Obutagatsi Obutakabahoga omu Byafaayo omu Nsi Yoona—Baibuli Neegamba Ki?

Nikigambwa ngu omu Kamushanju 2022, habaireho obutagatsi obutakabahoga omu byafaayo:

• “China niyo ekizireyo kugira obutagatsi bw’amaani omu ndembo nka 70 omu kyanda kya kabiri okwezi oku.”— Okwamushanju 25, 2022, aha buheereza bwa CNN.

• “Emiriro y’ebibira ekanyire omuri  Europe yoona ahabw’obutagatsi kweyongyera.”— Okwamushanju 17, 2022, Orupapura rw’amakuru The Guardian.

• “Endembo omuri United States yoona zitungire obutagatsi bwingi aha Sande ahabw’ekyanda kujanjaara omu bicweka by’Oburugwa Izooba, Obuzi-bwa-buryo, n’Oburengyerwa Izooba.”—Okwamushanju 24, 2022, Orupapura rw’amakuru The New York Times.

Ebi byona nibimanyisa ki? Mbwenu shi ensi neija kuba etakibaasa kutuurwa? Baibuli neegamba ki?

Obutagatsi bw’amaani shi nibuhikiiriza obunabi bwa Baibuli?

Eego. Obutagatsi omu nsi yoona nibuhikaana n’ebyagambirweho ngu bikaba nibiija kubaho omu bwire bwaitu. Nk’eky’okureeberaho, Yesu akagira ngu tukaba nitwija kureeba “ebirikutiinisa” nari “ebintu bitarikwetegyerezibwa kandi ebirikutiinisa.” (Luka 21:11; Good News Translation) Oweyongyera kw’obutagatsi omu nsi yoona kureeteire baingi kutiina ngu abantu nibaija kusiisira kimwe ensi.

Mbwenu shi ensi neija kusiisikara y’okutatuurwamu?

Ngaaha. Ruhanga akahanga ensi kuba eka y’abantu ey’obutwire. (Zaaburi 115:16; Omubuurizi 1:4) Ruhanga omu mwanya gw’okwikiriza abantu kugicwekyereza, naija ’kucwekyereza abarikugishiisha,’ nk’oku yaaraganiise.—Okushuuruurwa 11:18.

Yetegyereze obunabi bubiri oburikworeka ebindi ebi Ruhanga araganiise:

• ’Eihamba n’ensi eyomire nibiija kushemererwa, eihamba ry’omusheenyi niriija kushemererwa rirabye ebirabyo.’ (Isaaya 35:1) Ruhanga tarikwija kureka ensi ekaba eihamba eritarikubaasa kutuurwamu, kureka naija kugarura busya ebicweka byayo ebisiisirwe.

• Nooreeberera ensi, “kandi ogigwisiza enjura, ngu ogihindure erikweza munonga.” (Zaaburi 65:9) Ahabw’emigisha ya Ruhanga ensi neija kuba Paradiso.

Kubaasa kumanya oku empinduka y’obwire erikuhikiiriza obunabi bwa Baibuli, shoma ekicweka, “Empiduka y’Obwire na Nyentsya Yaitu—Baibuli Neegamba Ki”

Kubaasa kumanya ebirikukiraho aha kiraganiso kya Baibuli eky’ensi egarwirwe busya, reeba ekicweka, “N’oha Orikwija Kucungura Ensi?”