EKICWEKA EKY’OKWEGA 36
EKYESHONGORO 103 Abareeberezi n’Ebiconco omu Bantu
Shaba Abareeberezi Obuhwezi
“Atume aha [bareeberezi b’ekibiina.]”—YAK. 5:14.
ENTIMA
Okusherura obuhwezi bw’eby’omwoyo oburikwetengyesa aha bareeberezi b’ekibiina.
1. Yehova ayorekire ata ngu entaama ze n’ez’omuhendo ahariwe?
YEHOVA naareeba entaama ze nk’ez’omuhendo munonga, ahabw’okuba akazigura n’eshagama ya Yesu, kandi yaatoorana abareeberezi b’okuzireeberera. (Byak. 20:28) Ruhanga naayenda ngu entaama ze zireebererwe gye. Kandi akatoorana Yesu kuba omutwe gw’ekibiina, n’ahabw’ekyo abareeberezi nibatooreza Yesu barikureeberera kandi bakarinda entaama okutahikwaho akabi omu by’omwoyo.—Isa. 32:1, 2.
2. Ni baahi abu Yehova arikufaho munonga? (Ezekieli 34:15, 16)
2 Yehova naafayo munonga aha ntaama ze zoona, kwonka okukira munonga naafayo ahari ezo ezirikubonabona. Naakoresa abareeberezi kuhwera abaheereza be abaine oburemeezi omu by’omwoyo. (Shoma Ezekieli 34:15, 16.) Kwonka, naayenda ngu tusherure obuhwezi twaba nitubwetenga. Oyihireho okumushaba kutuhwera, twine n’okusherura obuhwezi ‘bw’abariisa n’abeegyesa’ b’ekibiina.—Efe. 4:11, 12.
3. Twena nitubaasa kugasirwa tuta twashwijuma ebi abareeberezi barikukora kutuhwera?
3 Omu kicweka eki, nituza kushwijuma entebeekanisa ei Ruhanga atuteeraireho ey’okutunga obuhwezi omu by’omwoyo kurabira omu bareeberezi. Nituza kugarukamu ebibuuzo ebi: Ni ryari obu twine kusherura obuhwezi omu bareeberezi? Ahabw’enki twine kukikora? Kandi nibatuhwera bata? N’obu twakuba tutaine oburemeezi hati, eby’okugarukamu by’ebibuuzo ebyo nibiza kutuhwera kwongyera kusiima entebeekanisa egyo ei Ruhanga atuteeraireho, n’okumanya eki twine kukora twayetenga obuhwezi omu biro by’omumaisho.
NI RYARI OBU TWINE KUSHABA ABAREEBEREZI OBUHWEZI?
4. Ahabw’enki nitugira ngu ebiri Yakobo 5:14-16, 19, 20 nibimanyisa okurwara omu by’omwoyo? (Reeba n’ebishushani.)
4 Entumwa Yakobo akatandika arikugamba aha ntebeekanisa ya Ruhanga ey’okutuhwera omu by’omwoyo arikubuuza ati: “Omuriimwe harimu orwaire? Atume aha [bareeberezi b’ekibiina].”(Shoma Yakobo 5:14-16, 19, 20.) Ebyetooroire emishororongo egyo nibyoreka ngu Yakobo akaba naagamba aha barwaire omu by’omwoyo. Nk’eky’okureeberaho, omurwaire naashabwa kusherura obuhwezi bw’abareeberezi, atari mushaho. Kandi omuntu ogwo kubaasa kukira aine kusaasirwa ebibi. Obumwe, embeera ezi omuntu arikurabamu kubaasa kukira omu by’omwoyo, nizishushana n’ez’omuntu arikurabamu kubaasa kukira omu by’omubiri. Twarwara nituza ow’omushaho, tumushoboororera oku turikushaasha kandi tukuratira obuhabuzi bwe. Nikyo kimwe, twarwara omu by’omwoyo, twine kugambira omureeberezi oburemeezi bwaitu, kandi tugyendera aha buhabuzi obu yaatuha oburikwegamira ahari Baibuli.
Twarwara nituza ow’omushaho. Nikyo kimwe, twarwara omu by’omwoyo tushemereire kuhikiirira abareeberezi (Reeba akacweka 4)
5. Nitubaasa kumanya tuta yaaba tutandikire kurwara omu by’omwoyo?
5 Entebeekanisa ei Yakobo yaagambireho omu shuura 5 neetuhiga kushaba abareeberezi obuhwezi twareeba ngu embeera yaitu y’eby’omwoyo eri omu kabi. N’eky’obwengye kusherura obuhwezi omukago gwaitu na Yehova gutakasiisikaire. N’ahabw’ekyo, twine kwebeera ab’amazima ahabw’okuba Ebyahandiikirwe nibiturabura ngu nitubaasa kwebeiha aha mbeera yaitu y’eby’omwoyo. (Yak. 1:22) Bamwe aha Abakristaayo ab’ekyasha ky’okubanza omu kibiina kya Saadi bakakora enshobe egyo, kandi Yesu akabarabura. (Kush. 3:1, 2) Kubaasa kumanya embeera yaitu y’eby’omwoyo, twine kugyeragyeranisa omujinya ogu twine hati n’ogu twabaire twine omu kubanza. (Kush. 2:4, 5) Nitubaasa kwebuuza tuti: ‘Okushemererwa kwangye okw’okushoma Baibuli n’okugiteekateekaho kutuubire? Ndekyeire aho kuta omutima aha kutebeekanisa enteerane n’okuzizamu obutoosha? Omujinya gwangye gw’okubuurira gutuubire? Niimara obwire bwingi ndikuteekateeka aha by’obugaiga n’eby’okweshemeza?’ Kimwe aha bibuuzo ebyo ku kiraabe kiri eego, nikibaasa kumanyisa ngu oine oburemeezi omu by’omwoyo obu oine kukoraho ahonaaho embeera etakeeyongiire kusiisikara. Twaba tutarikubaasa kusingura oburemeezi obwo ahabwaitu, nari twaba twahenzire emitindo ya Yehova, twine kushaba abareeberezi obuhwezi.
6. Abakozire ekibi ky’amaani bashemereire kukora ki?
6 Kwonka abarikuba bakozire ekibi ky’amaani ekirikubaasa kureetera omuntu kwihwa omu kibiina, bashemereire kuhikiirira abareeberezi. (1 Kor. 5:11-13) Omuntu weena okozire ekibi ky’amaani naaba naayetenga obuhwezi bw’okugaruzaho omukago gwe na Yehova. Kubaasa kusaasirwa ebibi byaitu kurabira omu kitambo, twine kukora “ebishemereire okweteisa.” (Byak. 26:20) Ebikorwa ebyo nibitwariramu okuhikiirira abareeberezi twaba tukozire ekibi ky’amaani.
7. Ni baahi abandi abarikwetenga obuhwezi bw’abareeberezi?
7 Abareeberezi nibahwera n’abahweiremu amaani omu by’omwoyo. (Byak. 20:35) Nk’eky’okureeberaho, noobaasa kuba oyerarikiriire ngu oremirwe kusingura ebyetengo bibi. Kandi embeera yaawe neebaasa kwongyera kukugumira waaba waabaire oine omuze gw’okukoresa emibazi y’ekitokooza bwonko, okureeba eby’enshoni, nari waayejumbire omu bushambani obu waabaire otakeegire amazima. Kwonka toine kuraba omu buremeezi obwo wenka. Noobaasa kucwamu kugambira omwe aha bareeberezi oraije kukuhurikiriza, akakuha obuhabuzi obwegamiire ahari Baibuli, kandi akakuhamiza ngu noobaasa kushemeza Yehova orikwangira kukorera aha byetengo bibi. (Mub. 4:12) Ku oraabe ohwairemu amaani omu kurwanisa ebyetengo bibi, abareeberezi nibabaasa kukwijutsya ngu enyehurira yaawe neeyoreka ngu nootwara omukago gwawe na Yehova nk’ogw’omuhendo, kandi torikweyesiga ekirenga.—1 Kor. 10:12.
8. Twine kugambira abareeberezi enshobe yoona ei turikukora? Shoboorora
8 Kwonka ti buri nshobe yoona ei turikukora ngu twine kugigambira abareeberezi. Nk’eky’okureeberaho, ka tugire ngu waagambira kubi ow’eishe-emwe nari munyaanyazi-itwe, nari waaremwa kutegyeka ekiniga kyawe. Omu mwanya gw’okugambira abareeberezi, noobaasa kukuratira obuhabuzi bwa Yesu obw’okugaruraho obusingye n’ow’eishe-emwe ogwo. (Mat. 5:23, 24) Noobaasa kucondooza aha mitwarize nk’obucureezi, okugumisiriza, n’okwezibira kugira ngu obaase kwongyera kugyoreka omurundi ogundi. Kwonka waaba otabaasize kugonjoora oburemeezi, noobaasa kushaba omureeberezi obuhwezi. Omu baruha ei entumwa Paulo yaahandiikire Abafilipi, akashaba ow’eishe-emwe otarikumanywa eiziina kuhwera Eodia na Suntuke kugonjoora obutaikirizana bwabo. N’ahabw’ekyo omureeberezi omu kibiina kyanyu naabaasa kukuhwera omu muringo nigwo gumwe.—Fil. 4:2, 3.
AHABW’ENKI TUSHEMEREIRE KUSHABA ABAREEBEREZI OBUHWEZI?
9. Ahabw’enki tutaine kwikiriza enshoni kuturemesa kushaba abareeberezi obuhwezi? (Enfumu 28:13)
9 Nitwetenga obumanzi n’okwikiriza kubaasa kushaba obuhwezi twaba tukozire ekibi ky’amaani nari twaba nitugumirwa kurwanisa obweremwa bwaitu. Titwine kwikiriza enshoni kuturemesa kushaba abareeberezi obuhwezi. Ahabw’enki? Ahabw’okuba twabashaba obuhwezi nitworeka ngu nitwesiga Yehova, kandi nitworobera obuhabuzi obu arikutuha kutuhwera kuguma tuhamiire omu kwikiriza. Nitukimanya ngu nitwetenga obuhwezi bwe kubaasa kugumizamu nitukora ekihikire. (Zab. 94:18) Twaba tukozire ekibi, Ruhanga naatugirira embabazi twakigambira abareeberezi, kandi tukamariirira kutagaruka kukikora.—Shoma Enfumu 28:13.
10. Niki ekirikubaasa kubaho twashereka ebibi byaitu?
10 Twagambira abareeberezi ekibi eki tukozire, nitutunga emigisha n’obuhwezi oburikwetengyesa, kwonka twakishereka embeera neeyongyera kusiisikara. Omugabe Daudi ku yaataireho kushereka ebibi bye, akatunga oburemeezi omu by’omwoyo, omu nyehurira n’omu mubiri. (Zab. 32:3-5) Twarwara nari twatunga obuhuta tukaremwa kutunga obujanjabi, nitwongyera kuba kubi, kandi ekyo nikyo kirikubaho twatunga oburemeezi omu by’omwoyo tukaremwa kushaba obuhwezi. Ekyo Yehova naakyetegyereza kandi nikyo arikutwetera ngu “tuhanuure” nawe kurabira omu ntebeekanisa ei ataireho kutuhwera omu by’omwoyo.—Isa. 1:5, 6, 18.
11. Abandi nibakwatwaho bata twashereka ekibi ky’amaani?
11 Twateeraho kushereka ekibi ky’amaani, nikikwata n’aha bandi. Nitubaasa kuremesa omwoyo gurikwera kwija omu kibiina, kandi ekyo nikimaraho obusingye bw’ab’eishe-emwe na banyaanyazi-itwe. (Efe. 4:30) N’ahabw’ekyo, twamanya ngu haine okozire ekibi ky’amaani omu kibiina, twine kumuhiga kugambira abareeberezi ekibi kye. Kwonka yaayeziringa kubagambira bwanyima y’obwire, rukundo ei twiniire Yehova eine kutuhiga kugambira abareeberezi amazima aha nshonga egyo. Ahabw’okuba twashwekyerera ekibi ky’omuntu ogwo naitwe nitugiibwaho orubanja. (Lev. 5:1) Twakora ekyo nikituhwera kurinda ekibiina kuguma kishemeire omu by’omwoyo n’okuhwera omusiisi kugaruka kugira omukago murungi na Yehova.
ABAREEBEREZI NIBATUHWERA BATA?
12. Abareeberezi nibahwera bata abahwairemu amaani omu by’omwoyo?
12 Abareeberezi nibahigwa kuhwera abahwairemu amaani omu by’omwoyo. (1 Tes. 5:14) Waaba okozire ekibi, abareeberezi nibabaasa kukubuuza ebibuuzo kubaasa kumanya gye ebiteekateeko byawe n’oku orikwehurira. (Enf. 20:5) Kubaasa kugasirwa omu buhwezi bwabo, oine kubagambira kyenyini ekikuri aha mutima n’obu kyakuba nikikugumira ahabw’oku waakuziibwe, nari ahabw’okushwara. Otatiina ngu noija kukoresa ebigambo ebitahikire. (Yob. 6:3) Abareeberezi nibaija kukuhurikiza n’obwegyendesereza n’okwetegyereza gye embeera yaawe batakakuhaire obuhabuzi. (Enf. 18:13) Nibamanya ngu okuhwera entaama nikitwara obwire, kandi nikibaasa kubetengyesa kugaaniira naiwe emirundi erengire ahari gumwe kubaasa kukuhwera.
13. Nitugasirwa tuta abareeberezi baatushabira, kandi bakatuha obuhabuzi oburikwegamira aha Byahandiikirwe? (Reeba n’ebishushani.)
13 Waashaba abareeberezi obuhwezi, tibarikwija kukureetera kwongyera kweshinja, kureka nibaija kukushabira. Noija kutangaara waareeba oku okushaba kwabo kwine “amaani maingi omu kukora kwakwo.” Obuhwezi bwabo nibutwariramu okukusiiga “amajuta omu iziina rya [Yehova].” (Yak. 5:14-16) “Amajuta” ago n’amazima ag’omu Kigambo kya Ruhanga. Abareeberezi nibaija kukoresa gye Baibuli kukuhuumuriza n’okukuhwera kugaruraho omukago gwawe na Yehova. (Isa. 57:18) Obuhabuzi obu barikukuha kuruga omu Byahandiikirwe nibubaasa kukuhwera kwongyera kumariirira kukora ekihikire. Kurabira omuribo, noobaasa kuhurira eiraka rya Yehova ririkukugira riti: ‘Ogu nigwo muhanda, ba nigwo waahamya.’—Isa. 30:21.
Abareeberezi nibakoresa Baibuli kuhuumuriza abarwaire omu by’omwoyo n’okubagaruramu amaani (Reeba obucweka 13-14)
14. Kurugiirira omu Abagalatia 6:1, abareeberezi nibahwera bata omuntu ‘ogwire omu kibi’? (Reeba n’ebishushani.)
14 Shoma Abagalatia 6:1. Omukristaayo orikugwa “omu kibi” naaba atarikugyendera aha mitindo ya Ruhanga ehikiriire. Okugwa omu kibi nikibaasa kutwariramu okucwamu kubi nari okuhenda ekiragiro kya Ruhanga. Abareeberezi b’ekibiina nibahigwa rukundo ei bainiire omuntu ogwo, reero ‘bamugarura n’omutima gw’obucureezi.’ Ekigambo ky’Orugriika ekyakoresiibwe kuvunuura ‘okugarura’ nikibaasa kumanyisa okumunga eigufu erihendekire kugira ngu omuntu atakaba ekimuga. Nk’oku omushaho arikuteeraho n’obwegyendesereza kumunga eigufa erihendekire, abareeberezi nibata omutima aha kuhwera orwaire omu by’omwoyo batamureeteire obusaasi. Kandi nabo nibahigwa ‘kwerinda kutategwa nkawe.’ Abareeberezi baaba nibatuhwera kuba gye omu by’omwoyo, nabo nibamanya ngu tibahikiriire kandi nibabaasa kukora enshobe. N’ahabw’ekyo tibarikwetwara nk’abarikukira abandi, nk’abahikiriire, nari kutucwera orubanja, kureka nibateeraho kugira esaasi.—1 Pet. 3:8.
15. Ahabw’enki tutaine kutiina kushaba abareeberezi obuhwezi twaba twine oburemeezi?
15 Nitubaasa kwesiga abareeberezi ahakuba batendekirwe kubiika ebihama, n’okutuha obuhabuzi oburikwegamira ahari Baibuli beitu etari miteekateekyere yaabo. Kandi nibagumizamu kutuhwera kwemera oburemeezi bwaitu. (Enf. 11:13; Gal. 6:2) Obwire obu bamazire bari abareeberezi n’emitwarize yaabo nibitaana, kwonka titushemereire kutiina kubashaba obuhwezi twagira oburemeezi. Kandi, titwine kushaba buri mureeberezi obuhabuzi, turikuteekateeka ngu nitwija kutunga oraatugambire ebi turikwenda kuhurira. Twakora tutyo, nituba turi nk’abo abaine ‘amatu agarikubarya’ omu mwanya gw’okukuratira “enyegyesa y’amazima” y’Ekigambo kya Ruhanga. (2 Tim. 4:3) Twashaba omureeberezi obuhwezi, naabaasa kutubuuza yaaba haine omureeberezi ondiijo ou tugambire nawe n’obuhabuzi obu atuhaire. Kandi obucureezi nibubaasa kumuhiga kubanza yaayebuuza aha mureeberezi ondiijo.—Enf. 13:10.
EKI TWINE KUKORA
16. Buri omwe ahariitwe aine bujunaanizibwa ki?
16 N’obu abareeberezi baraabe baine obujunaanizibwa bw’okurinda entaama za Ruhanga, tibarikutugambira eki twine kukora. N’obujunaanizibwa bwaitu kukora ebirikushemeza Ruhanga. Ahabw’okuba buri omwe ahariitwe naajunaanwa ahari Ruhanga ahabw’ebi arikugamba n’ebi arikukora. Ahabw’obuhwezi bwe, nitubaasa kuguma turi abeesigwa. (Rom. 14:12) Niyo nshonga ahabw’enki omu mwanya gw’okutugambira butunu eky’okukora nibatwijutsya emiteekateekyere ya Yehova ey’omu Kigambo kye. Twagyendera aha buhabuzi obu barikutuha kuruga omu Baibuli, nitutendeka okubaasa kwaitu kw’okucwamu omu muringo gw’obwengye.—Heb. 5:14.
17. Twine kumariirira kukora ki?
17 Ka n’omugisha gw’omuhendo kuba entaama za Yehova! Yehova akoohereza Yesu “omuriisa omurungi” kuhayo ekitambo ahabwaitu kugira ngu tutungye omugisha gw’okutuuraho ebiro byona. (Yoh. 10:11) Yehova akaraganisa ati: ‘Niinyija kubaha abariisa abarikunshusha omutima, babariise n’obwengye n’okwetegyereza.’ (Yer. 3:15) Kandi ahikiriize okuraganisa okwo kurabira omu bareeberezi b’ekibiina. N’ahabw’ekyo twaba tuhwairemu amaani omu by’omwoyo, titwine kweziringa kubashaba obuhwezi. Ka tumariirire kugasirwa omu bwijwire omu ntebeekanisa ya Yehova ei ataireho kutuhwera arikukoresa abareeberezi b’ekibiina.
EKYESHONGORO 31 Gyenda Hamwe na Ruhanga!