‘[Orutaro] n’Orwa [Yehova]’

Obutaikirizana obwo bukatandika omu myaka ya 1990 obu gavumenti ya France yaata omushoro mwingi aha sente ezaahairweyo aha ofiisi y’eitaagi eya France ahagati y’omwaka ogwa 1993 na 1996. Tukateeraho kusherura oburingaaniza omu kooti za France kwonka tikirabaasikire. Omushango ku gwatusingire omu kooti y’okujururiramu, gavumenti ekaiha sente nyingi aha akaunti ya banka y’eitaagi rya France ezirikwingana obukaikuru 6 n’emitwaro 30 eza doora. Omugisha gwonka ogu twabaire twine kubaasa kugaruza sente ezo, n’okutwara omushango omu Kooti ya Buraaya ey’Obugabe bw’Abantu. Kwonka kooti etakatandikire kuhurira omushango gwaitu, ekatushaba ngu tubanze twikirizane n’abahorereza ba gavumenti, turi n’omwe aha bahandiiki ba kooti abarikureeberera, kandi bakajwekyera emirimo ya kooti.

Tukaba nitumanya ngu omuhandiiki wa kooti naija kutugyemesereza kugonjoora enshonga, turikwikiriza kuhayo ekicweka kya sente ezi gavumenti yaabaire neetushaba. Kwonka, tukaba nitukimanya gye ngu n’obu kwakuba okushashura doora emwe nikihenda emisingye ya Baibuli. Ab’eishe-emwe na banyaanyazi-itwe bakaba bahaireyo kushagika emirimo y’Obukama, n’ahabw’ekyo sente ezi baabaire bahaireyo zikaba zitaine kutwarwa gavumenti. (Mat. 22:21) Kwonka nabwo, tukaza omu rukiiko orwo ahabw’okuha kooti ekitiinisa n’okukuratira ebiragiro byayo.

Tukagira orukiiko orwo omuri kimwe aha bishengye birungi by’ekyombeko kya kooti. Ekigaaniiro tikiratandikire gye. Omuhandiiki wa kooti akatandika arikuhamisiriza ngu akaba naateekateeka ngu Abajurizi ba Yehova omuri France baine kushashura omushoro ogu gavumenti yaabaire neeshaba. Ahonaaho tukamubuuza tuti: “Nookimanya ngu gavumenti yaaherize kwiha obukaikuru 6 n’emitwaro 30 eza doora aha akaunti yaitu ya banka?”

Ekyo kikamutangaaza. Kandi abahorereza ba gavumenti ku bakihamize ngu bakaba batwire sente zaitu, kikahindurira kimwe emiteekateekyere ye aha mushango ogwo. Akabakabukira kandi ahonaaho akahendera orukiiko orwo. Obwo nibwo naayetegyereza ngu Yehova, akaba ariyo naatuhwera omu omushango ogwo kutubaasisa kusingura omu muringo ogu twabaire tutarikuteekateeka. Tukaruga omu rukiiko orwo tushemereirwe, kandi turikutangaara aha bw’ebyabaireho.

Omu Okwamukaaga 30, 2011, Kooti ya Buraaya ey’Obugabe bw’Abantu ekaikirizana naitwe kandi omushango twagusingura. Ekaihaho omushoro ogwo kandi yaragiira gavumenti kutugaruriza esente ezi baabaire baihire aha akaunti yaitu ogaitsireho n’amagoba! Okucwamu okwo okw’ebyafaayo kurinzire okuramya okushemeire omuri France kuhitsya na hati. Ekibuuzo eki twabuurize omuhandiiki wa kooti, kikaba kiri nk’eibaare eri Daudi yaateire Goliasi omu buso. Kikatuhwera kusingura omushango. Mbwenu shi ahabw’enki twasingwire? Nk’oku Daudi yaagambiire Goliasi, ‘[orutaro] n’orwa [Yehova].’—1 Sam. 17:​45-47.

Ogwo tigwo mushango gw’okubanza kusingura omu kooti. Okutwarira hamwe, Abajurizi ba Yehova tubaasize kusingura emishango 1,225 omu kooti enkuru ez’amahanga 70, na kooti ez’ensi yoona ahabw’okuhakanisibwa ab’eby’obutegyeki n’amadiini. Obusinguzi obu butubaasiise kutunga obugabe bw’okwejumba omu kubuurira, okuba ediini erikwikirizibwa omu biragiro, okwanga kwejumba omu by’obutegyeki n’okwanga kukoresa eshagama.

Mbwenu shi nkahinduka nta omuhorereza w’omushango ogwo omuri Buraaya kandi obwo ndikuheereza aha Ofiisi Enkuru ey’Abajurizi ba Yehova omuri New York, U.S.A.?

NKAKUZIBWA ABAABAIRE BAINE OMUJINYA GW’OBUMIISANI

Abazaire bangye, George na Lucille, bakaza omu ishomero rya Gileadi erya 12, kandi bakaba nibaheereza omuri Ethiopia ei naazaarirwe omuri 1956. Bakampa eiziina Filipo, nk’ery’omubuurizi w’engiri ow’omukyasha eky’okubanza. (Byak. 21:8) Omwaka ogwakuratsireho, gavumenti ekeemereza okuramya kwaitu omuri Ethiopia. N’obu ndaabe naabaire nkiri muto, ninyijuka turikuramya bwesherekye nk’eka. Nk’omwana muto, nkaba ninteekateeka ngu ni kirungi! Kwonka eky’obusaasi ab’obushoboorozi bakaturagiira kuruga omu ihanga eryo omuri 1960.

Tukaza kutuura omuri Wichita, Kansas, U.S.A., kandi abazaire bangye bakagumizamu baine omujinya gw’obumiisani. Bakaba nibakunda amazima kandi bakaganyegyesa na munyaanyazi-itwe omukuru, Judy, na murumuna waitu omuto, Leslie, boona abaazaariirwe Ethiopia. Nkabatizibwa nyine emyaka 13 kandi bwanyima y’emyaka 3, eka yaitu ekaza ahu ababuurizi baabaire nibeendwa munonga omuri Arequipa, eya Peru.

Omuri 1974 obu naabaire nyine 18, ofiisi y’eitaagi eya Peru ekanyohereza kuza kuheereza nka payoniya w’omutaano n’ab’eishe-emwe abandi bana. Tukaba twine kubuurira omu myanya y’enshozi za Andes eyaabaire etakabuurirwamuga. Kikaba nikitwariramu okubuurira omu byaro ahu abantu baabaire nibagamba orurimi rwa Quechua na Aymara. Tukaba tugyendera omu motoka ei twabaire turaaramu. Ninkunda kuteekateeka aha ku twabaire tukoresa Baibuli kworeka abantu ngu Yehova ari haihi kumaraho obworo, endwara, n’okufa. (Kush. 21:​3, 4) Kandi baingi aharibo bakaikiriza amakuru g’Obukama.

OKUZA AHA OFIISI ENKURU

Omuri 1977 obu Albert Schroeder owaabaire ari omwe aha Kakiiko Akareeberezi yaataayaaya omuri Peru, akampiga kwijuza foomu y’okuheereza aha Beseeli aha Ofiisi Enkuru. Ekyo nikyo naakozire. Bwanyima y’obwire bukye omu Okwamukaaga, 17, 1977, nkatandika kuheereza aha Beseeli omuri Brooklyn. Emyaka ena eyaakuratsireho, nkaheereza omu kitongore eky’okuboneza n’okuhunduuza.

Omu Okwamukaaga 1978, nkabugana Elizabeth Avallone aha ruteerane oruhango orurikubamu ab’amahanga agandi omuri New Orleans, Louisiana. Akaba ayooroirwe abazaire abaabaire nibakunda mazima nk’abangye. Akaba naaheereza nka payoniya ow’obutwire kumara emyaka ena, kandi akaba naayenda kuza omu buheereza obw’obutwire. Kuruga obwo, tukaguma nituhurizana, twamanyana gye kandi omu bwire bukye, tukakundana munonga. Tukataaha omu bushwere omu Okwaikumi 20, 1979, kandi twaheereza hamwe aha Beseeli.

Ab’eishe-emwe na banyaanyazi-itwe omu kibiina kyaitu eky’okubanza ekya Brooklyn Spanish bakatwakiira na rukundo mpango. Kumara emyaka mingi, ebibiina bishatu ebindi bitworekire rukundo byatwakiira kandi byatushagika omu buheereza bwaitu obw’aha Beseeli. Nitusiima munonga obushagiki bwabo, n’obwa banywani baitu n’ab’omu maka gaabo abahwereire abazaire baitu omu myaka yaabo ya bukuru.

OKU NAABAIRE OMUHOREREZA

Omu Okwokubanza 1982, kikantangaaza obu naashabwa kuheereza omu ofiisi erikukora aha by’ebiragiro aha Beseeli. Bwanyima y’emyaka eshatu nkashabwa kuza aha ishomero kwega ebiragiro, kutunga ebihandiiko ebirikunyikiriza kuba omunyabiragiro. Obu naabaire niinyega kikantangaaza ku naamanyire ngu obugabe obu abantu baingi baine omuri Amerika n’amahanga agandi bukahamibwa emishango ei Abajurizi ba Yehova baasingwire. Emishango mikuru egyo tukaba tugyegaho emirundi mingi ah’eishomero.

Omuri 1986 obu naabaire nyine emyaka 30, nkatooranwa kureeberera ofiisi erikukora aha by’ebiragiro aha Beseeli. Ahabw’okugira ngu nkaba ndi muto kandi ntarikumanya bingi otwariiremu n’embeera ezi naabaire nyorekyereire, nkagutwara nk’omugisha, kwonka nabwo nkaba nyerarikiriire.

Nkaba omunyabiragiro omuri 1988, kwonka nkaba ntakamanyire akabi aku obwegyese obwo bwabaire bureetsire aha mbeera yangye y’eby’omwoyo byangye. Obwegyese obw’ahaiguru nibubaasa kukureetera kwetunguura n’okuteekateeka ngu waaba oine okumanya kw’omutaano nooba nookira abandi abataine bwegyese nk’obwawe. Omukazi wangye Elizabeth akampwera omu bwire obwo. Akampwera kugaruka kugira entebeekanisa y’eby’omwoyo ei naabaire nyine ntakagiire omu ishomero ry’ebiragiro. N’obu kiraabe kyatwire obwire, mporampora nkagaruka naateereera omu by’omwoyo. Nimpamiza kimwe ngu okugira okumanya kw’omutaano tikyo kirikukirayo obukuru omu magara. Ekirikureetera amagara kuba ag’omuhendo n’okugira omukago murungi na Yehova, okamukundira kimwe n’abantu be.

OKURWANIRIRA N’OKUJURIRIRA AMAKURU MARUNGI OMU BIRAGIRO

Ahabw’ebi naayegire omu ishomero ry’ebiragiro, nkata omutima omu kutebeekanisa enshonga ezikwatiraine n’ebiragiro aha Beseeli n’okurwanirira emirimo y’Obukama omu kooti. Okushagika emirimo y’ekibiina eyaabaire neehindahinduka kikaba nikinshemeza, kwonka hakaba harimu n’oburemeezi. Nk’eky’okureeberaho, emyaka ya 1990 erikutandika, ofiisi erikukora aha by’ebiragiro aha Beseeli ekashabwa kwebembera omu kukora empinduka omu ntebeekanisa y’Ekibiina eyaabaire eriho omu bwire obwo ey’abantu kuhayo sente kubaasa kutunga ebitabo byaitu. Bwanyima Abajurizi ba Yehova bakatandika kugabira abantu ebitabo batashashwire. Ekyo kikoorobya emirimo aha Beseeli n’omu kubuurira kandi n’okuhitsya hati kirinzire emirimo yaitu obutateebwaho emishoro etarikwetengyesa. Abamwe bakateekateeka ngu empinduka egi ekaba neija kutureetera kuburwa sente kandi ekyo kiteganise obuheereza bwaitu. Kwonka ekyo tikwo kyabaire. Omubaro gw’abaheereza ba Yehova kuruga omuri 1990 gweyongyereire kimwe, kandi hati abantu nibabaasa kutunga eby’okurya by’omwoyo ebirikukiza amagara ahabwa busha. Nyereebeire butunu ngu ahabw’amaani ga Yehova n’eby’okukuratira ebi arikutuha kurabira omu mwambari omwesigwa, empinduka z’ekibiina nk’ezi, n’ezindi nizibaasa kurugamu ebirungi twazita omu nkora.—Kur. 15:2; Mat. 24:45.

Titurikusinga emishango omu kooti ahabw’okugira ngu nituba twine abahorereza barungi kyonka. Obwire obwingi abaramuzi n’ab’obushoboorozi nibakwatwaho emitwarize mirungi ei Abajurizi ba Yehova baine. Ekyo nkakireeba omuri 1998 obu ab’aha Kakiiko Akareeberezi bashatu n’abakazi baabo baija aha ruteerane oruhango orw’omutaano omuri Cuba. Bakaba nibaha abandi ekitiinisa kandi barikutwaza gye. Ekyo kikoongyera kuhamiza ab’obushoboorozi ngu titurikugwera rubaju omu by’obutegyeki kukira ebi twabagambiire omu nkiiko ezi twagizire nabo.

Kwonka, obumwe ku turikuremwa kwikirizana n’ab’obushoboorozi, nituza omu kooti ‘kurwanirira [amakuru marungi] n’okugahamya’. (Fil. 1:7) Nk’eky’okureeberaho, kumara emyaka mingi ab’obushoboorozi omuri Europe na South Korea bakanga kwikiriza obugabe bwaitu bwʼokucwamu kutaza omu mahe. N’ekyarugiremu, ab’eishe-emwe nka 18,000 omuri Europe n’abandi abarikurenga 19,000 omuri South Korea, bakamara obwire omu bihome ahabw’okwanga kuza kuheereza omu mahe.

Empereruka, omu Okwamushanju 7, 2011, Kooti ya Buraaya ekakora okucwamu kukuru Bayatyan v. Armenia okwabaire nikuragiira ngu hateebweho entebeekanisa omuri Europe yoona ey’abantu kukora emirimo etari y’ekinyamahe baaba batarikwenda kuza omu mahe. Kandi bwanyima na Kooti Enkuru omuri South Korea ekakora okucwamu nikwo kumwe omu Okwamukaaga 28, 2018. Obusinguzi obwo bwona bukaba butarikwija kubaasika kuri noogira ngu ab’eishe-emwe abo abato bakaremwa kuguma bataine rubaju.

Ofiisi erikukora aha by’ebiragiro aha Ofiisi enkuru n’aha ofiisi z’amataagi omu nsi yoona nizikora munonga kujuririra emirimo y’Obukama. Nitugutwara nk’omugisha okujwekyera ab’eishe-emwe na banyaanyazi-itwe abarikuhakanisibwa ab’obushoboorozi. Twaza omu kooti, n’obu twakuba tutasingire omushango, nituha obujurizi omu maisho g’abategyeki, abagabe n’abanyamahanga. (Mat. 10:18) Abaramuzi, abajwekyerwa ba gavumenti, ab’eby’amakuru, n’abantu ba butoosha nibaba baine kuteekateeka aha byahandiikirwe ebi turikukoresa twaba nitwehozaho n’ebihandiiko ebi turikuhayo omu kooti. N’ahabw’ekyo ab’emitima eshemeire nibatunga omugisha gw’okumanya ebirikukwata aha Bajurizi ba Yehova n’obukomooko bw’ebi turikwikiriza. Kandi bamwe aharibo babaasize kuba ab’eishe-emwe.

YEBARE YEHOVA!

Kumara emyaka erikurenga 40, ntungire omugisha gw’okukorera hamwe na ofiisi z’amataagi nyingi aha nshonga z’okurwanirira obugabe bw’ab’eishe-emwe, n’okuza omu maisho ga kooti enkuru nyingi n’ab’obushoboorozi ab’emyanya y’ahaiguru. Ninkunda ab’eishe-emwe abu ndikukora nabo aha Ofiisi enkuru na ofiisi ezindi ezirikurwanirira obugabe bw’ab’eishe-emwe omu nsi yoona. Amagara gangye gabaasize kugira ekigyendererwa kandi ntungire emigisha mingi.

Omukazi wangye Elizabeth atwire ari omwesigwa kandi arikunshagika kumara emyaka 45 omu mbeera nungi n’ezigumire. Nimusiima ahabw’okugira ngu atwire naakora ebyo byona n’obu araabe aine oburwaire oburikumureetera kuhwamu amaani kandi bukamuremesa kukora bingi.

Tureebire n’agaitu ngu amaani n’obusinguzi tibirikurugiirira aha kubaasa kwaitu. Nk’oku Daudi yaagambire, “[Yehova niwe] maani g’abantu be.” (Zab. 28:8) Buzima, “[orutaro] n’orwa [Yehova.]”