EKICWEKA EKY’OKWEGA 43
EKYESHONGORO 41 Ninkweshengyereza Hurira Okushaba Kwangye
Ijuka Kushabira Abandi
“ Mushabirane . . . Okushaba kw’ohikiriire kugira amaani maingi omu kukora kwakwo.”—YAK. 5:16.
ENTIMA
Enshonga ahabw’enki kiri kikuru kushabira abandi n’oku turikubaasa kukikora.
1. Nitumanya tuta ngu okushaba kwaitu ni kukuru ahari Yehova?
OKUSHABA n’omugisha gw’omutaano. Teekateeka ahari eki: Yehova ahaire baamaraika obujunaanizibwa obumwe. (Zab. 91:11) Kandi ahaire Omwana we obujunaanizibwa bw’amaani. (Mat. 28:18) Kandi shi aha bikwatiraine n’okuhurira okushaba? Tihaine omuntu ondiijo ou akwatsize obujunaanizibwa obu. Yehova niwe ‘arikuhurira okushaba’ kwaitu.—Zab. 65:2.
2. Paulo akataho ky’okureeberaho ki aha bikwatiraine n’okushabira abandi?
2 N’obu turaabe nitubaasa kushaba Yehova aha kintu kyona ekirikutukwataho, twine kushabira n’abandi. Ekyo nikyo entumwa Paulo yaakozire. Nk’eky’okureeberaho, akahandiikira ekibiina ky’Abaefeso arikugira ati: ‘Tinkarekaga kubaijuka omu kushaba kwangye.’ (Efe. 1:16) Paulo akaba ashabira na buri muntu okwe. Nk’eky’okureeberaho, akagambira Timoseo ati: “Nsiima Ruhanga, . . . ku mba ninkwijuka obutoosha omu kushaba kwangye nyomushana na nyekiro.” (2 Tim. 1:3) Paulo nawe akaba aine ebyabaire nibimwerarikiriza. (2 Kor. 11:23; 12:7, 8) Kwonka nabwo akaba atwara obwire ashabira n’abandi.
3. Ahabw’enki obumwe nitwebwa kushabira abandi?
3 Obumwe nitubaasa kwebwa kushabira abandi. Ahabw’enki? Munyaanyazi-itwe omwe orikwetwa Sabrinaa akagamba enshonga emwe arikugira ati: “Twine bingi by’okukora buri izooba omu ntebeekanisa y’obusingye obu. Oburemeezi bwaitu nibubaasa kutuhuzya reero tushabe aha biturikwetenga byonka.” Mbwenu shi naiwe haine obu ekyo kirikukubaho? Ku kiraabe nikwo kiri, ekicweka eki nikiza kukuhwera (1) kumanya ahabw’enki ni kikuru kushabira abandi, (2) oku orikubaasa kukikora.
AHABW’ENKI TWINE KUSHABIRA ABANDI?
4-5. Okushabira abandi nikubaasa kugira kuta “amaani maingi omu kukora kwakwo”? (Yakobo 5:16)
4 Okushabira abandi kwine “amaani maingi omu kukora kwakwo.” (Shoma Yakobo 5:16.) Okushabira abandi shi nikubaasa kubahwera? Eego. Yesu ku yaamanyire ngu Petero akaba ari haihi kumwehakana akagira ati: “Nkakushabira, ngu okwikiriza kwawe kutahwaho.” (Luk. 22:32) Kandi Paulo akaba naamanya ngu okushaba nikubaasa kugira eki kwakora aha mbeera y’omuntu. Obu baamukomera omuri Rooma ataine rubanja, akahandiikira Filemooni ati: “Nyine amatsiko ngu nimwija kundeeba ahabw’okushaba kwanyu.” (Film. 22) N’ekyarugiremu, Paulo akarekurwa kandi yaagaruka omu murimo gw’okubuurira.
5 Kwonka ekyo tikirikumanyisa ngu Yehova naaza kugarukamu buri kushaba kwona. Naayetegyereza oku abaheereza be barikufayo aha bandi, kandi obumwe naagira eki yaakora haagira eki baamushaba. Okumanya ekyo nikibaasa kutuhwera kushaba Yehova aha nshonga reero tukagireka omu mikono ye.—Zab. 37:5; 2 Kor. 1:11.
6. Okushabira abandi nikibaasa kutuhwera kubagiraho nyehurira ki? (1 Petero 3:8)
6 Okushabira abandi nikituhwera kubagirira “embabazi.” (Shoma 1 Petero 3:8.) Embabazi nikimanyisa okumanya embeera ei omuntu arikurabamu kandi okagira eki waakora kumuhwera. (Mak. 1:40, 41) Omureeberezi orikwetwa Michael naagira ati: “Naashabira abandi kutunga ebi barikwetenga, nikimpwera kwetegyereza ebi barikurabamu, kandi nyongyera kubakunda. Ninyehurira ndi haihi nabo n’obu baakuba batarikukimanya.” Omureeberezi orikwetwa Richard naagamba aha mugasho ogundi arikugira ati: “Twashabira omuntu, nitugira ekihika ky’okugira eki twakora kumuhwera.” Naayongyeraho ati: “Twakora tutyo, nituba twagarukamu okushaba kwaitu.”
7. Okushabira abandi nikituhwera kita kutata omutima aha buremeezi bwaitu? (Abafilipi 2:3, 4) (Reeba n’ebishushani.)
7 Okushabira abandi nikituhwera kutata omutima aha buremeezi bwaitu. (Shoma Abafilipi 2:3, 4.) Buri omwe ahariitwe aine oburemeezi obu arikurabamu ahabw’okugira ngu turi omu nsi erikutegyekwa Omuregi. (1 Yoh. 5:19; Kush. 12:12) Kwonka twaguma nitushabira abandi, nitwijuka ngu ‘ab’eishe-emwe abari omu nsi yoona nabo nibahikwaho obusaasi [nk’obwaitu].’ (1 Pet. 5:9) Payoniya orikwetwa Katherine naagira ati: “Okushabira abandi nikinyijutsya ngu nabo nibaraba omu mbeera zigumire. Ekyo nikimpwera kwetantara kuta munonga omutima aha buremeezi bwangye.”
Okushabira abandi nikituhwera kutata omutima aha buremeezi bwaitu (Reeba akacweka 7)d
NIBEETENGA NGU TUBASHABIRE
8. Ni baahi abu turikubaasa kushabira?
8 Ni baahi abu turikubaasa kushabira? Nitubaasa kushabira abaine amagara mabi, abato abarikutwarizibwa kubi n’okugyemeserezibwa aha ishomero, nari abarikuteganisibwa emyaka ya bukuru. Baingi aha b’eishe-emwe bagyenzi baitu nibagumisiriza okuhakanisibwa ab’omu maka gaabo n’ab’eby’obushoboorozi. (Mat. 10:18, 36; Byak. 12:5) Abamwe batsigireho amaka gaabo ahabw’obutabanguko oburikureetwaho eby’obutegyeki. Abandi bahikirweho ebihikiirizi. Nitubaasa kutamanya amaziina g’ab’eishe-emwe na banyaanyazi-itwe abo. Kwonka twabashabira, nitworeka ngu nitworobera ekiragiro kya Yesu ekirikugira kiti: “Mukundane.”—Yoh. 13:34.
9. Ahabw’enki twine kushabira abarikureeberera ekibiina kya Yehova n’abakazi baabo?
9 Nitubaasa kushabira abarikureeberera ekibiina kya Yehova. Abo nibatwarirwamu Akakiiko Akareeberezi n’abahwezi baabo, Obukiiko bw’Amataagi, abarikureeberera ebitongore aha Beseeli, abareeberezi ba saketi, abareeberezi omu kibiina n’abaheereza. Baingi aha b’eishe-emwe abo baine ebirikubeerarikiriza baaba nibateeraho kuhikiiriza obuheereza bwabo ahabwaitu. (2 Kor. 12:15) Nk’eky’okureeberaho, omureeberezi wa saketi orikwetwa Mark naagira ati: “Kimwe aha birikukirayo kunyerarikiriza n’okuba hare n’abazaire bangye abari omu myaka ya bukuru. Bombi baine amagara mabi. N’obu munyaanyazi na iba baraabe nibabareeberera, nikinshaasha kureeba ngu tindikubaasa kukora bingi kubahwera.” Yaaba nitumanya oburemeezi obu ab’eishe-emwe abo abarikukora n’amaani barikurabamu nari tutarikubumanya, ni kikuru kubashabira. (1 Tes. 5:12, 13) Kandi nitubaasa n’okushabira abakazi baabo ahabw’okuba obushagiki bwabo nibuhwera baibabo kugumizamu omu buheereza bwabo.
10-11. Mbwenu shi okushabira ab’eishe-emwe na banyaanyazi-itwe boona nka guruupu nikishemeza Yehova? Shoboorora.
10 Nk’oku twaheza kureeba, nitukira kushabira ab’eishe-emwe na banyaanyazi-itwe baingi nka guruupu. Nk’eky’okureeberaho, n’obu twakuba tutaine omuntu ou turikuteekateekaho omu kaire ako, nitubaasa kushaba Yehova kuhwera ab’eishe-emwe abari omu bihome n’okuhuumuriza abafeereirwe abakundwa baabo. Omureeberezi orikwetwa Donald naagira ati: “Twine ab’eishe-emwe na banyaanyazi-itwe baingi abarikuraba omu mbeera zigumire n’ahabw’ekyo obumwe nitubashabira boona okutwarira hamwe.”
11 Mbwenu shi okushaba nk’okwo nikushemeza Yehova? Eego buzima! Ahakuba titurikumanya ebyetengo bya buri w’eishe-emwe weena. N’ahabw’ekyo tikiine nshonga kushabira ab’eishe-emwe na banyaanyazi-itwe nka guruupu. (Yoh. 17:20; Efe. 6:18) Okushaba omu muringo ogwo nikyoreka ngu ‘nitukunda ab’eishe-emwe’ boona omu nsi yoona.—1 Pet. 2:17.
TWABA NITUSHABIRA BURI MUNTU OKWE
12. Okwetegyereza embeera y’omuntu nikibaasa kutuhwera kita kumanya ebi turikubaasa kugamba omu kushaba?
12 Teeraho kwetegyereza embeera y’omuntu. Oyihireho okushabira ab’eishe-emwe na banyaanyazi-itwe nka guruupu, ni kirungi kushabira buri muntu okwe turikugamba n’amaziina gaabo. Nk’eky’okureeberaho, haine oine endwara etarikurahuka kukira omu kibiina kyanyu? Harimu omuto orikwehurira kubi ahabw’okugyemeserezibwa ah’eishomero? Harimu omuzaire ori wenka oriyo naagumirwa kworora omwana “[omu kuhana kwa Yehova n’omu kwehanangiriza kwe]”? (Efe. 6:4) Ku orikwetegyereza embeera y’abandi, noija kwongyera kumanya oku barikwehurira, kandi nikiija kukuhiga kubashabira.b—Rom. 12:15.
13. Nitubaasa kushabira tuta ab’eishe-emwe abu tutarikumanya?
13 Shabira abandi orikugamba amaziina gaabo. Ekyo nitubaasa kukikorera ab’eishe-emwe abu tutakabuganahoga. Nk’eky’okureeberaho, teekateeka aha b’eishe-emwe na banyaanyazi-itwe abari omu bihome omuri Crimea, Eritrea, Russia, na Singapore. Waaza aha jw.org, noija kushangaho amaziina g’abo abari omu bihome.c Omureeberezi wa saketi orikwetwa Brian naagira ati: “Nshangire ngu okuhandiika eiziina ry’ow’eishe-emwe ori omu kihome reero nkarigamba omu iraka eririkuhurirwa nikimpwera kumwijuka naaba ninshaba.”
14-15. Nitubaasa kumanya tuta eki turikubaasa kushaba Yehova kukorera abandi?
14 Gira eki waashaba Yehova kukorera abandi. Michael owaaba yaagambirweho naagira ati: “Naaba ninshoma aha jw.org ebirikukwata aha b’eishe-emwe abari omu bihome, niinteeraho kweta omu bigyere byabo. Niimanya ngu nkayerarikiriire ahabw’omukazi wangye, kandi nkaayenzire kuhamya ngu naareebererwa gye. Ekyo nikimpwera kumanya eki ndikubaasa kushaba Yehova kukorera ab’eishe-emwe abari omu bihome, kandi bari omu bushwere.”—Heb. 13:3.
15 Twateekateeka aha mbeera ezi ab’eishe-emwe abari omu bihome barikurabamu buri izooba, nitubaasa kutunga emiringo endiijo ei turikubaasa kushaba Yehova kubahwera. Nk’eky’okureeberaho nitubaasa kushaba ngu abarinzi b’ekihome babatwarize gye, kandi ngu n’ab’obushoboorozi babaase kuha ab’eishe-emwe abo obugabe bw’okuramya. (1 Tim. 2:1, 2) Nitubaasa n’okushaba ngu ebibiina ebi ab’eishe-emwe abo barikurugamu bihamire kimwe ahabw’eky’okureeberaho kyabo eky’obwesigwa, nari ngu abatari mu mazima bareebe emitwarize mirungi y’ab’eishe-emwe abo kibareetere kuhurikiza obutumwa bwaitu. (1 Pet. 2:12) Kandi nitubaasa kukora nikyo kimwe twaba nitushabira ab’eishe-emwe na banyaanyazi-itwe abarikugumisiriza oburemeezi butari bumwe. Twayetegyereza embeera y’abandi, tukabashabira turikugamba amaziina gaabo, kandi tukashaba Yehova kugira eki yaabakorera, nitworeka ngu buzima nitukundana munonga.—1 Tes. 3:12.
OKUGIRA EMITEEKATEEKYERE ERINGANIIRE AHA KUSHABA KWAITU
16. Nitubaasa kugira tuta emiteekateekyere eringaniire aha kushaba kwaitu? (Matayo 6:8)
16 Nk’oku twareeba, okushaba kwaitu nikubaasa kugira eki kwakora kuhindura embeera y’omuntu. Kwonka nabwo, twine kugira emiteekateekyere eringaniire. Twaba nitushaba, nituba tutarikugambira Yehova ekintu eki atarikumanya nari kumuhabura eki aine kukora, nari oku aine kukwatamu enshonga. Yehova naaba naamanya ebi abaheereza be barikwetenga batakamushabire nangwa n’obu barikuba batakakimanyire ngu nibabyetenga. (Shoma Matayo 6:8.) Mbwenu shi ahabw’enki nitubashabira? Oyihireho enshonga ezaagambwaho omu kicweka eki, rukundo niyo erikutuhiga kushabira abandi. Kandi Yehova naashemererwa kureeba abaheereza be nibooreka rukundo nk’ei aine.
17-18. Ni ky’okureeberaho ki ekirikubaasa kushoboorora ahabw’enki nitushabira abandi?
17 N’obu okushaba kwaitu kwakuba kutagizire eki kwahinduraho, Yehova naareeba rukundo ei twiniire ab’eishe-emwe na banyaanyazi-itwe. Nk’eky’okureeberaho, teekateeka aha ka erimu abaana bato, omwojo n’omwishiki. Omwojo arwaire kandi ari omu kitanda. Reero omwishiki ayeshengyereza ishe ati: “Nyabura ‘we gira eki waakora ohwere munyaanyazi ahakuba naashaasha munonga!” Kwonka ndi ishe haine eki ariyo naakora kureeberera omutabani ahabw’okugira ngu naamukunda. Kwonka nikimushemeza munonga kureeba omuhara arikufayo munonga ahari munyaanya, kandi arikumweshengyereza ngu amuhwere.
18 Nikyo kimwe naitwe, Yehova naatuhiga kufayo aha bandi, kandi naayenda ngu tubashabire. Twakora ekyo, nitworeka ngu titurikwefaho twenka kureka ngu nitukundira kimwe ab’eishe-emwe na banyaanyazi-itwe, kandi ekyo Yehova naakireeba. (2 Tes. 1:3; Heb. 6:10) Kandi nk’oku twareeba, omu mbeera ezimwe okushaba kwaitu nikubaasa kugira eki kwakoraho kuhindura embeera. N’ahabw’ekyo ka tuteereho nk’oku turikubaasa kwijuka kushabira abandi.
EKYESHONGORO 101 Okuheereza Hamwe Tukwataniise
a Amaziina agamwe omu kicweka eki gahindwirwe.
b Reeba vidiyo Takeshi Shimizu: Yehova ‘Naahurira Okushaba’, aha jw.org.
c Kubaasa kutunga amaziina g’ab’eishe-mwe abari omu bihome, za aha jw.org, osherure “Jehovah’s Witnesses Imprisoned for Their Faith—By Location.”
d ENSHOBOORORA Y’EKISHUSHANI: Ab’eishe-emwe na banyaanyazi-itwe abaine oburemeezi nabo nibashabira abandi.