Nitubaasa Kutuuraho Ebiro Byona

1. Okuteekateeka aha kuraganisa kwa Yehova okw’amagara agatahwaho nikitukwataho kita?

YEHOVA naaraganisa ngu abarikumworobera nibaija kutunga “amagara agatahwaho.” (Rom. 6:23) Twateekateeka aha kuraganisa okwo, rukundo ei twiniire Yehova neeyongyera kuhama. Kiteekateekeho: Tataitwe ow’omu iguru naatukunda munonga niyo nshonga ahabw’enki atarikwenda hagire ekyatutaanisa nawe.

2. Ekiraganiso ky’amagara agatahwaho nikituhwera kita?

² Ahabw’okugira ngu Ruhanga naaturaganisa amagara agatahwaho nitubaasa kugumisiriza oburemeezi obu twine hati. N’obu abazigu baitu baakututiinatiinisa kutwita, tituraarekyere aho kuheereza Yehova. Ahabw’enki? Ahakuba nitumanya ngu twafa turi abeesigwa ahari Yehova, naija kutuzoora twine amatsiko g’okugumaho ebiro byona. (Yoh. 5:28, 29; 1 Kor. 15:55-58; Heb. 2:15) Niki ekirikutuhamiza ngu nikibaasika kutuuraho ebiro byona? Yetegyereze enshonga ezi.

YEHOVA ATWIREHO EBIRO BYONA

3. Niki ekirikutuhamiza ngu Yehova naabaasa kutureetera kutuuraho ebiro byona? (Zaaburi 102:12, 24, 27)

³ Nitumanya ngu Yehova naabaasa kutureetera kutuuraho ebiro byona, ahakuba niwe Nshuro y’amagara kandi atwireho. (Zab. 36:9) Yetegyereze emishororongo emwe kuruga omu Baibuli erikutuhamiza ngu Yehova atwireho kandi ngu naija kugumaho. Zaaburi 90:2 nihagira ngu Yehova atwireho “okwiha obusingye bwona n’okuhitsya obusingye bwona.” Kandi Zaaburi 102 nayo neegamba enshonga niyo emwe. (Shoma Zaaburi 102:12, 24, 27.) Nabi Habakuuki nawe akahandiika ahari Tataitwe ow’omu iguru ati: ‘Ai [Yehova] Ruhanga wangye, Orikwera wangye, tori otahwaho ebiro byona? torikufa.’—Hab. 1:12.

4. Mbwenu shi tushemereire kwerarikirira twaba nitugumirwa kwikiriza ngu Yehova atwireho? Shoboorora.

⁴ Nikikugumira kwikiriza ngu Yehova atwireho? (Isa. 40:28) Abantu abandi nabo nikibagumira. Elihu akagamba ahari Ruhanga ati: “Emyaka ye terikubaasa kubarwa.” (Yob. 36:26) Kwonka okutetegyereza ekintu tikirikumanyisa ngu nikiba kitahikire. Nk’eky’okureeberaho, n’obu turaabe tutarikwetegyereza gye oku ekyererezi kirikubaho, ekyo nikimanyisa ngu tikiriho? Ngaaha buzima! Nikyo kimwe, nitubaasa kutamanya gye oku Yehova butoosha atwireho n’oku arikugumaho. Kwonka ekyo tikirikumanyisa ngu Ruhanga tatwireho. Amazima agarikukwata aha Muhangi tigarikurugiirira aha bi turikumanya nari ebi tutarikumanya. (Rom. 11:33-36) Kandi Yehova akaba ariho, iguru n’ensi otwariiremu eizooba n’enyonyoozi bitakabaireho. Twine obuhame ngu Yehova niwe “yaahangire ensi n’obushoboorozi bwe.” Buzima, akaba ariho ‘atakabambire eiguru.’ (Yer. 51:15; Byak. 17:24) Ni nshonga ki endiijo erikutuhamiza ngu nikibaasika kutuuraho ebiro byona?

TUKAHANGWA KUGUMAHO EBIRO BYONA

5. Abantu b’okubanza bakaba baine matsiko ki?

⁵ Yehova akahanga ebiine amagara eby’omu nsi kutuuraho obwire bukye, kwonka abantu bo bakaba nibaza kugumaho. Akabaha amatsiko g’omutaano ag’okugumaho batafiire. Kandi Yehova akarabura Adamu ati: ‘Omuti gw’okumanya oburungi n’obubi otariguryaho, ahabw’okuba eizooba eri origuryaho, buzimazima noija kufa.’ (Kut. 2:17) Ku ogire ngu Adamu na Haawa bakoorobera Yehova bakaba batarikwija kufa. Nitubaasa kugira ngu obwire bukaba nibwija kuhika, Yehova abaikirize kurya “aha muti gw’amagara.” Eki kikaba nikiija kubahamiza ngu nibaija kutuuraho ebiro byona.”b—Kut. 3:22.

6-7. (a) Ni nshonga ki endiijo erikutuhamiza ngu abantu bakahangwa kutuuraho ebiro byona? (b) Ni bintu ki ebi oiniire ekihika kukora omu paradiso? (Reeba ebishushani.)

⁶ Abacondooza baingi nibatangaara ku barikumanya ngu obwongo bwaitu nibubaasa kubiika ebintu bingi ebirikukirira kimwe ebi turikwega twaba tuhuriire. Omu 2010 magaziini emwe ekashoboorora ngu obwongo bwaitu nibubaasa kubiika ebintu ebirikwingana na vidiyo y’eshaaha obukaikuru bushatu. Vidiyo egyo neebaasa kutwara emyaka erikurenga omuri 300 kugireeba okagiheza. Kwonka obwongo bwaitu nibubaasa kuba nibubiika ebintu ebirikukira ahari ebyo. Ekyo nikyoreka ngu Yehova akahanga obwongo bwaitu kubiika ebintu ebirikukira aha bi turikwega omu myaka 70 nari 80 ei turikumara tuhuriire.—Zab. 90:10.

⁷ Yehova akatuhanga n’ekyetengo ky’okugumaho tuhuriire. Baibuli neegira ngu Ruhanga ‘akata omu mitima y’abantu ebiteekateeko by’obunaku obutarihwaho.’ (Mub. 3:11) Niyo nshonga ahabw’enki nitureeba rufu nk’omuzigu. (1 Kor. 15:26) Mbwenu shi twarwara tukareemba, nituguma aho tubura kusherura obuhwezi tutegyereza kufa? Ngaaha. Nituza ow’omushaho kandi tutunga n’emibazi y’okukiza endwara ei turikuba twine. Nangwa nitukora kyona eki turikubaasa kugira ngu tutafa. Kandi omukundwa waitu ku arikufa, n’obu arikuba ari muto nari akuzire, nitugira obusaasi bwingi kumara obwire buraingwa. (Yoh. 11:32, 33) Buzima, Omuhangi waitu owa rukundo akaba ataratuhange n’ekyetengo nari okubaasa kw’okugumaho ku ogire ngu akaba atarikwenda ngu tutuureho ebiro byona. Kwonka hariho enshonga ezindi ezirikutuhamiza ngu nitubaasa kugira amagara agatahwaho. Ka tushwijume ebikorwa bya Yehova ebya ira n’ebya hati ebirikutuhamiza ngu ekigyendererwa kye tikikahindukire.

EKIGYENDERERWA KYA RUHANGA TIKIKAHINDUKIRE

8. Isaaya 55:11 nihatuhamiza ki, aha bikwatiraine n’ekigyendererwa eki Yehova atwiniire?

⁸ N’obu Adamu na Haawa baraabe basiisire kandi bakahunguza abaana baabo okufa, Yehova tarahindwire kigyendererwa kye. (Shoma Isaaya 55:11.) Naakyendeza abantu abeesigwa kutuuraho ebiro byona. Ekyo nitukimanya twateekateeka aha bi Yehova yaagambire n’ebi arikukora kuhikiiriza ekigyendererwa kye.

9. Ruhanga akaraganisa ki? (Danieli 12:2, 13)

⁹ Yehova naaraganisa ngu naija kuzoora abaafiire kandi abahe omugisha gw’okutuuraho ebiro byona. (Byak. 24:15; Tit. 1:1, 2) Yobu owaabaire ari omwesigwa akaba naahamya ngu Yehova aine ekihika ky’okuzoora abaafiire. (Yob. 14:14, 15) Nabi Danieli akaba naamanya ngu abantu nibaija kuzoorwa batuureho ebiro byona. (Zab. 37:29; shoma Danieli 12:2, 13.) Kandi n’Abayudaaya omu bwire bwa Yesu, bakaba nibamanya ngu Yehova naabaasa kuha abaheereza be abeesigwa “amagara agatahwaho.” (Luk. 10:25; 18:18) Yesu akagamba emirundi mingi aha kuraganisa okwo, kandi Ishe akabaasa kumuzoora.—Mat. 19:29; 22:31, 32; Luk. 18:30; Yoh. 11:25.

10. Okuzooka okwabaireho ira nikuhamya ki? (Reeba ekishushani.)

¹⁰ Yehova niwe Bukomooko bw’Amagara kandi aine amaani g’okuzoora abantu bakagaruka bakaba abahuriire. Akabaasisa nabi Eliya kuzoora mutabani w’omufaakazi owa Zarefaasi. (1 Bag. 17:21-23) Bwanyima, nabi Elisa arikuhwerwa Ruhanga akabaasa kuzoora mutabani w’omukazi owa Shuneemu. (2 Bag. 4:18-20, 34-37) Eby’okureeberaho ebyo n’ebindi ebirikukwata aha kuzooka nibituhamiza ngu Yehova aine amaani g’okuzoora abantu bakagaruka bakaba abahuriire. Obu Yesu yaabaire ari omu nsi, akooreka ngu Ishe akaba amuhaire amaani g’okuzoora abafu. (Yoh. 11:23-25, 43, 44) Hati Yesu ari omu iguru kandi akaheebwa “obushoboorozi bwona omu iguru n’omu nsi.” N’ahabw’ekyo, naabaasa kuhikiiriza okuraganisa okurikworeka ngu “abari omu bituuro boona” abarikwijukwa nibaija kuzooka baine amatsiko gw’okutuuraho ebiro byona—Mat. 28:18; Yoh. 5:25-29.

11. Ekitambo nikitubaasisa kita kutuuraho ebiro byona?

¹¹ Ahabw’enki Yehova yaikiriize Omwana we kwitwa omu muringo gw’obusaasi? Yesu akooreka enshonga arikugira ati: “Oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.” (Yoh. 3:16) Ahabw’okugira ngu Ruhanga akahayo Omwana we nk’ekitambo kushweka ebibi byaitu, nitubaasa kutunga amagara agatahwaho. (Mat. 20:28) Entumwa Paulo akagamba omu bugufu aha kigyendererwa kya Ruhanga arikugira ati: “Nk’oku okufa kwareetsirwe omuntu, nikwo n’okuzooka kw’abafu kwareetsirwe omuntu. Nk’oku boona bafa omuri Adamu, nikwo n’omuri Kristo boona barihindurwa abahuriire.”—1 Kor. 15:21, 22.

12. Obukama nibwija kuhikiiriza buta ekigyendererwa kya Yehova?

¹² Yesu akeegyesa abakuratsi be kushaba ngu Obukama bwa Ruhanga bwije n’ebi Ruhanga arikukunda bikorwe omu nsi. (Mat. 6:9, 10) Kimwe aha kigyendererwa kya Ruhanga n’okwenda ngu abantu batuure omu nsi ebiro byona. Yehova kubaasa kuhikiiriza ekyo, akatoorana Omwana we kuba Omugabe w’Obukama bwa Mesia. Ruhanga atwire naarundaana abantu 144,000 kuruga omu nsi, kukora na Yesu kuhikiiriza ekigyendererwa kye.—Kush. 5:9, 10.

13. Yehova ariyo naakora ki hati kandi itwe twine kukora ki?

¹³ Yehova hati ariyo naarundaana “omutwe muhango” gw’abantu kandi naabatendeka kweta ahansi y’Obukama bwe. (Kush. 7:9, 10; Yak. 2:8) N’obu abantu abo barikutuura omu nsi ebaganisiibwemu rwango n’entaro, nibateeraho kweihamu rwango ey’omuringo gwona. Omu muringo gw’akamanyiso zaarurara zaabo bariyo nibaziheeshamu amafuka. (Mik. 4:3) Omu mwanya gw’okwejumba omu ntaro ezirikureetaho okufa kwingi, nibahwera abantu kutunga “amagara agaabuzima” barikubeegyesa ebirikukwata ahari Ruhanga n’ekigyendererwa kye. (1 Tim. 6:19) Nibabaasa kuhakanisibwa ab’eka yaabo nari bagire oburemeezi omu by’entaatsya ahabw’okushagika Obukama bwa Ruhanga, kwonka Yehova naahamya ngu baatunga ebirikwetengyesa. (Mat. 6:25, 30-33; Luk. 18:29, 30) Ebyo byona nibituhamiza ngu Obukama bwa Ruhanga n’obwabuzima kandi nibwija kugumizamu nibuhikiiriza ekigyendererwa kya Yehova.

NYENTSYA NUNGI ERI HAIHI

14-15. Ekigyendererwa kya Yehova eky’okwihiraho kimwe rufu nikiija kuhikiirira kita?

¹⁴ Yesu hati n’Omugabe w’Obukama bwa Ruhanga omu iguru kandi naija kuhikiiriza byona ebi Yehova arikuraganisa. (2 Kor. 1:20) Kuruga 1914, Yesu atwire naasingura abazigu be. (Zab. 110:1, 2) Yesu n’abu araategyeke nabo nibaija kusingurira kimwe kandi bacwekyereze ababi.—Kush. 6:2.

¹⁵ Omu Butegyeki bwa Yesu obw’Emyaka Rukumi, abafu nibaija kuzooka kandi boona abarikworobera Yehova nibaija kuba abahikiriire. Bwanyima y’okugyezibwa okw’aha muheru, abu Yehova araareebe ngu bahikiriire nibaija ‘kuhungura ensi, bagituuremu ebiro byona.’ (Zab. 37:10, 11, 29) Ekirikukirayo oburungi, omuzigu rufu niwe ‘arihereruka kwihwaho’.—1 Kor. 15:26.

16. Ni nshonga ki enkuru erikutuhiga kuheereza Yehova?

¹⁶ Nk’oku twareeba omu kicweka eki, amatsiko gaitu g’okutuuraho ebiro byona nigegamira aha Kigambo kya Ruhanga. Nigabaasa kutuhwera kuguma turi abeesigwa omu biro ebi ebigumire eby’emperu. Kwonka kubaasa kushemeza Yehova, twine kuba nituhigwa ekirikukira aha kugira ekyetengo ky’okutuuraho ebiro byona. Enshonga enkuru erikutureetera kuguma tuhamiire ahari Yehova na Yesu ni rukundo mpango ei tubainiire. (2 Kor. 5:14, 15) Rukundo egyo neetuhiga kubatooreza kandi tukagambira abandi amatsiko gaitu. (Rom. 10:13-15) Twayetantara okweyendeza kandi tukaba efura, nituba abu Yehova arikwenda ngu babe banywani be ebiro byona.—Heb. 13:16.

17. Twena twine bujunaanizibwa ki? (Matayo 7:13, 14)

¹⁷ Mbwenu shi nitwija kuba omuri abo abaraatungye amagara agatahwaho? Yehova atuhaire omugisha ogwo. Kiri ahariitwe kucwamu kugumizamu turi omu muhanda ogurikuhitsya omu magara. (Shoma Matayo 7:13, 14.) Embeera niziija kuba ziri zita obu turaabe nitutuuraho ebiro byona? Omu kicweka ekirikukurataho nituza kugarukamu ekibuuzo ekyo.