RAIBURARE Y'AHA INTANEETI eya Watchtower
Omunaara gw'Omurinzi
RAIBURARE Y'AHA INTANEETI
Runyankore
  • BAIBULI
  • EBITABO
  • ENTEERANE
  • w25 Gyuraayi rup. 14-19
  • Haine ebi Orikubaasa Kwegyera aha Mazima ga Baibuli Agarikutandikirwaho?

Vidiyo ei waatoorana teriho.

Haine ekyashoba omu kutaho vidiyo.

  • Haine ebi Orikubaasa Kwegyera aha Mazima ga Baibuli Agarikutandikirwaho?
  • Omunaara gw’Omurinzi Ogurikuranga Obukama Bwa Yehova (OgwʼOkwega)—2025
  • Emitwe Emikye
  • Ebirikushushana
  • YEHOVA NIWE MUHANGI
  • ENSHONGA AHABW’ENKI RUHANGA NAIKIRIZA OKUBONABONA KUKABAHO
  • TURI “OMU BIRO BY’AHA MPERU”
  • GUMA NOOSIIMA EBI YEHOVA ARIKUTWIJUTSYA
  • Ba Omucureezi Oikirize ngu Haine ebi Otarikumanya
    Omunaara gw’Omurinzi Ogurikuranga Obukama Bwa Yehova (OgwʼOkwega)—2025
  • Yoreka ngu Nooyesiga Yehova omu bi Orikucwamu
    Obuheereza Bwaitu n’Oku Turikutwaza—Akatabo k’Okukoresa—2023
  • Nootaanisa Amazima n’Ebishuba?
    Omunaara gw’Omurinzi Ogurikuranga Obukama Bwa Yehova (OgwʼOkwega)—2024
  • Higwa Rukundo Kugumizamu Noobuurira
    Omunaara gw’Omurinzi Ogurikuranga Obukama Bwa Yehova (OgwʼOkwega)—2024
Reeba Ebindi
Omunaara gw’Omurinzi Ogurikuranga Obukama Bwa Yehova (OgwʼOkwega)—2025
w25 Gyuraayi rup. 14-19

EKICWEKA EKY’OKWEGA 30

EKYESHONGORO 97 Ekigambo kya Ruhanga Nikibaisaho Amagara

Haine ebi Orikubaasa Kwegyera aha Mazima ga Baibuli Agarikutandikirwaho?

“Nikyo nyendera kubaijutsya obutoosha ebigambo ebyo, n’obu muraabe nimubimanya, kandi muhamiire omu mazima.”—2 PET. 1:12.

ENTIMA

Oku orikubaasa kugasirwa omu nyegyesa za Baibuli ezirikutandikirwaho, n’obu haakuba hahingwireho obwire buraingwa oherize kuzeega.

1. Okeehurira ota obu waabanza kwega amazima ga Baibuli?

AMAZIMA ga Baibuli agarikutandikirwaho gahindwire embeera zaitu. Nk’eky’okureeberaho, ku twamanyire ngu eiziina rya Ruhanga ni Yehova, tukatandika kuteeraho kuba banywani be. (Isa. 42:8) Ku twamanyire ekirikubaho omuntu yaafa, tituragarukire kwebuuza yaaba abakundwa baitu abaafiire nibabonabona. (Mub. 9:10) Kandi ku twamanyire okuraganisa kwa Ruhanga okw’okuhindura ensi Paradiso, tituragarukire kwerarikirira aha biro by’omumaisho. Tukagira obuhame ngu titurikwija kutuuraho kumara obwire bukye nk’emyaka 70 nari 80 yonka, kureka nitwija kugumaho ebiro byona.—Zab. 37:29; 90:10.

2. 2 Petero 1:​12, 13 nihooreka hata ngu n’Abakristaayo abakuzire omu by’omwoyo nibabaasa kugasirwa omu amashomo agu baabandize kwega omu Baibuli?

2 Titwine kureeba amazima agu twabandize kwega omu Baibuli nk’agatakiine mugasho. Ebaruha ya kabiri ei entumwa Petero yaahandiikire, akagihandiikira Abakristaayo abaabaire ‘bahamiire omu mazima.’ (Shoma 2 Petero 1:​12, 13.) Kwonka omu bwire obwo, omu kibiina hakaba harimu abeegyesa b’ebishuba, abaabaire nibenda kuhabisa ab’eishe-emwe n’okubaiha aha mazima. (2 Pet. 2:​1-3) Petero akaba naayenda kugumya ab’eishe-emwe na banyaanyazi-itwe kugira ngu abahwere kwerinda ebishuba ebyo. N’ahabw’ekyo akabaijutsya gamwe aha mashomo ga Baibuli agu baabaire baayegire. Amashomo ago gakaba nigaija kubahwera kuguma bari abeesigwa ahari Yehova kuhitsya aha muheru.

3. Shoboorora ahabw’enki Abakristaayo boona bashemereire kuteekateeka aha mazima ga Baibuli agarikutandikirwaho.

3 Ku turikweyongyera kukura omu by’omwoyo, nitubaasa kwongyera kwega amashomo masya kuruga omu bi twabandize kwega omu Baibuli. Nk’eky’okureeberaho: Omuteeki murungi naabaasa kukoresa ebirungo nibyo bimwe nk’eby’otakeegire kuteeka arikukoresa, kutebeekanisa ekiihuro. Kwonka bwanyima y’obwire, omuteeki murungi naaba naamanya kukoresa ebirungo ebyo omu miringo mingi erikunuza eby’okurya. Nikyo kimwe, omuheereza wa Yehova omazire obwire buraingwa, n’omwegi wa Baibuli omusya nibabaasa kuteekateeka aha mazima ga Baibuli agarikutandikirwaho omu miringo etarikushushana. Kuruga obu twabatizibwa, embeera zaitu n’obuheereza bwaitu bigyenzire nibihinduka. Twateekateeka aha bi twayegire omu myaka mingi enyima, nitubaasa kureeba oku birikubaasa kutuhwera omu mbeera zaitu omu miringo mingi. Ka tureebe eki Abakristaayo abakuzire omu by’omwoyo barikubaasa kwegyera aha mazima ga Baibuli ashatu agarikutandikirwaho.

YEHOVA NIWE MUHANGI

4. Okumanya ngu Yehova n’omuhangi kitukwatsireho kita?

4 “Omwombeki w’ebintu byona ni Ruhanga.” (Heb. 3:4) Nitumanya ngu ensi yaitu na byona ebigiriho bikakorwa Omuhangi w’obwengye oburikukirayo kandi oine amaani maingi. Naatwetegyereza gye ahabw’okugira ngu niwe yaatuhangire. Naatufaho kandi naamanya ebirungi ebitushemereire. Okumanya amazima goorobi aga ngu Yehova n’omuhangi nikitukwataho munonga, kandi kireetaire amagara gaitu kugira ekigyendererwa.

5. Ni mazima ki agarikutuhwera kuba abacureezi? (Isaaya 45:​9-12)

5 Okumanya ngu Yehova n’omuhangi nikitwegyesa eishomo ry’okuba abacureezi. Yobu ku yaayeteekateekireho ekirenga hamwe n’abantu abandi, Yehova akamwijutsya ngu niwe Muhangi Ow’obushoboorozi bwona. (Yob. 38:​1-4) Ekyo kikahwera Yobu kureeba ngu emitwarize ya Yehova neekirira kimwe ey’abantu. Nabi Isaaya akahandiika ebirikuhikaana n’ekyo ati: “Eibumba rikaabuuza orikuribumba riti: ‘Nombumbamu ki?’”—Shoma Isaaya 45:​9-12.

6. Ni ryari obu tushemereire kuteekateeka aha mwanya gwa Yehova ogw’ekitiinisa nk’Omuhangi waitu? (Reeba n’ebishushani.)

6 Omukristaayo yaaheereza Yehova kumara obwire buraingwa, naabaasa kutandika kwesiga emiteekateekyere ye omu mwanya gw’okwesiga Yehova n’obuhabuzi oburi omu kigambo kye. (Yob. 37:​23, 24) Mbwenu shi omuntu naabaasa kugasirwa ata yaateekateeka aha bwengye bwa Yehova n’amaani ge ebitarikugyeragyeranisibwa? (Isa. 40:22; 55:​8, 9) Amazima ago nigamuhwera kuguma ari omucureezi n’okureeba emiteekateekyere ye omu muringo oguringaniire.

Ebishushani: 1. Omureeberezi arikuha ekitenso omu rukiiko rw’abareeberezi kwonka abandi tibakikunda. 2. Bwanyima, omureeberezi owaaretsire ekitenso naareeba ahaiguru omu mwanya, kandi ariyo naateekateeka.

Niki ekiraatuhwere kuguma nitureeba emiteekateekyere yaitu omu muringo oguringaniire? (Reeba akacweka 6)d


7. Rahela akakora ki kubaasa kwikiriza empinduka nsya?

7 Rahela, orikutuura omuri Slovenia, ashangire ngu okuteekateeka ahari Yehova nk’Omuhangi, kimuhwereire munonga kwikiriza empinduka ezirikubaho omu kibiina. Naagira ati: “Obumwe kibaire kitarikunyorobera kwikiriza encwamu ezirikukorwa abarikureeberera ekibiina. Nk’eky’okureeberaho, n’obu ndaabe naabaire naareebire Ripoota 8 ey’Akakiiko Akareeberezi 2023, nkabanza kutangaara munonga ku naareebire ow’eishe-emwe arikuha orubazo akurize ekireju. N’ahabw’ekyo nkashaba Yehova kumpwera ngu mbaase kwikiriza empinduka egi.” Rahela akeetegyereza ngu Yehova Omuhangi w’eiguru n’ensi, aine amaani g’okwebembera ekibiina kye omu muringo oguhikire. Waaba noogumirwa kwikiriza empinduka nsya nari obuhabuzi busya, ahabw’enki otarikuteekateeka aha bwengye n’amaani ebitarikugyeragyeranisibwa ebi Omuhangi waitu aine?—Rom. 11:​33-36.

ENSHONGA AHABW’ENKI RUHANGA NAIKIRIZA OKUBONABONA KUKABAHO

8. Okumanya ahabw’enki Ruhanga naikiriza okubonabona kukabaho kituhwereire kita?

8 Ahabw’enki Ruhanga naikiriza okubonabona kukabaho? Bamwe abatarikubaasa kugarukamu ekibuuzo ekyo, bagiriire Ruhanga ekiniga kandi baateekateeka ngu tariho! (Enf. 19:3) Kwonka iwe noomanya ngu ekibi n’obutahikiirira ebi twahungwiire, nibyo birikureetaho okubonabona, atari Yehova. Kandi noomanya ngu okugumisiriza kwa Yehova kuhwereire obukaikuru bw’abantu kumumanya n’okwereebera oku araamarireho kimwe okubonabona. (2 Pet. 3:​9, 15) Amazima aga gakuhweraire kwirira haihi Yehova kandi gakuhuumuriza.

9. Ni mbeera ki ezirikubaasa kutureetera kwijuka enshonga ahabw’enki Yehova naikiriza okubonabona kukabaho?

9 Nitukimanya ngu twine kugumisiriza tutegyereize Yehova kwihiraho kimwe okubonabona. Kwonka itwe nari abakundwa baitu bahikwaho obusaasi, obutari buringaaniza nari okufeerwa, nitubaasa kwebuuza ahabw’enki Yehova akyerereirwe kugira eki yaakoraho. (Hab. 1:​2, 3) Omu bwire nk’obwo, tushemereire kuteekateeka aha nshonga ahabw’enki Yehova arikwikiriza abahikiriire kuhikwaho oburemeezi.a (Zab. 34:19) Nitubaasa n’okuteekateeka aha kigyendererwa kye eky’okumariraho kimwe okubonabona.

10. Niki ekirikuhuumuriza Anne ahabw’okufeerwa nyina?

10 Amazima agarikukwata aha kubonabona nigatuhwera kugumisiriza. Anne, orikutuura aha kirwa Mayotte, ekiri aha nyanja mpango eya Indian Ocean, naagira ati: “Okufeerwa maawe emyaka mikye enyima kikaandeetera obusaasi bwingi. Kwonka butoosha niinyeijutsya ngu Yehova tiwe arikujunaanwa ahabw’okubonabona okuriho. Aine ekihika ky’okumariraho kimwe okubonabona kw’emiringo yoona, kandi akazoora abakundwa baitu. Okuteekateeka aha mazima ago nikindeetera obusingye bw’omu biteekateeko.”

11. Okumanya ahabw’enki Yehova arikwikiriza okubonabona kukabaho nikituhwera kita kugumizamu nitubuurira?

11 Okumanya ahabw’enki Ruhanga naikiriza okubonabona kukabaho, nikibaasa kutuhiga kugumizamu nitwejumba omu kubuurira. Petero ku yaaherize kushoboorora ngu Yehova naagumisiriza kugira ngu abantu beeteise babaase kujunwa, akahandiika arikugira ati: “Mureebe oku mushemereire kuba abarikwera kandi abarikutiina Ruhanga omu mitwarize yaanyu.” (2 Pet. 3:11) Gumwe aha mitwarize yaitu erikworeka ngu nitutiina Ruhanga n’okwejumba omu kubuurira. Nka Tataitwe ow’omu iguru, naitwe nitukunda abantu. Nitwenda ngu batuure omu nsi ya Ruhanga ensya eraabemu okuhikiirira. Yehova akigumisiririize abantu b’omu kicweka kyawe kugira ngu batunge omugisha gw’okumuramya. Ka n’omugisha gw’omutaano kukora na Yehova kuhwera abantu baingi kumanya ebirikumukwataho emperu etakabaireho!—1 Kor. 3:9.

TURI “OMU BIRO BY’AHA MPERU”

12. Okumanya ngu turi “omu biro by’aha mperu” nikituhamiza ki?

12 Baibuli neeshoboorora gye oku abantu baabaire nibaija kutwaza “omu biro by’aha mperu.” (2 Tim. 3:​1-5) Twareeba oku abantu abatwetooroire barikutwaza buzima nitureeba oku obunabi obwo buriyo nibuhikiirira. Ku turikureeba oku emitwarize y’abantu erikweyongyera kusiisikara, nikituhamiza kimwe ngu Ekigambo kya Ruhanga n’eky’okwesigwa.—2 Tim. 3:​13-15.

13. Enfumu ya Yesu ey’omuri Luka 12:​15-21, neebaasa kutureetera kwebuuza bibuuzo ki?

13 Okumanya ngu turi omu biro by’aha mperu nikituhwera kuta omutima aha bikuru. Yetegyereze ebi turikubaasa kwegyera aha nfumu ya Yesu ey’omuri Luka 12:​15-21. (Kishome.) Ahabwʼenki omushaija omugaiga ogwo yaayetsirwe “omushema”? Taramwetsire atyo ahabw’okugira ngu akaba ari omugaiga, kureka akaba atarikwebembeza ebikuru. ‘Akeebiikira obutungi, haza atari mutungi ahari Ruhanga.’ Ahabw’enki yaabaire aine kukora empinduka ahonaaho? Ruhanga akagambira omushaija ogwo ati: “Eki kiro noija kwakwa amagara gaawe.” Obu emperu y’entebeekanisa y’obusingye obu erikwirira haihi, nitubaasa kwebuuza tuti: ‘Ebigyendererwa byangye nibyoreka ngu ninyebembeza ebikuru? Kandi shi ebigyendererwa ebi ndikuhwera abaana bangye kutaho? Ninkoresa amaani gangye, obwire bwangye n’eby’obugaiga ebi nyine kwebiikira eitungo omu iguru?’

14. Nk’oku kirikworekwa omu ky’okureeberaho kya Miki, ahabw’enki kiri eky’obwengye kuteekateeka aha byahandiikirwe ebirikuhamya ngu turi omu biro by’aha mperu?

14 Ebi turikutwara nka bikuru omu magara gaitu nibibaasa kuhinduka twateekateeka aha buhame oburikworeka ngu turi omu biro by’aha mperu. Ekyo nikyo kyahikire ahari munyaanyazi-itwe orikwetwa Miki. Akagira ati: “Ku naaherize okushoma, nkatandika kuteekateeka aha kutunga omurimo ogwabaire nigwija kumpwera kwega aha nyamaishwa. Kandi nkaba nyine ekigyendererwa ky’okuba payoniya ow’obutwire n’okuza kuheereza ahu ababuurizi barikwendwa munonga. Banywani bangye abakuzire omu by’omwoyo bakampwera kuteekateeka yaaba kyabaire nikibaasika kukora omurimo ogu naabaire niinyenda kandi nkahika n’aha bigyendererwa byangye. Bakanyijutsya ngu entebeekanisa y’obusingye obu eri haihi kuhwaho. Kwonka omu nsi ensya ninyija kuba nyine obwire burikumara kwega aha nyamaishwa zoona nk’oku ndikwenda. N’ahabw’ekyo, nkacwamu kusherura omurimo ogwabaire gutarikwetengyesa obwire bwingi. Omurimo ogwo gukambaasisa kuba payoniya ow’obutwire, kandi bwanyima nkaza Ecuador, ahu ababuurizi baabaire nibeendwa.” Miki n’omushaija we hati bari omu buheereza bw’okutaayaayira ebibiina omu ihanga eryo.

15. Kurugiirira aha ky’okureeberaho kya Yakobo, ahabwenki tutaine kuhanika abantu baaba batahurikiriize amakuru g’Obukama aha murundi gw’okubanza? (Reeba n’ebishushani.)

15 Titushemeire kuhwamu amaani abantu baayanga kuhurikiriza amakuru marungi omu kubanza. Abantu nibabaasa kuhinduka. Teekateeka aha ky’okureeberaho kya Yakobo murumuna wa Yesu. Akareeba Yesu naakura, arikuba Mesia, kandi arikwegyesa omu muringo ogw’omutaano. Kwonka nabwo, kumara emyaka mingi Yakobo tarabaire mukuratsi wa Yesu. Kwonka Yesu ku yaaherize kuzooka nibwo Yakobo omurumuna yaaba omukuratsi we aine omujinya mwingi munonga!b (Yoh. 7:5; Gal. 2:9) N’ahabw’ekyo, otarekyera aho kugamba n’abanyabuzaare abatakoorekire ngu nibenda kwikiriza amakuru g’Obukama, nari kugaruka kugamba n’abo abaagangire omu kubanza. Ijuka ngu turi omu biro by’aha mperu, n’ahabw’ekyo titwine kurekyera aho kubuurira. Ebi turikubagambira hati nibibaasa kubakwataho bwanyima nari okubonabona kwingi ku kuraatandikye.c

Munyaanyazi-itwe orikweyegyesa ariyo naateerera esimu omurumuna otari mu mazima arikugura ebintu omu duuka na muhara we omuto.

Niki ekirikubaasa kutuhwera kutahanika kubuurira abanyabuzaare baitu abatari omu mazima? (Reeba akacweka 15)e


GUMA NOOSIIMA EBI YEHOVA ARIKUTWIJUTSYA

16. Ogasiirwe ota omu bi Yehova arikutwijutsya? (Reeba n’akabokusi “Bikorese Kuhwera Abandi.”)

16 Bimwe aha by’okurya bw’omwoyo ebi turikutunga bitebeekanisiibwe kuhwera abantu abatakamanyire amazima ga Baibuli agarikutandikirwaho. Nk’eky’okureeberaho, embazo za boona ezirikuheebwa buri saabiiti, ebicweka ebimwe na vidiyo eziri aha jw.org, na magaziini bitebeekanisiibwe kuhwera abo abatari Bajurizi ba Yehova. Kwonka, naitwe nibitugasira munonga ahakuba nibitwijutsya enshonga ezi twayegire enyima. Nibihamya omukago gwaitu na Yehova, okwikiriza kwaitu omu kigambo kye, kandi bituhwera kuhika abantu aha mutima twaba nitubeegyesa amazima agarikutandikirwaho.—Zab. 19:7.

Bikorese Kuhwera Abandi

Waashoma ekicweka, okareeba vidiyo nari okahurikiza orubazo orutebeekanisiibwe kuhwera abasya abarikwenda kwega amazima, teekateeka oku orikubaasa kubikoresa kuhwera abandi. Noobaasa kwebuuza oti:

  • ‘Ni buhame ki oburikukoresibwa kushoborora abantu amazima ga Baibuli aga?’

  • ‘Haine eky’okureeberaho eki naayegamu eki ndikubaasa kukoresa naaba niinyegyesa omuntu ondiijo amazima aga?’

  • ‘N’oha orikubaasa kugasirwa omu kicweka eki, kandi ni ryari obu ndikubaasa kukikoresa kumuhwera?’

17. Ni ryari obu kiri kikuru kwijuka enyegyesa za Baibuli ezirikutandikirwaho?

17 Itwe Abajurizi ba Yehova, nitushemererwa twatunga enyetegyereza nsya y’amazima ga Baibuli. Kwonka nabwo nitusiima munonga enyegyesa za Baibuli ezirikutandikirwaho ezaatuhwereire kwija omu mazima. Twagumirwa kworobera obuhabuzi obu ekibiina kirikutuha, tushemereire kuba abacureezi tukaijuka ngu Yehova Ow’obushoboorozi bwona kandi Omuhangi w’obwengye bwingi niwe arikwebembera ekibiina kye. Itwe nari omukundwa waitu yaaba naagyezibwa, nitubaasa kugumisiriza kandi tuteekateekye ahabw’enki Yehova akirekireho okubonabona. Kandi twaba nitucwamu aha ku turaakorese obwire n’amaani gaitu, twine kuguma nitwijuka obwire obu turimu obw’aha mperu. Ebi Yehova arikutwijutsya ka bigumizemu nibitugumya, bituhige kandi bituhwere kuba abanyabwengye.

NITUBAASA KWEGA MASHOMO KI OMU NYEGYESA ZA BAIBULI EZIRIKUTANDIKIRWAHO EZI?

  • Yehova niwe muhangi

  • Enshonga ahabw’enki Ruhanga naikiriza okubonabona kukabaho

  • Turi “omu biro by’aha mperu”

EKYESHONGORO 95 Ekyererezi Nikyeyongyera

a Reeba ekicweka “Why All Suffering Is Soon to End” omu Omunaara gw’Omurinzi ogwa Mei 15, 2007, rup. 21-25.

b Reeba eishomo rya 8 omu katabo Kunda Abantu—Obahindure Abeegi.

c Reeba ekicweka “Nitumanya ki aha ku Yehova Araacwe Emanja omu Biro by’Omumaisho?” omu Omunaara gw’Omurinzi ogwa Mei 2024, rup. 8-13.

d ENSHOBOORORA Y’EBISHUSHANI: Akakiiko k’abareeberezi tikaikirizana n’enshonga ei ow’eishe-emwe arikugamba. Bwanyima, ow’eishe-emwe ogwo omu kiro ku yaareebire enyonyoozi omu mwanya yaateekateeka aha ku Yehova aine amaani n’obwengye oburikukirayo. Kandi ekyo kyamuhwera kureeba emiteekateekyere ye omu muringo oguringaniire.

e ENSHOBOORORA Y’EKISHUSHANI: Munyaanyazi-itwe omu kweyegyesa yaashwijuma obuhame oburikworeka ngu turi omu biro by’emperu. Ekyo kyamuhiga kuteerera omunyabuzaare esimu kumubuurira.

    Ebitabo Ebiri omu Runyankore (1996-2025)
    Shohora
    Taahamu
    • Runyankore
    • Yoherereza ondiijjo
    • Ebi Orikukunda
    • Copyright © 2025 Watch Tower Bible and Tract Society of Pennsylvania
    • Ebiine Kukuratirwa
    • Okurinda Ebirikukukwataho
    • Privacy Settings
    • JW.ORG
    • Taahamu
    Yoherereza ondiijjo