Baibuli Neeha Obuhabuzi Oburikwesigwa

Titurikubaasa kuhamya ngu ebi turikucwamu ebirikukwata aha micwe bihikire twaba nitwihirira aha nyehurira zaitu nari ez’abandi. Baibuli neeyoreka ahabw’enki, kandi neetuha n’obuhabuzi oburikwesigwa oburikukwata aha micwe oburikutureetera kugira okushemererwa n’okumarwa.

OBUHABUZI OBURIKWETENGYESA

Yehovaa Ruhanga, naakoresa Baibuli kworeka ngu naayenda abantu bamushabe obuhabuzi omu mwanya gw’okwehabura. (Yeremia 10:23) Niyo nshonga ahabw’enki yaatuhaire obuhabuzi oburi omu Baibuli. Naakunda abantu kandi tarikwenda ngu bahikweho oburemeezi n’amaganya agarikuruga omu kucwamu aha nshonga nkuru tutabandize kuteekateeka. (Eky’Ebiragiro 5:29; 1 Yohaana 4:8) Omuhangi waitu aine obwengye n’okumanya ebirikwetengyesa kutuha obuhabuzi oburikukirayo oburikukwata aha micwe. (Zaaburi 100:3; 104:24) Kandi, Ruhanga tarikugyema abantu kugyendera aha mitindo ye.

Yehova akaha Adamu na Haawa, omushaija n’omukazi ab’okubanza, byona ebyabaire nibyetengyesa kubaasa kushemererwa. (Okutandika 1:28, 29; 2:8, 15) Kandi akabaha n’eby’okukuratira byorobi ebi yaabaire naayenda ngu boorobere. Kwonka, bakaba baine kwecweramu kubikuratira nari kwanga. (Okutandika 2:9, 16, 17) Eky’obusaasi, Adamu na Haawa bakacwamu kugyendera aha mitindo yaabo etari ya Ruhanga. (Okutandika 3:6) Harugiremu ki? Abantu shi nibabaasa kwecweramu ekihikire n’ekigwire? Ngaaha. Ebyafaayo byorekire ngu okwehuzya emitindo ya Ruhanga tikirikureeta obusingye bw’obutwire n’okushemererwa.—Omubuurizi 8:9.

Baibuli neetuha obuhabuzi oburikwetengyesa kubaasa kucwamu omu muringo gw’obwengye aha bikwatiraine n’emicwe, hoona ahu turikutuura. (2 Timoseo 3:16, 17; Reeba akabokusi “Ekitabo ky’Abantu Boona.”) Yetegyereze oku Baibuli erikukora ekyo.

Yega ebirikukiraho ahabw’enki Baibuli ehikire kwetwa ‘Ekigambo kya Ruhanga.’—1 Abatesalonika 2:13. Reeba vidiyo N’oha Owaahandiikiise Baibuli? aha jw.org.

AHABW’ENKI ABAMWE BATARIKWESIGA BAIBULI

Abamwe nibagira ngu Baibuli terikubaasa kubaha obuhabuzi burungi oburikukwata aha micwe. Nibabaasa kwekwatsa ebintu nk’ebi.

Eky’okwekwatsa: “Baibuli neeyehakanisa.”

Amazima: Emishororongo mikye erikureebeka nk’erikwehakanisa neebaasa kwetegyerezibwa gye waateekateeka aha mishororongo endiijo egyetooroire, ebyafaayo, entwaza y’omu kicweka, owaagihandiikire, n’enshonga ezindi.

Okubaasa kutunga eby’okureeberaho ebindi shoma ekicweka “Are There Contradictions in the Bible?” aha jw.org.

Eky’okwekwatsa: “Abantu abarikwetwara nk’abarikukuratira Baibuli nibakora ebintu bibi, n’ahabw’ekyo terikuha buhabuzi burungi.”

Amazima: Titushemereire kuta orubanja ahari Baibuli ahabw’entwaza y’abantu abatarikuta omu nkora ebi erikwegyesa. Ekooreka ngu abantu baingi, otwariiremu n’abeebembezi b’ediini abarikwetwara nk’abarikukuratira Baibuli nibaija kukora ebirikutaana n’ebi erikwegyesa. Kandi ahabw’enshonga egyo, enyegyesa za Baibuli zikaba niziija kujumwa.”—2 Petero 2:1, 2.

Reeba eky’okureeberaho kimwe ekirikworeka oku abeebembezi b’ediini baateishukire aha ki Baibuli buzima erikwegyesa, orikushoma ekicweka “Is Religion Just Another Big Business?” aha jw.org.

Eky’okwekwatsa: “Baibuli neeshagika okushoroora abantu abamwe.”

Amazima: Baibuli neetuhiga kutwariza abandi omu muringo gw’ekitiinisa. Terikushagika. . .

okwetwara nk’abarikukira abandi. —Abafilipi 2:3.
okutaha kitiinisa abantu abaine emitindo n’enyikiriza ebirikutaana n’ebyaitu. —1 Petero 2:17.
okugyemesereza abandi kugira emitwarize nk’eyaitu.—Matayo 10:14.

• Baibuli neeyoreka ngu Ruhanga butoosha naatwariza abantu omu muringo gw’embabazi n’oburingaaniza, kandi naayenda ngu naitwe tumutooreze.—Abarooma 9:14.

Kumanya ebirikukiraho, shoma ekicweka “Tolerance—How the Bible Can Help” aha jw.org.

BAIBULI ERIMU OBUHABUZI BWA RUHANGA

Baibuli erimu byona ebirikukwata aha nkoragana ya Yehova n’abantu. Ebirimu nibituhwera kumanya eki Ruhanga arikureeba nk’ekihikire n’ekigwire, eky’omugasho n’eky’akabi. (Zaaburi 19:7, 11) Emisingye ei turikwega etarikuhwa aha murembe neebaasa kutuhwera kucwamu omu muringo gw’obwengye aha bikwatiraine n’emicwe omu mbeera zaitu za butoosha.

Nk’eky’okureeberaho, teekateeka aha buhabuzi oburi omu Enfumu 13:20: “Ogyenda n’abanyabwengye, nawe ahinduka omunyabwengye, kwonka mugyenzi w’abashema aryakizira.” Omusingye ogwo nigukora na hati nk’oku kyabaire kiri ira. Baibuli erimu emisingye mingi nk’egyo erikubaasa kutuhwera.—Reeba akabokusi “Obwengye bwa Baibuli Obutarikuhwa aha Murembe.”

Kwonka noobaasa kuba nooyebuuza oti: ‘Nimbaasa kuhamya nta ngu obuhabuzi bwa Baibuli oburikukwata aha micwe nibukora na hati?’ Omu kicweka ekirikukurataho nituza kureeba eby’okureeberaho bimwe.

a Yehova n’eiziina rya Ruhanga.—Zaaburi 83:18.

OBWENGYE BWA BAIBULI OBUTARIKUHWA AHA MUREMBE

N’obu Baibuli yaahandiikirwe nk’emyaka 2,000 enyima, obuhabuzi bwayo nibuhwera na hati. Entwaza y’abantu tekahindukire, nituguma nitusherura ebirikutureetera kugira okushemererwa n’okumarwa. (Omubuurizi 1:9) Obwengye bwa Baibuli obutarikuhwa aha murembe nibubaasa kutuhwera okukora ekyo.

Okuba ow’amazima

“Nitwetenga kutwaza gye omuri byona.” —Abaheburaayo 13:18.
“Omushuma arekye kugaruka kwiba, kureka akore n’amaani.”—Abaefeso 4:28.

Okukoragana n’Abandi

“Omuntu weena arekye kwesherurira ebye ahabwe, kureka asherure eby’okuhwera mutaahi we.”—1 Abakorinso 10:24.
Mugumizemu ‘nimugumisiririzana, kandi musaasirane.’—Abakolosai 3:13.

Okucwamu

“Otaine bwengye aikiririza eryo, kwonka omwerinzi ayetegyereza ahu arikuraba.”—Enfumu 14:15.
“Omwerinzi ku areeba akabi kaija, ayeshereka, kwonka otaine bwengye akeegyema, kamwita.”—Enfumu 22:3.