Baanabi Mubatware nk’Eky’Okureeberaho—Amosi
1. Ahabw’enki eky’okureeberaho kya nabi Amosi kirikubaasa kutugaruramu amaani?
1 Oreehurire nk’otarikubaasa kubuurira ahabw’okugira ngu oine obwegyese bw’ahansi kandi ngu nooruga omu ka etarikwebaasa? Kyaba nikwo kiri, eky’okureeberaho kya Amosi nikibaasa kukuhwera kugira obumanzi. Akaba ari omuriisa kandi omuhingi, kwonka Yehova akamuha amaani kuranga obutumwa bukuru. (Amo. 1:1; 7:14, 15) Nikyo kimwe, n’omu bunaku obu Yehova naakoresa abacureezi. (1 Kor. 1:27-29) Nabi Amosi nitumwegaho ki ebindi ebirikubaasa kutuhwera omu kubuurira?
2. Ahabw’enki turikubaasa kuguma tuhamire n’obu twakuhiiganisibwa omu kubuurira?
2 Guma Ohamire Waahiiganisibwa: Obu Amazia omunyamurwa ow’omu nganda ikumi z’obugabe bwa Israeli ez’omu matemba owaabaire naaramya ekishushani ky’enyana yaahurira Amosi naaranga, akamugarukamu n’ekiniga ati: ‘Ruga aha! Twine ediini yaitu!’ (Amo. 7:12, 13) Amazia akahindura ebigambo bya nabi Amosi arikushaba omugabe Yeroboamu kuremesa omurimo gwa nabi ogu. (Amo. 7:7-11) Kwonka Amosi taratiinire. Obunaku obu, abeebembezi b’amadiini abamwe nibasherura obushagiki kuruga omu b’eby’obutegyeki kuhiiganisa abaheereza ba Yehova. Kwonka nabwo, Yehova naatuhamiza ngu tihariho ky’okurwanisa eki baheesire kuturwanisa ekirikubaasa kutusingurira kimwe.—Isa. 54:17.
3. Ni makuru ki g’emiringo ebiri agu turikubuurira obunaku obu?
3 Buurira aha Kiro kya Yehova n’Aha Migisha ei Turaije Kutunga: N’obu Amosi araabe yaarangire ngu enganda ikumi za Israeli zikaba niziija kucwerwa orubanja, akahendera ekitabo kye arikugamba aha kiraganiso kya Yehova eky’okugarura Abaisraeli n’okubaha emigisha mingi. (Amo. 9:13-15) Naitwe nitugamba aha ‘kiro kya Yehova eky’okucweraho orubanja’ ekirikwija, kwonka eki nikimwe aha makuru ‘marungi g’obukama’ agu twine kubuurira. (2 Pet. 3:7; Mat. 24:14) Yehova ku araacwekyereze ababi ahari Haramagedoni naija kureetaho ensi ensya.—Zab. 37:34.
4. Ahabw’enki nituhamya ngu nitubaasa kukora ebi Yehova akunda?
4 Okubuurira amakuru g’Obukama omu nsi erimu baingi abarikutuhakanisa, nikigyeza okumariirira kwaitu kukora ebirikuhikaana n’okwehayo kwaitu ahari Yehova n’okukora ebi akakunda. (Yoh. 15:19) Kwonka nabwo, nitumanya ngu Yehova naija kugumizamu kutubaasisa kukora ebi akunda nk’oku yaabaasiise Amosi.—2 Kor. 3:5.