Oku Turikubaasa Kukoresa gye Magaziini Enkuru
Obu magaziini enkuru zitari kutugasira twaguma tuzibiikire nari zaanagwa, nituba tushemereire kuzigaba. Magaziini n’obu yaakuba eri emwe neebaasa kureetera omuntu yaakunda amazima kandi emuhigye kuheereza Yehova. (Rom. 10:13, 14) Ahaifo hariho obuhabuzi oburaatuhwere kukoresa gye magaziini enkuru.
Twaba nitubuurira omu bicweka ebi tutaheererukire kukora, nitubaasa kutsiga magaziini omu maka agu turikuba tutashangiremu bantu.
Twabuurira omu myanya erikuba erimu abantu baingi nk’omu myanya ei abantu barikukwatiramu ebiiruka, buuza abantu yaaba nibenda eky’okushoma, boorekye zimwe ahari magaziini enkuru, kandi obarekye beetooraniramu ezi barikwenda.
Waaza nk’omu marwariro, omu hoteeri nari ebicweka ebindi nk’ebyo omu kicweka kyanyu ky’okubuuriramu noobaasa kutsigira abarikwakiira abantu magaziini enkuru. Ni kirungi butoosha kubanza waabuuza orikuba naakurira emyanya nk’egyo. Waashanga baine magaziini ezi orikwenda kubaha otakatsigaho ezindi.
Waaba nootebeekanisiza okugarukayo kureeba abarikwenda kumanya ebirikukiraho, teekateeka aha byetengo bya buri muntu. Aine eka? Naakunda kuza omu ngyendo? Naakunda kuhinga? Reeba omu magaziini enkuru haaba harimu ekicweka ekirikubaasa kumushemeza, kandi okimworekye waagarukayo.
Waataayaayira orikwenda kumanya ebirikukiraho okamushangayo kandi emirundi emingi otwire otarikumushangayo noobaasa kumuha magaziini ezi ataraatungire enkuru.