Oyeteekateekire Kwehayo Ahari Yehova?

1-2. Omuntu aine kubanza kukora ki atakabatiziibwe?

EMYAKA etaano ehingwire, abantu abarikurenga akakaikuru kamwe babatiziibwe baaba Abajurizi ba Yehova. Abaingi bari nka Timoseo ow’omu kyasha ky’okubanza, beegyesiibwe amazima ‘kuruga omu buto.’ (2 Tim. 3:​14, 15) Abandi beegire ebirikukwata ahari Yehova baakuzire nari baakaikwire. Enyimaho, Abajurizi ba Yehova bakegyesa omukazi Baibuli yaabatizibwa aine emyaka 97!

² Ku oraabe ori omwegi wa Baibuli nari abazaire baawe bari Abajurizi ba Yehova, oriyo nooteekateeka aha kubatizibwa? Nitukusiima ahabw’okutaho ekigyendererwa ekyo. Kwonka, otakabaziibwe oine kubanza waayehayo ahari Yehova. Ekicweka eki nikiza kushoboorora ekirikutwarirwa omu kwehayo. Kandi nikiza kukuhwera kwetegyereza ngu toine kweziringa kwehayo kandi okabatizibwa, waaba oyeteekateekire kukikora.

OKWEHAYO NIKIMANYISA KI?

3. Ha eby’okureeberaho by’omu Baibuli eby’abantu abaabaire beehaireyo ahari Yehova.

³ Omu Baibuli, okwehayo kwine amakuru g’okutaanisibwa aha bandi ahabw’omurimo ogurikwera. Abaisraeli bakaba bari eihanga eryabaire ryehaireyo ahari Yehova. Kwonka abamwe omu ihanga eryo bakaba beehaireyo ahari Yehova omu muringo gw’omutaano. Nk’eky’okureeberaho, Arooni akaba ajwara ‘ekirunga ekirikwera’—nikyo kipande ky’ezaabu, ekyabaire kiri omu maisho g’ekikwemba kye. Ekipande ky’ezaabu kikaba nikyoreka ngu ataanisiibwe aha bandi kuheereza omu muringo gw’omutaano nk’omunyamurwa omukuru wa Israeli. (Lev. 8:9) Abanaziiri nabo bakaba beehaireyo ahari Yehova omu muringo gw’omutaano. Ekigambo “Omunaziiri,” nikiruga omu kigambo ky’Oruheburaayo nazirʹ, ekirikumanyisa “Otaanisiibwe aha bandi,” nari “Oyehaireyo.” Abanaziiri bakaba baine kugyendera aha buhabuzi obwabaire bubateerairweho omu Biragiro bya Musa.—Kub. 6:​2-8.

4. (a) Ni mu muringo ki oku abeehaireyo ahari Yehova bataanisiibwe aha bandi ahabw’omurimo ogurikwera? (b) ‘Okweyangisa’ nikimanyisa ki? (Reeba n’ekishushani.)

⁴ Waayehayo ahari Yehova, noocwamu kuba omwegi wa Yesu Kristo, kandi nooyebembeza okukora ebi Ruhanga arikukunda. Okwehayo kw’Ekikristaayo nikwija kukwetengyesa kukora ki? Yesu akagira ati: “Omuntu weena ku araayende kunkuratira, ayeyangise.” (Mat. 16:24) Ekigambo ky’Orugriika ekirikuvunuurwa “ayeyangise” nikibaasa kumanyisa “okwezibira kukora eki orikwenda.” Nk’omuheereza wa Yehova oyehaireyo, nikiija kukwetengyesa kwanga kukora ekintu kyona ekitarikuhikaana n’ebi Ruhanga arikukunda. (2 Kor. 5:​14, 15) Ekyo nikitwariramu okwanga emirimo “y’obuzaarwa bw’omubiri,” nk’ebikorwa by’obushambani. (Gal. 5:​19-21; 1 Kor. 6:18) Mbwenu shi okworobera obuhabuzi obwo nikiija kugumisa embeera zaawe? Tikwo kiraabe waaba nookunda Yehova, kandi orikuhamiza kimwe ngu ebiragiro bye biriho ahabw’oburungi bwawe. (Zab. 119:97; Isa. 48:​17, 18) Ow’eishe-emwe orikwetwa Nicholas akagira ati: “Noobaasa kureeba emitindo ya Yehova nk’emitehimbwa y’ekihome ekirikukuremesa kukora eki orikwenda, nari nk’emitehimbwa erikukurinda kutariibwa entare.”

5. (a) Nooyehayo ota ahari Yehova? (b) Okwehayo nikutaana kuta n’okubatizibwa? (Reeba n’ekishushani.)

⁵ Nooyehayo ota ahari Yehova? Noomuraganisa omu kushaba ngu noija kuba niwe waaramya wenka, kandi ngu noija kwebembeza okukora ebi arikukunda. Nooraganisa Yehova ngu noija kugumizamu noomukunda ‘n’omutima gwawe gwona, n’amagara gaawe goona, n’obwengye bwawe bwona, n’amaani gaawe goona.’ (Mak. 12:30) Nooyehayo ahari Yehova omu mubonano. Kwonka, okubatizibwa kwo nookukora omu rweteeraine kworeka muranga ngu oyehaireyo. Okwehayo kwawe n’okuragaanisa okurikwera. N’ahabw’ekyo, ekigyendererwa kyawe kiine kuba kiri eky’okuhikiiriza okuraganisa okwo, kandi nikyo Yehova arikwenda ngu okore.—Mub. 5:​4, 5.

AHABW’ENKI OINE KWEHAYO AHARI YEHOVA?

6. Niki ekirikuhiga omuntu kwehayo ahari Yehova?

⁶ Enshonga nkuru erikukureetera kwehayo ahari Yehova ni rukundo ei omwiniire. Rukundo egyo terikwegamira aha nyehurira kyonka. Kureka, esimbire emizi omu ‘kumanya’ okuhikire “n’okwetegyereza” eby’omwoyo—nibyo ebi waayegire ahari Yehova bikakureetera kwongyera kumukunda. (Kol. 1:9) Okwega Ebyahandiikirwe kikuhamiize ngu (1) Yehova n’owaabuzima, (2) niwe yaahandiikiise Baibuli, kandi (3) naakoresa ekibiina kye kuhikiiriza ebi arikukunda.

7. Twine kuba nitukora ki tutakeehaireyo ahari Ruhanga?

⁷ Abarikwehayo ahari Yehova baine kuba nibamanya enyegyesa ezirikutandikirwaho eziri omu Kigambo kya Ruhanga, kandi nibagyendera aha mitindo ye. Nibateeraho nk’oku barikubaasa kugambira abandi ebi barikwikiriza. (Mat. 28:​19, 20) Boongyeire kukunda Yehova, kandi baine ekihika ky’okumuramya wenka. Naiwe nikwo orikwehurira? Waaba nooyehurira otyo, noija kwehayo kandi obatizibwe, tihabw’okwenda kushemeza orikukwegyesa Baibuli, abazaire baawe, nari kwenda kuba nka banywani baawe, kureka ahabwa rukundo ei oiniire Yehova.

8. Okusiima nikukureetera kuta kucwamu kwehayo ahari Yehova? (Zaaburi 116:​12-14)

⁸ Waateekateeka ahari byona ebi Yehova akukoreire noija kucwamu oyekundiire kwehayo. (Shoma Zaaburi 116:​12-14.) Baibuli neegira ngu Yehova niwe bukomooko ‘bw’engabirano yoona enungi n’ekiconco kyona ekihikire.’ (Yak. 1:17) Ekiconco ekirikukirayo n’ekitambo ky’Omwana we, Yesu. Ekyo ka n’ekiconco kirikushemeza! Ekitambo kikubaasiise kugira omukago murungi na Yehova. Kandi oine amatsiko g’okutuuraho ebiro byona. (1 Yoh. 4:​9, 10, 19) Okwehayo ahari Yehova n’omuringo gw’okworeka ngu noomusiima ahabwa rukundo erikukirayo ei akworekire n’emigisha ei akuhaire. (Bir. 16:17; 2 Kor. 5:15) Okusiima okwo nikugambwaho omu kitabo Yesiimire Amagara Ebiro Byona!, eishomo 46 enshonga 4, erimu na vidiyo y’edakiika ishatu Okuhayo Ebiconco Byawe Ahari Ruhanga.

OYETEEKATEEKIRE KWEHAYO KANDI OKABATIZIBWA?

9. Ahabw’enki omuntu ataine kugyemeserezibwa kwehayo?

⁹ Noobaasa kuba nooteekateeka ngu tokahikire kwehayo kandi okabatizibwa. Obundi okiine kukora empinduka kuhikaana n’emitindo ya Yehova, nari nookyenda obwire kuhamya okwikiriza kwawe. (Kol. 2:​6, 7) Abeegi tibarikutunguukira aha rurengo rumwe, n’abato tibarikwehayo kandi bakabatizibwa aha myaka erikwingana. Teeraho kushwijuma okutunguuka kwawe kurugiirira aha bi orikubaasa kukora, beitu otarikwegyeragyeranisa n’omuntu ondiijo.—Gal. 6:​4, 5.

10. Noobaasa kukora ki waamanya ngu tokahikire kwehayo kandi okabatizibwa? (Reeba n’akabokusi “Abakuriire omu Mazima.”)

¹⁰ Waamanya ngu tokahikire kwehayo ahari Yehova, gumizamu nooteeraho kuhika aha kigyendererwa ekyo. Shaba Yehova kukuhwera kukora empinduka ezirikwetengyesa. (Fil. 2:13; 3:16) Noobaasa kugira obwesigye ngu naija kuhurira okushaba kwawe, kandi akugarukyemu.—1 Yoh. 5:14.

EKIRIKUREETERA ABAMWE KWEZIRINGA

11. Yehova naija kutuhwera ata kuguma turi abeesigwa?

¹¹ Abamwe abahikire kwehayo kandi bakabatizibwa, nibeeziringa kukikora. Nibabaasa kuba nibatiina ngu, nibaija kukora ekibi ky’amaani babingwe omu kibiina. Waaba nooyehurira otyo, gira obwesigye ngu Yehova naija kukuha kyona ekirikwetengyesa ‘kugyenda nk’oku [arikwenda], n’okumushemeza omuri byona.’ (Kol. 1:10) Naija kukuha n’amaani g’okukora ebihikire. Kandi kurugiirira aha ku atwariize abantu baingi, yaayorekire ngu naabaasa kukikora. (1 Kor. 10:13) Egi niyo nshonga ahabw’enki abantu bakye nibo barikubingwa omu kibiina Ekikristaayo. Yehova naahwera abantu kuguma bari abeesigwa.

12. Nitubaasa kwetantara tuta kukora ekibi ky’amaani?

¹² Abantu boona abatahikiriire niboohibwa kukora ebitahikire. (Yak. 1:14) Kwonka, kiri hariiwe kucwamu eki oraakore waayohibwa. Amazima gari ngu, niiwe orikumanya oku oshemereire kutwaza. N’obu abamwe barikugira ngu torikubaasa kwezibira, noobaasa kwega kutegyeka enyehurira zaawe. Kandi n’obu waakwohibwa, noobaasa kucwamu kwanga kukora ekibi. N’ahabw’ekyo, buri izooba shaba Yehova kukuhwera. Guma oine ntebeekanisa y’okweyegyesa Ekigambo kya Ruhanga. Za omu nteerane z’Ekikristaayo. Gambira abandi ebi orikwikiriza. Waaguma nookora ebyo nikiija kukuhwera kuhikiiriza okwehayo kwawe. Kandi ijuka ngu Yehova naija kukuhwera.—Gal. 5:16.

13. Yosefu akatuteeraho ky’okureeberaho ki kirungi?

¹³ Nikiija kukworobera kuguma ohamiire aha kwehayo kwawe, waacwamu bukiri kare eki oraakore waayohibwa. Baibuli neetugambira abantu batari bamwe abaakozire ekyo, n’obu baabaire batahikiriire. Nk’eky’okureeberaho, muka Potifaari akateeraho emirundi mingi kushendashenda Yosefu. Kwonka akaba naamanya eki yaabaire aine kukora. Baibuli neegira ngu ‘akanga,’ kandi yaagira ati: “Mbwenu nimbaasa nta kukora ekibi ekirikwingana kityo, n’okucumura ahari Ruhanga?” (Kut. 39:​8-10) Buzima, Yosefu akaba naamanya oku aine kutwaza, omukazi ogwo atakaizire kumubeihabeiha. Ekyo kikamuhwera kukora ekihikire ku yaayohiibwe.

14. Nitubaasa kwega tuta kwangira okwohibwa?

¹⁴ Noobaasa kutooreza ota Yosefu? Orikucwamu hati eki oraakore waayohibwa. Yega kwanga ahonaaho ebintu ebi Yehova arikwanga, n’obu kwakuba okubiteekateekaho. (Zab. 97:10; 119:165) Waakora otyo, torikwija kukora ekibi waayohibwa. Noija kuba noomanya oku oine kutwaza.

15. Omuntu naabaasa kworeka ata ngu ‘naasherura’ Yehova? (Abaheburaayo 11:6)

¹⁵ Noobaasa kuba noomanya ngu oboine amazima, kandi nooyenda kuheereza Yehova n’omutima gwawe gwona, kwonka haine ekirikukuremesa kwehayo n’okubatizibwa. Noobaasa kukora eki Omugabe Daudi yaakozire. Noobaasa kweshengyereza Yehova oti: “Oncaakye, ai Ruhanga, omanye omutima gwangye, ongyeze, omanye ebiteekateeko byangye, oreebe omuriinye ku haraabe harimu emitwarize yoona emibi, haza onyebembere omu muhanda ogw’ebiro n’ebiro.” (Zab. 139:​23, 24) Yehova naaha emigisha ‘abarikumusherura.’ Okuteeraho kuhika aha kigyendererwa kyawe eky’okwehayo kandi okabatizibwa nikimuhamiza ngu oriyo noomusherura.—Shoma Abaheburaayo 11:6.

GUMIZAMU NOIRIRA HAIHI YEHOVA

16-17. Yehova naayeyiriza haihi ata abakuriire omu mazima? (Yohaana 6:44)

¹⁶ Yesu, akagira ngu Yehova niwe arikweyiriza haihi abeegi be. (Shoma Yohaana 6:44.) Teekateeka aha ku ebigambo ebyo birikukukwataho. Yehova naareeba ekirungi omu buri muntu ou arikweyiriza haihi. Naareeba buri muntu nk’ou “yaayetooraniire.” (Bir. 7:6) Naiwe nikwo arikukureeba.

¹⁷ Noobaasa kuba okiri muto, kandi abazaire baawe bari omu mazima. Noobaasa kuba nooteekateeka ngu nooheereza Yehova ahabw’abazaire baawe, beitu atari Yehova okweyiriize haihi. Kwonka Baibuli neegira eti: “Mwirire haihi Ruhanga, nawe abone kubairira haihi.” (Yak. 4:8; 1 Bus. 28:9) Waaba niiwe waabanza kwirira haihi Yehova, nawe naakwirira haihi. Yehova tarikureeba abantu nka guruupu. Naayeyiriza haihi buri muntu okwe, otwariiremu n’abakuriire omu mazima. Omuntu nk’ogwo yaacwamu kumwirira haihi, Yehova nawe naakora nikyo kimwe nk’oku kiri omuri Yakobo 4:8.—Gyeragyeranisa 2 Abatesalonika 2:13.

18. Nituza kugamba ahari ki omu kicweka ekirikukurataho? (Zaaburi 40:8)

¹⁸ Waayehayo ahari Yehova kandi okabatizibwa, nooyoreka emiteekateekyere nk’eya Yesu. Akeehayo ayekundiire ahari Ishe kukora kyona eki yaabaire amushaba kukora. (Shoma Zaaburi 40:8; Heb. 10:7) Omu kicweka ekirikukurataho, nituza kureeba ekiraakuhwere kugumizamu nooheereza Yehova omu bwesigwa waaheza kubatizibwa.