Yesigye ‘Omucwi w’Emanja ow’Ensi Yoona’ Omunyambabazi!

1. Yehova akeegyesa Abrahamu eishomo ki eririkuhuumuriza?

EMYAKA mingi enyima, Ruhanga arikukoresa maraika akagambira Abrahamu ngu akaba naaza kucwekyereza orurembo rwa Sodoma na Gomora. Ekyo Abrahamu tarakyebirwe. Kwonka n’obu araabe yaabaire ari omwesigwa, ekyo kikamuteganisa. Akabuuza ati: ‘Buzima noija kucwekyereza abahikiriire hamwe n’ababi? . . . Omucwi w’emanja ow’ensi yoona tarikwija kukora ebihikire?’ Yehova akeegyesa munywani we omukundwa eishomo eririkutugasira kandi rikatuhuumuriza twena, ngu Ruhanga tarikubaasa kucwekyereza abantu abahikiriire.—Kut. 18:23-33.

2. Niki ekirikutuhamiza ngu Yehova naacwa emanja z’okuhikiirira n’embabazi?

² Nitubaasa kuhamya tuta ngu Yehova naacwa emanja z’okuhikiirira n’embabazi? Ahakuba ‘naareeba’ omu mitima y’abantu. (1 Sam. 16:7) Nangwa, naamanya “emitima y’abantu boona.” (1 Bag. 8:39; 1 Bus. 28:9) Ago n’amazima agarikutangaaza. Oku Yehova arikucwa emanja kurengire okwetegyereza kwaitu. Niyo nshonga ahabw’enki, entumwa Paulo yaagambire ahari Yehova Ruhanga ati: ‘Emicwere ye, terikubaasa kumanywa.’—Rom. 11:33.

3-4. Obumwe nitubaasa kwebuuza ki, kandi nituza kushwijuma ki omu kicweka eki? (Yohaana 5:28, 29)

³ Kwonka, obumwe nitubaasa kuba twine ebibuuzo nk’ebi Abrahamu yaabuurize. Nitubaasa kuba nitwebuuza tuti: ‘Hariho amatsiko goona ahabw’abantu abaacwekyereire omuri Sodoma na Gomora? Abamwe omuribo shi nibaija kuzoorwa omu kuzooka kw’abatahikiriire?’—Byak. 24:15.

⁴ Ka tweyijutsye ebi turikumanya aha kuzooka. Enyimaho tuherize kutunga enyetegyereza nsya ‘y’abaraazookyere amagara’ n’abo ‘abaraazookyere okucwerwa orubanja.’a (Shoma Yohaana 5:28, 29.) Enyetegyereza egi ereetsireho empinduka ezindi eziraagambweho omu kicweka eki n’ekirikukurataho. Aha bikwatiraine n’emanja za Yehova ez’okuhikiirira, nituza kubanza kureeba eki tutarikumanya, reero bwanyima tureebe eki turikumanya.

EKI TUTARIKUMANYA

5. Ebitabo byaitu bikagamba ki aha bantu abaacwekyereziibwe omuri Sodoma na Gomora?

⁵ Enyima, ebitabo byaitu bikagamba aha kirikwija kuhika aha bu Yehova arikucwera orubanja nk’abatahikiriire. Tukaba nitugira ngu abantu abari nk’aba Sodoma na Gomora abu Yehova yaacwekyereize, tibaraazookye. Kwonka, okwongyera kucondooza n’okushaba kureetsireho ekibuuzo eki, nitubaasa kuhamiza kimwe ngu tibaraazookye?

6. Ni by’okureeberaho ki bimwe eby’abantu abatahikiriire abu Yehova yaacwereire orubanja, kandi niki eki tutarikumanya?

⁶ Teekateeka aha by’okureeberaho bimwe omu Baibuli. Baibuli neegamba oku Yehova yaacwereire abantu abatahikiriire orubanja, nk’omubaro gw’abantu ogutarikumanywa abaitsirwe omwegyemure, nari amahanga mushanju g’omu Nsi Eyaaraganisiibwe agu Yehova yaagambiire abaheereza be kucwekyereza, n’abaserukare Abaasiria 185,000 abu maraika wa Yehova yaitsire omu kiro kimwe. (Kut. 7:23; Bir. 7:1-3; Isa. 37:36, 37) Mbwenu shi eby’okureeberaho ebyo nibyoreka ngu Yehova akacwera abantu abo boona orubanja rw’okucwekyererezibwa kimwe, kandi tibaraazoorwe? Ngaaha, tikwo kiri. Ahabw’enki nitubaasa kugira tutyo?

7. Niki eki tutarikumanya aha bantu abaacwekyereziibwe omwegyemure, n’abaitsirwe obu Kanaani yaasingurwa? (Reeba ekishushani .)

⁷ Titurikumanya orubanja oru Yehova yaacwereire buri omwe aha bantu abo, nari yaaba baatungire omugisha gw’okwega ahari Yehova kugira ngu beeteise. Omu bwire bw’omwegyemure, Baibuli neegira ngu Noa akaba ari omubuurizi “w’okuhikiirira.” (2 Pet. 2:5) Kwonka terikworeka ngu obu yaabaire naayombeka emeeri akabaasa kubuurira abantu boona omu nsi. Nikyo kimwe, titurikumanya yaaba abantu babi boona abaabaire nibatuura omuri Kanaani baatungire omugisha gw’okwega ahari Yehova, kandi bakahindura emitwarize yaabo.

8. Niki eki tutarikumanya aha bantu ba Sodoma na Gomora?

⁸ Kandi shi abantu ba Sodoma na Gomora? Omushaija owaabaire ahikiriire orikwetwa Looti, akaba naatuura nabo. Mbwenu shi nitumanya yaaba yaababuuriire boona? Ngaaha. N’amazima bakaba nibakora ebintu bibi, kwonka shi bakaba nibamanya ekihikire? Ijuka ngu abashaija b’omu rurembo bakaba nibenda kuhamba abagyenyi ba Looti. Baibuli neegira ngu hakaba harimu “abato n’abakuru.” (Kut. 19:4; 2 Pet. 2:7) Nitumanya shi yaaba Yehova Ruhanga, ow’embabazi yaabacwereire orubanja rw’okutaija kuzooka? Yehova akahamiza Abrahamu ngu omu rurembo tiharimu na bantu ikumi abahikiriire. (Kut. 18:32) N’ahabw’ekyo bakaba batahikiriire, kandi Yehova akaba ahikire kubacwekyereza ahabw’ebikorwa byabo. Kwonka shi nitubaasa kugira ngu tihariho n’omwe aharibo oraazookye, omu ‘kuzooka kw’abatahikiriire’? Eki titurikubaasa kukihamya.

9. Niki eki tutarikumanya aha bikwatiraine na Sulemaani?

⁹ Kwonka Baibuli neegamba n’aha bantu abahikiriire abaahindukire abatahikiriire. Omugabe Sulemaani n’omwe aharibo. Akegyesibwa emihanda ya Yehova, kandi akatunga emigisha mingi, kwonka bwanyima akatandika kuramya baaruhanga b’ebishuba. Ebibi bye bikagwisa kubi Yehova, kandi oburemeezi obwarugiremu bukamara ebyasha bingi. N’amazima, Ebyahandiikirwe nibigira ngu ‘Sulemaani akagwejegyera, yaashanga baishenkuru,’ otwariiremu abashaija abeesigwa nk’Omugabe Daudi. (1 Bag. 11:5-9, 43; 2 Bag. 23:13) Kwonka shi omuringo ogu yaaziikirwemu n’obuhame ngu naija kuzoorwa? Ekyo Baibuli terikukigambaho. Abamwe nibabaasa kugira ngu omuntu ku arikufa naihwaho ekibi. (Rom. 6:7) Ekyo kihikire, kwonka tikirikumanyisa ngu buri omwe orikufa naija kuzooka, orikushusha ngu aine obugabe bw’okugaruka kuheebwa amagara. Okuzooka n’ekiconco kuruga ahari Ruhanga oine rukundo. Kandi naakiha abo abu arikwenda batungye omugisha gw’okumuheereza ebiro byona. (Yob. 14:13, 14; Yoh. 6:44) Mbwenu shi Sulemaani naija kutunga ekiconco ekyo? Yehova niwe arikumanya, itwe titurikumanya. Kwonka nitumanya ngu Yehova naija kukora ekihikire.

EKI TURIKUMANYA

10. Yehova naayehurira ata kyahika aha kucwera abantu orubanja? (Ezekieli 33:11) (Reeba n’ekishushani.)

¹⁰ Shoma Ezekieli 33:11. Yehova naatumanyisa oku arikwehurira aha kucwera abantu emanja. Entumwa Petero akahwerwa kugamba eki nabi Ezekieli yaahandiikire obu yaagamba ngu, Yehova ‘tarikwenda muntu weena kuhwerekyerera.’ (2 Pet. 3:9) Ahabw’amazima ago agarikuhuumuriza, nitumanya ngu Yehova tarikurahuka kucwekyerereza kimwe abantu. Aine embabazi nyingi, kandi naazooreka kyaba nikyetengyesa.

11. Ni baahi abataraazookye, kandi ekyo nitukimanya tuta?

¹¹ Niki eki turikumanya aha bantu abataraazoorwe? Omu Baibuli harimu eby’okureeberaho bikye.b Yesu akooreka ngu Yuda Iskaryota tarazookye. (Mak. 14:21; reeba na Yohaana. 17:12.c) Yuda akahakanisa Yehova Ruhanga, n’Omwana we akigyendereire. (Reeba Mako. 3:29) Kandi, Yesu akagira ngu bamwe aha beebembezi b’ediini abaamuhakaniise tibarikwija kuzooka. (Mat. 23:33) Kandi entumwa Paulo akagira ngu abeehagwire aha mazima abatarikweteisa tibarikwija kuzooka.—Heb. 6:​4-8; 10:29.

12. Niki eki turikumanya aha mbabazi za Yehova? Ha eby’okureeberaho.

¹² Kwonka shi niki eki turikumanya aha mbabazi za Yehova? Ayorekire ata ngu ‘tarikwenda muntu weena kuhwerekyerera?’ Teekateeka aha ku yaagiriire embabazi bamwe abaakozire ebibi by’amaani. Omugabe Daudi akakora ebibi by’amaani bikurataine, otwariiremu obushambani n’okwita. Kwonka, Daudi akeeteisa, kandi Yehova ahabw’embabazi ze akamusaasira. (2 Sam. 12:1-13) Obwire obwingi obu Omugabe Manaase yaamazire akakora ebibi by’amaani. Kwonka nabwo, ku yaayeteisize Yehova akamugirira embabazi kandi yaamusaasira. (2 Bus. 33:9-16) Eby’okureeberaho ebyo nibitwijutsya ngu Yehova naayoreka embabazi haaba hariho enshonga erikumureetera kukikora. Naija kuzoora abantu nk’abo ahabw’okugira ngu bakeetegyereza ngu bakakora ebibi by’amaani kandi baayeteisa.

13. (a) Ahabw’enki Yehova yaagiriire aba Nineeve embabazi? (b) Yesu akagamba ki aha ba Nineeve?

¹³ Nitumanya n’embabazi ezi Yehova yaagiriire aba Nineeve. Ruhanga akagambira Yona ati: “Obubi [bwabo] buhikire omu maisho gangye.” Kwonka ku baayeteisize ebibi byabo, Yehova akabasaasira. Akaba aine embabazi nyingi kukira Yona. Ruhanga akaijutsya Yona owaabaire aine ekiniga ngu aba Nineeve bakaba ‘batarikubaasa kutaanisa ndyo na mosho.’ (Yon. 1:1, 2; 3:10; 4:9-11) Kandi, Yesu akakoresa eky’okureeberaho ekyo kwegyesa aha buringaaniza bwa Yehova n’embabazi ze. Akagira ngu aba Nineeve abaayeteisize bakaba nibaija ‘kwemerera aha kiro ky’orubanja.’—Mat. 12:41.

14. Nikimanyisa ki aba Nineeve ‘okuzookyera okucwerwa orubanja’?

¹⁴ Kwonka shi okugira ngu aba Nineeve bakaba nibaija ‘kwemerera aha kiro ky’orubanja’ nikimanyisa ki? Yesu akaba naayegyesa aha ‘kuzookyera okucwerwa orubanja’ okw’omu biro by’omumaisho. (Yoh. 5:29) Omu Butegyeki bwe obw’Emyaka Rukumi nihaija kubaho “okuzooka kw’abahikiriire n’abatahikiriire.” (Byak. 24:15) Abatahikiriire nibaija ‘kuzookyera okucwerwa orubanja.’ Ekirikumanyisa ngu Yehova na Yesu nibaija kureeba emitwarize yaabo kandi bagishwijume, n’oku baraatware ebi baraabe beegyesiibwe, n’oku baraatware ebi baraayegye. Omunineeve ku araazookye akanga kuza omu kuramya okushemeire, naija kucwerwa orubanja rw’okucwekyererezibwa kimwe. (Isa. 65:20) Kwonka boona abaraacwemu kuramya Yehova omu bwesigwa, nibaija kugirirwa embabazi, kandi bagire amatsiko g’okutuuraho ebiro byona.—Dan. 12:2.

15. (a) Ahabw’enki twine kwetantara kugira ngu tihariho n’omwe aha baacwekyereziibwe omuri Sodoma na Gomora oraazooke? (b) Nitubaasa kwetegyereza tuta ebiri omuri Yuda 7? (Reeba akabokusi “Yuda Akaba Naamanyisa Ki?”)

¹⁵ Obu Yesu yaagamba aha bantu ba Sodoma na Gomora, akagira ngu “aha kiro ky’okucwa orubanja” ekifubiro kyabo kikaba nikiija kwemerwa okukira eky’abantu abaamwangire, n’enyegyesa ze. (Mat. 10:14, 15; 11:23, 24; Luk. 10:12) Akaba naamanyisa ki? Nitubaasa kuteekateeka ngu Yesu akarengyesereza. Kwonka ekyo tikwo kiri.d Kureka, nikireebeka ngu Yesu akaba naamanyisa eki yaagambire. “Ekiro ky’Okucwa Orubanja” eki yaabaire naagambaho kikaba nikikwata aha ba Nineeve n’aba Sodoma na Gomora. Abantu abo boona bakakora ebintu bibi. Kwonka aba Nineeve bakaba baine omugisha gw’okweteisa. Kandi, ijuka eki Yesu yaagambire aha ‘baraazookyere okucwerwa orubanja.’ Akagira ngu nibaija kutwariramu ‘abaakozire ebibi.’ (Yoh. 5:29) N’ahabw’ekyo, nikireebeka ngu hariho amatsiko ahabw’abantu ba Sodoma na Gomora. Nikibaasika kugira ngu bamwe aha bantu abo nibaija kuzooka, kandi tugire omugisha gw’okubeegyesa ebirikukwata ahari Yehova na Yesu Kristo.

16.Niki eki turikumanya aha bikwatiraine n’oku Yehova araacwemu aha bu araazoore? (Yeremia 17:10)

¹⁶ Shoma Yeremia 17:10. Omushororongo ogu nigworeka gye byona ebi turikumanya: Yehova niwe atwire ‘naacaaka ebiteekateeko,’ kandi arikushwijuma emitima. Aha bikwatiraine n’okuzooka okuraabeho omu biro by’omumaisho, naija ‘kuzimuurira omuntu weena nk’emitwarize ye oku eri.’ Yehova naija kworeka embabazi, kandi ahamire aha nshonga kyaba nikyetengyesa. N’ahabw’ekyo titwine kuteebereza ngu omuntu taraazooke okwihaho twaba nitumanya ngu buzima nikwo kiri.

‘OMUCWI W’EMANJA OW’ENSI YOONA NAIJA KUKORA EBIHIKIRE’

17. Hariho matsiko ki ahabw’abantu abaafiire?

¹⁷ Okuruga obu Adamu na Haawa baayegaita ahari Sitaane kandi bakagomera Yehova Ruhanga, abantu baingi batwire nibafa. “Omuzigu” rufu ka aitsire abantu baingi! (1 Kor. 15:26) Hariho matsiko ki ahabw’abantu abo boona? Bakye aha bakuratsi ba Kristo abeesigwa, 144,000, nibazooka batunga okutafa omu iguru. (Kush. 14:1) Abashaija n’abakazi baingi abeesigwa abaabaire nibakunda Yehova, nibaija kuba omuri abo abaraazookye omu kuzooka kw’abahikiriire, kandi nibaija kutuuraho ebiro byona omu nsi ku baraagume bari abeesigwa omu Myaka Rukumi ey’Obutegyeki bwa Kristo n’omu kugyezibwa okw’aha muheru. (Dan. 12:13; Heb. 12:1) Kandi omu Myaka Rukumi, “abatahikiriire,” otwariiremu n’abo abataraheereize Yehova nari ‘abaakozire ebibi,’ nibaija kuheebwa omugisha gw’okuhindura emitwarize yaabo, kandi babe abeesigwa. (Luk. 23:42, 43) Kwonka abantu abamwe bakaba bari babi munonga, bamaririire kugomera Yehova n’ekigyendererwa kye, n’ahabw’ekyo tarikwija kubazoora.—Luk. 12:4, 5.

18-19. (a) Ahabw’enki turikubaasa kwesiga omuringo ogu Yehova araacweremu abaafiire orubanja? (Isaaya 55:8, 9) (b) Nituza kugamba ahari ki omu kicweka ekirikukurataho?

¹⁸ Twine enshonga ki ezihikire ezirikutureetera kwesiga omuringo ogu Yehova arikucwa emanja zoona? Eego. Nka Abrahamu, nitwetegyereza gye ngu Yehova ahikiriire, niwe arikukirayo obwengye, kandi ‘n’omucwi w’emanja ow’ensi yoona’ omunyambabazi. Akatendeka Omwana we, kandi yaamuha obujunaanizibwa bw’okucwa emanja. (Yoh. 5:22) Bombi Ishe n’Omwana nibabaasa kumanya ekiri omu mutima gwa buri muntu. (Mat. 9:4) Omuri buri mbeera, nibakora “ekihikire.”

¹⁹ Ka tumaririire kugira obwesigye ngu Yehova naamanya ekirikukirayo oburungi. Nitumanya ngu tituhikire kucwa emanja, kwonka we ahikire kuzicwa. (Shoma Isaaya 55:8, 9.) N’ahabw’ekyo nitwesiga Yehova n’Omwana we kuba nibo baacwa emanja zoona, kandi twine obwesigye ngu Yesu n’Omugabe oine oburingaaniza n’embabazi omu muringo oguhikiriire nka Ishe. (Isa. 11:3, 4) Nitubaasa kugamba ki aha manja ezi Ruhanga araacwe ezirikukwata aha kubonabona kwingi? Niki eki tutarikumanya? Kandi niki eki turikumanya? Ekicweka ekirikukurataho nikiija kugarukamu ebibuuzo ebyo.