Ebyahangirwe Nibyoreka Ekitiinisa kya Ruhanga
Abantu baingi nibakunda kureeba ebyahangirwe. Kwonka bakye nibo barikumanya ngu ebyahangirwe nibyoreka emitwarize y’Omuhangi. (Rom. 1:20) Ira, Daudi akeega ebirikukwata ahari Yehova kurabira omu Kigambo Kye. Kwonka n’okureeba ebyahangirwe kikamureetera kwirira haihi Ruhanga. (Zab. 8:3, 4) Vidiyo erikwetwa The Wonders of Creation Reveal God’s Glory neetuhwera hamwe n’abaana baitu n’abeegi baitu ba Baibuli kwetegyereza bimwe aha byahangirwe bya Yehova tukareeba emitwarize ye, reero tukabona kumwirira haihi. Waaheza kureeba vidiyo egi, garukamu ebibuuzo ebi ahaifo.
(1) Oku ebyahangirwe ebirikureebwa eby’omu nsi n’ahaiguru bitebeekanisiibwe n’obuhango bwabyo nibikureetera bita kwongyera kusiima Yehova? (Isa. 40:26) (2) Twayetegyereza gye amaizi, nitwega ki ahari Ruhanga? (Kush. 14:7) (3) Oku ensi erikwingana n’omwanya oguri ahagati yaayo n’eizooba nibyoreka bita obwengye bwa Yehova? (4) Okwezi kwine mugasho ki? (Zab. 89:37) (5) Yehova akatuhanga mu muringo ki ogurikutubaasisa kugira okushemererwa omu magara? (6) DNA niki? (Zab. 139:16) (7) Abantu n’ab’omutaano bata aha byahangirwe ebindi eby’omu nsi? (Kut. 1:26) (8) Niki eki oyiniire ekihika omu nsi ensya?
Ebindi Ebigirimu: (9) Niki ekirikureetera erangi kubaho? (10) Niki ekirikubaasisa amaizi kuhika omu bicweka by’omuti eby’ahaiguru? (11) Amaizi gaine mugasho ki omu mibiri yaitu? (12) Ha eby’okureeberaho ebirikworeka oku ebyahangirwe birikuhwerahwerana. (13) Niki ekirikureetera ebyahangirwe kugira omukago n’ebindi? (14) Niki ekirikubaasisa ebyahangirwe kugira patana ezitebeekanisiibwe gye?
“Mwetegyereze” ebi Yehova Yaahangire: Yesu akatuhiga ‘kwetegyereza enyonyi z’omu mwanya’ kandi ngu ‘twetegyereze n’ebirabyo by’omu ishwa.’ (Mat. 6:26, 28) Twakora ekyo, nikihamya okwikiriza kwaitu, kitureetera kwesigira kimwe Omuhangi, okusiima obwengye bwe, amaani ge g’okucungura abantu na rukundo ye. Omu mwanya gw’okwemarira aha mirimo y’ensi egi, teeraho kutunga obwire kwetegyereza ebi Yehova yaahangire, kandi oteekateeke aha ki birikutumanyisa ahariwe.—Zab. 19:1.