Obwegyese n’Esente shi n’Obuhame bw’Okugira Nyentsya Nungi?

Abantu baingi nibateekateeka ngu abeegire gye n’abagaiga baine nyentsya nungi. Nibaikiriza ngu obwegyese bwa yunivasite nibubaasa kuhwera omuntu kuba omukozi murungi, kuba ow’omugasho omu ka, n’okuba omutuuzi murungi. Nibaba nibateekateeka ngu waaba oine obwegyese burungi noija kutunga omurimo gw’esente nyingi, kandi ngu esente nyingi nizireeta okushemererwa.

BAINGI NIBACWAMU KUTUNGA OBWEGYESE BW’AHAIGURU

Yetegyereze ebigambo bya Zhang Chen, kuruga China. Naagira ati: “Nkaba niinyikiriza ngu nyine kutunga diguri aha yunivasite kubaasa kuruga omu bworo, kandi ngu omurimo gw’esente nyingi n’obuhame bw’okutunga okushemererwa n’okumarwa.”

Abantu baingi nibaza omu yunivasite ezirikumanywa munonga obundi omu mahanga ag’aheeru, barikuteekateeka ngu nibaija kwongyera aha migisha yaabo ey’okugira nyentsya nungi. Eki kibaire nikikira kubaho munonga, kuhitsya obu COVID-19 eremeise abantu kuza omu mahanga g’aheeru. Ripoota y’ekitongore ky’eby’entaatsya n’entunguuka omu 2012 ekagira eti: “Abeegi b’amashomero obucweka 52 ahari igana omuri Asia, nibashomera omu mahanga g’aheeru.”

Abazaire nibakira kwefeerereza munonga kugira ngu abaana baabo baze aha yunivasite aheeru y’eihanga ryabo. Qixiang, kuruga Taiwan, naagira ati: “Abazaire bangye bakaba bataine sente nyingi, kwonka itwe abaana bana bakatutwara omu koregi omuri United States.” Eka ye kubaasa kushashurira obwegyese bwabo, bakagira amabanja maingi nk’oku abandi barikukora.

NIHARUGAMU KI?

Omwishiki ondiijo naareebeka nk’oruhire kandi oine amaganya ashutami omu maisho ga kompyuta buri nyekiro. — Baingi abarikutunga obwegyese bw’ahaiguru n’obugaiga nibahendera bashobeirwe

Obwegyese nibubaasa kuboneza embeera zaawe kakye, kwonka butoosha tiharikurugamu ebirungi nk’oku abeegi barikuba nibateekateeka. Nk’eky’okureeberaho, baingi nibagwa omu mabanja maingi barikushoma, kwonka bwanyima tibarikutunga emirimo ei barikwenda. Ripoota ya Rachel Mui eyaashohoreire omu rupapura rw’amakuru Business Times orwa Singapore, neegira eti: “Omuhendo gw’abaherize yunivasite abataine mirimo nigweyongyera.” Jianjie, oine diguri nyingi orikutuura omuri Taiwan, naagira ati: “Baingi nibaba bataine ky’okukora kureka okwikiriza omurimo gwona ogutaine kakwate n’ebi baashomereire.”

Kandi abo abarikutunga emirimo ei baashomereire nibareeba ngu ebintu tibirikubagyendera gye nk’oku baabaire nibateekateeka. Niran kuruga Thailand bwanyima y’okuheza yunivasite omuri United Kingdom, akatunga omurimo ogurikuhikaana n’ebi yaashomire. “Nk’oku naabaire ninteekateeka, diguri ekampwera kutunga omurimo ogw’omushaara gw’ahaiguru. Kwonka, omushaara ogwo gukaba nigunyetengyesa kukora munonga, n’okumara eshaaha nyingi. Empereruka, ekitongore kikatuubya aha bakozi naanye ntwariirwemu. Nketegyereza ngu omurimo murungi ti buhame bw’okugira nyentsya nungi.”

Nangwa n’abagaiga nari abatungire ezi barikweta embeera nungi z’okujarama, nabo baine oburemeezi omu maka gaabo, baine endwara, kandi nibeerarikirira aha ntaatsya yaabo. Katsutoshi, kuruga Japan, naagira ati: “Nkaba nyine eby’obugaiga bingi, kwonka nkaba ntashemereirwe, ahabw’okuhayahana n’abandi, okungirira eitima, n’okundahura.” Lam, omukazi orikutuura omuri Vietnam, naagira ati: “Nindeeba abantu baingi abarikurwana kutunga omurimo gw’esente nyingi kubaasa kuhurira baine oburinzi, kwonka omu mazima, tibarikutunga burinzi, baine amagara mabi, nibaba baruhire omu nyehurira, baine n’amaganya.”

EKIRIKUREETERA OBWEGYESE N’ESENTE KUTAMARA

N’amazima, obwegyese buringaniire n’esente nibyetengyesa, abantu kubaasa kwebaisaho hamwe n’amaka gaabo. Kwonka, ebi ti buhame oburikumara ngu omuntu naija kutunga nyentsya nungi. Ahabw’enki? Yetegyereze eki Ebyahandiikirwe Ebirikwera birikugamba.

OBWEGYESE BW’AHAIGURU TIBURIKUKIRA KUREETA OBUSINGUZI.

‘Abairuki rugambwa tibo barikusinga omu mpaka z’okwiruka, n’abarikwetegyereza tibo barikugira eitungo, kandi n’abahangu tibo barikushongoka, kureka boona nibahikwaho obunaku n’ebihikiirizi.’—OMUBUURIZI 9:11.

Abarikureebeka nk’abaine kuba abasinguzi nibakira kuremwa, kandi nibakira kuremesibwa ebintu ebi bataineho bushoboorozi. Eby’entaatsya omu ihanga kugwa, obutari buringaaniza, n’okushoroora nibibaasa kuremesa nangwa n’abantu abeegire munonga kukora ebi barikwenda.

OBUGAIGA NIBUBAASA KUTAGUMAHO.

“Otarigwa ahaiguru noosherura eitungo, gira obwengye, okirekye. Ku origumyaho amaisho, ribura, ahabw’okuba ahonaaho rigira amapapa, riguruka nk’empungu erikuza ahaiguru.”—ENFUMU 23:4, 5.

Esente nizibaasa kukuha oburinzi bw’akaanya kakye. Kwonka ahonaaho omuntu naabaasa kufeerwa esente ze zoona ezi abiikire. Ebihikiirizi, nk’emitsitsa, omuriro, n’akasooroora, nibibaasa kutsiga omuntu ari omworo ataine n’oburaaro.

ESENTE NIZIKIRA KUREETA OBUREMEEZI.

“Omwiguto gw’omutungi gumubuza oturo.”—OMUBUURIZI 5:12.

Eki nikyo kyahikire ahari Franklin, orikutuura omuri Hong Kong. Akaba aine obwegyese bw’ahaiguru n’omurimo gw’esente nyingi. Bwanyima akakuzibwa kureeberera abakozi abandi. “Amaganya gakatandika kundeetera amagara mabi,” nikwo arikugira. “Nkaba ninyerarikirira munonga kindemesa n’okubyama.” Empereruka akahika aha kuremesibwa. Naagira ati: “Nkatandika kwebuuza ahabw’enki naabaire ninkora omurimo ogu, kandi eki kindeetera kuteekateeka munonga aha kigyendererwa ky’okugira amagara.”

“Otarigwa ahaiguru noosherura eitungo.”—ENFUMU 23:4

Nka Franklin, baingi bahendeire barikugira ngu okugira amagara kwine ekigyendererwa ekirikukira aha kusherura obwegyese bw’ahaiguru n’obugaiga. Bamwe omu mwanya gw’okuta omutima aha by’obugaiga, nibasherura nyentsya nungi barikuteeraho kuba abantu barungi n’okukorera abandi ebirungi. Mbwenu shi eki n’obuhame bw’okugira nyentsya nungi? Ekicweka ekirikukurataho nikiha eky’okugarukamu.