Nikyetengyesa Kuza omu Diini Etebeekanisiibwe?

Eki Baibuli erikugarukamu

Eego, ahakuba Ruhanga naayenda ngu abantu babe hamwe omu kuramya. Baibuli neegira eti: ‘Ka tuteekateekye oku turaayezirikanise, okukundana n’okukora ebirungi, tutarikureka kuteeranira hamwe.’​—Abaheburaayo 10:24, 25.

Yesu akooreka ngu abakuratsi be bakaba nibaija kuba batebeekanisiibwe nka guruupu emwe obu yaabagira ati: ‘Ku muraagume nimukundana, nibwo abantu boona barikwija kumanya ku muri abeegi bangye.’ (Yohaana 13:35) Omuringo gumwe omukuru ogu abeegi ba Yesu baabaire nibaija kworeka rukundo egi, n’okushashaanuka n’ab’eishe-emwe bagyenzi baabo. Bakaba nibaija kugira ebibiina kuguma nibateeranira hamwe kuramya. (1 Abakorinso 16:19) Ebibiina ebyo byona hamwe bikaba nibiija kuba eishe-emwe omu nsi yoona.​—1 Petero 2:17.

Twine kukora ekirikukira aha kuba omu diini

N’obu Baibuli eraabe neeyoreka ngu abantu baine kwegaita hamwe kuramya Ruhanga, terikwegyesa ngu okuba omu diini nari okubarwa omu diini nikyo kyonka ekirikwetengyesa. Kubaasa kusiimwa Ruhanga, omuntu aine kugyendera aha bi arikwega. Nk’eky’okureeberaho, Baibuli neegira eti: “Ediini eshemeire etaine kamogo omu maisho ga Ruhanga Isheboona niyo egi: Okutaayaayira efuuzi n’abafaakazi omu busaasi bwabo, n’okwerinda okugira amabara g’ensi.”​—Yakobo 1:27.