Orwakashatu, Seputemba 3
Yosefu akakora nk’oku maraika wa Yehova yaamuragiire, yaataatsya omukazi we.—Mat. 1:24.
Yosefu akaba naagyendera aha buhabuzi bwa Yehova, niyo nshonga ahabw’enki yaabaire nyineeka murungi. Yehova akamuha obuhabuzi emirundi eshatu oburikukwata aha ka ye. Buri murundi, akooroba ahonaaho, nangwa n’obu kyabaire kigumire. (Mat. 1:20; 2:13-15, 19-21) Ahabw’okugira ngu Yosefu akoorobera obuhabuzi bwa Ruhanga akarinda Mariamu, yaamureeberera kandi yaamushagika. Ekyo ka kyareeteire Mariamu kwongyera kukunda Yosefu n’okumuha ekitiinisa! Emitwe y’amaka, nimubaasa kutooreza Yosefu murikusherura omu Baibuli obuhabuzi bw’okureeberera amaka gaanyu. Waagyendera aha buhabuzi obu, n’obu kyakuba nikitwariramu okukora empinduka, nikyoreka ngu nookunda omukazi waawe, kandi nikihamya obushwere bwanyu. Munyaanyazi-itwe orikutuura Vanuatu, omazire emyaka erikurenga 20 omu bushwere naagira ati: “Ibanyi ku arikusherura obuhabuzi bwa Yehova kandi akabugyenderaho, ninyongyera kumuha ekitiinisa. Nimpurira nyine oburinzi kandi ninyesiga ebi arikucwamu.” w23.05 21 ¶5
Orwakana, Seputemba 4
Nihaija kubayo omuhanda rugyendwa, gwetwe omuhanda ogurikwera.—Isa. 35:8.
Abayudaaya abaagarukire kuruga Babulooni bakaba nibaija kuba “eihanga eryereziibwe” Ruhanga waaryo. (Bir. 7:6) Kwonka eki tikirikumanyisa ngu kikaba kitarikubeetengyesa kukora empinduka kubaasa kusiimwa Yehova. Abayudaaya baingi abaazariirwe omuri Babulooni, bakaba baatandikire kuteekateeka n’okutwaza nk’Abababulooni. Bwanyima y’emyaka mingi Omukungu Nehemia akatangaara ku yaamanyire ngu abaana abaazaariirwe omuri Israeli bakaba batarikumanya orurimi rw’Abayudaaya. (Bir. 6:6, 7; Neh. 13:23, 24) Mbwenu shi abaana abo bakaba nibaija kwega bata kukunda Yehova kandi bakamuramya, baaba batarikwetegyereza Oruheburaayo orurimi rukuru oru Ekigambo kya Ruhanga kyabaire kihandiikirwemu? (Ezr. 10:3, 44) Abayudaaya abo bakaba baine kukora empinduka z’amaani, kwonka kikaba nikiija kuborobera ahabw’okutuura omuri Israeli, ahu okuramya okushemeire kwabaire nikugarurwaho mporampora.—Neh. 8:8, 9. w23.05 15 ¶6-7
Orwakataano, Seputemba 5
Yehova naaramira boona abarikugwa, kandi naimutsya boona abeyinamiriire.—Zab. 145:14.
Kwonka n’obu twakuba twine ekihika nari turikubaasa kwezibira, nihabaasa kugira ebyaturemesa. Nk’eky’okureeberaho, ‘ebihikiirizi’ nibibaasa kutureetera kuburwa obwire bw’okukora aha kigyendererwa kyaitu. (Mub. 9:11) Nitubaasa kuhikwaho oburemeezi butureetere kuhwa amaani. (Enf. 24:10) Obutahikiirira bwaitu nibubaasa kutureetera kutwaza omu muringo ogutarikutuhwera kuhikiiriza ekigyendererwa kyaitu. (Rom. 7:23) Nari nitubaasa kuhurira turuhire. (Mat. 26:43) Niki ekirikubaasa kutuhwera kusingura ebirikuturemesa kuhikiiriza ekigyendererwa kyaitu? Ijuka ngu haagira ekyakuteganisa tikirikumanyisa ngu oremirwe. Baibuli neegira ngu nitubaasa kutunga oburemeezi emirundi mingi. Kwonka neeyoreka gye ngu nitubaasa. Eego, waateeraho kugumizamu na haagira ebyakuteganisa, nooyoreka ngu nooyenda kushemeza Yehova. Ka nikishemeza Yehova kukureeba nooteeraho kuhika aha kigyendererwa kyawe! w23.05 30 ¶14-15