Ebi Naakozire Nibyo Naabaire Nshemereire Kukora

Nkazaarirwa omu kicweka St. Paul, Minnesota omuri U.S.A., 1954, omu ka y’Abakaturiki. Ndi ow’eizaara rya kabiri aha baana bataano. Omu buto nkashomera omu Seminare y’Ekikaturiki, kandi nkaba nimpeereza aha rutaari. Kwonka nkaba ntarikumanya bingi ahari Baibuli. N’obu ndaabe naabaire nimmanya ngu hashemereire kuba hariho Ruhanga owaahangire byona, kwonka nkaba ntamirwe enyegyesa z’ekelezia.

OKWEGA AMAZIMA

Obu naabaire ndi omu mwaka gw’okubanza omu itendekyero ry’ebiragiro William Mitchell College, omushaija n’omukazi we Abajurizi ba Yehova, bakaija omu ka. Nkaba niinyozya emyenda, kandi bakandaganisa kugaruka obundi. Ku baagarukire, nkaba mbainiire ebibuuzo: “Ahabw’enki ababi nibo b’amaani omu nsi?” na “Niki ekirikureeta okushemererwa?” Nkaikiriza akatabo The Truth That Leads to Eternal Life na Baibuli eya New World Translation of the Holy Scriptures, eyaabaire eine ekipampagare kya kijubwe. Kandi nkaikiriza kwega Baibuli. Eki kikanyigura amaisho. Kikanshemeza kumanya ngu Obukama bwa Ruhanga niyo gavumenti eraamareho oburemeezi bw’abantu omu nsi. Nkaba nindeeba oku obutegyeki bw’abantu bureetsireho obusaasi, okubonabona, obutari buringaaniza, n’obundi buremeezi.

Nkehayo ahari Yehova omuri 1982 kandi naabatizibwa omu mwaka nigwo gumwe, aha ruteerane oruhango orwine omutwe, “Amazima Agarikukwata aha Bukama” omu kyombeko kya St. Paul Civic Center. Nkagarukayo aha mwanya ogwo omuri Minnesota, naakorerayo ebigyezo by’okumara emishomo yangye y’okuba omuhorereza. Okwaikumi kurikutandika, nkamanya ngu ebigyezo nkabihika, ekyambasiise kuba omuhorereza omu by’ebiragiro.

Aha ruteerane oruhango orwine omutwe “Amazima g’Obukama,” nkagaaniira na Mike Richardson, owaabaire naaheereza nk’Omubeseeli omuri Brooklyn, akangira ngu batandikireho ofiisi erikukora aha by’ebiragiro. Nkaijuka ebigambo by’Omwesiopia omukonwa ebiri omu Ebyakozirwe 8:36, reero naayebuuza nti: ‘Niki ekirikunzibira kushaba kuheereza omu Ofiisi Erikukora aha by’Ebiragiro?’ N’ahabw’ekyo nkashaba kuheereza aha Beseeli.

Abazaire bangye tibarashemereirwe ku naabaire omwe aha Bajurizi ba Yehova. Tata akambuuza oku okukora na Watchtower kwabaire nikuza kumpwera omu murimo gwangye ogu naashomereire. Nkashoboorora ngu ninza kukora omurimo gwa nyekundiire. Nkamugira ngu ninza kuba nimpeebwa doora 75 buri kwezi, nk’Ababeseeli abandi.

Bwanyima y’okuhikiiriza ebirikwetengyesa byona, nkatandika kuheereza aha Beseeli eya Brooklyn, New York, omuri 1984. Nkatandika kuheereza omu Ofiisi Erikukora aha by’Ebiragiro. Buzima nkatandika obuheereza obu omu bwire burungi.

OKUHUNDUUZA EKYOMBEKO STANLEY

Ekyombeko Stanley omu rurembo Jersey, orwa New Jersey, kikagurwa omuri Novemba 1983. Ab’eishe-emwe bakashaba orusa rw’okuhunduuza ekyombeko eki kutereeza amashanyarazi n’amaizi. Ab’eishe-emwe ku baabugaine abeebembezi b’orurembo orwo, bakashoboorora ngu nibenda kukoresa ekyombeko eki kugiriramu enteerane empango ez’Abajurizi ba Yehova. Ekyo kikareetaho oburemeezi. Ebiragiro bikaba nibigira ngu ebyombeko by’okuramizamu bishemereire kuteebwa omu myanya erimu amaju g’okuraaramu. Kandi kyo kikaba kiri omu kicweka ky’eby’obushuubuzi, n’ahabw’ekyo abeebembezi bakanga kutwikiriza kukikoresa. Ab’eishe-emwe bakagarukayo kujurira, kwonka nabwo bakanga.

Saabiiti yangye y’okubanza aha Beseeli, ekibiina kikatwara omu kooti enshonga egi ey’okutaikirizibwa kukoresa ekyombeko eki. Ahabw’okugira ngu nkaba mperize emyaka ebiri ndikukora omu kooti eya St. Paul, Minnesota, nkaba ninyetegyereza gye emishango nk’egyo. Omwe aha bahorereza baitu akashoboorora ngu ekyombeko Stanley kibaire nikikorerwamu emikoro y’orweteeraine, nk’okureeberamu vidiyo n’okugiriramu ebiivuro. Mbwenu shi ahabw’enki kitarikwikirizibwa kukoreramu omukoro gw’ediini? Kooti ekashwijuma enshonga yaacwamu ngu abeebembezi b’orurembo Jersey bakashiisha obugabe bwaitu bw’ediini. Ekashaba ngu ekibiina kiikirizibwe kukoresa ekyombeko ekyo, kandi nkatandika kureeba oku Yehova arikuha ekibiina kye emigisha kuhikiiriza omurimo gwe kirikukoresa ebiragiro. Nkashemererwa munonga kwejumbamu.

Ab’eishe-emwe bakatandika omurimo muhango gw’okuhunduuza ekyombeko ekyo, kandi nimwo baagiriire omukoro gw’okuhendera Ishomero rya Gileadi erya 79 Seputemba 8, 1985, bwanyima y’omwaka nka gumwe kuruga obu baatandika kukihunduuza. Nkagureeba nk’omugisha kushagika emirimo y’Obukama ndikukora n’abandi omu nshonga z’ebiragiro, kandi okumarwa oku naagizire kukaba nikukirira kimwe oku naabaire nyine ntakatandikire kukora aha Beseeli. Mporampora nkatandika kureeba ngu Yehova anyiniire emirimo mingi y’okukora.

OKURWANIRIRA OBUGABE BW’OKUTATEEBWAMU ESHAGAMA

Omu myaka ya 1980, amarwariro n’abashaho bakaba batarikuha ekitiinisa okucwamu kw’Omujurizi wa Yehova okuzire kwanga kuteebwamu eshagama. Abakazi abaine enda bakaba bari omu kabi k’amaani, ahakuba abaramuzi bakaba nibateekateeka ngu abakazi tibaine bugabe bw’okwanga kuteebwamu eshagama. Abaramuzi bakashoboorora ngu omukazi yaaba atatairwemu eshagama, omwereere naabaasa kufeerwa nyina.

Omu Kwaikumi-n’abiri  29, 1988, munyaanyazi-itwe Denise Nicoleau akarugwamu eshagama nyingi bwanyima y’okuzaara omutabani. Eshagama ye ekatuuba munonga yaaza ahansi ya 5.0, reero omushaho we yaamushaba ngu aikirize kuteebwamu eshagama. Munyaanyazi-itwe Nicoleau akanga. Akasheeshe akakuratsireho, irwariro rikateeraho kutunga ebihandiiko ebirikubaikiriza kumutamu eshagama. Bakakikora batabandize kwebuuza ahari munyaanyazi-itwe Nicoleau nari iba, kandi omuramuzi akabaikiriza.

Aha Rwakataano, Okwaikumi-n’abiri 30, munyaanyazi-itwe bakamutamu eshagama n’obu iba n’ab’eka ye bayangire. Omu mwabazyo, baingi aha b’eka ye otwariiremu n’omureeberezi omwe nari babiri bakakomwa ahabw’okwetaatsyataatsya omu nshonga za munyaanyazi-itwe Nicoleau ngu atateebwamu eshagama. Aha Rwamukaaga omu kasheeshe, ebiro 31, omu rurembo New York n’ekirwa kya Long bakashohoza amakuru agarikworeka okukwatwa kwabo.

Akasheeshe k’Orwokubanza akaakuratsireho, nkagaaniiraho n’omuramuzi, Milton Mollen. Nkamushoboororera ebikwatiraine n’omushango ogwo, kandi naamuhamiza ngu omuramuzi akata omukono aha kihandiiko ky’okuteebwamu eshagama hatabaireho kushomerwa omushango gwona. Omuramuzi Mollen akanshaba kugaruka omu ofiisi ye omu ihangwe, kugamba aha bundi buhame n’ebiragiro ebirikukwata aha nshonga egi. Nkagyenda n’ow’eishe-emwe, Philip Brumley ow’omuramuzi Mollen omu ihangwe eryo. Omuramuzi akeeta n’omuhorereza w’eirwariro kutwegaitaho. Okugaaniira kwaitu kukabamu empaka. Omu kugaaniira okwo, ow’eishe-emwe Brumley akahandiika aha kapapura arikungira ngu “reka kugambisa ekiniga.” Bwanyima, nkaija kureeba ngu obwo bukaba buri obuhabuzi burungi ahakuba nkaba naatandika kugambisa ekiniga omu kuhakanisa omujwekyerwa w’eirwariro.

Bwanyima y’eshaaha nk’emwe, omuramuzi Mollen akagira ngu omushango ogu niguza kuhurirwa omu kasheeshe akarikukurataho. Obu twabaire nituruga omu ofiisi ye omuramuzi Mollen akangira ngu omujwekyerwa w’eirwariro aine “omurimo gugumire nyenkyakare.” Ekyo kikaba nikimanyisa ngu omujwekyerwa ogwo naija kugumirwa kushoboorora enshonga ye. Okaba nooshusha oti Yehova ariyo naamanyisa ngu omushango gwaitu nituza kugusingura. Kikaba nikitangaaza kureeba oku Yehova yaabaire naatukoresa kuhikiiriza omurimo gwe.

Tukakora ekiro kyona turikutebeekanisa ebi turaagambe omu kasheeshe. Ahu omushango gwabaire niguza kuhuririrwa hakaba hatari hare na Beseeli eya Brooklyn, n’ahabw’ekyo baingi ahariitwe aba ofiisi y’eby’ebiragiro tukazayo aha bigyere. Bwanyima y’abaramuzi bana kuhurira enshonga zaitu, bakashazamu ekihandiiko ky’okuteebwamu eshagama. Kooti enkuru ekacwamu ngu munyaanyazi-itwe Nicoleau ahikire, kandi ngu kikaba kigwire kutaho ekiragiro ky’okutamu omurwaire eshagama batabandize kumubuuza.

Kooti enkuru omuri New York ekahamya ngu munyaanyazi-itwe Nicoleau aine obugabe bw’okucwamu kutaikiriza obujanjabi oburimu eshagama. Ogu gukaba guri gumwe aha mishango ena ei naayejumbiremu, omu kooti enkuru. (Reeba akabokusi “Obusinguzi omu Kooti Enkuru.”) Kandi nkegaita aha banyabiragiro abandi aha Beseeli omu nshonga z’okureeberera abaana, okugaitururwa, hamwe n’amataka n’ebyombeko.

OBUSHWERE BWANGYE N’OKUGIRA EKA

Obu naabanza kubugana Dawn, akaba aherize kugaitururwa na iba kandi aine abaana bashatu. Akaba aine omurimo gw’okwebaisaho kandi ari payoniya. Akaba arabire omu mbeera zigumire, kandi nkashemezibwa okumariirira kwe kuheereza Yehova. Omuri 1992, tukaza omu ruteerane oruhango orwine omutwe “Abarikujwisa Omushana” omuri New York City, kandi naamushaba kutaaha nawe omu bushwere. Bwanyima y’omwaka gumwe tukataaha omu bushwere. Okugira omukazi orikuta omutima aha by’omwoyo kandi orikushemererwa n’ekiconco kuruga ahari Yehova. Buzima Dawn ampweraire kugira ebiro birungi obwire obu tumazire kumwe.​—Enf. 31:12.

Obu twataaha omu bushwere, abaana ba Dawn bakaba baine emyaka 11, 13, na 16. Nkaba niinyenda kuba omutwe murungi gw’eka, n’ahabw’ekyo nkaba nshoma kandi nteeraho kukuratira obuhabuzi oburikukwata aha kworora abaana abu ori iba wa nyinabo. Kumara emyaka turabire omu buremeezi, kwonka nikinshemeza kureeba ngu abaana nibantwara nka munywani waabo kandi ishebo orikubakunda. Tukaba nitwakiira banywani b’abaana baitu omu ka yaitu, kandi ekaba erimu eminyeeto y’amaani.

Omu 2013, nyowe na Dawn tukaza omu Wisconsin kuhwera abazaire baitu abakuzire omu myaka. Ekyantangaarize, obuheereza bwangye tiburahindukire. Nkashabwa kugumizamu nimpwera ekibiina ndikukora nk’omuhwezi w’obwire bukye.

EMPINDUKA EY’AHONAAHO

Omu Kwamwenda 2018, nketegyereza ngu nkaba nyine oburemeezi aha murimo. Omushaho akanshwijuma, kwonka tarabaasize kureeba endwara. Bwanyima, omushaho ondiijo akampabura ngu nze kureeba omushaho omuhangu aha mpurizana y’omubiri. Omu Jenwari 2019, omushaho ogwo akankyebera yaashanga nyine endwara erikushiisha obwongo omubiri gukahwamu amaani (PSP).

Bwanyima y’ebiro bishatu, ku naabaire ndi omu muzaano gw’okuzaanira aha rubaare, nkahendeka omukono. Nkaba ntwire ninzaana omuzaano ogu, kandi nkaba ningukunda munonga. N’ahabw’ekyo nkamanya ngu omubiri gwangye tigwakibaasa obukoryo bw’omuzaano ogu. Endwara egi ahabw’okweyongyera nkaba ntakibaasa kugamba gye, kugyenda gye, nari kumira gye.

Ntungire omugisha gw’omutaano kushagika emirimo y’Obukama ndikukora nk’omuhorereza. Kandi ntungire n’omugisha gw’okuhandiika ebicweka bingi ebirikwizira omu magaziini z’ekishaho, n’okugambira omu nteerane z’ekishaho omu nsi yoona, kurinda obugabe bw’abaheereza ba Yehova kucwamu kutoorana obujanjabi n’emiringo y’okushemezibwa etarimu kuteebwamu eshagama. Kwonka nabwo ninjuriza ebigambo bya Luka 17:10: ‘Ndi omuhuuku otaine mugasho, ebi naakozire nibyo naabaire nshemereire kukora.’