Emyegyemure Erikucwekyereza—Baibuli Neegamba Ki?

Omu nsi yoona, abantu baingi nibateganisibwa emyegyemure erikucwekyereza. Yetegyereze ripoota ezi:

• “Ebiro bikye enyima, orurembo rukuru rwa China rutungire enjura nyingi ekizireyo kuba ey’amaani omu myaka 140. Aha gati y’Orwamukaaga n’Orwakashatu hakagwa enjura milimita . . . 744.8 nari inkyi 29.3.”—Amakuru ga AP, Okwamunaana 2, 2023.

• “Eihunga Khanun rireetsire enjura nyingi n’omuyaga gw’amaani omuri Japan aha izooba rya kabiri Orwakana, riita abantu nka babiri. . . . Kandi eihunga eri niriteeberezibwa kureeta enjura erikwingana mita 0.6 nari fuuti 2 omu nshozi za Taiwan.”—Deutsche Welle, Okwamunaana 3, 2023.

• “Omwegyemure ogubaireho omu wiikenda [omuri Nova Scotia] gureetsirwe enjura ekizireyo kuba ey’amaani kugwa omu kyanga kya Atlantic Canada, omu myaka 50.”—Amakuru ga BBC, Okwamushanju 24, 2023.

Baibuli neegamba ki aha bintu nk’ebi?

Akamanyiso ‘k’ebiro by’emperu’

Baibuli neeyoreka ngu turi omu bwire oburikwetwa ‘ebiro by’emperu.’ (2 Timoseo 3:1) Yesu akagira ngu omu bwire obu, tukaba nitwija kureeba “ebirikutiinisa,” nari ebirikuteera obwoba. (Luka 21:11) Empinduka y’obwire ereetsireho embeera y’obwire erikutiinisa kandi etarikwetegyerezibwa, okubaho kw’ebihikiirizi hakye-hakye, kandi eby’akabi munonga.

Enshonga y’okugira amatsiko

Baibuli neetugira ngu ebintu bingi ebirikutiinisa ebirikubaho hati, nibiha enshonga y’okugira amatsiko. Ahabw’enki? Yesu akagira ati: “Ku murireeba ebyo nibibaho, mumanye ngu Obukama bwa Ruhanga buri haihi.”—Luka 21:31; Matayo 24:3.

Ebi turikureeba nibibaho nibyoreka ngu Obukama bwa Ruhanga juba nibwija kutegyeka amaani g’obuhangwa, otwariiremu omwetoorooro gw’amaizi.—Yobu 36:27, 28; Zaaburi 107:29.

Kumanya oku Obukama bwa Ruhanga buraagarure ensi omu buteeka bwayo, reeba ekicweka, “N’oha Oraacungure Ensi?”