Okwombeka Busya Omukago Gwawe na Yehova

BURI mwaka, abantu abari nk’entaama z’omuhendo nibagarurwa omu kibiina Ekikristaayo. Teebereza “okushemererwa” kwingi okurikubaho omu iguru ku barikugaruka! (Luk. 15:7, 10) Ku oraabe ogarukire omu kibiina, noobaasa kuhamya ngu Yesu, baamaraika, na Yehova nibashemererwa kukureeba noogaruka omu mazima. Kwonka, omu kwombeka busya omukago gwawe na Yehova noobaasa kutooroberwa. Noobaasa kutunga mirabanamu ki emwe, kandi niki ekirikubaasa kukuhwera?

NOIJA KUTUNGA MIRABANAMU KI?

Abamwe nibaba nibateganisibwa okwehurira kubi baagaruka omu kibiina. Shana obundi hati nooyetegyereza oku Omugabe Daudi yaabaire naayehurira. Na bwanyima y’okusaasirwa ebibi bye akagira ngu “eby’okutahikiirira byangye bimpikireho” nari bindeengire. (Zab. 40:12; 65:3) Bwanyima y’omuntu kugarukira Yehova, naabaasa kumara emyaka arikweshinja nari arikuhemuka. Isabellea owaamazire emyaka erengire 20 abingirwe, naagira ati: “Kikangumira munonga kwikiriza ngu Yehova naabaasa kunsaasira.” Waayehwa amatsiko, noobaasa kugaruka ohwemu amaani omu by’omwoyo. (Enf. 24:10) Teeraho kureeba ngu ekyo tikyakuhikaho.

Abamwe nibeerarikirira aha birikutwarirwa omu kugaruraho omukago gwabo na Yehova. Bwanyima ya Antoine kugarurwa omu kibiina akagira ati: “Nkaba nindeeba ngu nyebirwe buri kimwe ekirikukwata aha buheereza bw’Ekikristaayo.” Ahabw’enyehurira nk’ezo, abamwe nibabaasa kweziringa kwejumbira kimwe omu by’omwoyo.

Nk’eky’okureeberaho, omuntu yaaba naakunda munonga enju reero ekashiishwa eihunga, naabaasa kwerarikirira yaateekateeka aha birikwetengyesa kugaruka kugyombeka. Nikyo kimwe, waaba waakozire ekibi ky’amaani kikaita omukago gwawe na Yehova, noobaasa kureeba ngu nikyetengyesa amaani maingi kugaruka kweyombeka omu by’omwoyo. Kwonka hariho obuhwezi.

Yehova naatweta ati: “Mbwenu nu nimwije tuhanuure hamwe.” (Isa. 1:18) Waakozire n’amaani ‘kuhanuura,’ nari kutereeza enshonga. Yehova naakukunda ahabw’okuteeraho kwawe. Teekateeka ahari eki: Waahaire Yehova ah’okwihirira kugarukamu Sitaane kumworeka ngu n’omubeihi!—Enf. 27:11.

Ahabw’okugarukira Yehova, hati ori haihi nawe, kandi nawe naaraganisa ngu naija kukwirira haihi. (Yak. 4:8) Kwonka, nihatwariramu bingi abandi kubaasa kugaruka kukwakiira kandi bakakwikiriza nk’omwe aha b’ekibiina. Oine kugumizamu nooyongyera kukunda Sho kandi Munywani waawe, Yehova. Eki noobaasa kukikora ota?

TAHO EBIGYENDERERWA EBIRINGANIIRE EBI ORIKUBAASA KUHIKAHO

Teeraho kutaho ebigyendererwa ebiringaniire. Ijuka ngu enyegyesa ezirikutandikirwaho, nk’okumanya Yehova n’ebi arikuraganisa aha biro by’omumaisho tizikahindukire. Kwonka oine kugaruka aha ntwaza y’Ekikristaayo, orikubuurira amakuru marungi, kandi orikuteeranira hamwe n’ab’eishe-mwe na banyaanyako. Teekateeka aha bigyendererwa ebi.

Gamba na Yehova obutoosha. Sho naakimanya ngu enyehurira z’okweshinja nizibaasa kukureetera kugumirwa kumushaba. (Rom. 8:26) Kwonka, ‘gumizamu nooshaba ohamire,’ orikugambira Yehova ku orikwendera kimwe kugaruraho omukago gwawe nawe. (Rom. 12:12) Andrej naijuka ati: “Nkaba ninyeshinja munonga kandi nyine n’okuhemuka kwingi. Kwonka bwanyima ya buri kushaba, enyehurira ezo zikaba zituuba. Nkaba ngira obusingye bw’omu mutima.” Waaba otarikumanya eki oine kushaba, yetegyereze okushaba kw’Omugabe Daudi owaayeteisize okuri omuri Zaaburi 51 na 65.

Yega Baibuli obutoosha. Eki nikiija kukuhamya omu by’omwoyo, kandi kihamye rukundo ei oyiniire Yehova. (Zab. 19:7-11) “Okutagira entebeekanisa y’eby’omwoyo nikyo kyagabire kindeeteire kuhwamu amaani n’okureebya Yehova,” Felipe nikwo arikugira. “Nkaba ntarikwenda kukora enshobe niyo emwe emirundi ebiri, n’ahabw’ekyo nkacwamu kuhindura okweyegyesa eky’okwerindisa kyangye.” Niiwe noobaasa kukora nikyo kimwe. Waaba nooyenda obuhabuzi kumanya enshonga ezi orikubaasa kwegaho, noobaasa kushaba omunywani okuzire omu by’omwoyo kukuhwera?

Yombeka busya omukago gwawe n’ab’eishe-emwe na banyaanyako. Abamwe abarikugaruka omu kibiina nibaba nibeerarikirira ngu abandi nibaija kuba nibabareeba kubi. Larissa naagira ati: “Nkaba nimpurira ndikuhemuka munonga. Nkaba nindeeba ngu nkareebya ekibiina. Nkaguma nyine enyehurira ezi kumara obwire bwingi.” Gira obuhame ngu abareeberezi n’abandi abakuzire omu by’omwoyo baine ekihika ky’okukuhwera kwombeka busya omukago gwawe na Yehova. (Reeba akabokusi “Abareeberezi Nibabaasa Kukora Ki?”) Bashemereirwe ahabw’okugaruka kwawe, naiwe nikwo oine kwehurira otyo!—Enf. 17:17.

Niki ekirikubaasa kukuhwera kwirira haihi n’ekibiina? Yejumbire kimwe omu bi ab’eishe-emwe na banyaanyako barikukora, nk’okuza omu nteerane, n’okubuurira butoosha. Ebi nibiija kuhwera bita? Felix naagira ati: “Ekibiina kikaba kiniire ekihika okugaruka kwangye. Nkaba nindeeba ngu nibanfaho. Boona bakampwera kugaruka kwijura omu kibiina, kuhurira ngu nsaasiirwe, n’okugumizamu nimpeereza.”—Reeba akabokusi “Noobaasa Kukora Ki?”

OTAHANIKA!

Sitaane naija kugumizamu naakureetera oburemeezi bwingi kuteeraho kukumaramu amaani waaba nooyombeka busya omukago gwawe na Yehova. (Luk. 4:13) Ba oyeteekateekire kuhamya enju yaawe ey’eby’omwoyo hati.

Yehova naaraganisa entaama ze ati: ‘Ninyija kusherura ezibuzire, ngarure ezirazire, mbungye ezihendekire, ezitaine maani, nzigagaruremu.’ (Ezk. 34:16) Yehova ahweraire abandi nyamwingi abaabaire bagarukire enyima omu by’omwoyo. Gira obuhame ngu naayenda kukuhwera kugumizamu nooyombeka omukago gwawe nawe gukahamira kimwe.

Abareeberezi Nibabaasa Kukora Ki?

Abareeberezi nibakora kihango kuhwera ababuurizi abagarukiire Yehova kugaruka kwombeka omukago gwabo na Yehova. Yetegyereze eki barikukora kubahwera.

Bahamize. Entumwa Paulo akaba naayetegyereza ngu omusiisi oyeteisize naabaasa ‘kurengwa obusaasi.’ (2 Kor. 2:7) Naabaasa kuba aine enyehurira z’okuhemuka nari okwehurira kubi. Paulo akahiga ekibiina arikugira ati: “Kibashemerereire kumusaasira n’okumuhuumuza.” Abagarukiire Yehova baine kuhamizibwa ngu Yehova n’Abakristaayo bagyenzi baabo nibabakunda munonga. Abareeberezi baagumizamu nibabasiima kandi bakagira eki baakora kubahwera nibagarukwamu amaani.

Shaba nabo. “Okushaba kw’ohikiriire kugira amaani maingi omu kukora kwakwo.” (Yak. 5:16) Larissa, owaaba yaagambirweho, naagira ati: “Nkagambira abareeberezi ngu nyine okubangaanisa n’okutiina. Bakashaba naanye. Kandi nketegyereza ngu abareeberezi bakaba batanyiniire kiniga. Bakaba nibenda kumpwera kugaruka kugira omukago murungi na Yehova.” Theo naagira ati: “Abareeberezi okushaba naanye kikampwera kugira obwesigye ngu buzima Yehova naankundiira kimwe kandi naandeebamu ebirungi, bitari ebibi.”

Banywane. Abagarukire omu kibiina nibaba nibenda abanywani omu kibiina. “Sherura oburyo bw’okubeeta kukora hamwe omu buheereza, kandi okukira byona bataayaayire omu maka gaabo. Ni kikuru kubanywana!” nikwo omureeberezi orikwetwa Justin arikugira. Henry omureeberezi ondiijo, naagira ati: “Abandi omu kibiina baareeba abareeberezi nibanywana abagarukire omu kibiina, nabo nibaija kuteeraho kukora nikyo kimwe.”

Bahwere kweyegyesa. Omunywani okuzire omu by’omwoyo naabaasa kuhwera ogarukiire Yehova kugira entebeekanisa nungi y’okweyegyesa. Omureeberezi orikwetwa Darko naagira ati: “Ninkunda kugaaniiraho nabo eby’omuhendo eby’omwoyo ebi ntungire omu kweyegyesa Baibuli, kandi ninyoreka ngu nyine omuhimbo gw’okweyegyesa Baibuli. Kandi ninkora entebeekanisa y’okwega nabo ebicweka ebirikugaruramu amaani.” Omureeberezi ondiijo, Clayton, naagira ati: “Nimbahiga kushoma aha barikugambwaho omu Baibuli abaarabireho omu mbeera nk’eyaabo.”

Bataayaayire kubagumya. Abagarukiire Yehova nibaba nibaijuka oku abareeberezi baakozire nk’abaramuzi omu manja zaabo. Kwonka hati, okukira obundi bwona, baine kubareeba nk’abariisa b’entaama. (Yer. 23:4) Ba oyeteekateekire kubahurikiza n’okubasiima. Guma noohurizana nabo. Yetegyereze eki omureeberezi orikwetwa Marcus arikukora yaaba ataayaayiire ogarukiire Yehova: “Ninshoma nabo Ekyahandiikirwe, mbasiima, kandi mbahamiza ngu Yehova n’ekibiina nitushemererwa nabo ahabw’okugaruka. Bwanyima, nitukora entebeekanisa y’okubataayaayira omurundi ogundi.”

a Amaziina agamwe gahindwirwe.