‘Noija Kuba Naanye Omuri Paradiso’

1. Obu Yesu yaabaire ari haihi kufa akagambira ki enkozi y’ebibi owaabaire ahanikirwe aha rubaju rwe? (Luka 23:39-43)

YESU hamwe n’enkozi z’ebihagaro babiri abaabaire bahanikirwe aha rubaju rwe bakaba baine obusaasi bwingi ahabw’okufa mporampora. (Luk. 23:32, 33) Ahabw’okugira ngu enkozi z’ebihagaro abo bakaba nibagamba kubi ahari Yesu, nikyoreka butunu ngu bakaba batari beegi be. (Mat. 27:44; Mak. 15:32) Kwonka omwe aharibo akahindura emiteekateekyere ye. Akagira ati: “Yesu, ku oriija omu Bukama bwawe, onyijukye.” Yesu akamugarukamu ati: ‘Buzimazima ninkugambira eri izooba nti, noija kuba naanye omuri Paradiso.’ (Shoma Luka 23:39-43.) Tihariho ekirikworeka ngu enkozi y’ebibi akaba yaikiriize obutumwa oburikukwata aha ‘Bukama bw’omu iguru,’ obu Yesu yaabuurireho omu buheereza bwe. Kandi Yesu nawe taragizire ngu omushaija ogwo naija kuba omu Bukama bw’omu iguru. (Mat. 4:17) Yesu akaba naagamba ahari paradiso eyaabaire neija kuba omu nsi omu biro by’omumaisho. Ahabw’enki turikubaasa kugira tutyo?

2. Niki ekirikworeka ngu enkozi y’ebibi owaayeteisize akaba ari Omuyudaaya?

² Enkozi y’ebibi ogwo owaayeteisize naabaasa kuba yaabaire ari Omuyudaaya. Omushaija ogwo akagambira mugyenzi we ati: “Na Ruhanga torikumutiina, ahabw’okushushanisa nawe ekiheneso?” (Luk. 23:40) Abayudaaya bakaba nibaramya Ruhanga omwe, kwonka abantu abanyamahanga bakaba nibaikiririza omuri baaruhanga baingi. (Kur. 20:2, 3; 1 Kor. 8:5, 6) Enkozi z’ebibi abo ku ogire ngu bakaba bari abanyamahanga, omwe aharibo akaba naaza kubuuza ati: “Na baaruhanga torikubatiina?” Ekindi, Yesu akaba atatumirwe aha banyamahanga, kureka “aha ntaama z’oruganda rwa Israeli ezaabuzire.” (Mat. 15:24) Ruhanga akaba agambire Abaisraeli ngu naija kuzoora abafu. Enkozi y’ebibi owaayeteisize aine kuba yaabaire naamanya okuraganisa okwo, kandi ebigambo ebi yaakoreise nibyoreka ngu akaba naateebereza ngu Yehova naija kuzoora Yesu kutegyeka omu Bukama bwa Ruhanga. Omushaija ogwo naabaasa kuba yaabaire aine amatsiko ngu nawe, Ruhanga naija kumuzoora.

3. Enkozi y’ebibi owaayeteisize naabaasa kuba yaateekateekire ahari ki, obu Yesu yaagamba ahari Paradiso? Shoboorora. (Okutandika 2:15)

³ Ahabw’okugira ngu enkozi y’ebibi ogwo akaba ari Omuyudaaya, aine kuba yaabaire naamanya ebirikukwata ahari Adamu na Haawa na Paradiso ei Yehova yaabaire abatairemu. N’ahabw’ekyo enkozi y’ebihagaro naabaasa kuba yaabaire naikiriza ngu Paradiso ei Yesu yaagambireho gukaba nigwija kuba guri omusiri murungi omu nsi.—Shoma Okutandika 2:15.

4. Ebi Yesu yaagambiire omwe aha nkozi z’ebibi biine kutuhiga kuteekateeka ahari ki?

⁴ Ebi Yesu yaagambiire enkozi y’ebibi, bishemereire kutuhiga kuteekateeka aha ku mbeera omu Paradiso ziraabe ziri. Nangwa, hariho eki turikwegyera aha butegyeki bw’Omugabe Sulemaani aha bikwatiraine na Paradiso. Baibuli neegira ngu Yesu naakirira kimwe Sulemaani. Kandi nitubaasa kugira ngu we n’abaraategyeke nawe nibaija kukorera hamwe kureetaho embeera nungi omu nsi. (Mat. 12:42) ‘Ab’entaama ezindi’ baine kumanya eki bashemereire kukora kuba abahikire kutuura omu Paradiso ebiro byona.—Yoh. 10:16.

EMBEERA NIZIIJA KUBA ZIRI ZITA OMURI PARADISO?

5. Nooteekateeka ngu embeera niziija kuba ziri zita omuri Paradiso?

⁵ Nooteekateeka ngu embeera niziija kuba ziri zita omuri Paradiso? Obundi, nooteera akashushani orikureeba omwanya murungi, oguri nk’omusiri Edeni. (Kut. 2:7-9) Noobaasa kwijuka obunabi obwahandiikirwe Miika oburikworeka ngu buri muheereza wa Ruhanga naija “kushutama ahansi y’omuzaabibu gwe n’ahansi y’omutiini gwe.” (Mik. 4:3, 4) Noobaasa n’okwijuka eki Baibuli erikugamba ngu nihaija kubaho omweru mwingi gw’eby’okurya. (Zab. 72:16; Isa. 65:21, 22) N’ahabw’ekyo noobaasa kwereeba omu mwanya murungi ori aha meeza eijwireho eby’okurya binuzire. Teera akashushani orikwitsya omwoya gw’obuhoho bw’ebimera n’ebimuri. Obundi orikuhurira ab’eka yaawe na banywani baawe otwariiremu n’abazookire bari hamwe barikusheka. Ebyo byona tibirooto. Hatariho kubangaanisa, embeera nk’ezo niziija kubaho omu nsi. Kwonka, omuri Paradiso nihaija kuba hariyo n’emirimo endiijo erikushemeza.

6. Nituza kukora ki omuri Paradiso? (Reeba ekishushani.)

⁶ Yehova akatuhanga turikubaasa kwesiimira omu mirimo yaitu. (Mub. 2:24) Nituza kuba twine bingi by’okukora omu Myaka Rukumi y’Obutegyeki bwa Kristo. Abaraahonokeho omu kubonabona kwingi hamwe n’abantu baingi abaraazoorwe nibaija kuba nibenda eby’okujwara, eby’okurya, n’ah’okutuura. Okubahwera kutunga ebyo byona n’omurimo ogurikwija kutureetera okushemererwa kwingi. Nk’oku Adamu na Haawa baabaire baine kureeberera omusiri gwabo, naitwe nitwija kugira omugisha gw’okuhindura ensi Paradiso. Teekateeka aha kushemererwa oku turaagire turikwegyesa abantu abeesigwa ebirikukiraho abaabaire bariho Yesu atakaizire omu nsi, otwariiremu n’abaraazoorwe abarikumanya bikye ahari Yehova n’ekigyendererwa kye.

7. Nitubaasa kugira bwesigye ki, kandi ahabw’enki?

⁷ Nitubaasa kugira obwesigye ngu omuri Paradiso nituza kuba twine obusingye, obuteeka, na byona ebirikwetengyesa. Ahabw’enki? Ahakuba Yehova yaaherize kutuha endozo oku embeera ziraabe ziri Omwana we yaaba naategyeka ensi. Ekyo nitukireebera aha byabaireho obu Omugabe Sulemaani yaabaire naategyeka.

OBUTEGYEKI BWA SULEMAANI BUKABA BURI ENDOZO YA PARADISO

8. Ebiri omuri Zaaburi 37:10, 11, 29 bikahikiirira bita bwanyima ya Daudi kubihandiika? (Reeba “Ebibuuzo Kuruga Omu Bashomi” omu magaziini egi.)

⁸ Omugabe Daudi arikuhwerwa Yehova akahandiika aha ku embeera ezaabaire niziija kuba ziri, omugabe omunyabwengye kandi omwesigwa yaaba naategyeka. (Shoma Zaaburi 37:10, 11, 29.) Nitukira kushomera abantu Zaaburi 37:11 twaba nitugamba ahari Paradiso. Buzima nituba tuhikire kukikoresa ahakuba na Yesu akajuriza ekyahandiikirwe ekyo omu Rubazo rwe Rw’aha Rushozi, arikworeka ngu nikiija kuhikiirira omu biro by’omumaisho. (Mat. 5:5) Kwonka ebigambo bya Daudi bikaba nibyoreka embeera ezaakubaireho omu bwire bw’Omugabe Sulemaani. Obu Sulemaani yaabaire naategyeka Israeli, abantu ba Ruhanga bakaba baine obusingye bwingi na byona ebirikwetengyesa omu ‘nsi ey’amate n’obwoki.’ Ruhanga akaba abagizire ati: ‘Ku muriguma nimukuratira ebi naataireho . . . , ninyija kureeta obusingye omu nsi, nimwija kubyama, kandi tihaine oribatiinisa.’ (Lev. 20:24; 26:3, 6) Ebyo byona bikahikiirira obu Sulemaani yaabaire naategyeka. (1 Bus. 22:9; 29:26-28) Kandi Yehova akaba agizire ngu ababi bakaba nibaija kumarirwaho kimwe. (Zab. 37:10) N’ahabw’ekyo, ebiri omuri Zaaburi 37:10, 11, 29 bikabanza kuhikiirira ira kandi nibiija kuhikiirira omu bwijwire omu biro by’omumaisho.

9. Omugabekazi wa Sheeba akagamba ki aha butegyeki bw’Omugabe Sulemaani?

⁹ Omugabekazi wa Sheeba akahurira ngu Abaisraeli abarikutegyekwa Sulemaani bakaba nibagogyera kandi baine na byona ebirikwetengyesa. Omugabekazi ogwo akacwamu kugyenda orugyendo ruraingwa kuza kwereebera n’age. (1 Bag. 10:1) Ku yaaherize kurambura obugabe bwa Sulemaani akagira ati: ‘Tibarangambiire n’obu kyakuba ekicweka kyabyo kimwe kya kabiri. . . . Abashaija baawe bahiiriirwe! N’abaheereza baawe aba bahiiriirwe, abeemerera obutoosha omu maisho gaawe, bakahurira obwengye bwawe!’ (1 Bag. 10:6-8) Kwonka embeera ezaabaire ziriho omu butegyeki bwa Sulemaani ekaba eri endozo y’ebi Yehova araakorere abantu boona Omwana we Yesu ku araabe naategyeka.

10. Yesu naakirira kimwe Sulemaani mu miringo ki?

¹⁰ Yesu naakirira kimwe Sulemaani omuri buri kimwe. Sulemaani akaba atahikiriire kandi akakora enshobe z’amaani omu kucwa emanja ekyarugiiremu abantu ba Ruhanga kugira oburemeezi bwingi. Kwonka Yesu, n’omutegyeki ohikiriire otarikukora nshobe. (Luk. 1:32; Heb. 4:14, 15) Yesu akasingura okugyezibwa kwa Sitaane kwona. Kristo akooreka ngu tarikubaasa kukora kibi nari ekintu kyona ekirikubaasa kuhitsya akabi aha bu arikutegyeka. Twine omugisha gw’amaani kugira Omugabe nk’ogwo.

11. Ni baahi abaraahwere Yesu yaaba naategyeka?

¹¹ Yesu na 144,000 nibaija kukorera hamwe kureeberera abantu n’okuhikiiriza ekigyendererwa eki Ruhanga ainiire ensi. (Kush. 14:1-3) Abaraategyeke na Yesu bakahikwaho okugyezibwa kwingi n’okubonabona, n’ahabw’ekyo nibaija kuba nibeetegyereza embeera y’abarikutuura omu nsi. Mbwenu shi abategyeki abo nibaija kukora ki?

ABASHUKIRWEHO OMWOYO GURIKWERA NIBAIJA KUKORA KI?

12. Yehova naija kuha bujunaanizibwa ki 144,000?

¹² Obujunaanizibwa obuhairwe Yesu n’abaraategyeke nawe nibukirira kimwe obwahairwe Sulemaani. Omugabe w’Abaisraeli ogwo akaba naareeberera abantu baingi b’eihanga rimwe. Kwonka, abaraategyeke omu Bukama bwa Ruhanga nibaija kuhwera obuhumbi bw’abantu abaraabe nibatuura omu nsi yoona. Obwo ka n’obujunaanizibwa bw’amaani obu Yehova ahaire 144,000!

13. Obujunaanizibwa bw’abaraategyeke na Yesu nibwija kutwariramu ki?

¹³ Nka Yesu, 144,000 nibaija kuheereza nk’abagabe kandi abanyamurwa. (Kush. 5:10) Omu Biragiro bya Musa, abanyamurwa nibo baabaire baine obujunaanizibwa bw’okuhamya ngu abantu baine amagara marungi kandi bari gye n’omu by’omwoyo. Ebiragiro bikaba biri ‘ekishushani ky’ebirungi ebyabaire nibyenda kwija,’ buzima n’eky’oburyo kuteekateeka ngu abaraategyeke na Yesu nibaija kuhwera abantu ba Ruhanga omu by’omubiri n’omu by’omwoyo. (Heb. 10:1) Titurikumanya oku abagabe n’abanyamurwa abo baraahurizane n’abaraabe nibategyekwa Obukama omu nsi. Omuringo gwona ogu Yehova araakorese, twine obwesigye ngu boona abaraabe nibatuura omu Paradiso nibaija kutunga obuhabuzi oburikwetengyesa.—Kush. 21:3, 4.

AB’ENTAAMA EZINDI BAINE KUKORA KI KUBAASA KUTUURA OMU PARADISO?

14. Ni nkoragana ki eri aha gati ‘y’ab’entaama ezindi’ ‘n’ab’obusyo bukye’?

¹⁴ Yesu akeeta abaraategyeke nawe “obusyo obukye.” (Luk. 12:32) Kandi akagamba aha guruupu y’abantu endiijo abu yaayetsire “entaama ezindi.” Guruupu ezo zombi n’obusyo bumwe. (Yoh. 10:16) Hati, nizikorera hamwe kandi niziija kugumizamu nizikorera hamwe n’omu Paradiso. Omu bwire obwo ‘ab’obusyo obukye’ nibaija kuba bari omu iguru kandi ‘ab’entaama ezindi’ nibaija kuba baine amatsiko g’okwija kwesiimira amagara ebiro byona omu nsi. Kwonka hariho ebi ‘ab’entaama ezindi’ baine kukora kubaasa kuba abahikire kutuura omuri Paradiso.

15. (a) ‘Ab’entaama ezindi’ nibakwatanisa bata na beene Ishe Kristo? (b) Noobaasa kutooreza ota ow’eishe-emwe ori omu duuka y’emibazi? (Reeba ekishushani.)

¹⁵ Enkozi y’ebibi owaayeteisize, akafa atakoorekire okusiima omu bwijwire ahabw’eki Yesu yaamukoreire. Okutashushana nawe, itwe ‘ab’entaama ezindi’ nitubaasa kworeka okusiima kwaitu omu miringo mingi. Nk’eky’okureeberaho, nitworeka rukundo ei tumwiniire kurugiirira aha ku turikutwariza beene Ishe, entoore. Yesu akagira ngu naaza kucwera entaama orubanja arikwihirira aha bi barikukorera beene Ishe. (Mat. 25:31-40) Nitubaasa kushagika beene Ishe Kristo turikubahwera n’obweziriki omu murimo gw’okubuurira n’okuhindura abantu abeegi. (Mat. 28:18-20) Kubaasa kuhikiiriza ekyo, twine kukoresa gye ebikoreso ebituhairwe kwegyesa abantu Baibuli, nk’ekitabo Yesiimire Amagara Ebiro Byona! Ku oraabe otaine ou orikwegyesa Baibuli, ahabw’enki otarikutaho ekigyendererwa ky’okwegyesa abantu baingi nk’oku orikubaasa?

16. Twine kukora ki hati kwetebeekanisiza okutuura omuri Paradiso?

¹⁶ Tikirikutwetengyesa kutegyereza Paradiso kubaho kugira ngu tubaase kuhinduka abu Ruhanga arikwenda ngu bagituuremu. Hati nitubaasa kuteeraho kuba ab’amazima omu migambire n’omu bikorwa byaitu kandi tukaba abeerinzi. Nitubaasa kuhamira ahari Yehova, abu turi nabo omu bushwere n’Abakristaayo bagyenzi baitu. Twateeraho kukora ebirikuhikaana n’emitindo ya Yehova omu nsi egi embi nikiija kutworobera kugigyenderaho n’omuri Paradiso. Nitubaasa n’okwega emyoga kandi tuteereho kugira emitwarize erikworeka ngu twetebeekaniise kugituuramu. Reeba ekicweka “Oyetebeekaniise ‘Kuhungura Ensi’?” omu magaziini egi.

17. Mbwenu shi twine kuguma nitweshinja aha bw’ebibi ebi twakozire? Shoboorora.

¹⁷ Kandi twine kwetantara kweshinja ahabw’ebibi by’amaani ebi twakozire enyima. Kwonka, titushemereire kuteekateeka ngu ahabw’okugira ngu hariho ekitambo twine ‘kushiisha nkana.’ (Heb. 10:26-31) Nitubaasa kugira obwesigye ngu twaba tweteisize kimwe eby’okushiisha byaitu, tushabire Yehova kutuhwera, tuhindwire n’emitwarize yaitu naatusaasirira kimwe. (Isa. 55:7; Byak. 3:19) Yesu akagambira Abafarisaayo ati: “Tindaizire kweta bahikiriire, kureka abasiisi.” (Mat. 9:13) Ekitambo nikibaasa kushwekyera kimwe ebibi byaitu byona.

NOOBAASA KUTUURA OMU PARADISO EBIRO BYONA

18. Okaayenzire kubuuza ki enkozi y’ebibi owaabaire ahanikirwe aha rubaju rwa Yesu?

¹⁸ Noobaasa kuteera akashushani ori omu Paradiso orikugamba n’enkozi y’ebibi owaagambire na Yesu? Hatariho kubangaanisa mwembi mukaayorekire okusiima ahabw’ekitambo kya Yesu. Noobaasa n’okumubuuza ebyabaireho omu shaaha ezaahererukireyo Yesu atakafiire n’oku yaayehuriire Yesu ku yaamugarukiremu. Kandi nawe naabaasa kukubuuza oku embeera zaabaire ziri omu biro by’emperu y’ensi ya Sitaane. Ka nigwija kuba guri omugisha gw’amaani kwegyesa omushaija ogwo Baibuli n’abandi abari nkawe!—Efe. 4:22-24.

19. Ahabw’enki embeera omuri Paradiso zirikwija kuba nizishemeza? (Reeba ekishushani ekiri aha kipampagare.)

¹⁹ Embeera omuri Paradiso niziija kuba nizishemeza. Nitwija kuba turi n’abantu abarikushemeza kandi turikukora emirimo erikutugasira. Kwonka ekirikukira byona, buri izooba nitwija kuba nitwongyera kumanya Tataitwe ow’omu iguru kandi turikwesiimira omu bi araabe naatuha. Kandi butoosha nitwija kuba twine bingi by’okwega ahari Yehova n’aha bi yaahangire. Buri kweyongyera kuhangaara, rukundo ei twiniire Ruhanga neija kuguma neeyeyongyera. Ka nitusiima Yehova na Yesu ahabw’okuturaganisa kwija kutuuraho ebiro byona omuri Paradiso!