Abaana Baawe Betebeekaniise?
1. Ahabw’enki abaana baitu abarikushoma baine kuba betebeekaniise?
1 Abaana baitu ku barikugaruka aha ishomero bwanyima y’ekihuumuro, hatariho kubanganisa nibashangayo embeera nsya ezirikubaasa kubagyemesereza kwejumba omu bitashemeire. Kandi nibaija kushangayo n’embeera ensya eziraababaasise ‘kubuurira amazima.’ (Yoh. 18:37) Betebeekaniise?
2. Okubaasa kuba betebeekaniise, abaana baitu baine kuba nibamanya ki?
2 Abaana baitu nibamanya gye ngu emikoro emwe ey’eishomero eine akakwate n’eby’obutegyeki n’ebiro bikuru by’ekikaafiire kandi n’ahabw’enki okugyejumbamu kigwire? Betebeekanisiize okugyemeserezibwa okurikubaasa kubareetera kusherura obwegyese bw’ahaiguru, kuriima, okukoresa amaarwa batakahikize myaka nari kukoresa kubi emibazi? Nibaija kugamba kwonka ngu emikoro nk’egyo ediini yaabo terikugiikiriza nari nibamanya kushoboorora ebi barikwikiriza?—1 Pet. 3:15.
3. Abazaire nibabaasa kukoresa bata obwire bw’Okuramya okw’Eka kutebeekanisa abaana baabo?
3 Koresa Obwire bw’Okuramya okw’Eka: N’amazima ngu nimwija kuguma nimugaaniira aha mbeera nsya eziraabeho baaba nibashoma. Mwafayo munonga kugaaniira aha birikubaasa kubaho aha ishomero batakagiireyo, nikiija kuhwera abaana baanyu kugira obumanzi. Ahabw’enki omurundi gumwe nari ebiri mutarikukoresa obwire bw’Okuramya okw’Eka kukora ekyo? Noobaasa kubuuza abaana baawe ebirikukira kubareetera kwerarikirira baaba nibaza kugaruka aha ishomero. Ebi mwagaaniireho omu myaka ey’enyima nimubaasa kubigarukamu hati obu bakuzire kandi bakeyongyera kwetegyereza. (Zab. 119:95) Nimubaasa n’okwegyezamu omuzaire arikukora nk’omushomesa nari nk’omwegi ondiijo. Yegyesa abaana baawe kugarukamu barikukoresa Baibuli n’ebitabo nka Reasoning na Young People Ask. Omuzaire omwe akaba akoresa obwire bw’okwegyezamu kutebeekanisa abaana be baaba nibaza kuhuumuruka aha kutandika kwa buri mwaka, kumanyisa abashomesa baabo abasya ngu n’Abajurizi ba Yehova.—Reeba Watchtower eya Desemba 15, 2010, orupapura 3-5.
4. Abazaire abanyabwengye nibaija kukora ki?
4 Oburemeezi obu Abakristaayo eminyeeto barikubugana omu biro ebi eby’emperu nibweyongyera kuguma kwemera. (2 Tim. 3:1) Abazaire abanyabwengye nibaija kuteeraho bukiri kare kuhwera abaana baabo kwetebeekanisiza oburemeezi obwo. (Enf. 22:3) Abaana baawe batakahuumurukire aha kutandika kw’omwaka, kora eki orikubaasa kyona kubahwera kwetebeekanisa.