Hariho Ekirikwesigwa Ekirikuhitsya Ahari Nyentsya Nungi?

Nk’oku kiri omu kicweka eky’enyima, abantu nibateeraho kugira nyentsya nungi barikuraguza enyonyoozi, barikusherura obwegyese, obugaiga, nari barikuba barungi. Kwonka ebi byona, ni nk’okukoresa maapu etahikire kumanya omuhanda ogu oine kutoora. Eki shi nikimanyisa ngu tihariho obuhabuzi oburikwesigwa obw’okutuhwera kugira nyentsya nungi? Ngaaha!

OBUKOMOOKO BURUNGI BW’OBUHABUZI

Twaba nitwenda kucwamu gye, nitukira kwebuuza aha bakuzire kutukira kandi abanyabwengye. Nikyo kimwe, nitubaasa kutunga obuhabuzi oburikukwata ahari nyentsya nungi turikwebuuza ahari Ogwo orikutukira kandi omunyabwengye. Obuhabuzi bwe abutaire omu kitabo ekyatandikire kuhandiikwa nk’emyaka 3,500 enyima. Ekitabo ekyo ni Baibuli.

Ahabw’enki noobaasa kwesiga Baibuli? N’ahabw’okugira ngu Owaagihandiikiise niwe arikukirayo obukuru n’okugira obwengye omu nsi n’omu iguru. Naagambwaho ati: “Omukuru owa Iranaira” otwireho “okwiha obusingye bwona n’okuhitsya obusingye bwona.” (Danieli 7:9; Zaaburi 90:2) Niwe ‘yaahangire eiguru, niwe Ruhanga owaahangire ensi.’ (Isaaya 45:18) Naatwemanyisa eiziina rye ry’omutaano, Yehova.—Zaaburi 83:18.

Ahabw’okugira ngu Baibuli neeruga aha Muhangi wa boona, terikwegyesa ngu erangi nari oruganda nanka nirukira orundi. Obuhabuzi bwayo tiburikuhwa aha murembe, kandi butwire nibugasira abantu omu mahanga goona. Eriho omu ndimi nyingi kandi etwire neejanjaazibwa okukira ekitabo ekindi kyona.a Eki nikimanyisa ngu abantu boona nibabaasa kworoberwa kugyetegyereza n’okukuratira obuhabuzi bwayo hoona ei barikuba bari. Obuhame obu nibuhikaana n’eki Baibuli erikugamba:

‘Ruhanga tarikushoroora omu bantu, kureka omu mahanga goona orikumutiina, akakora eby’okuhikiirira, ogwo niwe arikusiimwa.’—EBYAKOZIRWE 10:34, 35.

Nk’oku omuzaire arikuhabura abaana be, Yehova Ruhanga ni Tataitwe oine rukundo orikutuhabura arikukoresa Ekigambo kye, Baibuli. (2 Timoseo 3:16) Noobaasa kwesiga Ekigambo kye, ahakuba niwe yaatuhangire naamanya omuhanda ogu twine kutoora.

OBUHABUZI OBURIKWESIGWA

Nitubaasa kwesiga Baibuli ngu neebaasa kutuhabura ahari nyentsya, ahakuba emyaka nka 2,000 enyima ekagamba oku embeera omu nsi ziraabe ziri n’oku abantu baakutwarize ebiro ebi.

EBIRIKUBAHO

‘Eihanga niriija kuteera erindi ihanga n’obugabe nibwija kuteera obundi, nihaija kubaho emitsitsa y’amaani, enjara, [n’endwara] omu myanya mingi.’—LUKA 21:10, 11.

ENTWAZA Y’ABANTU

‘Kwonka omanye eki ngu, omu biro by’aha mperu, nihaija kubaho ebiro by’akabi kaingi, ahakuba abantu nibaija kuba abarikwekunda, abakunzi b’empiiha, abanyamaryo, abarikwemanya, abarikujumiirana, abarikugomera abazaire baabo, entasiima, abatarikwera, abatarikukunda baabo, abatarikwenda kugarukana n’abandi, abarikubeihererana, abatarikweyangisa, enshaarizi, abarikwanga ebirungi, abarikureebyana, engangaazi, abarikwekuza, abarikukunda kweshemeza bonka okukira Ruhanga.’—2 TIMOSEO 3:1-4.

Nooyehurira ota ku orikureeba ebi Baibuli yaagambireho ira munonga nibibaho hati? Hatariho kubangaanisa noikirizana na Leung, kuruga Hong Kong, orikugira ati: “Obunabi bwa Baibuli bukahandiikwa ira munonga. Abantu ba butoosha tibarikubaasa kugamba ebitakabaireho kandi bikahikiirira omu bwijwire. Baibuli ekahandiikisibwa ow’obwengye bwingi kutukira.”

Baibuli erimu obunabi bwingi munonga obutwire nibuhikiirira.b Obu n’obuhame ngu buzima Baibuli n’Ekigambo kya Ruhanga. “Niinye Ruhanga, tihariho orikushushana naanye, okwiha aha kutandika nkaranga eby’emperu.” (Isaaya 46:9, 10) N’ahabw’ekyo oine enshonga nungi kwesiga eki Baibuli erikugamba aha biro by’omumaisho.

OBUHABUZI OBURIKUKUGASIRA HATI N’EBIRO BYONA

Waagyendera aha buhabuzi oburi omu Byahandiikirwe Ebirikwera, noija kugasirwa. Yetegyereze eby’okureeberaho ebimwe.

EMITEEKATEEKYERE ERINGANIIRE AHA SENTE N’OKUKORA

“Oruhi rumwe rwijwire obusingye niruhita empi ibiri eziijwire emirabanamu n’okwitanira omuyaga.”—OMUBUURIZI 4:6.

OKUSHEMERERWA OMU KA

‘Omuntu weena omuriimwe akunde omukazi we, nk’oku arikwekunda, n’omukazi nawe ashemereire kutiina iba.’—ABAEFESO 5:33.

ENKORAGANA Y’ABANTU

‘Reka kuguubwa kubi, ruga omu kiniga, oteemereza omutima, ahakuba ekirikurugamu n’okukora ekibi.’—ZAABURI 37:8.

Waata omu nkora eki Baibuli erikwegyesa noogasirwa, kandi noogira amatsiko ga nyentsya nungi. Omu Baibuli harimu okuraganisa kwa Ruhanga aha biro birungi by’omumaisho ebirikutwariramu

OBUSINGYE N’OBURINZI

‘Kwonka abacureezi nibaija kuhungura ensi, beesiime ahabw’okugira obusingye bwingi.’—ZAABURI 37:11.

OBURAARO N’EBY’OKURYA BY’ABANTU BOONA

‘Nibaija kwombeka amaju, bagatuuremu, nibaija kubyara emizaabibu, barye ebijuma byayo.’—ISAAYA 65:21.

OKUHWAHO KW’ENDWARA N’OKUFA

‘Tiharikwija kubaho kufa obundi, n’obu kwakuba okucura nari okurira nari obusaasi.’—OKUSHUURUURWA 21:4.

Oine kukora ki kubaasa kugira obuhame bw’okugira nyentsya nungi? Shwijuma ekicweka ekirikukurataho.

a Okwongyera kumanya oku Baibuli ebaasize kuvunuurwa n’okugabwa, za aha www.jw.org za aha BIBLE TEACHINGS > HISTORY & THE BIBLE.

b Kumanya ebirikukiraho, reeba eshuura 9 ey’ekitabo The Bible—God’s Word or Man’s? ekyateirwe Abajurizi ba Yehova. Kiri aha mukura www.jw.org. Za aha LIBRARY > BOOKS & BROCHURES.