EKICWEKA EKY’OKWEGA 28
Obukama Bwatairweho!
“Obukama bw’ensi bwahinduka obwa Mukama waitu n’obwa Kristo we.”—Kush. 11:15.
EKYESHONGORO 22 Obukama Bwatairweho—Shaba ngu Bwije!
EBIRAAGAMBWEHOa
1. Twine buhame ki, kandi ahabw’enki?
KU ORIKUREEBA embeera eziri omu nsi, noogumirwa kuguma oine emiteekateekyere mirungi? Emikago y’amaka esiisikaire munonga. Abantu okutwarira hamwe nibeeyongyera kuba enshaarizi, abarikweyendeza, kandi abanyakiniga. Baingi nibagumirwa kwesiga ab’obushoboorozi. Kwonka embeera ezi nizibaasa kukuhwera kugira obwesigye. Ahabw’enki? N’ahabw’okugira ngu abantu nibatwaza nk’oku obunabi bwagambire kare aha ‘biro by’emperu.’ (2 Tim. 3:1-5) Okuhikiirira kw’obunabi obu obutarikubaasa kubangaanisibwaho, nikutuha obuhame ngu Kristo Yesu ariyo naategyeka nk’Omugabe w’Obukama bwa Ruhanga. Kwonka obu ni bumwe aha bunabi bwingi oburikukwata aha Bukama. Nikiija kuhamya okwikiriza kwaitu kushwijuma obunabi obundi obuhikiriire omu myaka egi.
Nk’oku obucweka bw’ekishushani burikubaasa kukwatanisibwa hamwe, obunabi bw’omuri Danieli n’Okushuuruurwa nibukwatana gye kutuhwera kumanya obwire obu turimu kurugiirira aha ntebeekanisa ya Yehova (Reeba akacweka 2)
2. Nituza kushwijuma ki omu kicweka ki, kandi ahabw’enki? (Gamba aha kishushani ekiri aha mutwe.)
2 Omu kicweka eki, nituza kushwijuma (1) obunabi oburikutuhwera kumanya obu Obukama bwateebwaho, (2) obunabi oburikutuhwera kumanya okubaho kwa Yesu omu Bukama okutarikureebwa, (3) n’obunabi oburikworeka oku abazigu b’Obukama bwa Ruhanga barikwija kucwekyerezibwa. Nituza kureeba ngu obunabi obu nibukwatana gye kutuhwera kumanya obwire obu turimu kurugiirira aha ntebeekanisa ya Yehova, nk’oku omuntu arikubaasa kukwatanisa gye obucweka bw’ekishushani.
OKU TURIKUMANYA OBU OBUKAMA BWATEEBWAHO
3. Obunabi oburi omuri Danieli 7:13, 14 nibutuha buhame ki oburikukwata aha Mugabe w’Obukama bwa Ruhanga?
3 Obunabi oburi omuri Danieli 7:13, 14 nibutuhamiza ngu Kristo Yesu n’omutegyeki murungi w’Obukama bwa Ruhanga. Abantu b’amahanga goona nibaija kushemererwa ‘kumuheereza,’ kandi tihaine orikwija kumuza omu bigyere. Obunabi obundi oburi omu kitabo kya Danieli bukooreka ngu Yesu akaba naija kutunga Obukama bwe aha muheru gw’omwanya gw’emyaka mushanju. Mbwenu shi nikibaasika kumanya obu Yesu yaabaire naija kuba Omugabe?
4. Shoboorora oku Danieli 4:10-17 harikutuhwera kumanya omwaka obu Yesu yaaba Omugabe w’Obukama bwa Ruhanga. (Reeba n’obugambo bw’ahansi.)
4 Shoma Danieli 4:10-17. ‘Omwanya gw’emyaka mushanju’ nigujwekyera obwire bw’emyaka 2,520. Obwire obwo bukatandika 607 Y.A. obu Abababulooni baihaho omugabe w’aha muheru aha kitebe kya Yehova omuri Yerusaalemu. Obwire obwo bukahendera omuri 1914 Y.A.K. obu Yehova yaayemeka Yesu ‘oine obushoboorozi’ bw’okuba Omugabe w’Obukama bwa Ruhanga.b—Ezk. 21:25-27.
5. Ni muringo ki gumwe ogu turikubaasa kugasirwa omu bunabi oburikukwata aha ‘mwanya gw’emyaka mushanju’?
5 Obunabi obu nibubaasa kutugasira buta? Okumanya ebirikukwata aha ‘mwanya gw’emyaka mushanju’ nikituhamiza ngu Yehova naahikiiriza ebi arikuraganisa omu bwire obuhikire. Nk’oku yaataireho obwire obuhikire obw’okutaho Obukama bwe, naija kuhamya ngu obunabi obundi bwona bwahikiirira omu bwire bwe obuhikire. Eego, ekiro kya Yehova tikirikwija ‘kukyerererwa.’—Hab. 2:3.
OKU TURIKUMANYA NGU KRISTO ARIYO NAATEGYEKA OMU BUKAMA BWA RUHANGA
6. (a) Ni bintu ki ebi turikureeba omu nsi ebirikutuhamiza ngu Kristo naategyeka omu iguru? (b) Obunabi oburi omu Okushuuruurwa 6:2-8 nibutuhamiza buta enshonga egi?
6 Yesu ari haihi kuhendera obuheereza bwe, akagamba aha bintu ebimwe ebyabaire nibiija kuhwera abakuratsi be kumanya ngu atandikire kutegyeka omu iguru. Bimwe aha bi yaagambireho, n’entaro, enjara, n’emitsitsa. Akagira ngu hakaba nihaija kubaho n’endwara “omu myanya mingi”, kandi muyego ya COVID-19 eya juba n’emwe aharizo. Ebi byona nibitwarirwa omu ki Baibuli erikweta ‘akamanyiso’ k’okubaho kwa Kristo. (Mat. 24:3, 7; Luk. 21:7, 10, 11) Emyaka erengire 60 Yesu aherize kufa kandi akagaruka omu iguru, akahamiza entumwa Yohaana ngu ebintu ebi bikaba nibiija kubaho. (Shoma Okushuuruurwa 6:2-8.) Ebintu ebi byona bitwire nibibaho kuruga obu Yesu yaaba Omugabe omuri 1914.
7. Ahabw’enki obutegyeki bwa Yesu bwarugiremu okureeba enaku omu nsi?
7 Ahabw’enki embeera omu nsi zaabaire mbi bwanyima ya Yesu kuba Omugabe? Okushuuruurwa 6:2 nihatugambira ngu omurimo ogu Yesu yaabandize kukora bwanyima y’okuba Omugabe, n’okurwana orutaro. Akarwanisa baahi? Akarwanisa Omuregi na baadaimoni be. Kurugiirira aha Okushuuruurwa eshuura 12, Sitaane akasingurwa, kandi we na baadaimoni be bakanagwa omu nsi. Sitaane ekiniga kye kingi akatandika kukyorekyeza abantu ekyarugiremu ‘okureeba enaku’ omu nsi.—Kush. 12:7-12.
Titurikwesiimira amakuru mabi, kwonka twareeba obunabi nibuhikiirira nikituhamiza ngu Obukama bwa Ruhanga buriyo nibutegyeka (Reeba akacweka 8)
8. Nitugasirwa tuta twareeba obunabi oburikukwata aha Bukama nibuhikiirira?
8 Obunabi obu nibubaasa kutugasira buta? Ebirikubaho omu nsi n’okuhinduka kw’emiteekateekyere y’abantu kikaba nikiija kutuhwera kumanya ngu Yesu abaire Omugabe. N’ahabw’ekyo omu mwanya gw’okuguubwa kubi twareeba abandi nibatwaza omu muringo gw’okweyendeza na rwango, nitwijuka ngu ebikorwa byabo nibihikiiriza obunabi bwa Baibuli. Obukama bwatandikire kutegyeka! (Zab. 37:1) Kandi nituhamya ngu amaganya nigaija kweyongyera twaguma nitwirira haihi na Haramagedoni. (Mak. 13:8; 2 Tim. 3:13) Torikusiima Tataitwe ow’omu iguru ahabw’okutuhwera kumanya ahabw’enki hariho oburemeezi bwingi?
OKU ABAZIGU B’OBUKAMA BWA RUHANGA BARAACWEKYEREREZIBWE KIMWE
9. Obunabi oburi omu Danieli 2:28, 31-35 nibushoboorora buta obutegyeki kirimaani obw’aha muheru, kandi bukabaho ryari?
9 Shoma Danieli 2:28, 31-35. Nitureeba obunabi obu burikuhikiirira hati. Ekirooto kya Nebukadeneeza kikooreka ekyabaire nikiija kubaho “omu biro” by’emperu bwanyima ya Kristo kutandika kutegyeka. Abazigu ba Yesu ab’omu nsi bakaba nibaija kutwariramu obutegyeki kirimaani obw’aha muheru oburikugambwaho omu Baibuli, oburikujwekyerwa ‘ebigyere by’ekyoma n’eibumba.’ Obutegyeki kirimaani obu bwatandikire kutegyeka. Bukatandika kubaho omu Rutaro rw’Ensi Yoona I obu Bungyereza n’Amerika baagira omukago gw’omutaano ogw’amakwatane. Ekirooto kya Nebukadeneeza eky’ekishushani nakyo kikagamba ebintu bibiri ebirikukwata aha butegyeki kirimaani ebyabaire nibiija kubutaanisa aha butegyeki obw’enyima.
10. (a) Obunabi bwa Danieli nibushoboorora gye buta obutegyeki bw’amakwatane obwa Bungyereza n’Amerika? (b) Ni kabi ki aku twine kwetantara? (Reeba akabokusi “Yegyendesereze Eibumba!”)
10 Eky’okubanza, okutashushana n’obutegyeki kirimaani obw’enyima, obwa Bungyereza n’Amerika tibugumire nk’ekyoma ky’ezaabu nari efeeza, kureka nk’ekyoma ekijwangizemu eibumba. Eibumba nirijwekyera oruzaaro rw’abantu nari abantu aba butoosha. (Dan. 2:43.) Nk’oku kirikureebwa butunu obunaku obu, nibaremesa obutegyeki kirimaani obu kuhikiiriza ebigyendererwa byabwo, kurabira omu karuuru, obugabe bw’abantu, okwesharinga, n’ebigombe by’abakozi.
11. Okutandika kw’obutegyeki kirimaani obwa Bungyereza n’Amerika nikutuhamiza kuta ngu turi omu biro by’emperu?
11 Ekya kabiri, obutegyeki kirimaani obwa Bungyereza n’Amerika oburikujwekyera ebigyere nibwo burikuhererukayo aha bwagambirweho omu Baibuli. Tiburikwija kuhungurwa obundi butegyeki omu nsi. Kureka, nibwija kuhwaho ahari Haramagedoni obu Obukama bwa Ruhanga buraabucwekyereze na gavumenti z’abantu zoona.c—Kush. 16:13, 14, 16; 19:19, 20.
12. Obunabi bwa Danieli nibuha buhame ki obundi oburikutuha amatsiko kandi bukatuhuumuriza?
12 Obunabi obu nibubaasa kutugasira buta? Obunabi bwa Danieli nibwongyera kutuhamiza ngu turi omu biro by’emperu. Emyaka erengire 2,500 enyima, Danieli akagira ngu bwanyima ya Babulooni, hakaba nihaija kukurataho obutegyeki obundi buna obwabaire nibwija kwetaatsyataatsya omu nshonga z’abantu ba Ruhanga. Kandi, akooreka ngu Obutegyeki obwa Bungyereza n’Amerika nibwo bwabaire nibuza kuba obw’aha muheru. Eki nikituhuumuriza kandi nikituha amatsiko ngu Obukama bwa Ruhanga nibwija kwihiraho kimwe obutegyeki bw’abantu, reero butegyekye ensi omu bwijwire.—Dan. 2:44.
13. ‘Omugabe owa munaana’ ‘n’abagabe ikumi,’ abarikugambwaho omu Okushuuruurwa 17:9-12, nibajwekyera ki, kandi obunabi obu buhikiriire buta?
13 Shoma Okushuuruurwa 17:9-12. Okucwekyerera okwareetsirweho Orutaro rw’Ensi Yoona I kukahikiiriza obundi bunabi bwa Baibuli oburikukwata aha biro by’emperu. Abategyeki b’ensi bakaba nibenda kureetaho obusingye omu nsi yoona. N’ahabw’ekyo omu Kwokubanza 1920, bakatandikaho Ekigombe ky’Amahanga Agakwataniise, ekyaihirweho Amahanga Ageeteeraine omu Kwaikumi 1945. Ekibiina eki nikyetwa ‘omugabe owa munaana.’ Kwonka obu ti butegyeki kirimaani. Ekigombe eki nikitunga maani kuruga omu gavumenti z’amahanga ezirikukishagika. Baibuli omu muringo gw’akamanyiso, gavumenti z’amahanga ezi neezeeta “abagabe ikumi.”
14-15. (a) Ebiri omu Okushuuruurwa 17:3-5 nibyoreka ki aha bikwatiraine na “Babulooni Orurembo Orukuru”? (b) Niki ekiriyo nikihika aha bushagiki bw’amadiini g’ebishuba?
14 Shoma Okushuuruurwa 17:3-5. Entumwa Yohaana omu kworekwa akareeba maraaya “Babulooni Orurembo Orukuru,” orurikujwekyera amadiini g’ebishuba goona. Okworekwa okwo nikumanyisa ki? Ebigombe by’ediini z’ebishuba bitwire nibikoragana n’ab’eby’obutegyeki, kandi bitwire nibibashabira emigisha. Kwonka juba Yehova naija kuta ekiteekateeko kye omu mitima y’ab’eby’obutegyeki “bahikiirize enaama ye.” Nihaija kurugamu ki? Gavumenti ezi nari “abagabe ikumi,” nibaija kwehindukana ebibiina by’ediini z’ebishuba bazicwekyereze.—Kush. 17:1, 2, 16, 17.
15 Nitumanya tuta ngu Babulooni Orukuru ruri haihi kuhendera? Kubaasa kugarukamu ekibuuzo eki, ni kikuru kwijuka ngu Omugyera Furaati gukaba niguhweraho orurembo Babulooni orwa ira kugira oburinzi. Ekitabo ky’Okushuuruurwa nikigyeragyeranisa obukaikuru bw’abantu abarikushagika Babulooni Orukuru ‘nk’amaizi’ g’oburinzi. (Kush. 17:15) Kwonka nabwo ekitabo ekyo nikyoreka ngu amaizi ago gakaba nigaija ‘kwoma,’ ekirikumanyisa ngu amadiini gakaba nigaija kufeerwa abashagiki baago baingi. (Kush. 16:12) Omu kuhikiirira kw’obunabi obwo, abantu baringaniire barugire omu diini z’ebishuba baatandika kusherura eby’okugarukamu by’ebibuuzo byabo ahandi.
16. Nitubaasa kugasirwa tuta twayetegyereza obunabi oburikukwata aha kubaho kw’ekigombe ky’Amahanga Ageeteeraine n’emperu ya Babulooni Orukuru?
16 Obunabi obu nibutugasira buta? Okubaho kw’Amahanga Ageeteeraine n’okutuuba kw’obushagiki bw’amadiini g’ebishuba n’obuhame obundi ngu turi omu biro by’emperu. N’obu amaizi g’akamanyiso aga Babulooni Orukuru garaabe gariyo nigooma, okuhwaho kw’ebibiina by’ediini z’ebishuba nikwija kureetwaho ekindi kintu. Nk’oku kyaba kyagambirweho, Yehova naija kuta ekiteekateeko ekyo omu mitima ‘y’amahembe ikumi,’ gavumenti z’eby’obutegyeki ezirikushagika Amahanga Ageeteeraine “kuhikiiriza enaama ye.” Muheru y’amadiini g’ebishuba ago neija kubaho kitaraariire, abantu omu nsi batakimanyire.d (Kush. 18:8-10) Okucwekyerera kwa Babulooni Orukuru nikwija kutengyetsa ensi, kandi nikubaasa n’okwija kureetaho oburemeezi, kwonka abantu ba Ruhanga nibaija kushemererwa ahabw’enshonga ibiri. Omuzigu wa Yehova ogu otwireho naija kwihirwaho kimwe ebiro byona, kandi okucungurwa kwaitu nikwija kuba kuri haihi!—Luk. 21:28.
YOREKYERA EBIRO BY’OMUMAISHO OINE OBUMANZI
17-18. (a) Nitubaasa kugumizamu tuta nituhamya okwikiriza kwaitu? (b) Nituza kushwijuma ki omu kicweka ekirikukurataho?
17 Danieli akagamba kare ngu ‘okumanya’ okuhikire kukaba nikwija ‘kweyongyera.’ Kandi kwo buzima kweyongyeire! Twongyeire kwetegyereza obunabi oburikukwata aha bunaku bwaitu. (Dan. 12:4, 9, 10) Okuhikiirira gye kw’obunabi obu nikutureetera kwongyera kusiima Yehova n’Ekigambo kye. (Isa. 46:10; 55:11) N’ahabw’ekyo gumizamu noohamya okwikiriza kwawe orikuba omweziriki omu kwega Ebyahandiikirwe, kandi orikuhwera n’abandi kugira omukago murungi na Yehova. Naija kurinda boona abarikumwesiga, kandi naija kubaha ‘obusingye buzima.’—Isa. 26:3.
18 Omu kicweka ekirikukurataho, nituza kuta omutima aha bunabi oburikukwata aha kibiina Ekikristaayo omu biro by’emperu. Nk’oku turikuza kwega, obunabi obu nibukwatana gye n’obunabi oburikukwata aha biro by’emperu. Nituza kwongyera kureeba obuhame ngu, Yesu Omugabe waitu hati yaatandikire kutegyeka abakuratsi be abamuhamiireho.
EKYESHONGORO 61 Abajurizi ba Yehova, Mugumizemu!
a Turi omu bwire obu harikubaho ebintu by’amaani omu byafaayo! Obukama bwa Ruhanga bwatairweho nk’oku kyagambirwe kare omu bunabi bwingi bwa Baibuli. Ekicweka eki nikiza kugamba ahari bumwe aha bunabi obwo, kutuhwera kuhamya okwikiriza kwaitu omuri Yehova, n’okutuhwera kuguma twikaikaine kandi twine obuhame omu biro by’omumaisho.
b Reeba eishomo 32 enshonga 4 omu kitabo Yesiimire Amagara Ebiro Byona!, kandi za n’aha jw.org oreebe vidiyo Obukama bwa Ruhanga Bukatandika Kutegyeka 1914.
c Kubaasa kumanya ebirikukiraho ebirikukwata aha bunabi bwa Danieli, reeba Watchtower eya Gyuni 15, 2012, rup. 14-19.
d Kubaasa kumanya ebirikukiraho aha kiraabeho omu biro by’omumaisho, reeba eshuura 21 ey’ekitabo God’s Kingdom Rules!