Okuba Omuntu Murungi shi n’Obuhame bw’Okugira Nyentsya Nungi?

Kumara ebyasha bingi, abantu baingi batwire nibateekateeka ngu waaba omuntu murungi noogira nyentsya nungi. Nk’eky’okureeberaho, abantu ba Asia bakaba nibaikiririza munonga omu munyabwengye omwegyesa Confucius (owa 551-479 Y.A.) owaagizire ati: “Eki otarikwenda bakukore otakikora abandi.”a

BAINGI NIBATEERAHO KUKIKORA

Na hati baingi nibaikiriza ngu okutwaza gye ni kikuru kugira nyentsya nungi. Nibateeraho kuha abandi ekitiinisa, kugira emicwe mirungi, n’okumanya omwanya gwabo, n’okuteeraho kugira omuntu murungi ow’omunda. “Nkaba niinyikiriza ngu naaba omwesigwa kandi ow’amazima ninyija kutunga emigisha mingi,” nikwo Linh omukazi omuri Vietnam arikugira.

Omukazi niwe omwe naaha eby’okurya abooro n’abataine buraaro.

Abamwe nibateeraho kukora ebirungi ahabw’enyikiriza zaabo z’ediini. Omushaija orikwetwa Hsu-Yun, orikutuura Taiwan, naagira ati: “Nkegyesibwa ngu eki omuntu arikukora yaaba akihuriire nikibaasa kworeka yaaba naija kutunga okushemererwa okw’obutwire nari kubonabona bwanyima y’okufa.”

NIKI EKIRUGIREMU?

Omukazi ogwo aha muheru gw’eizooba aine enaku kandi aruhire akiikiire omutabani.

N’amazima twakorera abandi ebirungi, nitugasirwa omu miringo mingi. Kwonka, baingi abarikuteeraho kukorera abandi ebirungi bareebire ngu emirundi mingi tikirikurugamu eki barikuteekateeka. “Nyereebiire n’agangye ngu abarikukorera abandi ebirungi obutoosha tibarikutunga emigisha,” nikwo omukazi orikwetwa Shiu Ping, orikutuura Hong Kong arikugira. “Nkakora n’amaani kureeberera eka yangye n’okukora ebirungi. Kwonka ekyo tikirahweraire obushwere bwangye, ibanyi akantsigaho na mutabani wangye.”

Baingi bareebire ngu ediini terikuhwera abantu kuba barungi. Etsuko, kuruga Japan naagira ati: “Nkegaita aha diini emwe kandi naatandika kutebeekanisa ebintu bitari bimwe ebi eminyeeto barikwejumbamu. Nkatangaara munonga kureeba ebikorwa by’obuhwanshoni, okuhayahayana, n’obushomankuzi omu diini ei naabaire ndimu.”

“Nkakora n’amaani kureeberera eka yangye n’okukora ebirungi. Kwonka ekyo tikirahweraire obushwere bwangye, ibanyi akantsigaho na mutabani wangye.”—SHIU PING, HONG KONG

Abamwe nibaguubwa kubi kureeba ngu tibarikutunga emigisha n’obu baraabe nibakora ebirungi. Okwo nikwo Van, omukazi omwe kuruga Vietnam, yaayehuriire. Naagira ati: “Buri izooba nkaba ngura ebijuma, ebimuri, n’eby’okurya by’okuha baatatenkuru abaafiire, nyine amatsiko ngu ninza kutunga emigisha. N’obu ndaabe naakozire ebirungi bingi, nkejumba n’omu migyenzo y’ediini, ibanyi nabwo akarwara endwara y’amaani. Kandi nkafeerwa muhara wangye, owaabaire naayegyera aheeru, buzima akafa akiri muto.”

ENSHONGA AHABW’ENKI OKUBA OMUNTU MURUNGI KITARIKUMARA

Okuba omuntu murungi ni kikuru, kwonka ekyo tikirikuhamya ngu noija kugira nyentsya nungi. Ahabw’enki? Yetegyereze eki Ebyahandiikirwe Ebirikwera birikutugambira.

TI BURI OMWE NGU NAACWAMU KUKORA EBIRUNGI

‘Omusiisi omwe naita ebirungi bingi.’—OMUBUURIZI 9:18.

N’obu waakuteeraho munonga kuba omuntu murungi, abantu abarikweyendeza nibabaasa kukusiisira nyentsya yaawe. Nk’eky’okureeberaho, omu bwire bw’ekigwererezi ab’obushoboorozi nibabaasa kuhabura boona okuteihitsya abandi. Kwonka shi abamwe ku baakwanga kworobera obuhabuzi obwo? Emitwarize yaabo neebaasa kuta omu kabi amagara g’abandi abarikuteeraho kwerinda.

ABANTU NIBABAASA KUREMWA KUTAANISA EKIRUNGI N’EKIBI

“Hariho omuhanda ogu omuntu ayeta murungi, kwonka omuheru gwagwo guri omuhanda gw’okufa.”—ENFUMU 14:12.

Ebyafaayo nibyoreka ngu baingi abaateireho kukora eki barikuteekateeka ngu ni kirungi, bakashanga bagwire. Okugira ebigyendererwa birungi tikirikuzibira omuntu kuhikwaho oburemeezi bw’okucwamu kubi.

TITURIKUBAASA KUMANYA EKIRAATUBEHO

‘Timurikumanya ekiraabeho nyencakare.’—YAKOBO 4:14.

Omuntu n’obu yaakuba naakora ebirungi, naabaasa kufa kitaraariire. Nk’eky’okureeberaho, omu bwire bw’endwara ya COVID-19, abarikwehayo beekundiire kuhwera baingi, bafiire. Nari noobaasa kuteekateeka aha ky’okureeberaho kya Liting, omukazi omuri China owaafereirwe ishe omuri butandu y’emotoka. Naagira ati: “Tindikubaasa kwetegyereza ahabw’enki omuntu w’embabazi nk’ogu arikufa. Tata akaba ari omukozi, omucureezi kandi ow’amazima. Niwe wenka owaafiire omu motoka.”

Okuba omuntu murungi ku buraabe butari buhame bw’okugira nyentsya nungi, niki ekiraatuhwere? Kubaasa kugarukamu ekibuuzo ekyo, nitwetenga ekintu ekirikwesigwa ekirikubaasa kugarukamu ebibuuzo byaitu n’okutworeka omuhanda gwa nyentsya nungi. Nitubaasa kwiha nkahi obuhabuzi obwo?

a Okwongyera kumanya ebi omunyabwengye Confucian yaayegyeise, reeba eshuura 7, akacweka 31-35, omu katabo Mankind’s Search for God, akaatairwe Abajurizi ba Yehova kari n’aha mukura www.jw.org.