Hwera Abeegi ba Baibuli Kuhamira aha Mazima

1-2. (a) Ahabw’enki abeegi ba Baibuli abamwe nibeeziringa kuhamira aha mazima? (b) Nituza kushwijuma ki omu kicweka eki?

HAINE ebyabaire nibikuremesa kuba omwe aha Bajurizi wa Yehova? Obundi okaba nootiina kuhiiganisibwa abu orikukora nabo, banywani baawe, nari ab’eka yaawe. Nari noobaasa kuba waabaire nooteekateeka ngu torikubaasa kuhikiiriza emitindo ya Yehova. Kyaba nikwo kiri, noobaasa kwetegyereza enyehurira z’abeegi ba Baibuli abarikweziringa kuheereza Yehova.

² Yesu akaba naamanya ngu okutiina nk’okwo nikubaasa kureetera bamwe kuremwa kutunguuka omu by’omwoyo. (Mat. 13:​20-22) Kwonka tararekyeire aho kuhwera abaabaire nibeeziringa kuba abakuratsi be. Kureka, akooreka entumwa ze oku barikubaasa kuhwera abantu nk’abo (1) kumanya ebirikubaremesa kutunguuka, (2) kwongyera kuhamya rukundo ei bainiire Yehova, (3) kukora empinduka omu bi barikutwara nka ebikuru, kandi (4) n’okusingura ebirikubaremesa. Nitwenda kugyendera aha bi Yesu yaagambiire entumwa ze twaba nituhwera abeegi ba Baibuli kuhamira omu mazima. Mbwenu shi nitubaasa kukikora tuta twaba nitukoresa akatabo Yesiimire Amagara Ebiro Byona!?

HWERA OMWEGI WA BAIBULI KUMANYA EBIRIKUMUREMESA KUTUNGUUKA

3. Niki ekirikubaasa kuba kyaremeise Nikodemu kuba omwe aha beegi ba Yesu?

³ Nikodemu, omwe aha bategyeki b’Abayudaaya, akaba aine ebyabaire nibimuremesa kuba omwe aha beegi ba Yesu. Bwanyima y’ameezi nka mukaaga Yesu aherize kutandika obuheereza bwe omu nsi, Nikodemu akeetegyereza ngu akaba ari omujwekyerwa wa Ruhanga. (Yoh. 3:​1, 2) Kwonka, “ahabw’okutiina Abayudaaya” akacwamu kugaaniira na Yesu bwesherekye. (Yoh. 7:13; 12:42) Naabaasa kuba yaabaire naateekateeka ngu naaza kufeerwa omwanya gwe yaahinduka omukuratsi wa Yesu.a

4. Yesu akahwera ata Nikodemu kumanya eki Ruhanga yaabaire naayenda ngu akore?

⁴ Nikodemu akaba naamanya gye ebiragiro, kwonka akaba naayetenga kumanya eki Yehova yaabaire naayenda ngu akore. Mbwenu shi Yesu akamuhwera ata? Akaba ayeteekateekire kwefeereza obwire bwe kugaaniira na Nikodemu omu shaaha z’ekiro. Yesu akagambira Nikodemu butunu aha ki aine kukora kuhinduka omwegi we. Akamuhiga kweteisa ebibi bye, kubatizibwa, n’okwikiririza omu mwana wa Ruhanga.—Yoh. 3:​5, 14-21.

5. Nitubaasa kuhwera tuta omwegi wa Baibuli kumanya ekirikumuremesa kutunguuka?

⁵ N’obu omwegi wa Baibuli yaakuba naayetegyereza gye ebyahandiikirwe, naaba aine kuhwerwa kubaasa kumanya ekirikumuremesa kutunguuka. Omurimo gw’okwebaisaho nari okuhakanisibwa ab’eka ye nikibaasa kumureetera kuremwa kuta omutima aha bigyendererwa bye by’omwoyo. N’ahabw’ekyo, gira obwire bw’okuba nawe kumuhwera. Noobaasa kumutaayaayisa kugira ngu mumare hamwe obwire murikugaaniira. Omu bwire nk’obwo, nikibaasa kumworobera kukugambira oburemeezi obu arikurabamu. Noobaasa kumuhiga kukora empinduka ezirikwetengyesa, kugira ngu ayorekye rukundo ei ainiire Yehova, beitu hatari ahabw’okwenda kukushemeza.

6. Noobaasa kuhwera ota omwegi wa Baibuli kugira obumanzi bw’okuta omu nkora ebi arikwega? (1 Abakorinso 16:13)

⁶ Omwegi wa Baibuli yaaba naahamiza kimwe ngu Yehova naija kumuhwera kugyendera aha misingye ya Baibuli, naagira obumanzi bw’okuta omu nkora ebi arikwega. (Shoma 1 Abakorinso 16:13.) Obujunaanizibwa bwawe nibubaasa kushushanisibwa n’obw’omushomesa ow’aha eishomero. Obu waabaire okiri aha eishomero, ni mushomesa ki ou waabaire nookira kukunda? Obundi n’ogwo owaabaire naakuhwera kweyikiririzamu. Nikyo kimwe, omwegyesa murungi wa Baibuli tarikwegyesa omwegi eki Ruhanga arikwenda ngu akore kyonka, kureka naamuhamiza ngu Yehova naija kumuhwera kukora empinduka ezirikwetengyesa. Ekyo noobaasa kukikora ota?

HWERA OMWEGI WAAWE KUHAMYA RUKUNDO EI AINIIRE YEHOVA

7. Yesu akahwera ata abantu abaabaire bamuhurikiize kwongyera kukunda Yehova?

⁷ Yesu akaba naamanya ngu abeegi be baakunda Yehova nikiija kubahiga kugyendera aha bi baayegire. N’ahabw’ekyo akateeraho emirundi mingi kubeegyesa ebintu ebyabaire nibiija kubahwera kwongyera kukunda Ishebo ow’omu iguru. Nk’eky’okureeberaho, akagyeragyeranisa Yehova n’omushaija orikuha abaana be ebintu birungi. (Mat. 7:​9-11) Bamwe aha baabaire bamuhurikiize, nibabaasa kuba baabaire bataine ishebo orikubakunda. Teekateeka aha ku baine kuba baayehuriire, obu Yesu yaaha enfumu y’omuzaire owaagiriire embabazi omutabani owaarazire, kandi akamwikiriza kugaruka omu ka. Bakaba nibabaasa kureeba ngu Yehova ainiire embabazi abaana be ab’omu nsi.—Luk. 15:​20-24.

8. Noobaasa kuhwera ota omwegi wa Baibuli kwongyera kukunda Yehova?

⁸ Naiwe noobaasa kuhwera omwegi wa Baibuli kuhamya rukundo ei ainiire Yehova orikugamba munonga aha mitwarize ye. Waaba noomwegyesa, muhwere kureeba oku ebi arikwega biine akakwate na rukundo ya Yehova. Nk’eky’okureeberaho, waaba noomwegyesa aha kitambo, muhwere kureeba oku kirikworeka rukundo ei Yehova amwiniire. (Rom. 5:8; 1 Yoh. 4:10) Omwegi yaaguma naateekateeka ahari rukundo ei Yehova amwiniire nikiija kumuhiga kwongyera kumukunda.—Gal. 2:20.

9. Niki ekyahwaire Micheal kuhindura emitwarize ye?

⁹ Teekateeka aha ky’okureeberaho kya Michael, owa Indonesia. Akamanya amazima akiri muto, kwonka tarahikire aha kubatizibwa. Ku yaahikize emyaka 18, akaza omu ihanga erindi kukora omurimo gw’okuvuga emotoka empango. Bwanyima akataaha omu bushwere, kwonka yaatsigaho eka ye kubaasa kugumizamu naakorera omu ihanga erindi. Ku harabireho obwire bukye, omukazi we na muhara waabo bakatandika kwega Baibuli kandi batunguuka. Micheal ku yaaherize kufeerwa nyina, akacwamu kugaruka omu ka kureeberera ishe kandi nawe yaikiriza kwegyesibwa Baibuli. Micheal akakwatwaho munonga obu yaabaire naayega ekicweka “Shwijuma Gye” omu ishomo 27 omu kitabo Yesiimire Amagara Ebiro Byona! Akarira ku yaateekateekire aha ku Yehova arikubaasa kuba yaayehuriire kureeba omwana we arikubonabonesibwa kuhika aha kufa. Ekyo kikamuhiga kwongyera kusiima ekitambo n’okuhindura emitwarize ye kandi yaabatizibwa.

HWERA OMWEGI KUKORA EMPINDUKA OMU BI ARIKUTWARA NKA EBIKURU

10. Yesu akahwera ata abeegi be kwebembeza ebirikukira obukuru? (Luka 5:​5-11) (Reeba n’ekishushani.)

¹⁰ Abeegi ba Yesu bakaba nibaikiriza ngu niwe Mesia owaaraganisiibwe, kwonka bakaba baine kuhwerwa kubaasa kwebembeza obuheereza. Petero na Anderea bakaba batwire nibakuratira Yesu kumara akaire, obu yaabeeta kumukuratira omu bwijwire. (Mat. 4:​18, 19) Bakaba nibakorera hamwe na Yohaana na Yakobo omu bizinesi y’eby’enyanja. (Mak. 1:​16-20) Obu Petero na Anderea “baatsigaho obutimba bwabo” bakakuratira Yesu, nibabaasa kuba bataireho entebeekanisa y’okureeberera ab’eka yaabo. Niki ekyabahigire kwebembeza ebirikukira obukuru? Ebiri omuri kitabo kya Luka nibyoreka ngu Yesu akakora eky’okutangaaza ekyabahamiize ngu Yehova naija kubareeberera.—Shoma Luka 5:​5-11.

11. Nitubaasa kukoresa tuta ebi turabiremu kubaasa kugumya okwikiriza kw’omwegi wa Baibuli?

¹¹ Titurikubaasa kukora eby’okutangaaza nka Yesu, kwonka nitubaasa kugambira abeegi ba Baibuli oku Yehova arikuhwera abarikwebembeza ebirikukira obukuru. Nk’eky’okureeberaho, noijuka oku Yehova yaakuhweraire obu waatandika kuza omu nteerane otarikwosha? Obundi okaba oine kushaba mukama waawe orusa rw’okuruga kare aha murimo nari kumushoboororera ahabw’enki waabaire otaine kukora kumara obwire buraingwa aha izooba ery’okuza omu nteerane. Waaba nooshoboororera omwegi waawe, muhwere kwetegyereza oku okwikiriza kwawe kwayongyeire kuhama ahabw’okureeba oku Yehova yaashagikire okucwamu kwawe kw’okwebembeza okumuramya.

12. (a) Ahabw’enki twine kweta ababuurizi abandi kutwegaitaho twaza kwegyesa omwegi? (b) Noobaasa kukoresa ota vidiyo kuhika omwegi aha mutima? Ha eky’okureeberaho.

¹² Omwegi wa Baibuli naija kugasirwa yaahurira oku Abakristaayo abandi bakozire empinduka kubaasa kwebembeza ebikuru. N’ahabw’ekyo waaba nooza kumwegyesa noobaasa kuzayo n’Abakristaayo abandi abarabire omu mbeera zitarikushushana. Babuuze oku baizire omu mazima n’empinduka ezi baakozire kubaasa kwebembeza okuheereza Yehova. Ekindi, mworekye vidiyo eziri omu kicweka “Shwijuma Gye” na “Jumbura Ebindi” omu kitabo Yesiimire Amagara Ebiro Byona! Nk’eky’okureeberaho, waaba noomwegyesa eishomo 37, noobaasa kumworeka emisingye eri omu vidiyo Yehova Naija Kutuha Ebirikwetengyesa.

HWERA OMWEGI KUSINGURA EBIRIKUMUREMESA

13. Yesu akahwera ata abeegi be kwetebeekanisiza okuhakanisibwa?

¹³ Kaingi Yesu akagambira abakuratsi be ngu bakaba nibaija kuhakanisibwa abantu, otwariiremu n’abanyabuzaare baabo. (Mat. 5:11; 10:​22, 36) Obu Yesu yaabaire ari haihi kwitwa, akarabura abeegi be ngu nabo bakaba nibabaasa kwitwa. (Mat. 24:9; Yoh. 15:20; 16:2) Akabahiga kuba abeegyendesereza omu buheereza bwabo. Akabahabura kuguma baikaikaine bahakanisibwa n’okuba abanyabwengye kubaasa kugumizamu nibabuurira.

14. Nitubaasa kuhwera tuta omwegi kwetebeekanisiza okuhakanisibwa? (2 Timoseo 3:12)

¹⁴ Nitubaasa kuhwera omwegi wa Baibuli kwetebeekanisiza okuhakanisibwa, turikumushoboororera oku abakozi bagyenzi be, banywani be, n’abanyabuzaare barikubaasa kumutwariza. (Shoma 2 Timoseo 3:12.) Abu arikukora nabo nibabaasa kumushekyerera ahabw’empinduka ezi arikuba akozire. Kandi abandi otwariiremu n’abanyabuzaare be, nibabaasa kugaya ebi arikwikiriza kuruga omu Baibuli. N’ahabw’ekyo twahwera omwegi kwetebeekanisiza okuhakanisibwa bukiri kare, nikiija kumuhwera kumanya eki araakore yaahakanisibwa.

15. Niki ekirikubaasa kuhwera omwegi wa Baibuli kwemera okuhakanisibwa abanyabuzaare?

¹⁵ Kyahika aha kuhakanisibwa abanyabuzaare, higa omwegi kuteekateeka aha kirikubaasa kubareetera kuguubwa kubi. Nibabaasa kuteekateeka ngu ahabisiibwe, nari baine emiteekateekyere mibi aha Abajurizi ba Yehova. Na Yesu akahakanisibwa abanyabuzaare. (Mak. 3:21; Yoh. 7:5) Yegyesa omwegi wa Baibuli kuguma aikaikaine kandi atwarize abandi n’obwegyendesereza otwariiremu n’abanyabuzaare.

16. Nitubaasa kuhwera tuta omwegi wa Baibuli kugambira abandi ebi arikwikiriza omu muringo gw’obwengye?

¹⁶ N’obu omunyabuzaare yaakwenda kumanya ebirikukiraho, omwegi tashemereire kuteeraho kushoboorora buri kimwe ahonaaho. Ahabw’okuba omunyabuzaare naabaasa kutamwa, abure ekihika ky’okugaruka kugaaniira nawe. N’ahabw’ekyo, higa omwegi waawe kugaaniira n’abanyabuzaare be aha bi arikwikiriza omu muringo ogurababaasise kwenda kugaruka kugaaniira nawe omurundi ogundi. (Kol. 4:6) Obundi naabaasa kubahiga kuza aha jw.org. Ekyo nikiija kubabaasisa kumanya bingi ebirikukwata aha Bajurizi ba Yehova omu bwire bwabo.

17. Noobaasa kutendeka ota omwegi kugarukamu abarikubaasa kuba baine emiteekateekyere etahikire aha Bajurizi ba Yehova? (Reeba n’ekishushani.)

¹⁷ Noobaasa kukoresa ekicweka “Ebibuuzo Ebirikukira Kubuuzibwa” aha jw.org kuhwera omwegi waawe kutunga eby’okugarukamu byorobi eby’ebibuuzo ebi abanyabuzaare nari abakozi bataahi be barikubaasa kubuuza. (2 Tim. 2:​24, 25) Buri kuheza eishomo omu kitabo Yesiimire amagara ebiro byona! mugaaniire aha kicweka “Abamwe nibagira ngu,” reero omuhige kwegyezamu oku arikubaasa kugarukamu omu bigambo bye. Muhwere kumanya oku arikubaasa kwongyera kugarukamu omu muringo murungi. Okwegyezamu okwo nikwija kumuhwera kujuririra ebi arikwikiriza n’obumanzi.

18. Noobaasa kuhiga ota omwegi kutandika kubuurira abandi ebi arikwikiriza ari hamwe n’ekibiina? (Matayo 10:27)

¹⁸ Yesu akaragiira abeegi be kubuurira abandi amakuru marungi. (Shoma Matayo 10:27.) Omwegi wa Baibuli yaatandika kugambira abandi ebi arikwikiriza, naatandika kwega kwesiga Yehova. Mbwenu shi noobaasa kuhwera ota omwegi kutaho ekigyendererwa ekyo? Baaranga kampeyini z’okubuurira omu kibiina, higa omwegi waawe kuteekateeka aha ki ashemereire kukora kubaasa kuba omubuurizi. Mushoboororere ahabw’enki kyorobeire baingi kutandika kubuurira omu bwire bwa za kampeyini ezo. Naabaasa n’okugasirwa yaateeraho kwejumba omu kutendekwa oku turikutunga omu nteerane ez’ahagati ya saabiiti. Yaateeraho kuhika aha kigyendererwa ekyo, naija kwega kushoboorora ebi arikwikiriza n’obumanzi.

YOREKA NGU OINE OBWESIGYE OMU MWEGI WAAWE

19. Yesu akooreka ata ngu aine obwesigye omu beegi be, kandi itwe nitubaasa kumutooreza tuta?

¹⁹ Obu Yesu yaabaire atakagarukire omu iguru, akagambira abeegi be ngu bakaba nibaija kugaruka babe nawe. Kwonka tibareetegyereize ngu akaba naagamba aha kwetwa kwabo okw’okuza omu iguru. Kwonka nabwo, Yesu akata omutima aha bwesigwa bwabo beitu kutari okubangaanisa kwabo. (Yoh. 14:​1-5, 8) Akaba naamanya ngu kikaba nikiija kubatwarira obwire kwetegyereza ebintu ebimwe nk’amatsiko ag’okuza omu iguru. (Yoh. 16:12) Naitwe nitubaasa kworeka ngu nitwesigira kimwe ngu omwegi waitu aine ekyetengo ky’okushemeza Yehova.

20. Munyaanyazi-itwe omuri Malawi akooreka ata obwesigye omu mwegi we?

²⁰ Nituguma twine amatsiko ngu omwegi waitu naayenda kukora ekihikire. Nk’eky’okureeberaho, munyaanyazi-itwe orikwetwa Chifundo kuruga Malawi akaba naayega ekitabo Yesiimire Amagara Ebiro Byona! n’omukazi muto Omukaturiki orikwetwa Alinafe. Ku baamazire kwega eishomo 14, Chifundo akabuuza omwegi ogwo eki arikuteekateeka aha kukoresa ebishushani omu kuramya. Alinafe akeehurira kubi yaamugarukamu ati: “Ekyo n’ekya buri omwe kwecweramu!” Chifundo akeebuuza yaaba araagumizemu naamwegyesa. Kwonka akagumizamu naamwegyesa aine amatsiko ngu eizooba rimwe naija kwetegyereza enshonga egyo. Bwanyima y’ameezi makye, Chifundo akamubuuza ekibuuzo ekiri omu ishomo 34 ati: “Ogasiirwe ota omu kwega Baibuli n’ebirikukwata ahari Yehova Ruhanga ow’amazima?” Alinafe akagamba aha bintu birungi ebi yaabaire ayegire kandi ngu kimwe aharibyo n’okugira ngu Abajurizi ba Yehova tibarikwejumba omu bikorwa ebi Baibuli erikwanga. Bwanyima y’ekyo, Alinafe akarekyera aho kukoresa ebishushani kandi yaabatizibwa.

21. Nitubaasa kuhwera tuta omwegi kwongyera kugira ekihika ky’okuhamira aha mazima?

²¹ N’obu Yehova araabe niwe ‘arikukuza’, twine obujunaanizibwa omu kuhwera omwegi wa Baibuli kutunguuka. (1 Kor. 3:7) Titurikumwegyesa eki Ruhanga arikwenda ngu akore kyonka, kureka nitumuhwera n’okuhamya rukundo ei ainiire Yehova. Nitumuhiga kworeka rukundo egyo arikukora empinduka omu bi arikutwara nka bikuru. Nitumwegyesa kwesiga Yehova yaatunga oburemeezi. Twayoreka ngu tumwinemu obwesigye, nikimuhwera kuhamya okucwamu kwe kw’okugyendera aha mitindo ya Yehova n’okuhamira aha mazima.