Abantu Obukaikuru 6 Baitsirwe COVID—Baibuli Neegamba Ki?

Kurugiirira aha Kitongore ky’Eby’amagara omu Nsi Yoona, kuza kuhika Okwakataano 23, 2022, abantu obukaikuru mukaaga n’emitwaro abiri na mushanju baaherize kwitwa COVID-19. Kwonka, amakuru agaashohoziibwe Okwakataano 5, 2022, ekitongore eki kikagira ngu abaafiire nibabaasa kuba bari baingi n’okukiraho. Kikagira ngu omu 2020 na 2021, “omuhendo gw’abantu abaitsirwe COVID-19, nari abaafiire ahabw’ekigwererezi eki . . . bakahika obukaikuru ikumi na buna n’emitwaro mwenda.” Mbwenu shi haine eki Baibuli erikugamba aha bigwererezi by’akabi nk’ebi?

Baibuli ekagamba kare ngu nihaija kubaho ebigwererezi by’akabi

•  Yesu akagira ngu hakaba nihaija kubaho ebigwererezi nari muyego z’amaani omu bwire oburikwetwa ‘ebiro by’emperu.’—Luka 21:11; 2 Timoseo 3:1.

Obunabi bwa Yesu buriyo nibuhikiirira hati. Kumanya ebirikukiraho, shoma ekicweka “Akamanyiso ‘k’Ebiro by’Emperu’ Nari ‘Obwire bw’Emperu’ ni Kaahi?“

Baibuli erimu ebirikuhuumuriza

•  ‘Ruhanga ow’okuhuumuriza kwona, naatuhuumuriza omu busaasi bwaitu bwona.’—2 Abakorinso 1:3, 4.

Baingi abafeereirwe abakundwa baabo babaasize kuhuumurizibwa obutumwa bwa Baibuli. Yega ebirikukiraho omu kicweka “Eki Orikubaasa Kukora Hati—Kwemera Amaganya“ na “Obuhwezi Burungi obw’Abarikuganya.“

Baibuli neeyoreka ekiraagoonjore oburemeezi obu eky’obutwire

•  “Obukama bwawe bwije, ebi okunda bikorwe omu nsi nk’oku bikorwa omu iguru.”—Matayo 6:10.

Juba “Obukama bwa Ruhanga” nibwija kuhamya ngu ‘tihaine mutuuzi owaagira ati: Ndwaire.’ (Mako 1:14, 15; Isaaya 33:24) Reeba vidiyo Obukama bwa Ruhanga Niki? kubaasa kumanya ebirikukwata ahari gavumenti egi ey’omu iguru n’eki eraakore.

Nituhiga kwega eki Baibuli erikugamba kugira ngu iwe n’eka yaawe mugasirwe omu buhabuzi bwayo, n’ebiraganiso byayo ebirikushemeza.