Ensi Eriyo Neeshiishwa—Baibuli Neegamba Ki?

“Tworekyeire akabi k’amaani ak’embeera y’obwire. Endembo nyingi niziija kumirwa amaizi. Nihaija kuguma nihabaho ekyanda ky’amaani. Nihaija kuguma nihabaho eihunga ririkutiinisa. Nihaija kubaho eibura ry’amaizi omu myanya mingi. Nihaija kubaho eicweka ry’ebimera n’enyamaishwa nyamwingi. Eki ti kirooto nari okurengyesereza. Saayansi neegira ngu ebi nibiija kubaho ahabw’enkoresa mbi y’obuhangwa bw’ensi.”—Bikagambwa António Guterres, omuhandiiki omukuru ow’Ekibiina ky’Amahanga Ageeteeraine, kurugiirira aha ripoota y’orukiiko rw’empinduka y’obwire eyaashohoziibwe Okwakana 4, 2022.

“Abanyasaayansi nibarabura ngu omu myaka mikye amarindiro g’enyamaishwa nka 423 [omuri United States], nigaija kucwekyerezibwa empinduka y’obwire, ahabw’okugira ngu amarindiro aga nigateganisibwa empinduka y’obwire. Ebigwererezi ebirikubaasa kwija kubaho biri nk’ebirikugambwaho omu Baibuli: Omurimo n’Omwegyemure, okuyaga kw’orubaare, okwijura kw’enyanja n’omushana mwingi.”—“Omwegyemure gw’amaani Omuri Yellowstone, n’Akamanyiso k’Ebihikiirizi Ebiri Haihi Kubaho,” orupapura rw’amakuru New York Times, Okwamukaaga 15, 2022.

Oburemeezi bw’obuhangwa bw’ensi nibubaasa kugonjoorwa? Ku kiraabe nikwo kiri, n’oha oraabugonjoore? Yetegyereze eki Baibuli erikugamba.

Baibuli ekagamba kare aha kabi akariyo nikahika aha nsi

Baibuli neegira ngu Ruhanga naija ‘kucwekyereza abarikushiisha ensi.’ (Okushuuruurwa 11:18) Ekyahandiikirwe eki nikitwegyesa ebintu bishatu:

1. 1. Ebikorwa by’abantu nibiija kushiisha munonga ensi.

2. 2. Okushiisha ensi nikwija kuhendera.

3. 3. Ruhanga niwe araagonjoore oburemeezi bw’obuhangwa bw’ensi, beitu batari bantu.

Ensi yaitu eine nyentsya nungi

Baibuli neegira ngu ‘ensi yo neegumaho obutwire bwona.’ (Omubuurizi 1:4) Neija kuguma neetuurwamu abantu.

• ‘Abahikiriire nibaija kuhungura ensi, bagituuremu ebiro byona.’—Zaaburi 37:29.

Ensi yaitu neija kugarurwa busya omu buteeka bwayo.

• ‘Eihamba n’ensi eyomire nibiija kushemererwa, eihamba ry’omusheenyi niriija kushemererwa, rirabye ebirabyo nk’esheko y’ensi.’—Isaaya 35:1.