N’oha Oraacungure Ensi?

Abantu baingi nibeerarikirira aha ku abantu basiisire ensi n’ebiine amagara ebigiriho. Kurugiirira aha bahangu b’obuhangwa bw’ensi, ebikorwa by’abantu nibireetaho akabi k’okumaraho ebihangirwe ebimwe n’okushiisha ebindi nyamwingi okukira ira.

Mbwenu shi abantu nibaija kucwekyereza ensi? Nari nibaija kubaasa kutuura omu nsi omu muringo ogutarikushiisha obuhangwa bwayo?

Abantu shi nibo baraacungure ensi?

Abahangu baingi baine obuhame ngu abantu nibabaasa kurinda ensi, kandi bagituuremu omu muringo ogutarikushiisha obuhangwa bwayo. Abacondooza abamwe nibagira ngu abantu kubaasa kuba abasinguzi, omu bicweka bingi eby’ensi haine kukorwayo empinduka, kandi omu bwire nibwo bumwe. Empinduka nizitwariramu ezi:

• Okuhindura oku eitaka, ebibira, ebisharara, n’enyanja birikureebererwa.

• Okukoresa emiringo misya y’okuhinga n’okuriisa, n’eby’okuhemba eby’omutaano.

• Okuhindura emiriire, na munonga okurya ebihingwa reero tukatuubya aha nyama n’eby’enyanja ebi turikurya kugira ngu eby’okurya bitashiishagurwa.

• Okwikiriza ngu amagara marungi tigarikurugiirira aha kugira ebintu bingi.

Iwe nooteekateeka ki? Noogira ngu n’eky’obwengye kuteekateeka ngu gavumenti, ab’eby’obushuubuzi, n’abantu buntu nibaija kwikirizana n’emiringo egyo ei batwire batarikumanya? Nari nooteekateeka ngu omururu, okweyendeza, n’okutaranzya hare nibiija kuremesa abantu?—2 Timoseo 3:1-5.

Ekirikutuha amatsiko

Baibuli neetuhamiza ngu nyentsya y’ensi yaitu ni nungi. Neeshoboorora ahabw’enki okuteeraho kw’abantu kutarikumara kucungura ensi, kandi neeshoboorora n’empinduka yenyini eine kukorwa. Kandi neeyoreka n’oku empinduka egi eraabeho.

Enshonga ahabw’enki okuteeraho kw’abantu kwonka kutarikwija kucungura ensi. Yehovaa Ruhanga akahanga ensi, kandi yaaha abantu obujunaanizibwa bw’okugireeberera. (Okutandika 1:28; 2:15) Bakaba nibabaasa kuba abasinguzi omu kugireeberera baaguma nibagyendera aha ndagiriro z’Omuhangi waabo, kandi bakoorobera n’obuhabuzi bwe. (Enfumu 20:24) Kwonka, bakanga Yehova, baacwamu kwetegyeka. (Omubuurizi 7:29) Abantu ahabwabo tibaine okubaasa kw’okureeberera ensi, n’ahabw’ekyo okuteeraho kwabo kwona tikurikubaasa kusingura gye.—Enfumu 21:30; Yeremia 10:23.

Empinduka eine kukorwa. Ruhanga aine ekigyendererwa ky’okuzibira abantu kushiisha ensi. (Okushuuruurwa 11:18) Tarikwija kuhindura gavumenti n’abantu abarikushiisha ensi, kureka omu mwanya gwabo naija kutamu abandi. (Okushuuruurwa 21:1) Ahabw’enshonga egi, Yehova naagira ati: “Reeba nimpindura byona bisya.”—Okushuuruurwa 21:5.

Oku empinduka egi eraabeho. Yehova naija kwihaho gavumenti z’abantu omu mwanya gwazo atemu Obukama bwe. Gavumenti egi neija kuba neeyebemberwa Yesu Kristo, kandi niwe araabe naareeberera enshonga z’ensi.—Danieli 2:44; Matayo 6:10.

Obukama bwa Ruhanga nibwija kwegyesa abantu kugyendera aha mitindo ya Ruhanga ehikiriire. Abantu baamanya Omuhangi waabo kandi bakagyendera aha buhabuzi bwe, nibaija kukoresa ebintu ebi yaahangire omu muringo oguhikire. (Isaaya 11:9) Baibuli neeshoboorora oku gavumenti ya Ruhanga eraabaasise abantu baayo kugira amagara agarikukirayo oburungi, agaraabe gatarikushiisha ensi. Gavumenti egi neija kukora ebi:

• Kuhwera boona kutunga eby’okurya.—Zaaburi 72:16.

• Kugaruraho obuhangwa bw’ensi.—Isaaya 35:1, 2, 6, 7.

• Kureetaho omukago oguhikire ogw’abantu n’enyamaishwa.—Isaaya 11:6-8; Hosea 2:18.

• Kuzibira ebihikiirizi kubaho.—Mako 4:37-41.

Noobaasa kugira obuhame ngu Obukama bwa Ruhanga buri haihi kureetaho empinduka ezi. Okumanya ebirikukiraho, shoma ekicweka “Obukama bwa Ruhanga Nibwija Kutegyeka Ryari Ensi?”