Mutafiisa Busha Obwire omu Kubuurira
Omu mwaka gw’obuheereza 2014, Abajurizi ba Yehova bamazire eshaaha 1,945,487,604 omu kubuurira—ekirikworeka ngu buzima titurikufiisa busha obwire omu kuheereza Yehova! (Zab. 110:3; 1 Kor. 15:58) Obu “hatsigaire ebiro bikye,” ni kikuru kukoresa obwire bwaitu omu kubuurira kubaasa kuhika abantu baingi.—1 Kor. 7:29.
Nitwetenga kukora empindahinduka kugira ngu tutafiisa busha obwire bwaitu omu kubuurira. Nk’eky’okureeberaho, haaba hariho omuringo gw’okubuurira ogu orikwejumbamu otagambire n’omuntu kumara eshaaha emwe n’okukiraho, noobaasa kukora empindahinduka kubaasa kubona abantu baingi b’okugamba nabo. Embeera tizirikushushana omu myanya etari emwe n’emwe. Kwonka, obuhabuzi oburi ahaifo nibubaasa kukuhwera kutafiisa busha obwire, kugira ngu obaase kwetantara ‘kuteera busha.’—1 Kor. 9:26.
Okubuurira Enju aha Nju: Kumara emyaka mingi, gutwire guri omucwe gw’ababuurizi buri kasheeshe kutandika n’okubuurira enju aha nju. Kwonka ahabw’okugira ngu abantu abaingi kuruga omu kasheeshe nibaba nibakora, ahabw’enki otarikuteeraho kubuurira omu ihangwe nari omu mwabazyo, obu abantu barikuba bari omu ka bahuumwire? Omu kasheeshe, okubuurira aha nguuto nari omu myanya erikukorerwamu eby’obushuubuzi nikibaasa kurugamu ebirungi.
Okubuurira omu Myanya Erimu Abantu Baingi: Emeeza n’obugaari bishemereire kuteebwa omu myanya erikurabwamu abantu baingi omu kicweka eki ekibiina kirikubuuriramu. (Reeba Obuheereza Bwaitu obw’Obukama aka Gyuraayi 2013, rup. 5.) Abantu baatuuba omu mwanya ogurikukira kurabwamu abantu baingi, akakiiko akarikukora aha by’obuheereza omu kibiina nikabaasa kucwamu kuta akagaari nari emeeza omu mwanya ogundi ogurikurabwamu abantu baingi.
Abarikwenda Kumanya Ebirikukiraho n’Abeegi ba Baibuli: Noobaasa kukora entebeekanisa kugarukayo aha barikwenda kumanya ebirikukiraho n’abeegi ba Baibuli omu bwire obu emiringo endiijo ey’okubuurira etarikukubaasisa kubona abantu. Nk’eky’okureeberaho, buri Rwamukaaga omu kasheeshe waaba noobaasa kushanga abantu omu ka orikubuurira enju aha nju, nikiba kiri kirungi kuza aha beegi ba Baibuli omu ihangwe nari omu mwabazyo.
N’obu kiraabe kihikiire kubara eshaaha twaba turi omu kubuurira, okushemererwa kwaitu nikweyongyera twateeraho kubuurira obu turikubaasa kubona abantu. Waareeba ngu ti waatunga bantu b’okubuurira omu bwire obu waayejumba omu muringo gumwe gw’okubuurira, teeraho kukoresa ogundi. Shaba Yehova, “Mukama w’eigyesha,” kukuhwera kubaasa kukoresa gye obwire bwawe omu kubuurira!—Mat. 9:38.