Omukono gwa Yehova Tigukabaga Mugufu

1. Musa akooreka ata ngu naayesiga Yehova obu yaayebembera Abaisraeli kuruga Misri?

MUSA n’omwe aha bantu abarikugambwaho omu kitabo kya Abaheburaayo abaayorekire okwikiriza kw’omutaano. (Heb. 3:​2-5; 11:​23-25) Akooreka ngu aine okwikiriza obu yaayebeembera Abaisraeli kuruga Misri. Taratiinire Faraho n’eihe rye. Ahabw’okwesiga Yehova, akeebembera abantu yaabarabya omu Nyanja Erikutukura, n’omu ihamba. (Heb. 11:​27-29) N’obu Abaisraeli baingi baarekyeire aho kwesiga ngu Yehova naabaasa kubareeberera, Musa we akagumizamu naayesiga Ruhanga we. Okwikiriza kwa Musa tikurafiire busha, ahakuba Ruhanga akakora eky’okutangaaza yaaha abantu eby’okurya n’amaizi by’okubabaisaho omu ihamba eryabaire rikarangataine.a—Kur. 15:​22-25; Zab. 78:​23-25.

2. Ahabw’enki Ruhanga yaabuurize Musa ati: “Omukono gwa [Yehova] gubaire mugufu”? (Okubara 11:​21-23)

² N’obu Musa araabe yaabaire aine okwikiriza kuhami, bwanyima y’omwaka gumwe Yehova aherize kucungura Abaisraeli omu muringo gw’eky’okutangaaza, Musa akatandika kubangaanisa yaaba Yehova naabaasa kuha abantu be enyama. Musa akaba atarikumanya oku Yehova yaabaire naija kuha obukaikuru bw’abantu abaabaire bacuumbikire omu ihamba enyama erikumara. N’ahabw’ekyo Yehova akabuuza Musa ati: “Omukono gwa [Yehova] gubaire mugufu?” (Shoma Okubara 11:​21-23.) Ebigambo “omukono gwa [Yehova]” nibimanyisa omwoyo gurikwera, nari amaani ge agarikureebekyera omu bikorwa. Yehova akaba ari nk’orikubuuza Musa ati: ‘Buzima nooteekateeka ngu tindikubaasa kukora eki ndikwenda?’

3. Ahabw’enki twine kuta omutima aha eky’okureeberaho kya Musa n’Abaisraeli?

³ Oreebuurizeho yaaba Yehova naija kukureeberera n’ab’eka yaawe omu by’omubiri? Yaaba nikwo kiri, nari tikwo kiri, ka tushwijume eky’okureeberaho kya Musa n’Abaisraeli, abaaremirwe kwesiga ngu Ruhanga naabaasa kubareeberera. Emisingye y’omu Byahandiikirwe erikukwata aha byabaireho neija kutuhwera kwongyera kugira obwesigye ngu omukono gwa Yehova tigukabaga mugufu.

YEGYERA AHARI MUSA N’ABAISRAELI

4. Niki ekirikubaasa kuba kyareetaire baingi kubangaanisa yaaba Yehova naabaasa kubareeberera omu by’omubiri?

⁴ Yetegyereze ebyetooroire emishororongo egyo. Eihanga rya Israeli, ‘n’omutwe muhango gw’ebijwangye by’abantu’ abatari Baisraeli bakamara obwire omu ihamba barikuruga Misri kuza omu Nsi Eyaaraganisiibwe. (Kur. 12:38; Bir. 8:15) Omutwe gw’ebijwangye bakatamwa okurya emaanu, kandi n’Abaisraeli baingi nabo bakatandika kwetomboita. (Kub. 11:​4-6) Abantu bakatandika kwetenga eby’okurya ebyabaire biri Misri. Bakagyemesereza munonga Musa, yaahika aha kuteekateeka ngu niwe ashemereire kubaha enyama.—Kub. 11:​13, 14.

5-6. Nitubaasa kwegyera ki aha ku entwaza y’ebijwangye yaakwatsire aha Baisraeli abaingi?

⁵ Obutasiima bw’ebijwangye bukakwata aha Baisraeli. Kandi naitwe, abantu entasiima nibabaasa kutureetera kutamarwa n’ebi Yehova arikutuha. Ekyo nikibaasa kubaho twatandika kwetenga ebintu ebi twatsigireho nari twagirira abandi eihari ahabw’ebi baine. Kwonka, nitushemererwa twateeraho kumarwa n’ebi twine, n’obu twakuba turi mu mbeera ki.

⁶ Abaisraeli bakaba baine kwijuka eki Ruhanga yaabaire abahamiize, ngu baahika omu ka yaabo ensya, nibaija kwesiimira ebintu birungi bingi. Ekiraganiso ekyo kikaba nikiija kuhikiirira omu Nsi Eyaaraganisiibwe, beitu butari obu baabaire nibaraba omu ihamba. Nikyo kimwe, omu mwanya gw’okuta omutima aha bi tutarikubaasa kutunga omu nsi egi, twine kuteekateeka aha bi Yehova araganiise kutuha omu nsi ensya. Nitubaasa n’okuteekateeka aha Byahandiikirwe ebirikubaasa kutuhwera kwongyera kwesiga Yehova.

7. Ahabw’enki nitubaasa kugira obwesigye ngu omukono gwa Yehova tigubaire mugufu?

⁷ Kwonka nabwo, noobaasa kwebuuza ahabw’enki Ruhanga yaabuurize Musa ati: “Omukono gwa [Yehova] gubaire mugufu?” Yehova naabaasa kuba yaabaire naahwera Musa kuteekateeka aha mukono gwe ogw’amaani n’oku arikugukoresa kutuhwera. Ruhanga akaba naabaasa kuha Abaisraeli enyama erikumara n’obu baraabe baabaire bari omu ihamba. Ruhanga akooreka amaani ge arikukoresa ‘engaro z’amaani n’omukono ogubangire.’ (Zab. 136:​11, 12) N’ahabw’ekyo twagyezibwa, titushemereire kuteekateeka ngu omukono gwa Yehova tigurikubaasa kutuhika.—Zab. 138:​6, 7.

8. Nitubaasa kwerinda tuta kukora enshobe nk’ei baingi baakozire bari omu ihamba? (Reeba n’ekishushani.)

⁸ Bwanyima Yehova akaha abantu enyama, arikubooherereza endahi nyingi. Kwonka, Abaisraeli tibarasiimire Ruhanga ahabw’eky’okutangaaza ekyo. Kureka, baingi aharibo bakasingurwa omururu. Buri izooba bakaba nibarundaana endahi nyingi. Yehova akagirira ekiniga abantu “abaayetengire,” kandi yaabafubira. (Kub. 11:​31-34) Nitubaasa kwegyera aha ky’okureeberaho ekyo. Twine kwegyendesereza omutego gw’omururu. Yaaba turi abagaiga nari abooro, twine kuta omutima aha kwebiikira “eitungo omu iguru” turikuteeraho kugira omukago murungi na Yehova na Yesu. (Mat. 6:​19, 20; Luk. 16:9) Twakora tutyo, nitubaasa kugira obwesigye ngu Yehova naija kutureeberera.

9. Niki ekirikutuhamiza ngu Ruhanga naija kutushagika?

⁹ Yehova ayeteekateekire kukoresa omukono gwe kuhwera abantu be obunaku obu. Kwonka, eki tikirikumanyisa ngu tituraije kuburwa eby’okutubaisaho nari kutagira enjara.b Kwonka Yehova tarikwija kututsigaho. Naija kutukwatirira twahikwaho okugyezibwa kw’emiringo etari emwe. Ka twetegyereze embeera ibiri obu turikubaasa kworeka ngu nitwesiga Yehova ngu naija kukoresa omukono gwe kutuha ebirikwetengyesa eby’omubiri: (1) twaba twine oburemeezi omu by’entaatsya (2) na twaba nitwetebeekanisiza ebirikwetengyesa omu biro by’omumaisho.

WAABA OINE OBUREMEEZI OMU BY’ENTAATSYA

10. Nitubaasa kuhikwaho buremeezi ki omu by’entaatsya?

¹⁰ Emperu y’ensi egi yaaguma neirira haihi, eby’entaatsya nibiija kwongyera kuguma. Obutabanguko omu by’obutegyeki, obwesharingo, ebihikiirizi, nari ebigwererezi bisya nibibaasa kureetaho enshohoza ezitarikwetengyesa, nari kufeerwa omurimo, ebintu byaitu, nari eka yaitu. Nitubaasa kusherura omurimo omu mwanya musya nari kuteekateeka aha kufurura eka yaitu kuza omu mwanya ogundi ahu turikubaasa kutunga ebyetengo by’omubiri. Niki ekirikubaasa kutuhwera kucwamu omu muringo ogurikworeka ngu nitwesiga Yehova?

11. Niki ekirikubaasa kukuhwera kwemera oburemeezi bw’eby’esente? (Luka 12:​29-31)

¹¹ Omuringo gw’okubanza kandi ogurarahukye kukuhwera, n’okugambira Yehova ebirikukwerarikiriza. (Enf. 16:3) Mushabe obwengye oburikwetengyesa kucwamu gye, n’omutima ogwikaikaine kugira ngu ‘oteemereza omutima’ aha mbeera yaawe. (Shoma Luka 12:​29-31.) Mweshengyereze kukuhwera kumarwa n’ebirikwetengyesa. (1 Tim. 6:​7, 8) Condooza omu bitabo byaitu aha ku orikubaasa kusingura oburemeezi omu by’esente. Baingi babaasize kugasirwa omu biri aha jw.org ebirikukwata aha kusingura oburemeezi omu by’entaatsya.

12. Niki bibuuzo ki ebirikubaasa kuhwera Omukristaayo kucwamu gye aha bikwatiraine n’eka ye?

¹² Abamwe babaasize kwohibwa kwikiriza emirimo erikubeetengyesa kutsigaho amaka gaabo, kwonka butoosha okucwamu okwo kushangirwe kutari kw’obwengye. Otakaikiriize omurimo musya, otateekateeka aha birungi ebi orikubaasa kutunga omu by’entaatsya byonka, kureka oshwijume n’oku gurikubaasa kukwata aha ntebeekanisa yaawe y’eby’omwoyo. (Luk. 14:28) Yebuuze oti: ‘Obushwere bwangye nibubaasa kukwatwaho buta naatsigaho ou ndi nawe omu bushwere? Ekyo nikiija kukwata kita aha buheereza bwangye n’obumwe obu nyine n’ab’eishe-emwe?’ Waaba oine abaana, oshemereire kwebuuza ekibuuzo kikuru eki: ‘Ninza kukuza nta abaana bangye ndikubahana, kandi ndikubeegyeseza omuri Yehova naaba ntari nabo?’ (Efe. 6:4) Yebemberwe emiteekateekyere ya Ruhanga, etari y’eka, nari ey’abanywani abatarikuha ekitiinisa emisingye y’omu Byahandiikirwe.c Tony, orikutuura omuri burengyerwa izooba bwa Asia, akatunga emirimo mirungi mingi eyabaire neemwetengyesa kuza kukorera omu ihanga erindi. Kwonka, bwanyima y’okushaba aha nshonga egyo n’okugigaaniiraho n’omukazi we, akacwamu kutaza kukora emirimo egyo, kureka akateeraho munonga kutuubya aha nshohoza yaabo. Tony naagira ati: “Ntungire omugisha gw’okuhwera abantu baingi kumanya Yehova, kandi abaana baitu nibakunda amazima. Eka yaitu twegire ngu twata omu nkora ebigambo ebiri omuri Matayo 6:​33, Yehova naija kutureeberera.”

OKUTEBEEKANISA EBIRIKWETENGYESA NYENTSYA

13. Ni bintu ki ebi twine kukora hati kubaasa kwebaisaho twahika omu myaka ya bukuru?

¹³ Okwikiriza kwaitu omu mukono gwa Yehova nikubaasa kugyezibwa twateekateeka oku embeera zaitu zirikubaasa kuba twahika omu myaka ya bukuru. Baibuli neetuhiga kukora n’amaani kugira ngu tubaase kwereeberera omu by’omubiri omu biro by’omumaisho. (Enf. 6:​6-11) N’eky’obwengye, twaba nitubaasa, kugira eki twabiika kutuhwera omu biro by’omumaisho. Esente nizibaasa kutuha oburinzi buringaniire. (Mub. 7:12) Kwonka, tushemereire kwetantara kuta omutima aha by’obugaiga.

14. Ahabw’enki twine kuteekateeka aha biri omu Abaheburaayo 13:5 twaba nitutebeekanisa eby’okutubaisaho omu biro by’omumaisho?

¹⁴ Yesu akooreka ngu n’eky’obushema kwebiikira sente haza otari “mutungi ahari Ruhanga.” (Luk. 12:​16-21) Tihaine orikumanya ekiraabeho nyentsya. (Enf. 23:​4, 5; Yak. 4:​13-15) Itwe abakuratsi ba Kristo nituhikwaho oburemeezi bw’omutaano. Yesu akagira ngu tushemereire kuba tweteekateekire ‘kutsigaho’ ebi twine byona kubaasa kuba abeegi be. (Luk. 14:33) Abakristaayo b’omu kyasha ky’okubanza omuri Buyudaaya bakaikiriza kufeerwa ebintu byabo baine okushemererwa. (Heb. 10:34) Omu bwire obu, ab’eishe-emwe baingi beefeerereize okugira entaatsya nungi ahabw’okwanga kwejumba omu by’obutegyeki. (Kush. 13:​16, 17) Niki ekibahweraire kukora ekyo? Nibeesigira kimwe ekiraganiso kya Yehova eki: “Tindikutsigaho, kandi tindikuhemukaho na kakye.” (Shoma Abaheburaayo 13:5.) Nituteeraho nk’oku turikubaasa kwetebeekanisiza ebiraayetengyese nyentsya, kandi twahikwaho ebihikiirizi, nitwesiga Yehova kutuhwera.

15. Abazaire baine kugira miteekateekyere ki eringaniire aha baana baabo? (Reeba n’ekishushani.)

¹⁵ Omu mahanga agamwe, omushaija n’omukazi nibazaara abaana kugira ngu baije kubareeberera bahika omu myaka ya bukuru. Ekirikumanyisa ngu, nibareeba abaana nk’abashemereire kubabaisaho baaba batakikora. Kwonka, Baibuli neeyoreka ngu abazaire nibo bashemereire kureeberera abaana baabo. (2 Kor. 12:14) Amazima gari ngu, obumwe abazaire bashemereire kuhwerwa baakura, kandi abaana abaingi nibashemererwa kukora entebeekanisa egyo. (1 Tim. 5:4) Kwonka abazaire Abakristaayo nibamanya ngu okushemererwa okurikukirayo, tikurikuruga omu kworora abaana orikwenda ngu bakushagike omu by’entaatsya, kureka nikuruga omu kubahwera kuba abaheereza ba Yehova.—3 Yoh. 4.

16. Abazaire nibabaasa kuhwera bata abaana baabo kwetebeekanisa kwebaisaho? (Abaefeso 4:28)

¹⁶ Taho eky’okureeberaho kirungi orikwegyesa abaana baawe kwesiga Yehova baaba nibeetebeekanisa kwebaisaho. Kuruga omu buto, boorekye omugasho gw’okukora n’amaani. (Enf. 29:21; shoma Abaefeso 4:28.) Baaba nibakura, bahwere kukora gye aha ishomero. Abazaire nibaba baine kucondooza aha misingye ya Baibuli kandi bakagigyenderaho kuhwera abaana baabo kucwamu oku baraakorese obwegyese bwabo. Ekyo nikiija kuhwera abaana baabo kwebaisaho, n’okwejumbira kimwe omu buheereza bw’Ekikristaayo.

17. Nitubaasa kugira bwesigye ki?

¹⁷ Abaheereza ba Yehova abarikumuhamiraho nibabaasa kugira obwesigye ngu naabaasa kandi aine ekyetengo ky’okubaha eby’okubabaisaho. Twaba nitwirira haihi n’emperu y’entebeekanisa y’obusingye obu, obwesigye bwaitu omuri Yehova nibwija kugyezibwa. Kwonka n’obu haakubaho ki, ka tumaririire kwesiga Yehova ngu naija kukoresa amaani ge kutuha eby’omubiri ebirikwetengyesa. Nitubaasa kugira obwesigye ngu omukono gwe ogw’amaani, kandi ogubangire tigurikubaasa kuba mugufu.