Akabokisi k’Ebibuuzo

◼ Abaana baine kwega ki kubaasa kukura omu by’omwoyo?

Abazaire Abakristaayo nibateeraho munonga kukuza abaana baabo ‘barikubeegyeseza omuri Mukama.’ (Efe. 6:4) Nk’eky’okureeberaho, abazaire bashangire ngu nikihwera kushoma ekyahandiikirwe ky’eizooba burikasheeshe n’abaana baabo. Baaba bari omu kuramya kw’eka nari omu bwire obundi, nibabaasa kugira omutwe ogu baagaaniiraho kuruga omu katabo Young People Ask, nari kureeba hamwe vidiyo kandi baakagihikaanisaho ebiteekateeko, nibabaasa kukora omuzaano ogurikukwata aha biri omu Baibuli, nari bakeegyeza omu nyanjura ezi baraakorese omu kubuurira. Kwonka, abaana kubaasa ‘kukura omu by’omwoyo,’ baine kwongyera kwegyesibwa enyegyesa za Baibuli ezitari z’okubandizaho.​—Heb. 6:1.

Teekateeka aha bi turikwegyesa abu turikubuurira omu kicweka kyaitu. Aha murundi gw’okubanza nari twagarukayo, nituteeraho kutandika kwegyesa abantu Baibuli turikukoresa akatabo Niki Eki Baibuli Buzima Erikwegyesa? Twaheza akatabo aka, nitukoresa akatabo “Mwerindire omu Kukunda kwa Ruhanga.” Ahabw’enki? Ahakuba akatabo Eki Baibuli Erikwegyesa nikahwera abeegi ba Baibuli kwega enyegyesa za Baibuli ezirikutandikirwaho. Akatabo “Okukunda kwa Ruhanga” nikabahwera kwega emisingye ya Baibuli ei baine kuguma nibagyenderaho. Okwega n’abasya obutabo obu bwombi nikibahwera ‘kutsimba emizi’ omuri Kristo kandi ‘bakahama omu kwikiriza.’ (Kol. 2:6, 7) Noogira ngu ebiri omu butabo obu tibirikuhwera n’abaana baitu? Nabo baine kwegyesibwa ebirikukwata aha kitambo, Obukama bwa Ruhanga, hamwe n’embeera y’abafu. Bashemereire kumanya ahabw’enki Ruhanga naareka okubonabona kukabaho kandi n’oku barikubaasa kumanya ebiro by’emperu. Baine kuhamya ngu Abajurizi ba Yehova baine amazima. Abato nabo baine kumanya emisingye y’omu Baibuli n’oku baine kutendeka okubaasa kwabo kw’okwetegyereza. (Heb. 5:14) Kwonka, abazaire baine kwega n’abaana baabo kurugiirira aha myaka yaabo n’aha bi barikubaasa kwetegyereza. Kwonka, abaana abaingi nibabaasa kwetegyereza enyegyesa za Baibuli ezitari z’okubandizaho n’obu barikuba bakiri bato.​—Luk. 2:42, 46, 47.