Akabokisi k’Ebibuuzo

◼ Ni misingye ki ya Baibuli ei turikubaasa kugyenderaho twaba turi ab’okukoresa esimu turi omu nteerane nari omu kubuurira?

‘Buri Kintu Kiine Obunaku Bwakyo.’ (Mub. 3:1): Nitubaasa kukoresa esimu kwoherereza omuntu obutumwa nari kugamba nawe ahu turikwendera. Kwonka obumwe Abakristaayo tibashemereire kwikiriza esimu kubahuzya. Nk’eky’okureeberaho twaba turi omu nteerane nibuba buri obwire bw’okuramya Yehova, okwegyesibwa, n’okwombekana. (Bir. 31:12; Zab. 22:22; Rom. 1:11, 12) Twahika omu nteerane nitubaasa kwihaho esimu zaitu reero tuzikorese bwanyima. Haaba hariho enshonga nkuru erikwetengyesa kutaihaho esimu yaawe reeba ngu terikwija kuteganisa abandi.

Kora Byona Ahabw’Amakuru Marungi. (1 Kor. 9:23): Obumwe esimu nizituhwera omu kubuurira. Nk’eky’okureeberaho, ow’eishe-emwe orikuba ayebembeire abarikubuurira naabaasa kukoresa esimu kuhurizana n’abu arikubuurira nabo. Ababuurizi obumwe nibakoresa esimu kugamba n’abeegi baabo nari abarikwenda kumanya ebirikukiraho na munonga baaba nibatuura hare. Tushemereire kuhamya ngu esimu yaitu tiyaatuteganisa twaba nituhikaanisa ebiteekateeko n’omuntu. (2 Kor. 6:3) Omu mwanya gw’okuhugira aha simu waaba otegyereize ababuurizi abandi, ni kirungi kuta ebiteekateeko aha kubuurira n’abu orikubuurira nabo.

Fayo aha Bandi. (1 Kor. 10:24; Fil. 2:4): Titushemereire kugira omuze gw’okwija kikyererezi kuza kubuurira turikuteekateeka ngu nitwija kugira ou twateerera esimu kumanya ahu barikubuurira. Ku turikwija kikyererezi nikiteganisa owaayebembera guruupu ahakuba naaba aine kukora empindahinduka. Obumwe nihabaasa kugira ebyatureetera kukyerererwa. Kwonka twayemanyiiza kuguma nitwija kare, nitworeka ngu nitufayo aha ntebeekanisa ya Yehova, ow’eishe-emwe orikuba ayebembeire abarikuza kubuurira, n’ababuurizi bagyenzi baitu.