Orwakabiri, Seputemba 2
Omwoyo nigurondoreza byona, nangwa [n’ebigumire kwetegyereza] ebya Ruhanga.—1 Kor. 2:10.
Ku oraabe ori omu kibiina kihango, kandi orikuteekateeka ngu torikukira kutooranwa, noobaasa kwohibwa kubirugaho. Kwonka otarekyera aho kuteeraho kugarukamu. Tebeekanisa eby’okugarukamu bingi buri ruteerane. Reero waaba otatoorainwe aha kutandika, noobaasa kutunga omugisha gw’okugarukamu handi hakye. Waaba nootebeekanisa Omunaara gw’Omurinzi ogw’Okwega, teekateeka aha ku buri kacweka karikuhikaana n’omutwe gw’ekicweka ekyo. Waakora otyo, noija kuba oine bingi by’okugarukamu. Ekindi, noobaasa kutebeekanisa kugarukamu aha bucweka oburimu amazima agatoorobi kushoboorora. Ahabw’enki? Ahakuba nihabaasa kuba hariho bakye abarikwimutsya emikono kugaruka. Kandi shi ku waakushanga ngu na bwanyima y’enteerane nyingi nabwo torikutooranwa kugarukamu? Gambira oraayebembere ekicweka ky’okwega, ekibuuzo eki orikwenda kugarukamu. w23.04 21-22 ¶9-10
Orwakashatu, Seputemba 3
Yosefu akakora nk’oku maraika wa Yehova yaamuragiire, yaataatsya omukazi we.—Mat. 1:24.
Yosefu akaba naagyendera aha buhabuzi bwa Yehova, niyo nshonga ahabw’enki yaabaire nyineeka murungi. Yehova akamuha obuhabuzi emirundi eshatu oburikukwata aha ka ye. Buri murundi, akooroba ahonaaho, nangwa n’obu kyabaire kigumire. (Mat. 1:20; 2:13-15, 19-21) Ahabw’okugira ngu Yosefu akoorobera obuhabuzi bwa Ruhanga akarinda Mariamu, yaamureeberera kandi yaamushagika. Ekyo ka kyareeteire Mariamu kwongyera kukunda Yosefu n’okumuha ekitiinisa! Emitwe y’amaka, nimubaasa kutooreza Yosefu murikusherura omu Baibuli obuhabuzi bw’okureeberera amaka gaanyu. Waagyendera aha buhabuzi obu, n’obu kyakuba nikitwariramu okukora empinduka, nikyoreka ngu nookunda omukazi waawe, kandi nikihamya obushwere bwanyu. Munyaanyazi-itwe orikutuura Vanuatu, omazire emyaka erikurenga 20 omu bushwere naagira ati: “Ibanyi ku arikusherura obuhabuzi bwa Yehova kandi akabugyenderaho, ninyongyera kumuha ekitiinisa. Nimpurira nyine oburinzi kandi ninyesiga ebi arikucwamu.” w23.05 21 ¶5
Orwakana, Seputemba 4
Nihaija kubayo omuhanda rugyendwa, gwetwe omuhanda ogurikwera.—Isa. 35:8.
Abayudaaya abaagarukire kuruga Babulooni bakaba nibaija kuba “eihanga eryereziibwe” Ruhanga waaryo. (Bir. 7:6) Kwonka eki tikirikumanyisa ngu kikaba kitarikubeetengyesa kukora empinduka kubaasa kusiimwa Yehova. Abayudaaya baingi abaazariirwe omuri Babulooni, bakaba baatandikire kuteekateeka n’okutwaza nk’Abababulooni. Bwanyima y’emyaka mingi Omukungu Nehemia akatangaara ku yaamanyire ngu abaana abaazaariirwe omuri Israeli bakaba batarikumanya orurimi rw’Abayudaaya. (Bir. 6:6, 7; Neh. 13:23, 24) Mbwenu shi abaana abo bakaba nibaija kwega bata kukunda Yehova kandi bakamuramya, baaba batarikwetegyereza Oruheburaayo orurimi rukuru oru Ekigambo kya Ruhanga kyabaire kihandiikirwemu? (Ezr. 10:3, 44) Abayudaaya abo bakaba baine kukora empinduka z’amaani, kwonka kikaba nikiija kuborobera ahabw’okutuura omuri Israeli, ahu okuramya okushemeire kwabaire nikugarurwaho mporampora.—Neh. 8:8, 9. w23.05 15 ¶6-7