Okwongyera Kubuurira Gye​—Okuhwera Abu Turikutwarira Magaziini Kutunguuka

Ahabw’Enki Ni Kikuru: Abantu baingi abarikukunda kushoma magaziini zaitu tibarikukira kukunda ngu tubegyese Baibuli. Nibabaasa kuba nibakunda ediini yaabo, nari nibareeba ngu tibaine bwire bw’okwega Baibuli. Kwonka, bagumizamu nibashoma magaziini zaitu, nibabaasa kugira ekyetengo ky’okumanya ebiri omu Kigambo kya Ruhanga. (1 Pet. 2:2) Nibabaasa kushoma ekicweka omu magaziini kibahikye aha mutima, nari embeera yaabo neebaasa kuhinduka. Butoosha twaguma nitubataayaayiraho kakye, nikibaasa kubareetera kuba banywani baitu, kituhwere kumanya ebirikukira kubashemeza n’ebirikubakwataho. Twagumizamu nitubataayaayira, nitubaasa kutandika kubegyesa Baibuli.