EKICWEKA EKY’OKWEGA 42
EKYESHONGORO 44 Okushaba kw’Omuntu Ohwairemu Amaani
Ekirikubaasa Kutuhwera Kushaba Twihire aha Mutima
“ Ai [Yehova], ninkutakira n’omutima gwangye gwona, ongarukyemu.”—ZAB. 119:145.
ENTIMA
Okuteekateeka aha kushaba okuri omu Baibuli nikibaasa kutuhwera kushaba twihire aha mutima.
1-2. (a) Niki ekirikubaasa kuturemesa kushaba Yehova twihire aha mutima? (b) Nitumanya tuta ngu Yehova naahurira okushaba kwaitu?
OBUMWE nooreeba ngu okushaba kwawe kubaire okw’okugarukamu ebigambo kyonka nari kuri nk’omugyenzo? Kyaba nikwo kiri tori wenka. Ahabw’okugira bingi by’okukora nitubaasa kurahukiiriza omu kushaba kwaitu. Nari obumwe nikibaasa kutugumira kugambira Yehova oku turikwehurira ahabw’okugira ngu nitwereeba nk’abatashemeire kumushaba.
2 Baibuli neetuhamiza ngu ekikuru ahari Yehova ti bigambo ebi turikukoresa twaba nitushaba, kureka okushaba twihire aha mutima omu bucureezi. Naahurira okutaka “kw’abacureezi.” (Zab. 10:17) Naahurira buri kigambo eki turikukoresa omu kushaba ahakuba naatufaho.—Zab. 139:1-3.
3. Nituza kugarukamu bibuuzo ki omu kicweka eki?
3 Omu kicweka eki nituza kugarukamu ebibuuzo ebi: Ahabw’enki tutaine kutiina kugambira Yehova oku turikwehurira? Nitubaasa kushaba tuta Yehova twihire aha mutima? Okuteekateeka aha kushaba okuri omu Baibuli nikituhwera kita kwongyera kushaba twihire aha mutima? Kandi nitubaasa kukora ki twaba twerarikirire munonga tukaburwa ebigambo by’okushoboorora enyehurira zaitu?
OTATIINA KUGAMBIRA YEHOVA OKU ORIKWEHURIRA
4. Niki ekirikubaasa kutuhwera kugambira Yehova oku turikwehurira? (Zaaburi 119:145)
4 Twamanya ngu Yehova ni munywani waitu orikutwendeza ebirungi, nikituhwera kumugambira oku turikwehurira tutatiinire. Omuhandiiki wa Zaaburi 119 akateeraho kugira omukago murungi na Yehova. Akaraba omu buremeezi bwingi. Abantu babi bakamugambaho ebishuba. (Zab. 119:23, 69, 78) Kandi akaba naateganisibwa obutahikiirira bwe. (Zab. 119:5) Kwonka nabwo, taratiinire kugambira Yehova oku yaabaire naayehurira.—Shoma Zaaburi 119:145.
5. Ahabw’enki tutaine kwikiriza enyehurira mbi kuturemesa kushaba Yehova? Ha eky’okureeberaho.
5 Yehova naayenda ngu n’abakozire ebibi by’amaani bamushaba. (Isa. 55:6, 7) N’ahabw’ekyo titwine kwikiriza ekintu kyona kuturemesa kumushaba. Nk’eky’okureeberaho, omuvugi w’enyonyi tarikutiina kugamba n’abari aha kishaayi yaaba naayetenga obuhwezi bwabo. Mbwenu shi yaahaba nari akakora enshobe naabaasa kweziringa kushaba obuhabuzi ahabw’okugira ngu nikimushwaza? Ngaaha buzima! Nikyo kimwe, naitwe obumwe twashoberwa nari twakora enshobe, titwine kutiina kugambira Yehova oku turikwehurira.—Zab. 119:25, 176.
OKU ORIKUBAASA KUSHABA OYIHIRE AHA MUTIMA
6-7. Okuteekateeka aha mitwarize ya Yehova nikibaasa kutuhwera kita kwongyera kushaba twihire aha mutima? Ha eky’okureeberaho. (Reeba n’obugambo obw’ahansi.)
6 Okushaba kwaitu nikwongyera kugira amakuru twagambira Yehova ebiteekateeko byaitu n’oku turikwehurira twihire aha mutima. Mbwenu shi niki ekirikubaasa kutuhwera kushaba omu muringo nk’ogwo?
7 Teekateeka aha mitwarize ya Yehova.a Twayongyera kuteekateeka aha mitwarize ya Yehova nitwongyera kumushaba twihire aha mutima. (Zab. 145:8, 9, 18) Teekateeka aha ky’okureeberaho kya munyaanyazi-itwe orikwetwa Kristine, ou ishe yaabaire ari enshaarizi. Naagira ati: “Nkaba ningumirwa kureeba Yehova nka Tata owa rukundo n’okugamba nawe. Nkaba ninteekateeka ngu obutahikiirira bwangye bukaba nibwija kumureetera kuntsigaho.” Ni mutwarize ki ogu Yehova aine ogwamuhwereire? Naagira ati: “Rukundo ya Yehova etarikuhinduka neempwera kwehurira gye. Niimanya ngu tarikwija kuntsigaho, kandi n’obu naakukora enshobe naija kumpwera omu muringo gwa rukundo. Eki nikimbaasisa kumugambira ebirikunshemeza n’ebirikundeetera obusaasi.”
8-9. Nitugasirwa tuta twateekateeka aha bi turikuza kugamba tutakashabire? Ha eky’okureeberaho.
8 Teekateeka aha bi oraagambe. Otakashabire, noobaasa kugira ebibuuzo ebi waayebuuza. Nk’eky’okureeberaho, ‘Ni buremeezi ki obu nyine hati? Haine ou nyine kusaasira? Haine oburemeezi busya obu nyine obu ndikwetenga obuhwezi bwa Yehova kubaasa kubusingura?’ (2 Bag. 19:15-19) Nitubaasa n’okukuratira omuringo ogu Yesu yaateireho turikuteekateeka aha bi turikubaasa kushaba Yehova ebikwatiraine n’eiziina rye, Obukama bwe, n’ekigyendererwa kye.—Mat. 6:9, 10.
9 Munyaanyaziitwe orikwetwa Aliska ku yaamanyire ngu iba aine ekookoro y’obwongo, akagumirwa kushaba. Naagira ati: “Nkaba nyine amaganya mingi ekyandetaire kuremwa kuteekateeka ebi ndagambe naaba ninshaba.” Niki ekyamuhweraire? Naashoboorora ati: “Nintwara akaire kakye ntakashabire kubaasa kutebeekanisa ebiteekateeko byangye, kandi ekyo nikimpwera kuteetaho munonga omutima naaba ninshaba. Okukora ekyo kindeeteire kwikaikana n’okugambira Yehova enshonga zitari zimwe omu kushaba.”
10. Ahabw’enki twine kuteeraho kwetwara twaba nitushaba? (Reeba n’ebishushani.)
10 Yetware waaba nooshaba. Okushaba kugufu nikubaasa kuba okw’omugasho kwonka kubaasa kugamba byona ebituri aha mutima, twine kwetwara twaba nitushaba.b Elijah iba wa Aliska, naagira ati: “Niinteeraho kushaba emirundi mingi omu izooba, kandi nyongyeire kwirira haihi Yehova ahabw’okuteeraho kwetwara naaba ninshaba. N’ahabw’ekyo nimbaasa kwetwara omu kushaba ahakuba niimanya ngu Yehova naaguma ampurikize kuhitsya naaheza kushaba.” Ekyo noobaasa kukikora ota? Shabira omu bwire n’omwanya ogucureire ahu orikubaasa kuguma nooyetwara waaba nooshaba, kandi omu iraka eririkuhurirwa.
Tunga obwire n’omwanya oguraakubaasise kushaba orikwetwara (Reeba akacweka 10)
TEEKATEEKA AHA KUSHABA OKUHANDIIKIRWE OMU BAIBULI
11. Nitubaasa kugasirwa kuta twateekateeka aha kushaba okuhandiikirwe omu Baibuli? (Reeba n’akabokusi “Embeera Yaawe Neeshushana Eta n’Eyaabo?”)
11 Noobaasa kugasirwa munonga waateekateeka aha byeshongoro ebiri omu Baibuli nka zaaburi, n’oku abaheereza ba Yehova baashabire baihire aha mutima. Waakora otyo, nikiija kukuhiga kugambira Yehova buri kimwe ekikuri aha mutima. Noobaasa kutunga n’ebigambo bisya ebi orikubaasa kukoresa kuhimbisa Yehova waaba nooshaba. Kandi noobaasa kushangamu abantu abaashabire baine oburemeezi nk’obwawe.
12. Nitubaasa kwebuuza bibuuzo ki twateekateeka aha kushaba kw’abaheereza ba Yehova okuri omu Baibuli?
12 Waaba nooteekateeka aha bigambo ebi abaheereza ba Yehova ab’omu Baibuli baakoreise omu kushaba, noobaasa kwebuuza oti: ‘N’oha owaagambire ebigambo ebi, kandi akaba ari omu mbeera ki? Embeera ye eine kakwate ki n’eyangye? Okushaba oku ninkwegyeraho ki?’ Nikibaasa kukwetengyesa kwongyera kucondooza kutunga eby’okugarukamu by’ebibuuzo ebyo, kwonka waakikora noija kugasirwa. Teekateeka aha by’okureeberaho ebi.
13. Nitubaasa kwegyera ki aha kushaba kwa Hanna? (1 Samueli 1:10, 11) (Reeba n’ekishushani.)
13 Shoma 1 Samueli 1:10, 11. Obu Hanna yaagamba ebigambo ebyo, akaba aine oburemeezi bw’emiringo ebiri. Akaba ari engumba, kandi muka iba akaba naamutwariza kubi. (1 Sam. 1:4-7) Waaba oine oburemeezi obu otarikubaasa kumaraho, noobaasa kwegyera ki aha kushaba kwa Hanna? Akatunga obuhuumure arikwetwara yaaba naashaba, kandi arikugambira Ruhanga obusaasi bwe bwona. (1 Sam. 1:12, 18) Naitwe nitubaasa kutunga obuhuumure ‘twayegyekyerera [Yehova] omutwaro gwaitu,’ kandi tukamugambira oku turikwehurira aha oburemeezi obu turikurabamu.—Zab. 55:22.
Obu Hanna yaabaire ari engumba, kandi arikutuuntuzibwa muka iba, akagambira Yehova obusaasi obu yaabaire aine aha mutima (Reeba akacweka 13)
14. (a) Niki ekindi eki turikwegyera ahari Hanna? (b) Okuteekateeka aha Byahandiikirwe nikibaasa kutuhwera kita kwongyera kushaba twihire aha mutima? (Reeba obugambo obw’ahansi.)
14 Bwanyima y’emyaka mikye Hanna aherize kuzaara Samueli, akamutwarira Eli Omunyamurwa Omukuru. (1 Sam. 1:24-28) Obu yaabaire naashaba akooreka okusiima ahakuba akeetegyereza ngu Yehova naarinda abaheereza be abeesigwa.c (1 Sam. 2:1, 8, 9) Oburemeezi obu yaabaire aine omu ka nibubaasa kuba butarahwaireho, kwonka akaguma ataire omutima aha ku Yehova yaamuhaire emigisha. Nitubaasa kumwegyeraho ki? Twata omutima aha ku Yehova atwire naatushagika, nitwija kugumisiriza embeera zigumire ezi turikurabamu hati.
15. Nitubaasa kwegyera ki aha kushaba kwa nabi Yeremia, twahikwaho obutari buringaaniza? (Yeremia 12:1)
15 Shoma Yeremia 12:1. Obumwe nabi Yeremia akaba ayehurira kubi ku yaabaire areeba abantu babi bari omu mbeera nungi. Kandi akeehurira kubi ku yaahiiganisiibwe Abaisraeli bagyenzi be. (Yer. 20:7, 8) Naitwe nikwo turikwehurira twareeba abantu endyarya barikutunguuka nari twashekyererwa. N’obu Yeremia araabe yaagambiire Yehova oku yaabaire naayehurira, tarabanganiise aha buringaaniza bwe. Ku yaareebire oku Yehova yaafubiire abantu abagomi, akoongyera kwesigira kimwe oburingaaniza bwe. (Yer. 32:19) Naitwe nitubaasa kugambira Yehova oku turikwehurira twaba nitushaba, twine obwesigye ngu omu bwire bwe obuhikire, naija kugonjoora obutari buringaaniza oburiho hati.
16. Nitubaasa kwegyera ki aha Muleevi enkwatwa embeera yaitu yaaba etarikutwikiriza kukora ebi turikwenda? (Zaaburi 42:1-4) (Reeba n’ebishushani.)
16 Shoma Zaaburi 42:1-4. Ekyeshongoro eki kikahandiikwa Omuleevi owaabaire ari omu bukwatwa atarikubaasa kuramya hamwe n’Abaisraeli bagyenzi be. Zaaburi ye neeyoreka oku yaabaire naayehurira. Nitubaasa kwehurira nkawe twaba tutarikubaasa kuruga omuka nari twaba turi omu kihome ahabw’okwikiriza kwaitu. Enyehurira zaitu nizibaasa kuhindahinduka, kwonka nikiba kiri kirungi twazigambira Yehova omu kushaba. Ekyo nikibaasa kutuhwera kushwijuma ebiteekateeko byaitu kubaasa kugira emiteekateekyere eringaniire aha mbeera yaitu. Nk’eky’okureeberaho, Omuleevi akakyetegyereza ngu akaba aine emigisha misya ey’okuhimbisa Yehova. (Zab. 42:5) Kandi akateekateeka n’aha ku Yehova yaabaire naamureeberera. (Zab. 42:8) Okushaba Ruhanga twihire aha mutima nikibaasa kutuhwera kwetegyereza gye enyehurira zaitu, kugaruka kwehurira gye, n’okutunga amaani g’okugumisiriza.
Omuleevi owaahandiikire Zaaburi eya 42 akagambira Yehova buri kimwe ekyabaire kimuri aha mutima. Twagambira Yehova oku turikwehurira, nikituhwera kureeba embeera yaitu omu muringo oguringaniire (Reeba akacweka 16)
17. (a) Nitubaasa kwegyera ki aha kushaba kwa nabi Yona? (Yona 2:1, 2) (b) Ebigambo ebimwe ebiri omuri Zaaburi nibibaasa kutuhwera bita twaba turi omu buremeezi? (Reeba obugambo obw’ahansi.)
17 Shoma Yona 2:1, 2. Nabi Yona akagamba ebigambo ebyo obu yaabaire naashaba ari omunda y’eky’enyanja kihango. N’obu araabe yaabaire agomiire Yehova, akaba aine obwesigye ngu naaza kuhurira okushaba kwe. Obu Yona yaabaire naashaba, akakoresa ebigambo bingi ebyabaire biri omuri Zaaburi.d Naabaasa kuba yaabaire naamanya gye ebyahandiikirwe ebyo. Ku yaabiteekateekireho kikamuhamiza ngu Yehova naija kumuhwera. Naitwe twateeraho kukwata ebyahandiikirwe bimwe omu mutwe, nitubaasa kubiijuka kandi bituhuumurize twashaba Yehova omu bwire bugumire.
GUMIZAMU KWIRIRA HAIHI YEHOVA KURABIRA OMU KUSHABA
18-19. Ni buhame ki oburi omu Abarooma 8:26, 27, oburikubaasa kutuhwera twagumirwa kugambira Yehova oku turikwehurira twaba nitushaba? Ha eky’okureeberaho.
18 Shoma Abarooma 8:26, 27. Obumwe nitubaasa kwerarikirira ekirenga, kitugumire kugamba oku turikwehurira. Kwonka hariho ekirikubaasa kutuhwera. Omu bwire nk’obwo omwoyo ogurikwera ‘nigututonganira’. Mu muringo ki? Yehova akakoresa omwoyo gwe kuhandiikisa okushaba kwingi okw’abaheereza be omu Kigambo kye. N’ahabw’ekyo twaba tutarikubaasa kugamba oku turikwehurira, Yehova naabaasa kureeba okushaba kw’abaheereza be aba ira nk’okwaitu reero atuhe ebiturikwetenga omu bwire obwo.
19 Ekyo nikyo kyahweraire munyaanyazi-itwe orikwetwa Yelena kuruga omuri Russia. Akateebwa omu kihome ahabw’okushaba n’okushoma Baibuli. Akagira amaganya mingi kyamureetera kugumirwa kushaba. Naagira ati: “Nkaijuka ngu naaba nyine amaganya mingi, kandi ntarikumanya eki ndagambe omu kushaba, Yehova naija kwikiriza okushaba kw’abaheereza be aba ira . . . nk’okwangye. . . . Eki kikampuumuriza omu bwire obwo obwabaire bugumire munonga.”
20. Twaba twine amaganya, nitubaasa kutebeekanisa tuta ebiteekateeko byaitu tutakashabire?
20 Twaba twine amaganya, nikibaasa kutugumira kuta omutima aha bi turikugamba twaba nitushaba. Kubaasa kutebeekanisa gye ebiteekateeko byaitu, nitubaasa kuhurikiza amaraka g’ekitabo kya Zaaburi agakatsirwe. Kandi nitubaasa kuhandiika enyehurira zaitu nk’oku Omugabe Daudi yaakozire. (Zab. 18, 34, 142; n’Ebigambo Ebirikushoborora eshuura ezo.) Kwonka tihariho biragiro aha ku twine kwetebeekanisa tutakashabire. (Zab. 141:2) Noobaasa kukora ekirikukworobera.
21. Ahabw’enki turikubaasa kushaba twihire aha mutima?
21 Nitwehurira gye twamanya ngu Yehova naayetegyereza oku turikwehurira n’obu twakuba tutakamugambiire. (Zab. 139:4) Kwonka nabwo nikimushemeza twamushaba, ahakuba nitworeka ngu nitumwesiga. N’ahabw’ekyo otatiina kushaba Sho ow’omu iguru Yehova. Koresa ebigambo ebiri omu kushaba kw’abaheereza be ebihandiikirwe omu Baibuli, kandi oshabe orikwiha aha mutima. Mugambire byona ebirikukushemeza n’ebirikukwerarikiriza. Yehova n’Omunywani owaabuzima kandi naija kuguma ari naiwe!
EKYESHONGORO 45 Okuteekateeka kw’Omutima Gwangye
a Teekateeka aha mitwarize ya Yehova erikushemeza omu kitabo Scriptures for Christian Living ahansi y’omutwe “Jehovah.”
b Waaheebwa omugisha gw’okujwekyera abandi omu kushaba omu nteerane, teeraho kukikora omu bugufu.
c Hanna obu yaabaire naashaba, akakoresa ebigambo ebirikushushana n’ebiri omu bitabo bya Musa. Hatariho okubangaanisa, akatwara obwire kuteekateeka aha Byahandiikirwe. (Bir. 4:35; 8:18; 32:4, 39; 1 Sam. 2:2, 6, 7) Bwanyima y’emyaka mingi, Mariamu nyina wa Yesu, akahimbisa Yehova arikukoresa ebigambo ebirikushushana n’ebi Hanna yaakoreise.—Luk. 1:46-55.
d Nk’eky’okureeberaho, gyeragyeranisa Yona 2:3-9 na Zaaburi 69:1; 16:10; 30:3; 142:2, 3; 143:4, 5; 18:6; na 3:8, nk’oku Yona yaabikurataniise.