Waayegire Kugira Okumarwa?

1. Okumarwa nikimanyisa ki, kandi niki eki kutarikumanyisa?

NOOMANYWA nk’omuntu orikumarwa n’ebi oine? Omuntu omazirwe naaba ashemereirwe, kandi aine obunanukye ahabw’okuta omutima aha migisha ei aine. Tarikugira ekiniga nari kuguubwa kubi ahabw’okugira ngu haine eki akyenire. Kwonka, okumarwa tikirikumanyisa kuba byafandimu. Nk’eky’okureeberaho, Omukristaayo naaba aine kuteeraho kwongyera aha buheereza bwe. (Rom. 12:1; 1 Tim. 3:1) Kwonka nabwo yaaba amazirwe, naaguma aine okushemererwa n’obu yaakukyerererwa kutunga obujunaanizibwa.

2. Ahabw’enki obutamarwa n’eky’akabi?

² Obutamarwa niburugamu oburemeezi bw’amaani. Abo abatarikumarwa nibabaasa n’okukora obwire buraingwa munonga kubaasa kutunga ebintu ebitarikwetengyesa. Eky’obusaasi, Abakristaayo abamwe bagwire omu mutego gw’okwiba sente nari ebindi bintu ebi barikwegomba. Nibabaasa kuteekateeka bati, ‘eki kinshemereire,’ ‘ntegyereize ekirikumara,’ nari ‘esente ninza kuzishashura mporampora.’ Kwonka, okwiba okw’omuringo gwona nikugwisa kubi Yehova. (Enf. 30:9) Abamwe beetamirwe ahabw’okukyerererwa kutunga obujunaanizibwa obu barikwenda bahika n’aha kurekyera aho kuheereza Yehova. (Gal. 6:9) Kwonka shi omuheereza wa Yehova oyehaireyo niki ekirikumureetera kuteekateeka atyo? Omuntu ogwo naaba arekyeire aho kugira okumarwa.

3. Ni mazima ki agu turikwega omu Abafilipi 4:​11, 12?

³ Twena nitubaasa kuteeraho kugira okumarwa. Entumwa Paulo akahandiika ngu akaba ‘ayegire kumarwa omu muringo gwona ogu yaabaire aba arimu.’ (Shoma Abafilipi 4:​11, 12.) Akahandiika ebigambo ebyo obu yaabaire ari kihome. Kwonka nabwo, akaba akiine okushemererwa. Akaba ‘ayegire’ kumarwa. Twaba nitugumirwa kumarwa, ebigambo bya Paulo n’ebi yaarabiremu nibituhamiza ngu nitubaasa kumarwa. Titushemereire kuteekateeka ngu nitwija kugira okumarwa hataine eki tukozire. Kureka, twine kukwega. Tuta shi? Ka tureebe emitwarize eraatuhwere kugira okumarwa.

BA OMUNTU ORIKUSIIMA

4. Okuba abarikusiima nikituhwera kita kugira okumarwa? (1 Abatesalonika 5:18)

⁴ Omuntu orikusiima nikimworobera kugira okumarwa. (Shoma 1 Abatesalonika 5:18.) Nk’eky’okureeberaho, twaba nitusiima ahabw’ebi twine, titurikwija kwerarikirira ekirenga aha bintu ebi turikwenda kutunga. Twakunda obujunaanizibwa obu twine, nikiija kutuhwera kubuhikiiriza gye omu mwanya gw’okuta omutima aha kutunga obujunaanizibwa busya. Niyo nshonga ahabw’enki Ebyahandiikirwe nibituhiga kusiima Yehova omu kushaba kwaitu! Okuba abarikusiima nikituhwera kugira “obusingye bwa Ruhanga oburengire okwetegyereza kw’omuntu weena.”—Fil. 4:​6, 7.

5. Abaisraeli bakaremwa kukora ki? (Reeba n’ekishushani.)

⁵ Teekateeka aha ky’okureeberaho ky’Abaisraeli. Eizooba rimwe, bakeetomboitera Yehova ngu tibarikurya eby’okurya nk’ebi baabaire nibarya bakiri Misri. (Kub. 11:​4-6) Amazima gari ngu, embeera zikaba zitoorobi omu ihamba. Niki ekyabaire nikiija kubahwera kugira okumarwa? Bakaba baine kuteekateeka munonga aha bi Yehova yaabaire abakoreire. Yehova akaba areetsire ebiheneso ikumi aha Banyamisri abaabaire nibabatwariza nk’abahuuku. Bwanyima y’Abaisraeli kureekurwa ‘bakanyaga’ efeeza, ezaabu n’ebijwaro by’Abanyamisri. (Kur. 12:​35, 36) Abaisraeli ku baahikire aha Nyanja Erikutukura, Yehova akabaganisamu amaizi omu muringo gw’eky’okutangaaza. Kandi ku baabaire nibaraba omu ihamba, akaba abagaburira emaanu buri izooba. Mbwenu shi ahabw’enki baabaire nibeetomboita? Bakaba baine ebyabaire nibyetengyesa, kwonka ahabw’okutamarwa bakaremwa kusiima Yehova ahabw’ebi yaabaire abahaire.

6. Nitubaasa kworeka tuta ngu nitusiima?

⁶ Niki ekirikubaasa kukuhwera kworeka okusiima? Eky’okubanza, buri izooba gira obwire bw’okuteekateeka aha ebintu birungi ebirikukushemeza. Noobaasa kuhandiika ebintu bibiri nari bishatu ebi orikwenda kusiimira Yehova. (Tonz. 3:​22, 23) Ekya kabiri, yoreka ngu noosiima. Yehabure kusiima abandi ahabw’ebi baakukoreire. Okukira byona, siima Yehova obutoosha. (Zab. 75:1) Ekya kashatu, toorana abanywani abarikukunda kusiima. Nibaija kukuhwera kuba orikusiima. (Bir. 1:​26-28; 2 Tim. 3:​1, 2, 5) Twata omutima aha kworeka okusiima, nikiija kutworobera kumarwa n’ebi twine.

7. Niki ekyahweraire Aci kuba orikusiima, kandi niki ekyarugiremu?

⁷ Teekateeka aha byahikire ahari Aci, orikutuura Indonesia. Naagira ati: “Omu bwire bw’ekigwererezi kya COVID-19, nkatandika kwegyeragyeranisa n’Abakristaayo abandi. Eki kikandeetera kugira okutamarwa.” (Gal. 6:4) Niki ekyamuhweraire Aci kuhindura emiteekateekyere ye? Naayongyeraho ati: “Nkatandika kuteekateeka aha migisha ei Yehova yaabaire naampa buri izooba n’ebintu birungi bingi ebi naabaire ntungire kuruga omu kibiina kya Yehova. Bwanyima nkasiima Yehova kurabira omu kushaba. N’ekyarugiremu, nkahurira mmazirwe.” Ku oraabe nooyehurira otyo, noobaasa kukora ebintu nibyo bimwe kubaasa kugaruka kuba orikusiima.

BA OMUCUREEZI KANDI OGIRE EMITEEKATEEKYERE MIRUNGI

8. Baruki akagwa omu mutego ki?

⁸ Baruki omuhandiiki wa nabi Yeremia akagwa omu mutego gw’obutamarwa n’ebi yaabaire aine. Akaba aine obujunaanizibwa obwabaire butoorobi, obw’okushagika Yeremia obu yaabaire naagambira Abaisraeli ebyabaire nibiija kubahikaho. Omu bwire obwo, Baruki akahugibwa okwenda kugira ebintu bingi. Omu mwanya gw’okuta omutima aha bi Yehova yaabaire naayenda ngu akore, akatandika kweteekateekaho munonga n’okuta omutima aha bi yaabaire naayetenga. Yehova akakoresa Yeremia kugambira Baruki ati: ‘Oriyo nooyesherurira ebintu bikuru. Rekyera aho kusherura ebintu nk’ebyo.’ (Yer. 45:​3-5) Yehova akaba ari nk’orikumugambira ati: “Marwa n’ebi oine.” Baruki akoorobera obuhabuzi obwo, kandi yaagumizamu naasiimwa Yehova.

9. Kurugiirira aha 1 Abakorinso 4:​6, 7, obucureezi nibutuhwera kugira miteekateekyere ki? (Reeba n’ebishushani.)

⁹ Obumwe Omukristaayo naabaasa kuteekateeka ngu haine obujunaanizibwa obu ashemereire kuheebwa. Naabaasa kuba aine etalanta, ari omweziriki, arikumanya bingi, nari abiine byona. Kwonka, abandi nibabaasa kuheebwa obujunaanizibwa obu atwire naayenda. Ashemereire kugira miteekateekyere ki aha nshonga egyo? Naabaasa kuteekateeka aha bigambo ebi entumwa Paulo yaahandiikire omu 1 Abakorinso 4:​6, 7. (Kishome.) Buri bujunaanizibwa obu turikuheebwa, n’etalanta ei twine byona nibikomooka ahari Yehova. Kandi tarikubituha ahabw’okugira ngu turi ab’omutaano aha bandi nari ngu tubishemereire. Kureka naabituha ahabw’embabazi ze ezitatushemereire.—Rom. 12:​3, 6; Efe. 2:​8, 9.

10. Nitubaasa kwega tuta kuba abacureezi?

¹⁰ Nitubaasa kwega kuba abacureezi turikutooreza Yesu. Akanaabisa abeegi be ebigyere n’obu araabe yaabaire aine obushoboorozi bwingi kandi ari omwana wa Ruhanga. Entumwa Yohaana akahandiika ati: “Yesu [ku] yaamanyire ngu Ishe amurekuriire byona, kandi ngu akaruga ahari Ruhanga kandi naagaruka ahari Ruhanga, . . . yaatandika kunaabisa abeegi be ebigyere.” (Yoh. 13:​3-5) Yesu akaba naabaasa kuteekateeka ngu abeegi be nibo baabaire bashemereire kumunaabisa ebigyere. Kwonka, tarateekateekire ngu akaba ashemereire kutunga ebintu bingi n’okutuura omu mbeera z’okujarama. (Luk. 9:58) Yesu akaba ari omucureezi kandi amazirwe. Buzima akatuteeraho eky’okureeberaho kirungi.—Yoh. 13:15.

11. Obucureezi buhwereire buta Dennis kugira okumarwa?

¹¹ Dennis, orikutuura Netherlands, naateeraho kutooreza Yesu arikuba omucureezi, kwonka tikirikumworobera kukikora. Naagira ati: “Obumwe niinyereebamu amaryo n’obutamarwa, nk’omuntu yaatunga obujunaanizibwa obu mbaire niinyenda. Ku ndikwehurira ntyo, niinyeyegyesa aha mutwarize gw’obucureezi. Omu JW Library^® app, ndambiremu ebyahandiikirwe bitari bimwe ebirikukwata aha mutwarize gw’obucureezi kugira ngu mbaase kubitunga juba n’okugaruka kubishoma. Kandi, nyihire aha mukura embazo zitari zimwe ezirikukwata aha bucureezi, kandi ninkira kuzihurikiza.a Nyetegyereize ngu emirimo yoona ei turikukora n’ey’okuhimbisa Yehova atari itwe. Naikiriza buri omwe ahariitwe kugira eki yaakoraho kubaasa kuhikiiriza ebi arikwenda ngu bikorwe.” Waatandika kuhurira otamazirwe omu mbeera yaawe, teeraho kwega kwongyera kuba omucureezi. Ekyo nikiija kuhamya omukago gwawe na Yehova kandi kikuhwere kugira okumarwa.—Yak. 4:​6, 8.

TA OMUTIMA AHA MATSIKO GAAWE

12. Ni matsiko ki aga nyentsya agarikutuhwera kugira okumarwa? (Isaaya 65:​21-25)

¹² Nitugira okumarwa twateekateeka aha matsiko gaitu ag’ebiro by’omumaisho. Ebigambo bya Yehova ebyahandiikirwe nabi Isaaya nibyoreka ngu naayetegyereza embeera zigumire ezi turikurabamu obunaku obu, kandi naatuhamiza ngu naija kuzimariraho kimwe. (Shoma Isaaya 65:​21-25.) Nitwija kutuura omu maju marungi n’omu mbeera nungi. Nitwija kugira emirimo erikushemeza, turye eby’okurya ebinuzire kandi ebiine ekiriisa. Titurigaruka kwerarikirira ngu akabi nikabaasa kutuhikaho nari kuhika aha baana baitu. (Isa. 32:​17, 18; Ezk. 34:25) Nyentsya yaitu neija kuba eri nungi kandi eine oburinzi.

13. Ni ryari obu turikubaasa kuta omutima aha amatsiko gaitu?

¹³ Twine kuhamya amatsiko gaitu hati okukira obundi bwona. Ahabw’enki? Ahakuba turi omu “biro by’aha mperu” kandi twena nituhikwaho oburemeezi obugumire kwemera. (2 Tim. 3:1) Butoosha Yehova naatuhwera kugumisiriza, arikutuha obuhabuzi, amaani, n’obushagika oburikwetengyesa. (Zab. 145:14) Ekindi, amatsiko gaitu g’Ekikristaayo nigabaasa kutuhwera kwemera embeera zigumire. Obundi noogumirwa kutunga eby’okureeberera eka yaawe. Mbwenu shi eki nikimanyisa ngu embeera zaawe nikwo ziraije kuguma? Ngaaha buzima! Yehova naaraganisa kukuha buri kimwe eki orikwetenga n’ebindi bingi omuri Paradiso. (Zab. 9:18; 72:​12-14) Noobaasa kuba oine obusaasi, amaganya nari oburwaire bw’amaani. Mbwenu shi noija kuguma n’embeera ezo otaine matsiko g’okukirira kimwe? Ngaaha buzima. Endwara n’okufa nibiija kuhweraho kimwe omu nsi ya Ruhanga ensya. (Kush. 21:​3, 4) Amatsiko ago nigatuhwera kutagira ekiniga n’obushaarizi ahabw’ebirikutubaho obunaku obu. Nitugira okumarwa n’obu twakuhikwaho obutari buringaaniza, okufeerwa, nari twayemera endwara n’oburemeezi obundi. Ahabw’enki? Ahabw’okuba n’obu embeera zaitu zaakuguma zita obunaku obu, nitumanya ngu ‘obusaasi bwaitu n’obw’omwanya mukye’ kandi titurigaruka kugira obusaasi omu nsi ensya.—2 Kor. 4:​17, 18.

14. Nitubaasa kuhamya tuta amatsiko gaitu?

¹⁴ Amatsiko nigatuhwera kugira okumarwa. Mbwenu shi nitubaasa kugahamya tuta? Nk’oku omuntu otarikuhweza gye kirikumwetengyesa kujwara ebirahure by’amaisho kubaasa kureeba ebiri hare, naitwe haine ebi twine kukora kubaasa kuhamya amatsiko gaitu g’ebiro by’omumaisho. Twaba nitwerarikirira ahabw’okutagira esente zirikumara, nitubaasa kuteekateeka aha ku embeera zaitu ziraabe ziri obu esente, amabanja, n’obutari buringaaniza omu by’entaatsya biraabe bitakiriho. Twayehurira kubi ahabw’okugira ngu titutungire obujunaanizibwa obu turikwenda, nitubaasa kuteekateeka aha ku obujunaanizibwa obwo butarikubaasa kugyeragyeranisibwa n’obwire bwingi obu turaamare nituheereza Yehova tuhikiriire. (1 Tim. 6:19) Ahabw’okugira ngu twine bingi ebirikutwerarikiriza hati, nikibaasa kutugumira kuteekateeka aha biro by’omumaisho. Kwonka, twaguma nituteekateeka ahari nyentsya ei Yehova arikuturaganisa, nikituhwera kutata omutima aha buremeezi obu twine hati.

15. Nooyegyera ki aha bigambo bya Christa?

¹⁵ Teekateeka aha ku amatsiko gaahwereire munyaanyazi-itwe Christa, muka Dennis, owaaba yaagambirweho. Naagira ati: “Nyine endwara erikureetera enyama z’omubiri gwangye kuhwa amaani, n’ahabw’ekyo ningyendera omu kagaari kandi niimara obwire obwingi omu kitanda. Nimba nyine obusaasi eizooba ryona. Enyimaho omushaho wangye angizire ngu tindikwija kukira. Kwonka ahonaaho nkateekateeka nti, ‘Tarikureeba ebiro by’omumaisho nk’oku ndikubireeba.’ Okuta omutima aha amatsiko nikimpwera kugira obusingye bw’omu biteekateeko. Nyine kugumisiriza embeera egi naaba nkiri omu nsi egi, kwonka ninyija kutunga okushemererwa kwingi omu nsi ensya!”

“ABARIKUMUTIINA TIBAGIRA KI BAKYENA”

16. Ahabw’enki omugabe Daudi yaahandiikire ngu abarikutiina Yehova “tibagira ki bakyena”?

¹⁶ Omuheereza wa Yehova oine okumarwa nawe naahikwaho oburemeezi. Omugabe Daudi akafeerwa abaana be bashatu, yaabeihererwa, bamureebya, kandi yaamara emyaka arikuzengyerera obu Saulo yaabaire naamuhiiga kumukora kubi. Kwonka nabwo, obu yaabaire naagumisiriza oburemeezi obwo, akagamba ahari Yehova ati: “Abarikumutiina tibagira ki bakyena.” (Zab. 34:​9, 10) Ahabw’enki yaagambire atyo? N’ahabw’okugira ngu akaba naamanya ngu n’obu abaheereza ba Yehova baakuhikwaho oburemeezi, naija kuguma naabaha ebirikwetengyesa. (Zab. 145:16) Kandi nitubaasa kwesigira kimwe Yehova kutuhwera kuraba omu buremeezi obw’emiringo yoona. Buzima nitubaasa kugira okumarwa.

17. Ahabw’enki omaririire kumarwa n’ebi oine?

¹⁷ Yehova naayenda ngu ogire okumarwa. (Zab. 131:​1, 2) N’ahabw’ekyo teeraho nk’oku orikubaasa kukugira. Waakora munonga kuba omuntu orikusiima, okagira emiteekateekyere mirungi, okaba omucureezi kandi okahamya amatsiko gaawe, noija kubaasa kugira ngu: Eego, nyine okumarwa.—Zab. 16:​5, 6.