Okubagana n’Abandi ebi Oyegire

Okweshomesa nikubaasa kuturuhuura, kwonka nitugasirwa munonga twagambira abandi ebirikugaruramu amaani ebi turikwega omu Kigambo kya Ruhanga. Enfumu 11:25 nihagira hati: “Orikuha abandi amaizi, nawe aryagaheebwa.”

Twagambira abandi ebi turikwega, nikituhwera kuguma nitwijuka enshonga enkuru, kandi twongyera n’okuzeetegyereza gye. Kandi ahabw’okugira ngu enshonga ezo nizibaasa kuhwera abandi, nikitureetera okushemererwa twabagambira eby’omuhendo ebi turikuba twegire.—Byak. 20:35.

Teeraho kukora eki: Omu saabiiti erikukurataho, teeraho kugambira abandi ebi oyegire omu kweshomesa. Ekyo noobaasa kukikora orikugambira omunyabuzaare, omwe aha b’omu kibiina kyawe, ou orikukora nawe, ou orikushoma nawe, mutaahi waawe, nari ou oraashange omu kubuurira. Teeraho kubagambira ebi oyegire omu bigambo byawe kandi omu muringo ogurikwetegyerezibwa.

Eky’okwijuka: Gambira abandi ebi oyegire kubaasa kubagaruramu amaani kutari kweyoreka nari kwetunguura.—1 Kor. 8:1.