Oku Twine Kutwaza Haabaho Obutari Buringaaniza

1-2. Abantu nibatwaza bata haabaho obutari buringaaniza, kandi nitubaasa kwebuuza ki?

NITUTUURA omu nsi etarimu buringaaniza. Abantu nibatwarizibwa kubi ahabw’entaatsya yaabo, erangi yaabo, obuhangwa bwabo, n’obukomooko bwabo. Nibabonabona ahabw’okusiisikara kw’obuhangwa bw’ensi obureetsirweho abantu abarikweyendeza n’abategyeki endyarya. Obutari buringaaniza obu n’obundi nibutukwataho twena omu miringo etari emwe.

² Buzima twena nitwenda kutuura omu nsi ahu turikuhurira twine oburinzi kandi turikutwarizibwa gye. N’ahabw’ekyo tikirikututangaaza ku turikureeba abantu baingi baine ekiniga ahabw’obutari buringaaniza oburi omu nsi hati. Bamwe aharibo nibeejumba omu bwesharingo, bahakanisa ebiragiro kandi bashagika ab’eby’obutegyeki abarikubaraganisa kugira eki baakoraho. Kwonka itwe Abakristaayo nitumanya ngu ‘tituri b’ensi’ kandi tutegyereize Obukama bwa Ruhanga oburaamareho obutari buringaaniza bwona. (Yoh. 17:16) Kwonka nabwo, nitushaasha kandi obumwe tugira ekiniga twareeba omuntu naatwarizibwa kubi. Nitubaasa kwebuuza tuti: ‘Mbwenu shi hariho eki ndikubaasa kukora kumaraho obutari buringaaniza?’ Tutakagarukiremu ekibuuzo ekyo, ka tubanze tureebe oku Yehova na Yesu barikwehurira abantu baatwarizibwa kubi.

YEHOVA NA YESU NIBANGA OBUTARI BURINGAANIZA

3. Ahabw’enki kitarikututangaaza twayehurira kubi ahabw’obutari buringaaniza? (Isaaya 5:7)

³ Baibuli neeyoreka ahabw’enki nitwehurira kubi twareeba obutari buringaniza. Neeshoboorora ngu Yehova akatuhanga omu kishushani kye kandi ‘naakunda okuhikiirira n’eby’oburyo.’ (Zab. 33:5; Kut. 1:26) Tarikututwariza kubi kandi tarikwenda omuntu weena kukikora. (Bir. 32:​3, 4; Mik. 6:8; Zek. 7:9) Nk’eky’okureeberaho, omu bwire bwa nabi Isaaya, Yehova akahurira “okurira” kw’Abaisraeli abaabaire nibatwarizibwa kubi bataahi baabo. (Shoma Isaaya 5:7.) Yehova akabafubira ahabw’okwehuzya ebiragiro bye n’okutwariza kubi bataahi baabo.—Isa. 5:​5, 13.

4. Yesu naayehurira ata omuntu yaatwarizibwa kubi? (Reeba n’ekishushani.)

⁴ Yesu naayangira kimwe obutari buringaniza nka Yehova. Eizooba rimwe obu yaabaire ari omu buheereza omu nsi, akareeba omushaija owaabaire akokootsire omukono. Akamugirira esaasi yaamutambira, kwonka abeebembezi b’ediini bakeehurira kubi ahabw’eki Yesu yaakozire. Bakagira ngu Yesu akaba naahenda ekiragiro kya Sabato. Bakaba batarikufayo aha mushaija owaabaire naabonabona. Ekyo kikareetera Yesu kwehurira ata? Akaguubwa kubi kandi yaagira “ekiniga ahabw’obugaangaazi bw’omu mitima yaabo.”—Mak 3:​1-6.

5. Twine kwijuka ki twagira ekiniga ahabw’obutari buringaaniza oburikubaho?

⁵ Ahabw’okugira ngu Yehova na Yesu nibeehurira kubi bareeba obutari buringaaniza, ti kigwire naitwe kwehurira tutyo. (Efe. 4:26) Kwonka twine kukiijuka ngu n’obu twakugira ekiniga, titurikubaasa kumaraho obutari buringaaniza. Amazima gari ngu twamara obwire buraingwa twine ekiniga, nikibaasa kuba eky’akabi aha magara gaitu n’omu nyehurira zaitu. (Zab. 37:​1, 8; Yak. 1:20) Mbwenu shi tushemeire kutwaza tuta haabaho obutari buringaaniza? Nitubaasa kwegyera aha ky’okureeberaho kya Yesu.

OKU YESU YAATWARIZE KU YAAREEBIRE OBUTARI BURINGAANIZA

6. Obu Yesu yaabaire ari omu nsi, akareeba butari buringaaniza bwa muringo ki? (Reeba n’ekishushani.)

⁶ Obu Yesu yaabaire ari omu nsi akareeba obutari buringaaniza bwingi. Akareeba oku abeebembezi b’ediini baabaire nibatwariza kubi abantu baabutoosha. (Mat. 23:​2-4) Kandi akaba naamanya oku abategyeki b’Abarooma baabaire nibatwariza kubi abantu. N’ahabw’ekyo Abayudaaya abaingi bakaba nibenda kwetegyeka. Nangwa bamwe aharibo bakataho ebibiina by’okuhakanisa Abarooma. Kwonka Yesu taratandikireho kibiina ky’eby’obutegyeki nari okugira eki yaashagika kuteeraho kuhindura obutegyeki bw’Abarooma. Kandi ku yaamanyire ngu abantu nibenda kumuhindura omugabe, akabarugamu mpora yaayeshereka.—Yoh. 6:15.

7-8. Ahabw’enki Yesu ataragyerizeho kumaraho obutari buringaaniza obu yaabaire ari omu nsi? (Yohaana 18:36)

⁷ Obu Yesu yaabaire ari omu nsi tarataireho kukwatanisa n’ab’eby’obutegyeki kumaraho obutari buringaaniza. Ahabw’enki? Akaba naamanya ngu abantu tibaine maani nari obushoboorozi bw’okwetegyeka. (Zab. 146:3; Yer. 10:23) Kandi tibarikubaasa kumaraho ekirikureetaho obutari buringaaniza. Ahabw’okugira ngu ensi neetegyekwa Sitaane Omuregi kandi omwitsi, naakoresa obushoboorozi bwe kwenegyeza obutari buringaaniza. (Yoh. 8:44; Efe. 2:2) Kandi ahabw’obutahikiirira, abantu tibarikubaasa kumaraho oburemeezi obwo ahabw’okuba tibarikubaasa kuguma nibakora ebihikire.—Mub. 7:20.

⁸ Yesu akaba naamanya ngu Obukama bwa Ruhanga nibwo buraamareho ebirikureetaho obutari buringaaniza. N’ahabw’ekyo akakoresa obwire bwe n’amaani ge ‘kubuurira n’okugamba ebigambo ebirungi by’Obukama bwa Ruhanga.’ (Luk. 8:1) Akahamiza abainiire “eby’okuhikiirira enjara n’eiriho” ngu oburyarya n’obutari buringaaniza nibiija kuhwaho. (Mat. 5:6; Luk. 18:​7, 8) Kwonka ekyo tikiraije kureetwaho amaani g’abantu nari obwesharingo, kureka Obukama bwa Ruhanga obutari “bw’ensi egi.”—Shoma Yohaana 18:36.

TOOREZA YESU WAAHIKWAHO OBUTARI BURINGAANIZA

9. Niki ekirikukuhamiza ngu Obukama bwa Ruhanga bwonka nibwo buraamareho obutari buringaaniza?

⁹ Obunaku obu, nitureeba obutari buringaaniza bwingi okukira obu Yesu yaareebire ari omu nsi. Kwonka orikureetaho obutari buringaaniza “omu biro by’aha mperu” ebi ni Sitaane n’abantu abatahikiriire abu arikutegyeka. (2 Tim. 3:​1-5, 13; Kush. 12:12) Nka Yesu, nitumanya ngu Obukama bwa Ruhanga nibwo buraiheho Sitaane n’obutari buringaaniza bwona. Ahabw’okugira ngu nitushagika Obukama obwo, titurikwejumba omu bwesharingo nari ebibiina ebirikuteeraho kurwanisa obutari buringaaniza. Teekateeka aha ky’okureeberaho kya munyaanyazi-itwe orikwetwa Stacy.a Obu yaabaire atakamanyire amazima, akaba ayejumba omu bwesharingo. Kwonka akatandika kubangaanisa aha bi yaabaire naakora. Naagira ati: “Ku naabaire mba ndi omu bwesharingo, nkaba nyebuuza yaaba ndi aha rubaju oruhikire. Hati ninshagika Obukama bwa Ruhanga, kandi niimanya ngu ndi aha rubaju oruhikire. Niimanya ngu Yehova naija kurwanirira abarikutwarizibwa kubi kukira oku naabaire nimbaasa kukikora.”—Zab. 72:​1, 4.

10. Ni mu muringo ki oku ebikorwa by’ebibiina ebirikurwanisa obutari buringaaniza birikutaana n’obuhabuzi bwa Yesu oburi omuri Matayo 5:​43-48? (Reeba n’ekishushani.)

¹⁰ Ebibiina ebirikurwanisa obutari buringaaniza nibiba birimu abantu enshaarizi, kandi abarikweyendeza. Emitwarize egyo neetaanira kimwe n’ebi Yesu yaayegyeise. (Efe. 4:31) Ow’eishe-emwe orikwetwa Jeffrey naagira ati: “N’obwesharingo oburikureebwa nk’obw’obusingye, ahonaaho nibubaasa kurugamu obushaarizi n’okunyaga ebintu by’abantu.” Kwonka, Yesu naatwegyesa ngu twine kutwariza abantu boona omu muringo gwa rukundo otwariiremu n’abo abarikutuhakanisa nari abarikutuhiiganisa. (Shoma Matayo 5:​43-48.) Itwe Abakristaayo nituteeraho munonga kwetantara ekintu kyona ekitarikuhikaana n’eky’okureeberaho eki Yesu yaatuteeraireho.

11. Niki ekirikubaasa kutureetera kwenda kushagika ebibiina ebirikurwanisa obutari buringaaniza?

¹¹ N’obu turaabe nitumanya ngu Obukama bwa Ruhanga nibuza kwihaho obutari buringaaniza, nikibaasa kutugumira kutooreza Yesu twatwarizibwa kubi. Teekateeka aha ku munyaanyazi-itwe Janiya yaayehuriire ku bamushoroire ahabw’erangi ye. Naagira ati: “Nkaguubwa kubi, naashaasha munonga kandi naayenda n’okuhoora enzigu. Bwanyima nkateekateeka aha kwegaita aha kibiina ky’okurwanisa okushoroora omu rangi ndikumanya ngu nigwo muringo gwonka ogw’okworeka ekiniga kyangye.” Kwonka bwanyima y’obwire, Janiya akeetegyereza ngu akaba aine kukora empinduka. Akongyeraho ati: “Omu mwanya gw’okwesiga Yehova, nkaba niinyikiriza abantu kushiisha emiteekateekyere yangye. Nkacwamu kwecwa aha kigombe ekyo.” N’obu turaabe tuhikire kugira ekiniga twahikwaho obutari buringaaniza, twine kwegyendesereza kugira kitatureetera kugwera orubaju omu nshonga z’eby’obutegyeki.—Yoh. 15:19.

12. Ahabw’enki twine kwegyendesereza amakuru agu turikutaho omutima?

¹² Niki ekirikubaasa kutuhwera kutegyeka ekiniga kyaitu haabaho obutari buringaaniza? Tushemerere kwegyendesereza aha bi turikushoma, ebi turikuhurikiza, n’ebi turikureeba. Ahabw’okuba emikura y’empurizana emwe neegamba aha butari buringaaniza nk’ekirikushemeza kandi neeshagika ebibiina ebirikwenegyeza obwesharingo. Kandi obwire obwingi, ebitongore by’amakuru nibigwera orubaju. Mbwenu shi haine eki kirikutugasira twaguma tutaire omutima aha makuru g’obutari buringaaniza, n’obu gaakuba gahikire? Twamara obwire aha makuru nk’ago, nitwongyera kwerarikirira n’okugira ekiniga ekitarikwetengyesa. (Enf. 24:10) Kandi nitubaasa kurekyera aho kwebembeza Obukama bwa Ruhanga oburaamareho obutari buringaaniza bwona.

13. Entebeekanisa nungi y’okushoma Baibuli, neebaasa kutuhwera eta kugira emiteekateekyere eringaniire aha butari buringaaniza?

¹³ Entebeekanisa nungi y’okushoma Baibuli n’okuteekateeka aha bi twashoma neebaasa kutuhwera kwemera obutari buringaaniza. Nk’eky’okureeberaho, munyaanyazi-itwe orikwetwa Alia akakwatwaho munonga oku abantu ab’omu kicweka kye baabaire nibatwarizibwa kubi. Kandi okaba nooshusha ngu abaabaire nibakikora bakaba batarikujunaanwa. Naagira ati: “Nkashutama ahansi naayebuuza nti, ‘Niinyikiririza kimwe ngu Yehova naija kumaraho oburemeezi obu?’ Omu bwire obwo nkashoma omuri Yobu 34:​22-29. Emishororongo egyo ekanyijutsya ngu tihaine orikubaasa kweshereka Yehova. Niwe wenka orikubaasa kutwariza gye abantu, kandi niwe araije kugonjoora enshonga.” Kwonka twaba tutegyereize Obukama bwa Ruhanga kumaraho obutari buringaaniza, twine kubwemera hati. Ekyo nitubaasa kukikora tuta?

NITUBAASA KUKORA KI HAABAHO OBUTARI BURINGAANIZA HATI

14. Nitubaasa kukora ki kwetantara kwenegyeza obutari buringaaniza oburiho omu nsi? (Abakolosai 3:​10, 11)

¹⁴ Nitubaasa kutareetera abandi kutwaza nk’oku turikwenda, kwonka itwe nitubaasa kubatwariza omu muringo murungi. Nk’oku twaba twareebire, nitubaasa kutooreza Yesu omu kworeka abandi rukundo. Ekyo nikituhiga kugyoreka n’abo abarikututwariza kubi. (Mat. 7:12; Rom. 12:17) Nikishemeza Yehova twatwariza buri omwe omu muringo gw’embabazi kandi ogw’oburingaaniza.—Shoma Abakolosai 3:​10, 11.

15. Amazima ga Baibuli agu turikwegyesa abantu nigahwera gata omu kutuubya aha butari buringaaniza?

¹⁵ Okugambira abandi amazima g’omu Baibuli nigwo muringo murungi gw’okurwanisa obutari buringaaniza. Ahabw’enki nitugira tutyo? Ahabw’okuba “okumanya [Yehova]” nikubaasa kuhindura omuntu enshaarizi kuba omunyambabazi kandi ow’obusingye. (Isa. 11:​6, 7, 9) Obu omushaija orikwetwa Jemal yaabaire atakeegire amazima, akeegaita aha kibiina ky’abaheekyera ekyabaire nikirwanisa gavumenti ei yaabaire naareeba nka mbi. Naagira ati: “Torikubaasa kugyemesereza abantu kuhinduka. Tihaine owaangyemesereize kuhinduka, kwonka amazima ga Baibuli ei naabaire niinyega gakampindura.” Ebi Jemal yaayegire bikamuhiga kurekyera aho kurwanisa gavumenti. N’ahabw’ekyo twayegyesa abantu amazima ga Baibuli nitubahwera kuteejumba omu bikorwa by’obutari buringaaniza.

16. Ahabw’enki oine ekihika ky’okugambira abandi amatsiko agarikukwata aha Bukama bwa Ruhanga?

¹⁶ Nka Yesu, twine ekihika ky’okugambira abantu ngu Obukama bwa Ruhanga nibwo buraamareho obutari buringaaniza. Kandi amatsiko ago nigabaasa kuhuumuriza abatwire nibatwarizibwa kubi. (Yer. 29:11) Stacy owaaba yaagambirweho naagira ati: “Amazima ga Baibuli gaampweraire kwemera obutari buringaaniza obu ndikureeba n’obu ndikurabamu. Yehova naakoresa Baibuli kutuhuumuriza.” Kwonka kubaasa kubuurira abandi amazima ga Baibuli agarikukwata aha ku obutari buringaaniza buraahweho, twine kuba twetebeekaniise gye. Waahamiza kimwe amazima g’Ebyahandiikirwe agu twareeba omu kicweka eki, noija kubaasa kugeegyesa abandi n’obwegyendesereza aha murimo nari aha ishomero.b

17. Yehova naatuhwera ata kwemera obutari buringaaniza hati?

¹⁷ Nitumanya ngu nitwija kuhikwaho obutari buringaaniza obwire bwona obu Sitaane araamare ari ‘omutegyeki’ w’ensi egi. Kwonka nitubaasa kugirira ekihika obwire obu araabingwe nk’oku Yehova yaaturaganiise. (Yoh. 12:31) Yehova naakoresa Ebyahandiikirwe kutumanyisa ahabw’enki hariho obutari buringaaniza n’oku arikwehurira twaba nitutwarizibwa kubi. (Zab. 34:​17-19) Kandi naakoresa Omwana we kutwegyesa oku twine kutwaza haabaho obutari buringaaniza n’oku Obukama bwa Ruhanga buraabumarireho kimwe omu nsi yoona. (2 Pet. 3:13) Ka tugumizemu kugambira abandi amakuru marungi g’Obukama n’omujinya, twine ekihika ky’okuba omu nsi eraije kuba eijwire “eby’oburyo n’okuhikiirira.”—Isa. 9:7.