Otakaayeziringa Ahabw’okwetiina!

1. Ni mu muringo ki ogu ‘tutarikwima abantu ebirungi’?

¹ Ku turikwejumbira kimwe omu kubuurira amakuru marungi g’Obukama bwa Ruhanga, ‘titurikwima abantu abari omu kicweka eki turikubuuriramu ebirungi.’ (Enf. 3:27) Tihariho makuru marungi g’okutwarira abantu agari nk’agarikukwata aha biro by’omu maisho ebirungi ahansi y’obutegyeki bwa Ruhanga. N’obu oraabe noobaasa kumanyisa abantu amatsiko g’Obukama orikubuurira kitaraariire nari orikubagabira ebitabo, ahabw’enki otarikukihindura ekigyendererwa kyawe okutandika kwegyesa omuntu Baibuli, ku oraabe otakatandikire?

2. N’enki ekirikubaasa kutureetera kutiina kutandika kwegyesa omuntu Baibuli?

² Obumwe, ekirikukira kuturemesa okwegyesa omuntu Baibuli n’oku turikuteekateeka aha nshonga egi. Abamwe tibarikwegyesa muntu weena Baibuli ahabw’okwetiina nari ahabw’okugira bingi eby’okukora. Obuhabuzi oburi ahaifo nibubaasa kukuhwera okutatiina kutandika kwegyesa omuntu Baibuli.​—Mat. 28:19; Byak. 20:20.

3. N’enki ekirikutubaasisa kwegyesa abantu Baibuli?

³ Okuteegiramu Bwesigye: Obundi noobaasa kuba otaine bwegyese bw’ahaiguru nari oine enshonga endiijo erikukureetera kuteekateeka ngu torikubaasa kwegyesa omuntu Baibuli. Ababuurizi barungi ab’omu kyasha ky’okubanza bakaba bari abantu ‘ba butoosha, abatashomire munonga.’ N’enki ekyababaasiise kwegyesa abantu amazima? ‘Bakaba bakira kuba bari na Yesu.’ (Byak. 4:3) Bakeegyera ahari Yesu, Omwegyesa Omukuru, ou enyegyesa ze n’emiringo i yaayegyeisemu yaahandiikirwe omu Baibuli. N’obu waakuba otaine bwegyese bw’ahaiguru, obwegyese obw’eby’omwoyo obu orikutunga nibukirira kimwe obundi bwona.​—Isa. 50:4; 2 Kor. 3:5.

4. N’enki eki turikubaasa kwega ahari Amosi?

⁴ Yehova obumwe akaba akoresa baanabi okuhana abategyeki nari abandi abaine obushoboorozi abaabaire bashobya. Abamwe, nka Amosi, bakaba batarikuruga omu maka g’amaani. Amosi akagira ati: “Nkaba ntari nabi nari mwana wa nabi; kureka nkaba ndi omuriisa, kandi omusharizi w’emisikamoori.” (Amo. 7:14) Kwonka nabwe, Amosi taratiinire kumanyisa Amazia, omunyamurwa ow’okuramya kw’ekishushani ky’enyana, orubanja oru Yehova yaabaire amucwereire. (Amo. 7:16, 17) Tushemereire kuguma nitwijuka ngu omurimo ogu turikukora n’ogwa Ruhanga kandi naija kutubaasisa kugukora.​—2 Tim. 3:17.

5. Ahabw’enki tushemereire kuteeraho kutandika kwegyesa omuntu Baibuli n’obu twakuba twine bingi eby’okukora?

⁵ Bingi Eby’Okukora: N’obu oraabe oine bingi eby’okukora, noobaasa obundi kuba waataireho obwire obw’okwejumba omu kubuurira butoosha. Okwegyesa abantu Baibuli nikibaasa kuba kimwe aha bintu ebirikukirayo oburungi omu kubuurira. N’omugisha gw’omutaano okureeba Ekigambo kya Yehova nikihindura amagara g’omuntu. (Heb. 4:12) Yehova naashemererwa twayefiisiriza okubaasa kugira ou twahwera ‘kumanya amazima.’ (1 Tim. 2:4) Na baamaraika nibashemererwa omuntu omwe yaayeteisa ebibi bye kandi akeeyongyera omu maisho omu by’omwoyo.​—Luka 15:10.

⁶ Ruhanga ‘naayenda ngu abantu boona bajunwe, bamanyire kimwe amazima.’ (1 Tim. 2:4) Ka n’omugisha muhango okukora nk’oku Ruhanga akunda, tutarikutiina kwegyesa abantu Baibuli!

6. Twine mugisha ki ogw’omutaano aha bikwatiraine n’okukora ebi Ruhanga arikwenda?