Nyentsya Nungi n’Ekyetengo kya Buri Omwe
Ni nyentsya ya muringo ki ei orikwenda? Nk’abantu baingi, buzima nooyenda kugira nyentsya nungi n’eka yaawe mwine okushemererwa, amagara marungi, obusingye, n’ebintu birikumara.
Kwonka, baingi tibarikuhamya yaaba baraagire nyentsya ei barikwenda. Nibareeba ebigwererezi nka muyego ya COVID-19 birikuteganisa obutuura gye bw’abantu, eby’entaatsya, n’okwita abantu. N’ekirikurugamu, nibateekateeka ngu nyentsya yaabo terikwija kuba nungi.
Ahabw’ebintu nk’ebi ebirikubaho kitaraariire, abantu nibasherura ekirikubaasa kubahitsya ahari nyentsya nungi. Abamwe nibateekateeka ngu ebirikubabaho yaaba birungi nari bibi bikatebeekanisibwa kare. Baingi nibasherura obwegyese n’obugaiga, barikuteekateeka ngu ebintu ebi nibiija kubabaasisa kutunga eki barikwenda. Abandi nibateekateeka ngu okuba omuntu murungi nikyo kyonka ekirikwetengyesa kubaasa kuba gye.
Mbwenu shi kimwe ahari ebi nikikubaasisa kutunga nyentsya ei orikwenda? Kubaasa kumanya ekyo, teekateeka aha bibuuzo ebi:
Nyentsya yaawe buzima neihirira ahari ki?
Obwegyese n’esente shi n’obuhame bw’okugira nyentsya nungi?
Okuba omuntu murungi shi n’obuhame bw’okugira nyentsya nungi?
Niki ekirikubaasa kutuhwera kugira nyentsya nungi?
Omunaara gw’Omurinzi ogu nigubaasa kukuhwera kutunga eby’okugarukamu.