Oku Orikubaasa Kukoresa eby’Okuhurikiza Ebiri aha Rutambi
1. Okwongyera aha bitabo ebi twine, hariho ki ekindi eki twine ekirikubaasa kutugasira?
1 Abantu abaingi nibakunda kukoresa jw.org kushoma ebigambo by’amazima ebirikushemeza. (Mub. 12:10) Kwonka shi waakoreise eby’okuhurikiriza ebiri aha rutambi? Ebi nibitubaasisa kuhurikiriza bingi ebiri aha mukura gwaitu. Eby’okuhurikiriza ebiri aha rutambi nibitugasira bita?
2. Nitubaasa kukoresa tuta eby’okuhurikiriza ebiri aha rutambi, omu kweshomesa nari omu kuramya kw’eka?
2 Kubikoresa omu Kweshomesa Nari omu Kuramya kw’Eka: Okuhurikiza ebiri omu Baibuli, magaziini, nari ebihandiikirwe omu kitabo ebiri aha rutambi twaba turi aha rugyendo nari twaba twine ebi turikukora nikibaasa kutuhwera kukoresa gye obwire bwaitu. (Efe. 5:15, 16) Nitubaasa kugira bingi by’okukoresa omu kuramya kwaitu kw’eka, twahurikiza ebiri aha rutambi obwo turikukuratira ebiri omu kitabo. Twakoresa eby’okuhurikiriza ebiri aha rutambi, omu kweshomesa, nikihwera na munonga twaba nitwenda kwongyera kwega kushoma gye nari twaba nitwega orurimi orundi
3. Ni baahi abarikubaasa kugasirwa omu eby’okuhurikiriza ebiri aha rutambi?
3 Okubikoresa omu Kubuurira: Abantu abari omu kicweka kyaitu abarikugira ngu baine bingi by’okukora nibabaasa kwikiriza kuhurikiriza ebiri aha rutambi. Obumwe nitubaasa kubugana abarikugamba orurimi orundi kandi abarikubaasa kwenda kumanya ebirikukiraho baahurikiza amakuru g’Obukama omu rurimi rwabo. (Byak. 2:6-8) Omu myanya emwe, okuhurikiza nibakutwara nka kikuru. Nk’eky’okureeberaho, aba Hmong nibagambira baijukuru baabo ebyabaireho ira kandi bateeraho kuguma nibabiijuka. Abantu b’omuri Afrika nibakunda kwega kurabira omu bitebyo.
4. Nitubaasa kwebuuza bibuuzo ki aha bikwatiraine n’okuhwera abari omu kicweka kyaitu?
4 Mbwenu shi ou orikubuurira ori omu kicweka kyanyu naabaasa kugasirwa waamuteeraho ebiri aha rutambi ebiri omu rurimi rwe? Haine orikubaasa kugasirwa wamwoherereza ekitabo ekiri aha rutambi orikukoresa Intaneeti? Nitubaasa kwiha ekitabo ekiri aha rutambi aha jw.org tukite aha CD reero tukihe ou twabuurira orikwenda kumanya ebirikukiraho kandi kyabaasika tumuhe n’ekitabo kyenyine. Ekitabo, akatabo, nari magaziini kuruga aha Intaneeti, ebi turikuha abantu turi omu kubuurira nitubaasa kubibarira omu bi twagaba. Eby’okuhurikiriza ebiri aha rutambi, bitebeekanisiibwe ngu tubikorese omu kweshomesa hamwe n’omu kubyara embibo z’amazima agarikukwata aha Bukama.—1 Kor. 3:6.