Gumizamu Noogyenda Ahabw’Okwikiriza

1. Ahabw’enki entumwa Paulo yaabaire naabaasa kuhurira amazirwe ku yaateekateekire aha by’enyima?

ENTUMWA PAULO akaba naamanya ngu eshaaha yoona naabaasa kwitwa, kwonka akaba naahurira amazirwe. Akabaasa kugira ati: “Mperize orugyendo rwangye, ndinzire okwikiriza.” (2 Tim. 4:​6-8) Paulo akabaasa kucwamu gye omu buheereza bwe obw’Ekikristaayo, kandi akaba naahamiza kimwe ngu Yehova naamwesiimisa. Naitwe nitwenda kucwamu gye kubaasa kusiimwa Ruhanga. Ekyo nitubaasa kukikora tuta?

2. Nikimanyisa ki kugyenda ahabw’okwikiriza?

² Paulo akeegambaho n’abandi Abakristaayo ati: ‘Nitugyenda ahabw’okwikiriza, ti habw’okureeba.’ (2 Kor. 5:7) Paulo akaba naamanyisa ki? Omu bwire bwa Baibuli, “okugyenda” obumwe nikimanyisa oku omuntu arikucwamu kutwaza. Omuntu orikugyenda ahabw’okureeba, naacwamu arikwihirira aha bi arikureeba, ebi arikuhurira, nari oku arikwehurira. Aha rubaju orundi, orikugyenda ahabw’okwikiriza, naacwamu arikwihirira aha ku arikwesiga Yehova Ruhanga. Ebikorwa bye nibyoreka ngu naahamiza kimwe ngu Ruhanga naija kumushumbuusha, kandi ngu naija kugasirwa omu buhabuzi oburi omu Kigambo kye.—Zab. 119:66; Heb. 11:6.

3. Ni birungi ki ebirikuruga omu kugyenda ahabw’okwikiriza? (2 Abakorinso 4:18)

³ Amazima gari ngu, twena obumwe nitucwamu turikwihirira aha bi turikureeba, ebi turikuhurira, nari aha nyehurira. Nitubaasa kugira oburemeezi, twacwamu aha nshonga nkuru turikwihirira aha bi turikureeba nari ebi turikuhurira byonka. Ahabw’enki? Ahabw’okuba ebi turikureeba nari ebi turikuhurira obumwe nibibaasa kutuhabisa. N’obu byakuba bitatuhabaise, twagumizamu nitugyenda ahabw’ebi turikureeba, nitubaasa kuhendera twehugize ebi Ruhanga arikwenda nari obuhabuzi bwe. (Mub. 11:9; Mat. 24:​37-39) Kwonka twagyenda ahabw’okwikiriza, nikiija kutworobera kucwamu “ebirikusiimwa Mukama.” (Efe. 5:10) Twakuratira obuhabuzi bwa Ruhanga nitugira obusingye bw’omu mutima n’okushemererwa. (Zab. 16:​8, 9; Isa. 48:​17, 18) Kandi twagumizamu turikugyenda ahabw’okwikiriza, nitwija kutunga amagara agatahwaho nyentsya.—Shoma 2 Abakorinso 4:18.

4. Omuntu naabaasa kumanya ata yaaba naagyenda ahabw’okwikiriza nari ahabw’okureeba?

⁴ Nitubaasa kumanya tuta yaaba nitugyenda ahabw’okwikiriza nari ahabw’okureeba? Obwire obwingi, twine kwebuuza tuti: Ni bintu ki ebirikutuhwera kucwamu? Nitucwamu turikwihirira aha bintu ebi turikureeba byonka? Nari nitwesiga Yehova n’obuhabuzi bwe? Ka tureebe oku turikubaasa kugumizamu turikugyenda ahabw’okwikiriza omu miringo eshatu mikuru: Twaba nitutoorana omurimo, twaba nitutoorana ow’okutaaha nawe omu bushwere, na twaheebwa obuhabuzi omu kibiina. Omu buri mbeera, nituza kugamba aha nshonga ezi twine kuteekateekaho kubaasa kucwamu gye.

WAABA NOOTOORANA OMURIMO

5. Ni bintu ki ebi twine kuteekateekaho twaba nitutoorana omurimo?

⁵ Twena nitwenda ngu tube nitubaasa kwehitsyaho ebirikwetengyesa n’eby’ab’eka yaitu. (Mub. 7:12; 1 Tim. 5:8) Emirimo emwe neeshashura esente nyingi. Neebaasa kuhwera omukozi kutunga ebirikwetengyesa ebya buri izooba n’okugira eki yaabiika kumuhwera omu biro by’omumaisho. Kwonka emirimo endiijo, neeshashura esente enkye ezirikubaasa kuhwera omukozi kuha ab’eka ye ebirikwetengyesa byonka. Twaba nitucwamu yaaba turaikirize omurimo, n’eky’obwengye kuteekateeka aha bwingi bw’esente ezi turaashashurwe. Kwonka, omuntu naabaasa kuba naagyenda ahabw’okureeba yaaba egyo niyo nshonga yonka ei arikutaho omutima.

6. Nitubaasa kugyenda tuta ahabw’okwikiriza kyahika aha kutoorana omurimo? (Abaheburaayo 13:5)

⁶ Twaba nitugyenda ahabw’okwikiriza, twine n’okuteekateka aha oku omurimo gurikubaasa kukwata aha mukago gwaitu na Yehova. Nitubaasa kwebuuza tuti: ‘Omurimo nigubaasa kunyetengyesa kwejumba omu bikorwa ebi Yehova arikwanga?’ (Enf. 6:​16-19) ‘Nigubaasa kutaahataaha omu ntebeekanisa yangye y’okuramya, nari kundeetera kumara obwire bwingi ntari n’eka yangye?’ (Fil. 1:10) Ku kiraabe nikwo kiri, tiky’obwengye kwikiriza omurimo nk’ogwo, n’obu kirikuba kitoorobi kutunga omurimo ogundi. Ahabw’okugira ngu nitugyenda ahabw’okwikiriza, nitucwamu omu muringo ogurikworeka ngu nituhamiza kimwe ngu Yehova naija kutuhwera kutunga ebirikwetengyesa.—Mat. 6:33; shoma Abaheburaayo 13:5.

7-8. Ow’eishe-emwe omuri South America akagyenda ata ahabw’okwikiriza? (Reeba n’ekishushani.)

⁷ Yetegyereze oku ow’eishe-emwe Javier,a kuruga South America, yaareebire obukuru bw’okugyenda ahabw’okwikiriza. Naagira ati: “Nkaba mpandikire ndikushaba omurimo gw’esente nyingi, kandi ogwabaire nigwija kumbaasisa kutunga byona ebi naabaire niinyenda.” Kwonka, Javier akaba aine ekyetengo ky’okuba payoniya. Naayongyeraho ati: “Nkeetwa kubuuzibwa kureeba yaaba mpikire kuheebwa omurimo. Ntakabuuziibwe, nkashaba Yehova kumpwera, nkaba nyine obwesigye ngu naamanya ekirikukirayo oburungi ahabwangye. Nkaba niinyenda ngu nkore gye mbaase kushashurwa esente nyingi, kwonka nkaba ntarikubaasa kukora omurimo ogwo gwaba gutarampwere kuhika aha bigyendererwa byangye by’omwoyo.”

⁸ Javier naagira ati: “Obu naabaire nimbuuzibwa, mukama w’omurimo akangira ngu nkaba nyine kukora nkarenzya aha shaaha eza butoosha. Omu muringo gw’ekitiinisa nkamugira ngu ekyo tindikubaasa kukikora ahabw’obuheereza bwangye.” N’ahabw’ekyo, Javier akacwamu kutaikiriza omurimo. Bwanyima ya saabiiti ibiri, akaba payoniya. Kandi bwanyima omu mwaka ogwo, akatunga omurimo gutari gw’obutwire. Naagira ati: “Yehova akahurira okushaba kwangye, kandi yaampa omurimo ogurikumpwera kuba payoniya. Buzima nyine okushemererwa ahabw’okutunga omurimo ogurikumbaasisa kugira obwire bw’okuheereza Yehova n’ab’eishe-emwe.”

9. Nitwegyera ki ahari Trésor?

⁹ Kandi shi ku twakwetegyereza ngu omurimo ogu twine niguturemesa kugyenda ahabw’okwikiriza? Teekateeka aha ky’okureeberaho kya Trésor, owa Congo. Naagira ati: “Nkaba ninkunda omurimo musya ogu naatungire. Nkaba nintunga omushara ogurikukira emirundi eshatu ogu naabaire ninshashurwa enyima, kandi nkaba nimpeebwa ekitiinisa.” Kwonka, Trésor akaba naakira kwosha enteerane ahabw’okukora akarenzya eshaaha eza butoosha. Kandi akaba naagyemeserezibwa aha murimo kushwekyerera ebikorwa bitari by’obwesigwa. Trésor akaba naayenda kugutsigaho, kwonka akaba naatiina kugumira aho ataine murimo. Niki ekyamuhweraire? Naagira ati: “Habakuuki 3:​17-19 hakampwera kwetegyereza ngu n’obu naakushashurwa esente nkye, Yehova akaba naija kugira oku yaandeeberera. N’ahabw’ekyo nkatsigaho omurimo ogwo.” Naahendera arikugira ati: “Abakozi baingi nibateekateeka ngu kubaasa kukora omurimo ogurikushashura esente nyingi, omuntu aine kwefeerereza buri kimwe otwariiremu eka ye, n’eby’omwoyo. Nyine okushemererwa ahabw’okurinda omukago gwangye na Yehova, n’eka yangye. Omwaka ogwakuratsireho, Yehova akampwera kutunga omurimo ogurikumbaasisa kworobya embeera zangye n’okwongyera kwejumbira kimwe omu mirimo y’Ekikristaayo. Twayebembeza ebi Yehova arikukunda, nitubaasa kugumirwa kutunga esente zirikumara, kwonka Yehova naija kutureeberera.” Twayesiga obuhabuzi bwa Yehova n’ebi arikuturaganisa, nitwija kugumizamu nitugyenda ahabw’okwikiriza, kandi naija kutuha emigisha.

WAABA NOOTOORANA OW’OKUTAAHA NAWE OMU BUSHWERE

10. Niki ekirikubaasa kutureetera kugyenda ahabw’okureeba twaba nitutoorana ow’okutaaha nawe omu bushwere?

¹⁰ Obushwere n’ekiconco kuruga ahari Yehova, kandi n’eky’obuhangwa kwenda kutaaha omu bushwere. Munyaanyazi-itwe yaaba naasherura ow’okutaaha nawe omu bushwere, naabaasa kuteekateeka aha mitwarize y’ow’eishe-emwe, endeebeka ye, oku arikugambwaho, esente ezi aine, oku arikureeberera eka ye, n’oku arikumureetera kwehurira.b Ebintu ebyo byona ni bikuru. Kwonka, munyaanyazi-itwe yaaba nibyo yaateekateekaho byonka, naaba naagyenda ahabw’okureeba.

11. Nitubaasa kugyenda tuta ahabw’okwikiriza twaba nitutoorana ow’okutaaha nawe omu bushwere? (1 Abakorinso 7:39)

¹¹ Yehova ka aine kuba naayesiimisa banyaanyazi-itwe n’ab’eishe-emwe abarikukuratira obuhabuzi bwe aha bikwatiraine n’okutoorana ow’okutaaha nabo omu bushwere! Nk’eky’okureeberaho, nibateekateeka aha kwehanangiriza okw’okutegyereza kuhitsya baakura ekirikumara kubaasa kutandika kuriima. (1 Kor. 7:36) Nibasherura ow’okutaaha nabo omu bushwere barikwihirira aha mitwarize ei Yehova arikugira ngu neija kubahwera kuba nyineeka nari omukazi murungi. (Enf. 31:​10-13, 26-28; Efe. 5:33; 1 Tim. 5:8) Omuntu otari Mujurizi wa Yehova yaabarigira niboorobera obuhabuzi obw’okutaaha omu bushwere “omuri Mukama,” oburi omu 1 Abakorinso 7:39. (Kishome.) Nibagumizamu barikugyenda ahabw’okwikiriza, baine obwesigye ngu Yehova naija kufayo aha nyehurira zaabo kukira ondiijo weena.—Zab. 55:22.

12. Niki eki orikwegyera ahari Rosa?

¹² Teekateeka aha kyahikire ahari Rosa, payoniya omuri Colombia. Omurimo gwe gukamureetera kuguma naabugana omushaija owaabaire atari Mujurizi wa Yehova owaatandikire kumurigira. Rosa nawe akaba naamukunda. Rosa naagira ati: “Akaba naareebeka nk’omushaija orikutwaza gye. Akaba naayehayo kuhwera ab’omu kyanga kye, kandi ataine micwe mibi. Nkaba ninkunda oku yaabaire naantwariza. Akaba aine buri kimwe eki naabaire niinyenda omu mushaija, kwonka akaba atari Mujurizi wa Yehova.” Naayongyeraho ati: “Kikaba kigumire kumwangira ahabw’okuba nikyo naabaire nimpurira ndikwenda. Omu bwire obwo, nka ninyehurira ndi nyenka, kandi nkaba niinyenda kuza omu bushwere, kwonka nkaba ntakatungire ow’eishe-emwe ow’okubutaahamu nawe.” Kwonka nabwo, Rosa tarataire omutima aha bi yaabaire naareeba byonka. Akateekateeka aha ku okucwamu okwo, kwabaire nikubaasa kukwata aha mukago gwe na Yehova. N’ahabw’ekyo, akarekyera aho kukoragana n’omushaija ogwo, kandi yaatunga bingi by’okukora omu buheereza. Bwanyima y’akaire, akeetwa kuza omu Ishomero ry’Ababuurizi b’Obukama, kandi hati ni payoniya ow’omutaano. Rosa naagira ati: “Yehova ampweraire kugira okushemererwa kwingi omu mutima.” N’obu kiraabe kitoorobi kugyenda ahabw’okwikiriza omu nshonga ezirikukwata aha nyehurira, butoosha nikyo kirikukirayo oburungi.

EKIBIINA KYATUHA EBY’OKUKURATIRA

13. Niki ekirikubaasa kutureetera kugyenda ahabw’okureeba twaheebwa obuhabuzi omu kibiina?

¹³ Butoosha nitutunga eby’okukuratira kuruga aha bareeberezi, omureeberezi wa saketi, ofiisi y’eitaagi, nari Akakiiko Akareeberezi kutuhabura omu kuramya kwaitu. Kwonka shi obumwe ku twakuba tuteetegyereize ahabw’enki twaheebwa obuhabuzi nanka? Nitubaasa kuteekateeka aha ku obuhabuzi burikubaasa kwongyera kugumisa embeera yaitu kyonka. Nitubaasa n’okutandika kuta omutima aha butahikiirira bw’ab’eishe-emwe abatuhaire obuhabuzi.

14. Niki ekirikubaasa kutuhwera kugyenda ahabw’okwikiriza twaheebwa obuhabuzi omu kibiina? (Abaheburaayo 13:17)

¹⁴ Twagyenda ahabw’okwikiriza, nituba twine obwesigye ngu Yehova niwe arikutwebembera kandi naamanya embeera zaitu. N’ekirikurugamu, nitworoba ahonaaho, kandi nitukikora twine emiteekateekyere mirungi. (Shoma Abaheburaayo 13:17.) Nitumanya ngu okworoba kwaitu nikwongyera aha bumwe bw’ekibiina. (Efe. 4:​2, 3) Nitugira obwesigye ngu n’obu ab’eishe-emwe abarikutureeberera omu by’omwoyo baraabe batahikiriire, Yehova naija kutuha emigisha twayoroba. (1 Sam. 15:22) Omu bwire obuhikire, naija kugonjoora ekintu kyona ekiine kushoboororwa.—Mik. 7:7.

15-16. Niki ekyahweraire ow’eishe-emwe kugyenda ahabw’okwikiriza n’obu yaabaire naabangaanisa aha buhabuzi obu yaahairwe? (Reeba n’ekishushani.)

¹⁵ Teekateeka aha ky’okureeberaho ekirikworeka emigasho erikuruga omu kugyenda ahabw’okwikiriza. N’obu Orusipania ruri orurimi orurikukoresibwa munonga omuri Peru, abantu baingi nibakunda kukoresa endimi ezirikugambwa omu kicweka ekyo. Rumwe aharizo ni Quechua. Kumara emyaka, ab’eishe-emwe na banyaanyazi-itwe abarikukoresa orurimi rwa Quechua bakaba nibasherura abarikurugamba omu kicweka kyabo. Kwonka kubaasa kworobera ebiragiro bya gavumenti hakakorwa empinduka omu muringo gw’okubasherura. (Rom. 13:1) N’ekyarugiremu, abamwe bakateekateeka ngu nikiija kuremesa omurimo gw’okubuurira omu kicweka ekyo. Ahabw’okugira ngu ab’eishe-emwe bakoorobera obuhabuzi, Yehova akaha omugisha okuteeraho kw’abo, baatunga abantu baingi abarikugamba orurimi rwa Quechua.

¹⁶ Kevin, omureeberezi ori omu kibiina ekirikukoresa Quechua akaba ari omwe aha baabaire beerarikiriire. Naashoboorora ati: “Nkateekateeka ngu, nitwija kutunga tuta abantu abarikugamba orurimi rwa Quechua?” Kevin akakora ki? Naagira ati: “Nkaijuka ebiri omu Enfumu 3:5. Kandi nkateekateeka ahari Musa. Akaba aine kwebembera Abaisraeli kuruga Misri barikwambuka Enyanja Erikutukura, ekyabaire nikireebeka nka ekitarikubaasika ahabw’okuba Abanyamisri bakaba nibabaasa kubakora kubi. Kwonka, akoorobera Yehova, kandi akamuha emigisha erikureebwa butunu.” (Kur. 14:​1, 2, 9-11, 21, 22) Kevin akaba ayeteekateekire kukora empinduka. Niki ekyarugiremu? Naagira ati: “Nkatangaarira oku Yehova yaatuhaire omugisha. Enyima, tukaba tugyenda munonga omu kubuurira, kandi obumwe tutunga omuntu omwe nari babiri abarikugamba orurimi rwa Quechua. Hati nituta munonga omutima aha myanya erimu abantu baingi abarikugamba Quechua. Ekirugiremu, tutungire abantu baingi b’okugaaniira nabo, ab’okugarukira, n’abeegi ba Baibuli. Omuhendo gw’abantu abarikwija omu nteerane zaitu gweyongyeire.” Eego, twagyenda ahabw’okwikiriza, butoosha Yehova naatuha emigisha.

17. Waayega ki omu kicweka eki?

¹⁷ Twayetegyereza oku turikubaasa kugumizamu nitugyenda ahabw’okwikiriza omu miringo eshatu emikuru. Kwonka twine kuguma nitugyenda ahabw’okwikiriza omu buri mbeera, nka twaba nitutoorana eby’okweshemeza, twaba nitucwamu aha bikwatiraine n’obwegyese, n’okworora abaana. Kyona eki turaacwemu, titwine kwebemberwa ebi turikureeba byonka, kureka n’omukago gwaitu na Yehova, obuhabuzi bwe, n’ekiraganiso kye ky’okutureeberera. Twakora ekyo, nitwija ‘kuguma nitugyendera omu iziina rya [Yehova] Ruhanga waitu okuhitsya ryari na ryari.’—Mik. 4:5.