Okutwarira Abantu Magaziini Obutoosha Nikituhwera Kutunga Abeegi ba Baibuli
1. Ahabw’enki ekibiina kya Yehova kitwire nikihiga ababuurizi kutwarira magaziini abarikwenda kuzishoma?
1 Abantu baingi tibarikukunda ngu tubegyese Baibuli, kwonka nibashoma Magaziini zaitu. N’ahabw’ekyo, ekibiina kya Yehova kitwire nikihiga ababuurizi kutwarira magaziini abarikworeka ngu nibenda kuzishoma. Abantu baaguma nibashoma magaziini zaitu, nibagira ekyetengo ky’okwega ebiri omu Kigambo kya Ruhanga. (1 Pet. 2:2) Bimwe omu bi barikushoma omu magaziini zaitu nibibaasa kubareetera kwikiriza kutandika kwega Baibuli.
2. Nitubaasa tuta kureetera abu turikutwarira magaziini kutandika kwega naitwe Baibuli?
2 ‘Yitirira’ Embibo z’Amazima: Omu mwanya gw’okumutsigira magaziini kwonka, teeraho kugaaniira nawe kandi omunywane. Eki nikiija kukuhwera kumanya embeera ei arimu, ebi arikukunda, n’ebi arikwikiriza, kandi kikubaasise kugamba nawe orikukoresa obwengye. (Enf. 16:23) Yetebeekanise buri kugarukayo kumutaayaayira. Kyaba nikibaasika, omu bugufu gamba aha nshonga emwe n’ekyahandiikirwe ekirikugigambaho omu magaziini, obwo noija kuba noitirira embibo z’amazima eziri omu mutima gwe. (1 Kor. 3:6) Handiika ebiro buri kumutaayaayira, ekitabo eki waamutsigira, eki mwagaaniiraho hamwe n’ebyahandiikirwe ebi mwahikaanisaho ebiteekateeko.
3. Abu turikukira kutwarira magaziini nitubaasa kugarukayo emirundi engahi?
3 Tugarukyeyo Emirundi Engahi? Abu orikukira kutwarira magaziini ogume ogarukyeyo omurundi gumwe omu kwezi kubaha magaziini ensya. Noobaasa kwongyera aha mirundi ei orikugarukayo kurugiirira aha mbeera yaawe n’ekyetengo ky’ogwo ou orikutwarira magaziini. Nk’eky’okureeberaho, bwanyima ya saabiiti emwe nari ibiri oherize kumutsigira magaziini, noobaasa kugarukayo reero omugire oti: “Naakutaayaayiraho kakye kugira eki naagaaniira naiwe aha biri omu magaziini ezi naakutsigiire.” Eki nikibaasa kumuhiga kushoma ekicweka eki mwagaaniireho. Yaaba yaakishomire, noobaasa kumubuuza ekyamushemeizemu reero mukihikaaniseho ebiteekateeko omu bugufu. Kandi omuntu yaaba naakunda kushoma ebitabo byaitu, noobaasa kugarukayo kumuha turakiti n’obutabo obundi obu turikugaba omu kwezi okwo.
4. Obumwe n’obumwe, nitubaasa kukora ki kumanya yaaba abu turikutwarira magaziini nibenda kwega Baibuli?
4 Otakategyereza ou orikubuurira kuba niwe yaakushaba kumwegyesa Baibuli, beitu oine kuba niwe waabanza. N’obu yaakuba yaayangire kwega Baibuli omu kubanza, obumwe n’obumwe noobaasa kumworeka “Eby’Okugarukamu eby’Ebibuuzo Ebirikukwata aha Baibuli” ebiri enyima ya Watchtower reero oreebe yaaba naabaasa kuhikaanisa naiwe ebiteekateeko. Obumwe noobaasa kutandika kumwegyesa Baibuli omu mwanya gwona ogu arikuba arimu. Kwonka waaba otabaasize kutandika kumwegyesa Baibuli, noobaasa kugumizamu orikumutwarira magaziini okuhitsya obu araakunde kwega Baibuli.