Koresa Omukura Gwaitu Kwegyesa Abaana Baawe
1. Ahabw’enki ekicweka “Children” ekiri aha Mukura kitebeekanisiibwe?
1 Omukura gwaitu jw.org, gutebeekanisiibwe kuhwera abato n’abakuru. Ekicweka ekiri aha Mukura “Children” (za aha Bible Teachings > Children) nikihwera abaana n’abazaire baabo kugira omukago murungi n’okwirira haihi Yehova. (Bir. 6:6, 7) Noobaasa kukoresa ota ekicweka eki kwegyesa abaana baawe?
2. Noobaasa kusherura ota eby’okwega n’abaana baawe ebirikuhikaana n’emyaka yaabo?
2 Hindura omu Bi Orikwegyesa Abaana Baawe: Ebyentengo by’abaana tibirikushushana. (1 Kor. 13:11) Noobaasa kusherura ota eby’okwega n’abaana baawe ebirikuhikaana n’emyaka yaabo? Yebuuze oti: ‘Niki ebirikubaasa kubashemeza omu kwega? Nibabaasa kwetegyereza birikwingana ki? Nibabaasa kumara obwire burikwingana ki bahurikiize gye omu kwega? Abaana ab’emyaka eshatu n’okugarura ahansi, noobaasa kuhikaanisa ebiteekateeko nabo aha biri omu kicweka “My Bible Lessons.” Abazaire abamwe nibakoresa ebitebyo by’omu Baibuli ebiri omu kicweka “Teach Your Children.” Kandi noobaasa n’okukoresa ebindi ebiri ahaifo.
3. Abazaire nibabaasa kukoresa gye bata ebitebyo hamwe n’ebi murikubaasa kukora ebiri kushangwa omu kicweka “Ebi Murikwegaho omu Kuramya kw’Eka”?
3 Ebi Murikubaasa Kukoresa omu Kwega kw’Eka: Ebi n’eby’okuhwera baanyineeka kwegyesa abaana baabo. Kubaasa kumanya oku oraakorese ebitebyo n’ebi murikubaasa kukora, imaata aha kigambo eby’okwihaho oshome “Parents’ Guide.” Koresa ebishushani ebiri omu bi murikubaasa kukoresa, nka okuhuuga ebishushani kwegyesa abaana bato. Hwera abaana abakuru kuheza ebi orikuba obahaire kukora omu kwega kwanyu. Byona ebi murikubaasa kukora ebiri omu bi murikubaasa kukoresa omu kwega kw’eka, nibikwata aha kitebyo nari eishomo rimwe, kugira ngu abaana boona nk’oku emyaka yaabo eri babaase kwejumba omu kwega kw’eka.
4. Niki eki turikushanga omu kicweka “Ba Munywani wa Yehova”?
4 Ba Munywani wa Yehova: Vidiyo, ebyeshongoro n’ebi murikubaasa kukora ebiri omu kicweka eki eky’omukura gwaitu nikihwera abazaire kwegyesa abaana ekigambo kya Ruhanga. (Bir. 31:12) Buri vidiyo engufu ez’abaana nizegyesa enshonga nkuru. Ebi murikubaasa kukora nk’okusherura n’okubona emizaano nibyongyera kwegyesa aha nshonga enkuru. Obu abaana barikukunda okweshongora kandi ebyeshongoro birikubahwera kwijuka ebi baayega, ebyeshongoro by’Obukama n’ebyeshongoro ebindi ebihandiikirwe kuhwera abaana, nibikira kuteebwa aha Mukura gwaitu.
5. Ahabw’enki abazaire baine kushaba Yehova kubahwera kubaasa kwegyesa abaana baabo amazima?
5 Yehova naayenda ngu abazaire musingure omu kwegyesa abaana baanyu. N’ahabw’ekyo mu mushabe kubahwera kubaasa kwegyesa abaana baanyu amazima. (Bar. 13:8) Muri kuhwerwa Yehova, nimubaasa kutendeka abaana baanyu kugira “obwengye bw’okubahabura omuhanda gw’okujunwa ahabw’okwikiriza Kristo Yesu.”—2 Tim. 3:15; Enf. 4:1-4.