Emperu Neija Kubaho Ryari? Eki Yesu Yaagambire

YETEGYEREZE ENSHONGA IBIRI EZI YESU YAAGAMBIRE AHA MPERU Y’ENSI:

“N’ahabw’ekyo mugume nimureeba, ahabw’okuba timurikumanya kiro n’obu yaakuba eshaaha.”​—MATAYO 25:13.

“Mwerinde, mugume nimureeba, kandi mushabe, ahakuba timurikumanya ahu obunaku obwo burihikira.”​—MAKO 13:33.

Tihariho n’omwe omu nsi orikumanya obu entebeekanisa y’ensi egi araahendere. Kwonka, Ruhanga yaataireho obwire obuhikire nari ‘ekiro’ n’eshaaha obu emperu eraahikye. (Matayo 24:36) Mbwenu shi eki nikimanyisa ngu titurikubaasa kumanya na kakye obu emperu eraabe eri haihi kuhika? Ngaaha buzima. Yesu akagambira abeegi be ebintu bingi ebyabaire nibiija kworeka ngu emperu eri haihi.

AKAMANYISO

Ebintu ebi bikaba nibiija kuba akamanyiso ‘k’obunaku obu ensi egi yaabaire neija kuhwaho.’ Yesu akagira ati: ‘Eihanga niriija kuteera erindi ihanga, n’obugabe nibwija kuteera obundi bugabe, nihaija kubaho enjara n’emitsitsa omu myanya mingi.’ (Matayo 24:3, 7) Kandi akagira ngu hakaba nihaija kubaho n’endwara z’ebigwererezi. (Luka 21:11) Nooreeba ebintu ebi Yesu yaagambire nibibaho?

Entaro z’amaani, enjara, emitsitsa, n’endwara nyamwingi, ebi byona nibiteganisa ensi omu bunaku obu. Nk’eky’okureeberaho, omu 2004 omutsitsa gw’amaani omuri Indian Ocean gukareeta eihunga eryaitsire abantu 225,000. Omwaka gumwe n’okurengamu, endwara ya COVID-19 eitsire abantu obukaikuru 2.6 omu nsi yoona. Yesu akagira ngu ebintu nk’ebi bikaba nibiija kworeka ngu entebeekanisa y’ensi egi eri haihi kuhendera.

‘EBIRO BY’EMPERU’

Baibuli neegamba aha bwire obwabaire nibwija kubandiza ebiro by’emperu. (2 Petero 3:3, 4) Omu 2 Timoseo 3:1-5, nihagira ngu omu biro by’emperu emicwe y’abantu ekaba neija kusiisikara. (Reeba akabokusi “Emperu y’Ensi Yaaba Eri Haihi Kuhika.”) Nooreeba abantu abarikweyendeza, abaine omururu, enshaarizi, kandi abataine rukundo? Obu nabwo n’obuhame ngu emperu y’ensi egi eri haihi.

Ebiro by’emperu nibiija kumara bwire ki? Baibuli neegira ngu ‘n’obwire bukye.’ Reero bwanyima Ruhanga naija kucwekyereza ‘abarikucwekyereza ensi.’—Okushuuruurwa 11:15-18; 12:12.

ENSI ENSYA ERI HAIHI!

Ruhanga yaataireho eizooba n’eshaaha obu araareete emperu y’ensi egi. (Matayo 24:36) Kwonka, hariho amakuru marungi ngu Ruhanga, ‘tarikwenda muntu weena kuhwerekyerera.’ (2 Petero 3:9) Naaha omugisha abantu boona kugyendera aha mitindo ye. Ahabw’enki? Ahakuba naayenda ngu tuhonokeho aha mperu y’ensi egi, ensi ku eraabe paradiso.

Ruhanga ataireho entebeekanisa y’okwegyesa abantu omu nsi yoona kumanya oku baraatuure omu nsi ensya barikutegyekwa Obukama bwa Ruhanga. Yesu akagira ngu amakuru marungi g’Obukama gakaba nigaija kubuurirwa omu “mahanga goona.” (Matayo 24:14) Omu nsi yoona, omu 2019 Abajurizi ba Yehova bakamara eshaaha ezirikurenga obuhumbi bubiri barikubuurira kandi barikwegyesa abantu Baibuli kubahwera kugira amatsiko. Yesu akagira ngu ehururu y’okubuurira egi ekaba neija kubaho omu nsi yoona emperu etakahikire.

Obwire bw’abantu obw’okutegyeka buri haihi kuhendera. Kwonka hariho amakuru marungi ngu noobaasa kuhonokaho aha mperu, reero oze omu Paradiso omu nsi ei Ruhanga arikuraganisa. Ekicweka ekirikukurataho nikiza kworeka oku orikubaasa kutuura omu nsi egyo ensya.