Okugira Bingi by’Okukora Kutakuremesa
1. Ahabw’enki abamwe nibatiina kutandika kwegyesa omuntu Baibuli?
1 Abamwe nibatiina kutandika kwegyesa omuntu Baibuli ahabw’okugira bingi by’okukora. Okuhwera omwegi wa Baibuli kutunguuka nikyetengyesa obwire. Okutebeekanisa ebi orikuza kumwegyesa, okumwegyesa n’okumuhwera kusingura oburemeezi obu aine, nikyetengyesa obwire. Entumwa Paulo akagira ngu akahayo amagara ge kuhwera Abatesalonika kugira ngu babaase kumanya Yehova. (1 Tes. 2:7, 8) Nitubaasa kwegyesa omuntu Baibuli tuta n’obu twakuba twine bingi by’okukora?
2. Twaba nitukunda Yehova nitwija kukoresa tuta obwire bwaitu?
2 Okuheereza Yehova Nikyetengyesa Obwire: Nk’eky’okureeberaho, okuza omu nteerane butoosha, kuza kubuurira, okushoma Baibuli n’okushaba nibyetengyesa obwire. Ori omu bushwere oine bingi by’okukora naafayo kuha ou ari nawe omu bushwere obwire burikumara. Naitwe tushemereire kutaho obwire bw’okuramya Yehova ahabw’okugira ngu nitumukunda. (Efe. 5:15-17; 1 Yoh. 5:3) Yesu akooreka ngu omurimo gw’okuhindura abantu abeegi ni mukuru omu kuramya kwaitu. (Mat. 28:19, 20) Okuteekateeka ahari ekyo nikiija kutuhwera kutatiina obujunaanizibwa bw’okwegyesa omuntu Baibuli.
3. Nitubaasa kuhwera tuta omwegi wa Baibuli n’obu embeera zaitu zaakuba zitarikutubaasisa kwejumba omu kubuurira butoosha?
3 Kwonka shi ku twakuba twine bingi by’okukora, twine endwara etarikurahuka kutambwa nari twine obujunaanizibwa bwingi omu kibiina? Ababuurizi abamwe abarikuba baine bingi by’okukora nibakoresa esimu nari kompyuta kwegyesa omuntu Baibuli. Abo abarikuba baine endwara ezitarikurahuka kutambwa nibatebeekanisa kugira ngu abeegi baabo ba Baibuli baije omu maka gaabo kwega. Abamwe haagira ebyabaremesa nibashaba ababuurizi abandi kwegyesa abeegi baabo.
4. Ni birungi ki ebirikubaasa kuruga omu kwejumba omu murimo gw’okwegyesa abantu Baibuli?
4 Paulo akatunga okushemererwa kwingi ahabw’okukoresa amaani ge n’obwire bwe omu kuhwera abandi kwega amazima. (Byak. 20:35) Ku yaateekateekire ahari abo abu yaabaasize kuhwera omuri Tesalonika, kikamuhiga kusiima Yehova. (1 Tes. 1:2) Twaba tutaikiriize bingi by’okukora kuturemesa kwejumba omu murimo gw’okwegyesa abantu Baibuli, nitwija kweyongyera kutunga okushemererwa n’okumarwa.