Oteereeba nk’Otarikubaasa
1. Ahabw’enki abamwe nibatiina kushaba omuntu kumwegyesa Baibuli?
1 Nootiina kushaba omuntu kumwegyesa Baibuli orikuteekateeka ngu torikubaasa kumwegyesa gye? Obumwe, abaheereza ba Ruhanga abeesigwa nka Musa na Yeremia bakereeba nk’abatarikubaasa kuhikiiriza obujunaanizibwa bwabo. (Kur. 3:10, 11; 4:10; Yer. 1:4-6) Baingi nibakira kwehurira batyo. Noobaasa kweihamu ota okutiina?
2. Ahabw’enki tutashemereire kuteekateeka ngu okubuurira enju aha nju nikimara reero okwegyesa abantu Baibuli tukakurekyera abandi?
2 Tushemereire kukimanya ngu Yehova tarikutushaba kukora ekintu eki tutarikubaasa. (Zab. 103:14) N’ahabw’ekyo, omurimo ogu tuhairwe ‘ogw’okuhindura abantu abeegi n’okubeegyesa’ n’ekintu eki turikubaasa. (Mat. 28:19, 20) Omurimo ogu, Yehova taguhaire ababuurizi abaine etalanta y’okwegyesa gye bonka. (1 Kor. 1:26, 27) Titushemereire kuteekateeka ngu okubuurira enju aha nju nikimara reero okwegyesa abantu Baibuli tukakurekyera abandi.
3. Yehova atubaasiise ata omu kwegyesa abantu Baibuli?
3 Yehova Niwe Arikutubaasisa: Yehova niwe arikutubaasisa omu kwegyesa abantu Baibuli. (2 Kor. 3:5) Kurabira omu kibiina kye atwegyeise amazima ga Baibuli agu abantu abaine obwegyese bw’ahaiguru omu nsi egi batarikumanya. (1 Kor. 2:7, 8) Emiringo ei Omwegyesa Mukuru yaakoreise omu kubuurira, Yehova agibaasiise kurindwa gye kugira ngu tubaase kugikoresa kandi naaguma naatutendeka kurabira omu kibiina kye. Kandi Yehova atuhaire eby’okugyenderaho omu kwegyesa abantu Baibuli. Atuhaire eby’okukoresa nk’akatabo Eki Baibuli Erikwegyesa akarikushoboorora amazima omu muringo ogutebeekanisiibwe gye kandi koorobi kwetegyereza. Okwegyesa omuntu Baibuli tikigumire nk’oku turikuteekateeka.
4. Ahabw’enki turikubaasa kuhamya ngu Yehova naija kutuhwera?
4 Musa na Yeremia bakabaasa kuhikiiriza obujunaanizibwa bwabo barikuhwerwa Yehova. (Kur. 4:11, 12; Yer. 1:7, 8) Naitwe nitubaasa kushaba Yehova kutuhwera. Ku turikwegyesa omuntu Baibuli, nituba nitumwegyesa amazima agarikukwata ahari Yehova kandi ekyo nikishemeza Yehova. (1 Yoh. 3:22) N’ahabw’ekyo teeraho kwejumba omu murimo ogu ogw’okwegyesa abantu Baibuli ogurikukirayo kureeta okushemererwa omu kubuurira.