Otakaatiina Kubuurira
1. Niki ekirikwetengyesa okubaasa kubuurira aha ishomero, kandi n’ahabw’enki?
1 Oraatiinire kubuurira aha ishomero ahabw’okuteekateeka ngu abu orikushoma nabo nibaija kukushekyerera? Buzima nikyetengyesa obumanzi kubabuurira, na munonga waaba oine enshoni. Niki ekirikubaasa kukuhwera?
2. Okukoresa okwetegyereza nikihwera kita omu kubuurira aha ishomero?
2 Koresa Okwetegyereza: N’obu aha ishomero orikubaasa kuhareeba nk’omwanya ogurikukubaasisa kubuurira abandi, ijuka ngu tikirikukwetengyesa kutandika kubuurira buri omwe nk’oku orikubuurira enju aha nju. Koresa okwetegyereza kubaasa kumanya obu oine kubuurira. (Mub. 3:1, 7) Ebi murikuba nimwegyesibwa omu kibiina nari ebi barikubaha kukora nibibaasa kukuha omugisha kugamba ebi orikwikiriza. Nari omwegi mugyenzi waawe naabaasa kukubuuza ahabw’enki otarikwejumba omu bikorwa ebimwe. Abakristaayo abamwe aha kutandika kwegyera omu ishomero nibagambira abashomesa baabo ngu n’Abajurizi ba Yehova kandi baaha abashomesa ebitabo ebirikushoboorora aha bi turikwikiriza. Abandi nibata ebitabo aha meeza zaabo kugira ngu abu barikushoma nabo bagire eki baababuuza.
3. Noobaasa kwetebeekanisa ota kubuurira aha ishomero?
3 Ba Oyetebeekaniise: Waaba oyetebeekaniise nikiija kukuhwera kwongyera kugira obumanzi. (1 Pet. 3:15) N’ahabw’ekyo, teeraho kuteekateeka aha bi barikubaasa kukubuuza n’oku orikubaasa kubigarukamu. (Enf. 15:28) Kyaba nikibaasika, gyenda na Baibuli yaawe n’ebitabo ebindi bikye nka Reasoning, Young People Ask, n’ebyo ebirikugamba aha kuhangwa kw’ebintu, kugira ngu obaase kubikoresa kyayetengyesa. Shaba abazaire baawe kwegyezamu naiwe mwaba muri omu kuramya kw’eka.
4. Ahabw’enki oshemereire kugumizamu noobuurira aha ishomero?
4 Gira Emiteekateekyere Mirungi: Otakaateekateeka ngu abu orikushoma nabo butoosha nibaija kukushekyerera waagamba aha bi orikwikiriza. Abamwe nibaija kukukunda ahabw’obumanzi bwawe kandi nibabaasa kuhurikiza. Kwonka otakaahwa amaani haaba hatagizire n’omwe owaahurikiza. Yehova naija kusiima okuteeraho kwawe. (Heb. 13:15, 16) Guma noomushaba kukuhwera ‘kuguma noogamba n’obumanzi bwona.’ (Byak. 4:29; 2 Tim. 1:7, 8) Teekateeka aha kushemererwa oku orikubaasa kugira haagira owaahurikiza. Omuntu ogwo naabaasa kwija ahindukye omuheereza wa Yehova mugyenzi waawe!