EKICWEKA EKY’OKWEGA 32
EKYESHONGORO 38 Naija Kukugumya
Oku Yehova Arikutuhwera Kugumisiriza
‘Ruhanga ow’embabazi zoona . . . naija kubagarura busya, abagumye, abahe amaani.’—1 PET. 5:10.
ENTIMA
Ebi Yehova atuhaire kutuhwera kugumisiriza n’oku turikubaasa kubikoresa.
1. Ahabw’enki twine kugira okugumisiriza, kandi ni buhwezi ki obu twine? (1 Petero 5:10)
ABAHEEREZA ba Yehova baine kugira okugumisiriza omu biro eby’emperu ebi ebigumire. Ahabw’okuba abamwe baine endwara z’amaani ezitarikukira. Abandi baine amaganya ahabw’okufeerwa abakundwa baabo. Kandi abandi nibahakanisibwa ab’omu maka gaabo n’ab’obushoboorozi. (Mat. 10:18, 36, 37) Gira obwesigye ngu oburemeezi bwona obu orikurabamu, Yehova naabaasa kukuhwera kubugumisiririza.—Shoma 1 Petero 5:10.
2. Nitutunga tuta okubaasa kw’okugumisiriza?
2 Okugumisiriza nikimanyisa okuguma ori omwesigwa ahari Yehova, kandi okaguma oine amatsiko waahikwaho oburemeezi, okuhiiganisibwa n’okugyezibwa. Okugumisiriza nk’Abakristaayo tikirikuruga omu kubaasa kwaitu kureka ahari Yehova orikubaasa kutuha amaani “agarikukirira kimwe.” (2 Kor. 4:7) Omu kicweka eki nituza kushwijuma ebintu bina ebi Yehova atuhaire kutuhwera kugumisiriza. Kandi nituza n’okwetegyereza oku turikubaasa kukoresa ebintu ebyo.
OKUSHABA
3. Ahabw’enki nitubaasa kugira ngu okushaba nikitangaaza?
3 Yehova ataireho entebeekanisa erikutangaaza erikutuhwera kugumisiriza. Atuhaire omugisha gw’okubaasa kugamba nawe n’obu turaabe turi abasiisi. (Heb. 4:16) Nk’eky’okureeberaho: Nitubaasa kushaba Yehova obwire bwona kandi aha nshonga yoona. Naabaasa kuhurira okushaba kwaitu omu rurimi rwona, omu mwanya gwona, yaaba turi twenka nari turi omu kihome. (Yon. 2:1, 2; Byak. 16:25, 26) Twaba twerarikirire munonga kandi tutaine bigambo by’okukoresa kugamba enyehurira zaitu, Yehova naabaasa kwetegyereza ebi turikwenda kumugambira. (Rom. 8:26, 27) Buzima, okushaba n’eky’okutangaaza!
4. Ahabw’enki nitubaasa kugira ngu okushaba Yehova kutuhwera kugumisiriza nikihikaana n’ebi arikukunda?
4 Yehova naatuhamiza omu Kigambo kye ‘ngu twashaba ekintu kyona nk’oku arikukunda, naatuhurira.’ (1 Yoh. 5:14) Mbwenu shi nitubaasa kushaba Yehova kutuhwera kugumisiriza? Eego! Ahakuba ekyo nikihikaana n’ebi arikukunda. Ahabw’enki nitugira tutyo? Ku turikugumisiririza oburemeezi, nituha Yehova eky’okugarukamu Sitaane Omuregi otuura naamujuma. (Enf. 27:11) Oyihireho ekyo, Baibuli neegira ngu Yehova aine ekihika ‘ky’okweyoreka ku ari ow’amaani kuhwera abaine emitima eshugaine ahariwe.’ (2 Bus. 16:9) N’ahabw’ekyo nitubaasa kuhamiza kimwe ngu Yehova aine amaani n’ekihika ky’okutuhwera kugumisiriza.—Isa. 30:18; 41:10; Luk. 11:13.
5. Okushaba nikubaasa kutuhwera kuta kugira obusingye bw’omu biteekateeko? (Isaaya 26:3)
5 Baibuli neegira ngu twagambira Yehova ebirikutwerarikiriza, obusingye bwe “oburengire okwetegyereza kw’omuntu weena, nibwija kuguma burinde emitima [yaitu] n’obwengye [bwaitu].” (Fil. 4:7) Teekateeka ahari eki. Abantu abatarikuheereza Yehova ku barikuhikwaho embeera zigumire, nibagyezaho emiringo etari emwe kubaasa kutunga obusingye bw’omu biteekateeko. Nk’eky’okureeberaho, abamwe baine omuringo ogu barikuteeraho kweyebesa ebiteekateeko byabo byona otwariiremu n’ebirikubeerarikiriza. Kwonka ekyo n’eky’akabi munonga omu by’omwoyo. (Gyeragyeranisa Matayo 12:43-45.) Oyihireho ekyo, obusingye obu Yehova arikutuha twamushaba, nibukirira hare obusingye obu omuntu arikutunga kurabira omu kweyebesa ebiteekateeko bye. Twashaba Yehova, nitworekyera kimwe ngu nitumwesiga kandi naatuha ‘obusingye obutarikuhwaho.’ (Shoma Isaaya 26:3.) Omuringo gumwe oku Yehova arikukora ekyo, n’okutuhwera kwijuka amazima agarikuhuumuriza agu twegire omu kigambo kye. Amazima ago nigahuumuza ebiteekateeko n’emitima yaitu ahabw’okuba nitumanya ngu Yehova naatufaho, kandi naayenda ngu tusingure.—Zab. 62:1, 2.
6. Omugisha gw’okushaba noobaasa kugukoresa ota omu bwijwire? (Reeba n’ekishushani.)
6 Eki orikubaasa kukora. Waaba noogumisiriza okugyezibwa, “yegyekyerera [Yehova] omutwaro gwawe” kandi omushabe kukuha obusingye. (Zab. 55:22) Mushabe obwengye oburikwetengyesa oburaakuhwere kuraba omu mbeera egyo. (Enf. 2:10, 11) Waaba nooyeshengyereza Yehova kukuhwera kugumisiriza, otakaayebwa kumusiima. (Fil. 4:6) Teeraho kureeba oku Yehova arikukuhwera kugumisiriza oburemeezi, kandi omusiime ahabw’okukushagika. Otakaikiriza oburemeezi kukuremesa kureeba emigisha ei Yehova akuhaire.—Zab. 16:5, 6.
Nitugamba na Yehova kurabira omu kushaba. Kandi Yehova naagamba naitwe kurabira omu Kigambo kye Baibuli (Reeba akacweka 6)b
EKIGAMBO KYA RUHANGA
7. Okweyegyesa Baibuli nikubaasa kutuhwera kuta kugumisiriza?
7 Yehova atuhaire Ekigambo kye kutuhwera kugumisiriza. Omu Baibuli harimu emishororongo mingi erikutuhamiza kimwe ngu Yehova naija kutuhwera. Nk’eky’okureeberaho, Matayo 6:8 nihagira hati: “Shoimwe amanya ebi mukyenire mutakamushabire.” Yesu niwe yaagambire ebigambo ebyo, kandi naamanya gye Yehova kukira omuntu ondiijo weena. N’ahabw’ekyo nituhamiza kimwe ngu twaba nituraba omu buremeezi, Yehova naaba naamanya ebi turikwetenga. Kandi omu Baibuli harimu ebiraganiso bingi ebirikubaasa kuhamya okumariirira kwaitu kw’okugumisiriza.—Zab. 94:19.
8. (a) Ha eky’okureeberaho eky’omusingye gwa Baibuli ogurikubaasa kutuhwera kugumisiriza. (b) Niki ekirikubaasa kutuhwera kwijuka emisingye ya Baibuli kubaasa kucwamu gye?
8 Emisingye ya Baibuli neebaasa kutuhwera kugumisiriza. Kandi erimu obuhabuzi oburikubaasa kutuhwera kucwamu gye. (Enf. 2:6, 7) Nk’eky’okureeberaho, Baibuli neeturabura kuterarikirira aha bya nyencakare kureka buri izooba rihwe n’amaganya gaaryo. (Mat. 6:34) Twaba twine omucwe gw’okushoma Ebyahandiikirwe n’okubiteekateekaho, nikiija kutworobera kwijuka emisingye ya Baibuli ei turikwetenga kubaasa kucwamu gye, nari kwemera oburemeezi.
9. Ebyahandiikirwe nibituhwera bita kwongyera kugira obwesigye omu buhwezi bwa Yehova?
9 Kandi Baibuli erimu eby’okureeberaho eby’abantu baabutoosha abaayesigire Yehova, kandi bakatunga obuhwezi bwe. (Heb. 11:32-34; Yak. 5:17) Twateekateeka aha byabahikireho, nitwongyera kugira obwesigye ngu Yehova “niwe buhungiro bwaitu, kandi amaani gaitu, omuhwezi buzima otabura mu biro by’enaku.” (Zab. 46:1) Kandi twayongyera kuteekateeka aha ku abaheereza ba Yehova abeesigwa aba ira baamwesigire, nikituhiga kutooreza okwikiriza kwabo n’okugumisiriza kwabo.—Yak. 5:10, 11.
10. Noobaasa kukoresa ota Baibuli omu bwijwire, kugira ngu ebaase kukuhwera?
10 Eki orikubaasa kukora. Shoma Baibuli buri izooba, kandi obiike emishororongo erikubaasa kukuhwera. Baingi baashangire ngu okushwijuma ekyahandiikirwe kya buri izooba n’omuringo murungi gw’okutandika izooba n’ebiteekateeko ebirikugaruramu amaani kuruga omu Baibuli. Munyaanyazi-itwe orikwetwa Mariea akashanga ekyo kihikire obu abazaire be bombi baashangwa baine ekookoro. Niki ekyamuhweraire kugumisiriza obu yaabaire nabareeberera omu meezi makye bari haihi kufa? Naagira ati: “Buri kasheeshe nkaba nshoma ekyahandiikirwe kuruga omu katabo Okushwijuma Ebyahandiikirwe Buri Izooba kandi nkiteekateekaho. Entebeekanisa egi ekampwera kuta omutima ahari Yehova n’ebi arikuraganisa omu myanya gw’okuguta aha buremeezi obu naabaire nyine.”—Zab. 61:2.
AB’EISHE-EMWE BAGYENZI BAITU
11. Ahabw’enki nikitugumya kumanya ngu hariho abandi abarikugumisiriza oburemeezi?
11 Yehova atuhaire ab’eishe-emwe na banyaanyazi-itwe omu nsi yoona kutuhwera kugumisiriza. Okumanya ngu ‘ab’eishe-emwe abari omu nsi yoona nabo nibahikwaho obusaasi nk’obwaitu’ nikituhuumuriza. (1 Pet. 5:9) Buzima, nitubaasa kuhamya ngu embeera yoona ei turikurabamu, eraahikire aha bandi, kandi baagigumisiriza. Ekyo nikimanyisa ngu naitwe nitubaasa kugumisiriza.—Byak. 14:22.
12. Ab’eishe-emwe na banyaanyazi-itwe nibabaasa kutuhwera bata, kandi itwe nitubaasa kubakorera ki? (2 Abakorinso 1:3, 4)
12 Twaba nitugumisiriza oburemeezi, ab’eishe-mwe bagyenzi baitu nibabaasa kutugumya. Ekyo nikyo kyahikire aha ntumwa Paulo. Kaingi, akasiima abaamuhweraire obu yaabaire akomiirwe omu nju, kandi akaba abagamba amaziina omu mabaruha ge. Bakamuhuumuriza, baamugumya, kandi baamuha n’obuhwezi oburikwetengyesa. (Fil. 2:25, 29, 30; Kol. 4:10, 11) Naitwe obunaku obu nitubaasa kukorerwa nikyo kimwe. Twaba nitwetenga obuhwezi kubaasa kugumisiriza, ab’eishe-emwe na banyaanyazi-itwe nibatuhwera, kandi nabo baabwetenga nituba tweteekateekire kubahwera.—Shoma 2 Abakorinso 1:3, 4.
13. Niki ekyahweraire munyaanyazi-itwe orikwetwa Maya kugumisiriza?
13 Ab’eishe-emwe na banyaanyazi-itwe bakagumya munyaanyazi-itwe ow’omuri Russia orikwetwa Maya. Omu 2020, ab’obushoboorozi bakacaaka enju ye, bwanyima baamutaho omushango ahabw’okugambira abandi ebi arikwikiriza. Naagira ati: “Omu bwire obwo nkaba nduhire omu nyehurira, kwonka ab’eishe-emwe na banyaanyazi-itwe bakanteerera esimu kandi baampandiikira amabaruha barikumpamiza ku barikunkunda. Nkaba ntwire niimanya ngu nyine eka mpango erikunkunda, kwonka omu 2020 nkongyera kukihamya.”
14. Nitubaasa kugasirwa tuta omu buhwezi bw’ab’eishe-emwe bataahi baitu twaba nitugumisiriza oburemeezi? (Reeba n’ekishushani.)
14 Eki orikubaasa kukora. Waaba noogumisiriza, guma haihi n’ab’eishe-emwe na banyaanyazi-itwe. Oteeziringa kushaba abareeberezi obuhwezi. Nibabaasa kuba “nk’omwanya ogw’okwekingaho omuyaga, n’obwegamo bw’eihunga.” (Isa. 32:2) Kandi, ijuka ngu n’ab’eishe-emwe bataahi baawe nabo nibagumisiriza embeera zigumire. Waahwera ondiijo orikugumisiriza oburemeezi, nikiija kukuhwera kuguma oine emiteekateekyere eringaniire aha buremeezi obu oriyo noorabamu.—Byak. 20:35.
Guma haihi n’ab’eishe-emwe na banyaanyazi-itwe (Reeba akacweka 14)c
AMATSIKO GAITU
15. Amatsiko gahweraire gata abaheereza ba Yehova abeesigwa otwariiremu na Yesu? (Abaheburaayo 12:2)
15 Yehova atuhaire amatsiko gahami kutuhwera kugumisiriza. (Rom. 15:13) Ijuka oku amatsiko gaahweraire Yesu kugumisiriza eizooba eryakizireho kumugumira omu nsi. (Shoma Abaheburaayo 12:2.) Yesu akaba naamanya ngu yaaguma ari omwesigwa kikaba nikiija kweza eiziina rya Yehova. Kandi Yesu akata omutima aha kugaruka kuba na Ishe, n’okwija kuheereza n’abarumuna omu Bukama bw’omu iguru. Naitwe, amatsiko gaitu ag’okutuuraho ebiro byona omu nsi ensya nigatuhwera kugumisiriza embeera zigumire ezirikutuhikaho omu nsi ya Sitaane.
16. Amatsiko gakahwera gata munyaanyazi-itwe omwe kugumisiriza, kandi ebi yaagambire noobyegyeraho ki?
16 Teekateeka aha ku amatsiko g’Obukama gaahweraire munyaanyazi-itwe omuri Russia orikwetwa Anna, ou iba yaakwatsirwe kandi akateebwa omu kihome atakahozesiibwe. Ekyo ku kyabaireho, Anna akagira ati: “Okushaba aha matsiko g’ebiro by’omumaisho n’okugateekateekaho nikimpwera kutahwamu amaani. Niimanya ngu egi tiyo muheru. Yehova naija kusingura kandi naitwe tusingure.”
17. Nitubaasa kworeka tuta ngu nitusiima amatsiko gaitu agarikwegamira omu Baibuli? (Reeba n’ekishushani.)
17 Eki orikubaasa kukora. Taho obwire bw’okuteekateeka aha bintu birungi ebi Yehova arikukuraganisa. Yereebe ori omu nsi ensya, oteere akashushani aha migisha ei oraatungye. Kandi oburemeezi bwona obu orikurabamu hati nibwija kureebeka nka “bukye, [kandi] obw’omwanya mukye.” (2 Kor. 4:17) Teeraho kugambira abandi ebi orikwikiriza. Abantu baingi tibarikumanya ebirikukwata aha kigyendererwa kya Ruhanga eky’ebiro by’omumaisho. N’ahabw’ekyo teekateeka aha ku barikugumirwa kwemera oburemeezi oburi omu nsi ya Sitaane. Okugaaniira nabo aha matsiko g’Obukama nikibaasa kubahiga kwenda kumanya ebirikukiraho.
Taho obwire bw’okuteekateeka ahari nyentsya nungi ei Yehova arikukuraganisa (Reeba akacweka 17)d
18. Nitugasirwa tuta twayesiga ebiraganiso bya Yehova?
18 Bwanyima ya Yobu kugumisiriza okugyezibwa kw’amaani, akagambira Yehova ati: “Nimmanya ku orikubaasa byona, kandi tihariho kirikubaasa kuzibira eki omaririire kukora.” (Yob. 42:2) Yobu akeega ngu tihaine ekirikubaasa kuremesa ekigyendererwa kya Yehova kuhikiirira. Nka Yobu, naitwe nitubaasa kugumisiriza twaijuka ngu Yehova naija kuhikiiriza ekigyendererwa kye. Nk’eky’okureeberaho, teekateeka aha mukazi oine endwara kandi ahwairemu amaani ahabw’okugira ngu abashaho batari bamwe baremirwe kumutambira. Kwonka bwanyima y’omushaho omukugu kandi orikwesigwa kwetegyereza endwara ye kandi akamushoboororera oku araamujanjabe, omukazi ogwo naatunga oburuhuuko n’obu kiraabe nikiija kumutwarira obwire kukirira kimwe. Naabaasa kugumisiriza ahabw’okugira amatsiko ngu naija kuba gye. Nikyo kimwe, okugira obwesigye omu matsiko gaitu aga Paradiso nikituhwera kugumisiriza.
19. Ni bintu ki ebirikubaasa kutuhwera kugumisiriza?
19 Nk’oku twareeba, Yehova naatuhwera kugumisiriza oburemeezi kurabira omu kushaba, Ekigambo kye, ab’eishe-emwe bagyenzi baitu, n’amatsiko gaitu. Twakoresa ebintu ebyo omu bwijwire, Yehova naija kutuhwera kuraba omu buremeezi bwona, okuhitsya obu obusaasi oburikureetwaho ensi ya Sitaane buraahwereho kimwe.—Fil. 4:13.
EKYESHONGORO 33 Yegyekyera Yehova Oburemeezi Bwawe
a Amaziina agamwe omu kicweka eki gahindwirwe.
b ENSHOBOORORA Y’EKISHUSHANI : Ow’eishe-emwe okuzire naagumisiriza omu bwesigwa obwire bwona.
c ENSHOBOORORA Y’EKISHUSHANI: Ow’eishe-emwe okuzire naagumisiriza omu bwesigwa obwire bwona.
d ENSHOBOORORA Y’EKISHUSHANI: Ow’eishe-emwe okuzire naagumisiriza omu bwesigwa obwire bwona.