Baakiire Na Rukundo

Ni baahi abu twine kwakiira na rukundo? Buri omwe orikwija omu nteerane zaitu​—abasya hamwe n’abo abamazire obwire buraingwa nibazijamu. (Rom 15:7; Heb 13:2) Naabaasa kuba ari ow’eishe-emwe mugyenzi waitu orikuruga omu ihanga erindi otayaayire nari ow’eishe-emwe omazire obwire bwingi atakiija mu nteerane. Teekateeka aha ku orikubaasa kwehurira omu mbeera nk’ezo. Buzima torikushemererwa omuntu yaakwakiira na rukundo mpango? (Mat 7:12) N’ahabw’ekyo noobaasa kuteeraho kuramutsya abandi waaba ori aha Kyombeko ky’Obukama enteerane zitakatandikire na zahwa. Eki nikyongyera aha rukundo kandi nikihimbisisa Yehova. (Mat 5:16) Amazima gari ngu, obumwe tikirikubaasika kugamba na buri omwe. Kwonka, buri omwe naija kuhuurira ashemereirwe twena twakora eki tushemereire kukora.a

Obufura obwabuzima bushemereire kworekwa obwire bwona beitu butari aha izooba ry’omutaano ryonka ery’EKiijutsyo. Abasya ku barikureeba nitukundana kandi nabo tukabooreka rukundo, nikibaasa kubahiga kuhimbisa Ruhanga kandi batwegaiteho omu kuramya okw’amazima.​—Yoh 13:35.