Oyeteekateekire Kuza aha Ishomero?
1. Nooza kuba oine mugisha ki ogundi ku oraaze aha ishomero?
1 Yaaba oriyo nooza kuza omu ishomero risya nari noogaruka ei obaire nooshomera, iwe nk’Omukristaayo omunyeeto nooza kushanga kitoorobi kubuurira aha ishomero. Kwonka nabwe, oine omugisha ogundi ‘ogw’okubuurira abantu amazima.’ (Yoh. 18:37) Oyetebeekaniise gye kubuurira?
2. Oyetebeekanisiize ota ebi oraashangye aha ishomero?
2 Okukuhwera kusingura gye omu bi orikukora byona, otungire okutendekwa okurikuruga ahari Yehova, aha bazaire baawe kandi n’aha mwambari omwesigwa kandi ow’obwengye. (Enf. 1:8; 6:20; 23:23-25; Efe. 6:1-4; 2 Tim. 3:16, 17) Buzimazima hati aha ishomero ei orikuza noomanya ebi orikubaasa kushanga bitoorobi. Ahabw’okutendekwa nk’okwo n’ahabw’okumanya ebi oraarabemu, yetebeekanise obaase kubuurira aha ishomero. (Enf. 22:3) Fayo munonga aha buhabuzi bw’omu Byahandiikirwe oburi omu katabo Young People Ask ak’okubanza n’aka kabiri hamwe n’ebindi ebirikukira kwizira omuri Awake!
3. Ni mu miringo ki ei orikubaasa kubuuriramu ori aha ishomero?
3 Embeera z’aha ishomero niziija kukubaasisa kubuurira omu miringo mingi. Abandi baareeba emijwarire, emitwarize n’emigambire yaawe mirungi, n’oku orikweboneza, oku orikuha abu orikwega nabo hamwe n’abashomesa ekitiinisa, kandi n’oku orikukora omu kibiina, bakareeba ngu amagara gaawe gaine ekigyendererwa, abamwe nibabaasa kukubuuza, “Ahabw’enki iwe ori ow’omutaano?” (Mal. 3:18; Yoh. 15:19; 1 Tim. 2:9, 10) Eki nikibaasa kukuha omugisha gw’okubabuurira n’okubashoboororera ebi orikwikiriza. Kwonka noobaasa kugyemwa kwejumba omu mikoro y’eby’obutegyeki n’omu biro bikuru. Waabuuzibwa ahabw’enki otarikubyejumbamu, noija kubagambira kwonka ngu, “Ediini yangye terikunyikiriza; Ndi omwe aha Bajurizi ba Yehova,” nari noija kukoresa omugisha ogwo kubabuurira ebirikukwata ahari Yehova, Tataitwe owa rukundo? Okutebeekanisa gye orikugyendera aha buhabuzi bwa Yehova nikukubaasisa kubuurira abeegi bagyenzi baawe, abeegyesa baawe n’abandi.—1 Pet. 3:15.
4. Ahabw’enki oine obwesigye ngu noobaasa kubuurira gye aha ishomero?
4 N’obu waakuba otiinire kuza aha ishomero, manya ngu ni baingi abarikukwendeza ebirungi omu kwega kwawe. Kandi nitushemererwa naiwe omu kuteeraho kwawe kubuurira abandi aha ishomero. N’ahabw’ekyo, gira obumanzi kandi yetebeekanisize ishomero!